Luku 9 - Dɔnɔn kə̂ Siki: Tar kə̂ aw arə təbbə

Jeju ula njê-kaw-kulaje laa kə̂ dɔku gire joo

¹ Jeju mbɔn njê-kaw-kulaje laa kə̂ dɔku gire joo ngaâ arəde singa ddəm singa kɔn-mbay ddəm karə n̂-tubbaje nɛ̂n ndilje kə̂ maji ang ddəm narəde singa kaji njê-rɔ-toje ddəm.

² Nulade karə dila mbər tar kɔn-mbay lə Lubba darə dəwje ddəm karə daji njê-rɔ-toje ddəm.

³ N̂-pa narəde nan: «Unnje nɛ̂n kâra bba awje nɛ̂n ang. Unnje kakə wase bbɔl wase mapa wase narɛ ang. Awje kə kubbu-kul joo ang.

⁴ Kəy njaa kə̂ andəje tə̂ a, ə-naynje tə̂ nyɔm ta ɔtuje nɛ̂n.

⁵ Bbe kə̂ ə-teeje tə̂, â bbo dəwje taase kə kə̂y ang ngaâ â ta kɔtuje kə kete a, ə-tundaje bum nangə kə̂ gɔlse tə̂ ɔruje nɛ̂n naji ləse ta tɔju to n̂-ddaje majang.»

⁶ Njê-kaw-kulaje lə Jeju le awje ngaâ n̂-njaje kə bbe bbe, n̂-paje Tar kə̂ Maji darəje dəwje ngaâ dajije nje-rɔ-toje tɔ.

Erodə əjə tar dɔ Jeju tə̂

⁷ Erodə kə̂ to nje-kɔn-bbe oo tar nɛ̂nje tɔyn kə̂ aw nja le a, əjə tar, mba marə dəwje paje nan: «Jan kə̂ oy le â ndol.»

⁸ Marɛ̂je paje nan: «Eli â unda lo tee.» A marɛ̂je paje bbay nan: «Marə nje-kila mbər tar lə Lubba kâra horo marɛ̂je tə̂ kə̂ oyje ləw le â ndol.»

⁹ A Erodə pa nan: «Jan le, əman njaa munn ndu marə n̂-gangə dɔɛ̂ mban. A dəw nəənn to nân bba maw moo tarje dang dang dɔɛ̂ tə̂ nəənn wa?» Yeenn bba n̂-sangə ddəw ta koo Jeju le.

Jeju arə nɛ̂n-kusa dəwje doro min

¹⁰ Njê-kaw-kulaje lə Jeju le təlje ngaâ n̂-paje tar nɛ̂nje tɔyn kə̂ n̂-ddaje darɛ̂. Jeju ɔrude kə karəde baa aw kə de ddəw əw, ər kə tɔkə bbe tə̂ kə̂ ria nan Betesayida.

¹¹ A dəwje kə̂ banya le gərəje tarɛ̂ ngaâ ɔruje goe. Jeju taade kə rɔɛ̂ tə̂ ngaâ pa tar kɔn-mbay lə Lubba arəde ddəm aji njê-rɔ-toje kə̂ ndikije karə najide ddəm.

¹² Lo aw ndul ngaâ njê-kaw-kulaje lə Jeju ngəsəje kə rɔɛ̂ tə̂ paje arɛ̂je nan: «Ə-tubba dəwje kə̂ banya nəənn arə daw toje dɔ-ndɔɔ̂ kə ngann bbeje tə̂ kə̂ ngɔsi nəənn ta dinga nɛ̂n-kusa, mba lo kə̂ jar tə̂ nəənn to mə kɔr baa.»

¹³ A Jeju pa arəde nan: «Sese njaa arəjede nɛ̂n dusaje.» Dilaje tə̂ nan: «Mapa min kə kanjije joo baa â to. Ə-ndiki ta karə jeje njaa jaw ndoko nɛ̂n-kusa jarə dəwje kə̂ banya nəənn wa?»

