Luku 7 - Dɔnɔn kə̂ Siki: Tar kə̂ aw arə təbbə

Jeju aji nje-kula lə marə baw-ddɔ lə Rɔmɛnje

¹ Jeju pa tarjeenn tɔyn arə dəwje a, naw tɔkə bbe tə̂ Kapɛrnawum.

² Marə baw-ddɔ lə Rɔmɛnje ee kə nje-kula laa kə̂ n̂-ndike nya. Rɔ nje-kula laa le toe ngaâ nayn ngɔsi ta koy.

³ Baw-ddɔ le oo tam Jeju a, ula marə tɔkəje lə Jiipije arɛ̂ karə n̂-ddee naji nje-kula laa le.

⁴ Dawje rɔ Jeju tə̂ ngaâ n̂-ddaje rɔde to ndoo rɔɛ̂ tə̂ nan: «Dingaw nəənn asə karə ə-dda nɛ̂n kə̂ n̂-duji le arɛ̂,

⁵ mba n̂-ndikije jee Jiipije nya. Ne â n̂-dda kəy mbɔn-naan ləje.»

⁶ Jeju aw kə de ngaâ nayn ngɔsi baa kə kəy lə baw-ddɔ le a, baw-ddɔ le ula njê-buwa-kuraje laa arə Jeju le nan: «Əbbəmje, maji karə ə-tuju singai baann ang, mba masə karə andə kə̂y ləm ang.

⁷ Mba yeenn le tɔ â moo a, masə ta kaw rɔi tə̂ kə da-rɔm ang. A maji karə ə-pa tar kâra njaa a, nje-kula ləm a kaji.

⁸ Mba əman, marə dəw aw ɔn dɔm ngaâ mɔn dɔ marə mbambaje tɔ. Bbo munn ndu marə marɛ̂ m-pa nan: ‹Aw!› A naw. Munn ndu marə marɛ̂, m-pa nan: ‹Ə-ddee!› A n̂-ddee. Munn ndu marə nje-kula ləm, m-pa nan: ‹Ə-dda nɛ̂n kə̂ be!› A n̂-dda.»

⁹ Jeju oo tar le a, tar laa le dum dɔɛ̂ ddəm nəəle ddəm. N̂-turu rɔɛ̂ kə rɔ dəwje tə̂ kə̂ banya kə̂ aw unnje goe le ngaâ n̂-pa nan: «M-pa marəse, nangə tə̂ kə̂ Ijarayɛl njaa kara minga mə-kunn kə̂ be ang.»

¹⁰ Njê kə̂ baw-ddɔ ulade le təlje awje kəy a, daw dingaje nje-kula lə baw-ddɔ le kə rɔ kə̂ maji.

Jeju ndol ngonn basan kə̂ oy

¹¹ Goe tə̂ a, Jeju aw marə bbe tə̂ kə̂ ria nan Nayn. Njê-njaje go Jeju tə̂ kə marə dəwje tokə banya awje saa.

¹² Kar tə̂ kə̂ n̂-tee ngɔsi kə bbe le a, noo dəwje kə̂ awje kə niinn ta dubbu. Dəw kə̂ oy le to ngonn lə marə dɛnɛ̂n-ndubba kə̂ to ngonn-kâra laa kə̂ dingaw. Dəwje kə̂ mə bbe tə̂ le tokə banya aw dannje dɛnɛ̂n le tɔ.

¹³ Əbbə-dəwje le oo dɛnɛ̂n le a, ddɛɛ̂ ndoo ngaâ pa arɛ̂ nan: «Ə-nɔn ang!»

¹⁴ N̂-ngəsə kə kete nɔru tuwa kə̂ dila niinn le tə̂. Dəwje kə̂ otoje niinn le arje lo kâra ngaâ Jeju pa nan: «Basan, m-pa mari, ə-ndol!»

¹⁵ Dəw kə̂ oy le in isi taar ngaâ aw pa tar. Jeju ulɛ̂ ji kɔɛ̂nje tə̂.

¹⁶ Bbəəl uta dɔ dəwje le tɔyn. Dɔsuje gaji Lubba, n̂-paje nan: «Marə tɔkə nje-kila mbər tar lə Lubba tee horoje tə̂, Lubba ddee ta dda maji kə dəwje laa.»

¹⁷ Tar nɛ̂n kə̂ Jeju dda le nja dɔ nangə tə̂ kə̂ Jude tɔyn kə mə bbeje tə̂ tɔyn kə̂ guku dɔ Jude.