¹⁴ Dingawje eeje lo tə̂ənn ngɔsi kə doro min. Jeju pa arə njê-njaje goe tə̂ nan: «Arəje disije dɔ naan tə̂ dɔmin dɔmin.»

¹⁵ Njê-njaje goe tə̂ le arəje dəwje le isije nangə̂ tokə ndue pa le.

¹⁶ Jeju jin mapa kə̂ min kə kanji kə̂ joo le, naa lo kə darâ ngaâ narə wooyo Lubba. N̂-tətə dannâ ngaâ n̂-kayn njê-njaje goe tə̂ karə kayn dəwje kə̂ banya le.

¹⁷ Dəwje le tɔyn usaje arə məde ndann, a kəsə nɛ̂n-kusa nayn baa, ddusu karɛ dɔku gire joo.

Piyɛr pa nan Jeju to Kristə le

¹⁸ Marə ndɔ, Jeju ɔru rɔɛ̂ aw duju Lubba ngaâ njê-njaje goe tə̂ mbɔnje naan rɔɛ̂ tə̂ a, n̂-dujude nan: «Dəwje aw paje nan m-to nân wa?»

¹⁹ Dilɛ̂je tə̂ nan: «Nan ə-to Jan-Batisi, marɛ̂je paje nan ə-to Eli, marɛ̂je bbay paje nan ə-to marə nje-kila mbər tar lə Lubba kə̂ ləw horo marɛ̂je tə̂ kə̂ oyje â ə-ndol.»

²⁰ Jeju dujude nan: «A sese ə-paje nan m-to nân wa?» Piyɛr ilɛ̂ tə̂ nan: «Ə-to Kristə lə Lubba le.»

²¹ Jeju ndɔru mbide nya karə n̂-pa tar nəənn le darə dəw oo ang.

Jeju pa tar nɛ̂n kəm-to-ndoo kə̂ a ddɛɛ̂

²² Jeju pa bbay nan: «Maji karə Ngonn lə dəw oo ndoo nya, maji karə tɔkəje lə Jiipije kə mbayje lə njê-poloje Lubba kə njê-gərəje-Ndu mbəteje, maji karə n̂-tɔlɛ̂je ngaâ ndɔ mota goe tə̂ a, n̂-ndol.»

²³ N̂-pa narəde tɔyn nan: «Bbo dəw ndiki ta kuwa gom a, maji karə nəjə rɔɛ̂ ang. Maji karə noto kakə-dəsə laa kə ndɔ ndɔ bba ta nuwa gom.

²⁴ Dəw kə̂ ndiki ta ngəm təbbə laa a, təbbə laa le a goto. A dəw kə̂ a koy mba tar ləm, dəw le a kaji təbbə laa.

²⁵ Bbo dəw inga nɛ̂n kə̂ duninya nəənn tɔyn, â bbo təbbə laa nayn kə kɔrɔ̂ wase ne njaa n̂-tuju rɔɛ̂ a, ddi bba nâ kinga goe tə̂ wa?

²⁶ Tɔkɔrɔ, dəw kə̂ dda rɔ-kul ləm kə rɔ-kul tar ləm a, Ngonn lə dəw a dda rɔ-kul laa ndɔ tə̂ kə̂ nâ ddee kə piti laa kə piti lə bɔɛ̂je kə lə anjəje kə̂ maji tɔyn.

²⁷ M-pa marəse, kə̂ tɔkɔrɔ, marə dəwje horo dəwje tə̂ kə̂ arje nəənn a koyje ang ndərəng dâ kooje kɔn-mbay lə Lubba.»

Piyɛr kə Jan kə Jakə dooje Jeju piti tə̂ laa

²⁸ Ndɔ jijoo go tarje tə̂ənn le a, Jeju aw kə Piyɛr kə Jan kə Jakə dɔ ər tə̂ mba duju Lubba.

²⁹ Kar tə̂ kə̂ naw duju Lubba a, kəmɛ̂ turu to dang ngaâ kubbuje laa kara turu nda kayn kayn.

³⁰ Dəwje joo eeje tə̂ənn kə̂ aw paje saa tar: To Mɔyijə de kə Eli.

³¹ Piti lə Lubba to dɔde tə̂ ngaâ daw paje tar koy lə Jeju Jerujalɛm kə̂ a ddee to nɛ̂n kə̂ tɔkɔrɔ.

³² Bbi tɔl Piyɛr kə njê-marɛ̂je le. A n̂-ndolje a, dooje piti lə Jeju ngaâ dooje dingawje joo kə̂ arje mbɔrɛ̂ tə̂ le.

³³ Kar tə̂ kə̂ dəwje kə̂ joo le aw inyaje Jeju ta kɔtu a, Piyɛr pa arə Jeju nan: «Nje-nɛ̂n-tɔju, maji laa boy â jee nəənn. Ja dda ngann kəy-kamje mota: kâra to ləi, kâra to lə Mɔyijə, a kâra to lə Eli.» Piyɛr gərə nɛ̂n kə̂ aw pa le ang.

³⁴ Naw pa tar baann le a, mum ddee kiride ngaâ bbəəl dda njê-njaje go Jeju tə̂ kar tə̂ kə̂ mum le aw dibbi dɔde.

³⁵ Marə ndu bbar mə mum tə̂ le pa nan: «Dəw nəənn to Ngonnəm kə̂ m-mbəre, ooje tɛɛ̂.»

³⁶ Kar tə̂ kə̂ ndu le bbar a, Jeju ar kə karɛ̂ baa ngaa. Njê-njaje goe tə̂ le paje tar ang. Mə ndɔje tə̂ənn, dɔruje gəl nɛ̂nje kə̂ dooje le kâra darə dəw ang.

Jeju tubba ndil kə̂ maji ang rɔ dəw tə̂

³⁷ Lo-karɛ̂ a, Jeju kə njê-njaje goe tə̂ dinje dɔ ər tə̂ le n̂-ddisije. Dəwje tokə banya tilaje kəmɛ̂.

³⁸ Horo dəwje tə̂ənn le marə dəw uru əkii nan: «Nje-nɛ̂n-tɔju, m-wali nya, oo ngonnəm nəənn, n̂-to ngonnəm kə̂ kâra baa.

³⁹ Ndɔ tɔyn njaa bbo ndil uwa ngonn le a, njangə baa njaa nunda əkii. Ndil le yəke kə singa ngaâ njum-tɛɛ̂ tee. Ndil le ula kəmɛ̂ ndoo tə̂ ndərəng bba inyɛ̂.

⁴⁰ M-duju njê-njaje goi tə̂ karə n̂-tubbaje ndil le a, dumanje nɛ̂n pin.»

⁴¹ Jeju ilɛ̂ tə̂ nan: «See dəwje kə̂ mə-kunn ləse goto ddəm njê-nɛ̂n-ddaje kə̂ maji ang ddəm. Mâ nayn kə se be mba kumanse ndərəng ndɔ tə̂ kə̂ dda wa? Ə-ddee kə ngonni le nəənn.»

⁴² Ngonn le aw ddee ngɔsi kə Jeju a, ndil kə̂ maji ang le unnɛ̂ ilɛ̂ nangə̂ ngaâ aw yəke kə singa. A Jeju ndangə ndil kə̂ maji ang le. Naji ngonn le ngaâ n̂-təl saa narə bɔɛ̂je.

⁴³ Dɔ dəwje tɔyn ayn mba tɔkə-mbangə lə Lubba kə̂ dooje le. Nɛ̂nje kə̂ Jeju aw dda le dum dɔ dəwje, a n̂-pa narə njê-njaje goe tə̂ nan:

Jeju təl pa tar koy laa

⁴⁴ «Maji karə ə-tukaje mbise kə majɛ̂ ooje nɛ̂n tar nəənn. Dâ kuwa Ngonn lə dəw kulɛ̂ ji dəwje tə̂.»

⁴⁵ A njê-njaje go Jeju tə̂ le gərəje dɔde tar tə̂ kə̂ naw pa narəde le ang. Tar le iya rɔɛ̂ kə de bba karə n̂-gərəje ang. A n̂-bbəəlje ta təl duje.