Jan-Batisi ula rɔ Jeju tə̂

¹⁸ Njê-njaje go Jan tə̂ aw paje go nɛ̂njeenn tɔyn arɛ̂je. Jan le bbar marə njê-njaje goe tə̂ joo

¹⁹ ngaâ ulade rɔ Əbbə-dəwje tə̂ arə n̂-dujeje nan: «Əi â ə-to dəw kə̂ a ta ddee le wase ta n-nginan marə dəw kə̂ dang wa?»

²⁰ Dəwje le teeje rɔ Jeju tə̂ ngaâ paje arɛ̂je nan: «Jan-Batisi ulaje karə n-duji se əi â ə-to dəw kə̂ jaw nginɛ̂n le wase ta n-nginan marə dəw dang wa?»

²¹ Kar tə̂ənn njaa Jeju aji njê-rɔ-toje kə njê-mətəje ngaâ tubba ndilje kə̂ maji ang rɔ dəwje tə̂ nya nya, narə dəwje kə̂ kəmde tɔ nya nya ooje lo.

²² Goe tə̂ a, n̂-pa narə njê-njaje go Jan tə̂ le nan: «Aw paje nɛ̂n kə̂ ooje kə kəmse ddəm kə mbise ddəm le arəje Jan. Ə-paje nan: ‹Njê-kəm-tɔje ooje lo, njê-gɔl-gotoje njaje, banji lə dəwje goto rɔde tə̂ kə ddang, njê-mbi-kutuje ooje tar, dəwje kə̂ oyje ndolje ngaâ njê-ndooje ooje Tar kə̂ Maji.›

²³ Maji arə dəw kə̂ əman â, mâ to nje-dda karə mə-kunn laa oso ang.»

Jeju pa tar dɔ Jan-Batisi tə̂

²⁴ Njê-njaje go Jan tə̂ le təlje a, Jeju unn kutu pa tar dɔ Jan tə̂ arə dəwje kə̂ banya le nan: «Ddi â awje aw ooje mə kɔr tə̂ le wa? Waa lə habbə kə̂ ləl aw yəkə wa?

²⁵ A ddi njaa â awje aw ooje wa? Aw ooje dəw kə̂ ula kubbu kə̂ kura wa? Njê kə̂ ulaje kubbu kə̂ kura ngaâ toje to njê-nɛ̂n-kingaje isije kəy mbayje tə̂.

²⁶ A ddi njaa â aw ooje le wa? Marə nje-kila mbər tar lə Lubba wa? Tɔkɔrɔ m-pa marəse, nuta nje-kila mbər tar lə Lubba bbay.

²⁷ Mba Jan-Batisi â Makəturu lə Lubba pa tar dɔɛ̂ tə̂ nan: Mula nje-kaw-kula ləm nɔin tə̂ kete karə ila ddəw arə ə-nja tə̂.

²⁸ M-pa marəse: Horo dəwje tə̂ tɔyn kə̂ dɛnɛ̂nje ujujede, dəw kə̂ uta Jan goto. A dəw kə̂ to tɛn uta kəseje mə Bbe-kɔn tə̂ lə Lubba utɛ̂.

²⁹ Dəwje tɔyn kə̂ ooje tar lə Jan le kə njê-taaje narɛ lambo kara gərəje to Lubba ndiki ta kajide ngaâ dawje darə Jan ddade batɛm.

³⁰ A Parijinyɛje kə Njê-gərəje-Ndu mbətəje nɛ̂n kə̂ maji kə̂ Lubba ndiki ta dda mbade le ngaâ n̂-mbətəje karə Jan ddade batɛm.»

³¹ Jeju təl pa arəde nan: «Njê kə̂ dda bba mâ kunnde kɔju nɛ̂n dəwje kə̂ bbokənɛn wa? Dunnje da-rɔ njê kə̂ dda wa?

³² N̂-toje kâra baa kə ngannje kə̂ isije natâ kə̂ bbarje naan ngaâ paje arəje naan nan: N-kɔl mbula jarəse, a ə-laje nɛ̂n ang ddəm jɔsu pa nɔn-rɔ, a ə-nɔnje nɛ̂n rɔse ang ddəm.