Dəw kə̂ bo uta marɛ̂je tɔyn

⁴⁶ Kar tə̂ənn, njê-njaje go Jeju tə̂ aw maynje naan tar ta gərə dəw kə̂ uta marɛ̂je horode tə̂.

⁴⁷ A Jeju gərə kəjə ləde ngaâ nunn marə ngonn kə̂ ngaji be nundɛ̂ mbɔrɛ̂ tə̂

⁴⁸ ngaâ n̂-pa narəde nan: «Dəw kə̂ taa ngonn nəənn kə rɔɛ̂ tə̂ kə rim a, əman njaa n̂-taam kə rɔɛ̂ tə̂ənn. A bbo dəw kə̂ taam kə rɔɛ̂ tə̂ a, taa dəw kə̂ ulam kə rɔɛ̂ tə̂ tɔ. Mba dəw kə̂ to ngaji baa horose tə̂ tɔyn, ne â n̂-to dəw kə̂ bo.»

Dəw kə̂ mbətəse ang to dəw ləse

⁴⁹ A Jan pa nan: «Nje-nɛ̂n-tɔju, joo marə dəw kə̂ unn rii aw tubba nɛ̂n ndilje kə̂ maji ang. N-sangə ddəw ta kɔkɛ̂ ddəwe, mba n̂-nja kə je goi tə̂ ang.»

⁵⁰ A Jeju ilɛ̂ tə̂ nan: «Ɔkɛ̂je ddəw ang, mba dəw kə̂ mbətəse ang, to dəw ləse.»

Dəwje kə̂ marə bbe tə̂ kə̂ Samari mbətəje Jeju

⁵¹ Ndɔ kə̂ Lubba a ta kunn Jeju ta təl saa darâ ddee ngɔsi. Yeenn bba Jeju le ndiki ta kaw to kaw njaa Jerujalɛm.

⁵² Nula dəwje nɔɛ̂n tə̂ kete. Dawje ngaâ dandəje marə ngonn bbe tə̂ lə dəwje kə̂ Samari ta gɔl nɛ̂n ngəbbe nɛ̂n.

⁵³ A njê-bbeje le tɛɛ̂je kə rɔde tə̂ ang, mba naw naw kə Jerujalɛm.

⁵⁴ Jakə kə Jan kə̂ toje to njê-njaje goe tə̂ ooje baann a, paje nan: «Əbbə-dəwje, ə-ndiki karə n-duju jarə puru in darâ ddee ɔn dəwje nəənn wa?»

⁵⁵ Jeju turu rɔɛ̂ kə rɔde tə̂ ngaâ nin kə de nya.

⁵⁶ Dunnje ddəw dawje marə bbe tə̂ kə kete.

Dəw kə̂ ndiki ta kunn go Jeju

⁵⁷ Kar tə̂ kə̂ daw njaje ddəw-boô a, marə dəw pa arə Jeju nan: «Lo tɔyn kə̂ â kaw tə̂, mâ kunn goi.»

⁵⁸ Jeju ilɛ̂ tə̂ nan: «Mulaje, buwa tode to ngaâ əəlje kə̂ darâ kəy tode to, a Ngonn lə dəw, kəy dɔɛ̂ goto.»

⁵⁹ Jeju pa arə marə dəw nan: «Unn gom.» A dəw le ilɛ̂ tə̂ nan: «Əbbə-dəwje arə maw dubbu bɔmje bba.»

⁶⁰ A Jeju ilɛ̂ tə̂ nan: «Inya yoje arə dubbuje yoje ləde. A əi, aw pa tar kɔn-mbay lə Lubba arə dəwje.»

⁶¹ Marə dəw pa arə Jeju bbay nan: «Mâ ta nja goi tə̂ Əbbə-dəwje, a inya arə maw muwa ji njê kə̂ ləm bba.»

⁶² A Jeju ilɛ̂ tə̂ nan: «Dəw kə̂ uwa kɔsu-mangə bba kəl goe, asə Bbe-kɔn lə Lubba ang.»