³³ Mba Jan-Batisi ddee le, ɔn muru ang ddəm ay bɛn ang ddəm a ə-paje nan: ‹Ndil kə̂ maji ang to məɛ̂ tə̂.›

³⁴ Ngonn lə dəw ddee ngaâ ɔn muru ddəm ay nɛ̂n ddəm, a ə-paje nan: ‹Dəw nəənn to nje-nɛ̂n-kusa, nje-nɛ̂n-kay, nje-buwa-kura lə njê-taaje narɛ lambo ddəm njê-nɛ̂n-ddaje kə̂ maji ang ddəm.›

³⁵ A ngann lə Lubba tɔyn gərəje to kəm-karɛ laa to gatə gatə.»

Jeju aw kə̂y lə Simɔn kə to Parijinyɛ

³⁶ Marə Parijinyɛ bbar Jeju ta karə usa nɛ̂n saa. Jeju andə kə̂y lə Parijinyɛ le ngaâ aw isi ta nɛ̂n-kusa tə̂.

³⁷ A marə dɛnɛ̂n kə̂ to nje-nɛ̂n-dda kə̂ maji ang kə̂ isi mə bbe tə̂ənn, oo nan Jeju ee mə kəy tə̂ lə Parijinyɛ le. N̂-ddee kə ku albatərə kə̂ yambo ddusu.

³⁸ N̂-ddee nar go Jeju tə̂, mbɔr gɔlɛ̂ tə̂ naw nɔn narə maann-kəmɛ̂ nyɔm gɔl Jeju ngaâ n̂-bɔru gɔlɛ̂ le kə biin-dɔɛ̂. Nunda tɛɛ̂ gɔl Jeju tə̂ le ngaâ nungu yambo le gɔlɛ̂je tə̂ le.

³⁹ Parijinyɛ le oo baann a, pa məɛ̂ tə̂ nan: «Bbo dingaw nəənn to nje-kila mbər tar lə Lubba tɔkɔrɔ a, nâ gərə to dɛnɛ̂n kə̂ aw ɔrɛ̂ nəənn to nje-nɛ̂n-dda kə̂ maji ang.»

⁴⁰ Jeju pa arə Parijinyɛ le nan: «Simɔn, tar to ta karə m-pa mari.» Simɔn le ilɛ̂ tə̂ nan: «Nje-nɛ̂n-tɔju, ə-pa tar le.»

⁴¹ Jeju pa nan: «Marə dəw, bbangə laa to dɔ dəwje tə̂ joo. Marɛ̂ kâra tunan kandə narɛ kɔr min, a marɛ̂ kâra tunan kandə narɛ dɔmin.

⁴² Dingaje ddəw ta kuka bbangə le ang ngaâ nje-narɛ le inya narɛ laa le arəde. Horo dəwje tə̂ kə̂ joo le, ne kə̂ dda bba nâ ndiki dəw kə̂ dda maji kə de le nya wa?»

⁴³ Simɔn le ila Jeju tə̂ nan: «Məjə a, to ne kə̂ bbangə laa bo nya.» Jeju pa arɛ̂ nan: «Tar ləi le to kə dɔgɔlɛ̂.»

⁴⁴ N̂-turu rɔɛ̂ kə rɔ dɛnɛ̂n tə̂ le ngaâ n̂-pa narə Simɔn nan: «Oo dɛnɛ̂n nəənn, m-ddee kə̂y ləi, a arəm maann toko gɔləm ang, a ne â n̂-toko gɔləm kə maann-kəmɛ̂ ngaâ n̂-bɔru gɔləm kə biin-dɔɛ̂.

⁴⁵ Əi, ə-to mbim ang, a ne, kandə kə̂ mandə kəy be njaa, nunda tɛɛ̂ gɔləm tə̂, a nəw rɔɛ̂ ang.

⁴⁶ Əi, ungu ubbu dɔm tə̂ ang, a ne, nungu yambo gɔləm tə̂.

⁴⁷ Mba yeenn bba m-pa mari: Tar majang laa kə̂ banya ɔru dɔɛ̂ tə̂ ngaa, mba ndiki laa bo nya. A dəw kə̂ dɔru tar dɔɛ̂ tə̂ tɛn baa, ndiki laa to tɛn baa tɔ.»

⁴⁸ Goe tə̂ a, n̂-pa narə dɛnɛ̂n le nan: «Tar majang ləi ɔru dɔi tə̂ ngaa.»

⁴⁹ Dəwje kə̂ isije ta nɛ̂n-kusa tə̂ kə Jeju le paje məde tə̂ nan: «Dəw nəənn to nân bba majang lə dəwje kara naw nɔru tarɛ̂ dɔde tə̂ wa?»

⁵⁰ A Jeju pa arə dɛnɛ̂n le nan: «Mə-kunn ləi ajii. Aw kə mə-wul-lɔm.»