Luku 5 - Dɔnɔn kə̂ Siki: Tar kə̂ aw arə təbbə

Njê-njaje go Jeju tə̂ kə̂ dɔngɔr

¹ Marə ndɔ Jeju ar mbɔr dangə maann tə̂ kə̂ Jenejarɛtə. Dəwje kə̂ banya gukuje dɔɛ̂ ngaâ daw dubbaje naan mba koo tar lə Lubba kə̂ naw pa.

² Nunn kəmɛ̂ a, noo tɔkə toje joo mbɔr maann tə̂ le. Njê-ndɔnje-maann inje məɛ tə̂ ddisije uruje nangə̂ mba toko ddəngəje ləde.

³ Jeju aal marə to le kə̂ to lə Simɔn ngaâ n̂-duje narə n̂-ngəsə to lə əw ngaji be kə ta kongo. Nisi mə to tə̂ le naw tɔju nɛ̂n dəwje kə̂ banya le.

⁴ N̂-tunga tar le a, n̂-pa narə Simɔn nan: «Ə-ngəsə to le kə kete, lo tə̂ kə̂ uru bbo ilaje ddəngəje ləse ə-ddaje nɛ̂n ndɔn.»

⁵ Simɔn ilɛ̂ tə̂ nan: «Əbbə-dəwje, n-dda ndɔn til tə̂ ndərəng lo arɛ, a jinga nɛ̂n kâra ang. A bbo baann a, mâ kila ddəngəje le tokə tai pa.»

⁶ Dilaje ddəngəje le ngaâ duwaje kanjije nya arə ddəngəje ləde aw ujaje.

⁷ N̂-kəbbəje njê-ndɔn marde kə̂ aw umanjede ndɔn-maann tə̂ kə̂ isije mə to tə̂ kə̂ kâra karə n̂-ddee dumanjede. N̂-ddeeje ngaâ dunguje kanjije le mə toje tə̂ kə̂ joo le, nayn ngaji baa ta karə toje le diije.

⁸ Simɔn Piyɛr oo baann a, ɔsu məkəjə-gɔlɛ̂ nɔn gɔl Jeju tə̂ pa nan: «Əbbəmje, maji karə aw ddəw əw səm mba m-to nje-nɛ̂n-dda kə̂ maji ang.»

⁹ Bbəəl uta dɔɛ̂, ne ddəm dəwje tɔyn kə̂ arje mbɔrɛ̂ tə̂ ddəm mba ndɔn kə̂ n̂-ddaje le.

¹⁰ Bbəəl uta dɔ Jakə de kə Jan kə̂ toje to ngann lə Jebede kə̂ toje to njê-ndɔn mar Simɔn le tɔ. Jeju pa arə Simɔn nan: «Ə-bbəəl ang. A kunn-kute bbokənɛn, ndɔn ləi a to ənga sangə dəwje ngaa.»

¹¹ N̂-ddeeje kə toje le kar mbal tə̂ ngaâ dinyaje nɛ̂nje tɔyn, a dunnje go Jeju.

Jeju aji marə nje-banji

¹² Marə ndɔ Jeju ee mə marə bbe tə̂ ngaâ marə dingaw kə̂ banji usɛ̂ nya unda lo tee. Noo Jeju le a, n̂-tee noso nɔn gɔlɛ̂ tə̂ n̂-dəbbə kəmɛ̂ nangə̂ ngaâ n̂-nɔn kə rɔɛ̂ tə̂ nan: «Əbbəmje, bbo ə-ndiki a, arə rɔm ddee maji.»

¹³ Jeju ula jia ɔrɛ̂ nɛ̂n ngaâ pa nan: «M-ndiki tə̂, maji karə rɔi ddee maji.» Njangə baa njaa a, banji laa le goto.

¹⁴ Goe tə̂ a, Jeju ndəje nan: «Ə-pa tarɛ̂ arə dəw oo ang. A ta aw tɔju rɔi nje-polo Lubba, ta arə nɛ̂n-polo mba karə tokoi arə ə-ddee maji tokə Ndu lə Mɔyijə pa le, mba kɔru nɛ̂n naji ləi karəde.»

¹⁵ Ri Jeju bbar kə kete kete ngaâ dəwje nya nya mbɔnje naan mba koo tar laa ddəm karə naji njê-rɔ-toje ddəm.

¹⁶ A ne, nɔru rɔɛ̂ naw mə kɔr tə̂, naw duju Lubba.

Jeju aji marə dəw kə̂ dəbbə rɔɛ̂ oy

¹⁷ Marə ndɔ Jeju aw tɔju nɛ̂n. Parijinyɛje kə njê-gərəje-Ndu isije nangə̂. Dinje ngann bbeje tə̂ tɔyn kə̂ Galile kə Jude kə Jerujalɛm. Singa-mɔngu lə Əbbə-dəwje aw dda kula lo tə̂ənn arə Jeju aji njê-rɔ-toje.

¹⁸ Marə dəwje unnje marə dəw kə̂ dəbbə rɔɛ̂ oy kə tuwa ddeeje saa. Daw sangəje ddəw ta kandə saa kilɛ̂ nɔn Jeju tə̂.

¹⁹ A dingaje ddəw ta kandə saa ang, mba dəwje banya nya. Dunnɛ̂je daalje nɛ̂n dɔ kəy taar ngaâ dɔruje kəm lo dulɛ̂je nɛ̂n kə tuwa laa baa dann dəwje tə̂ kə̂ mbɔnje naan nɔn Jeju tə̂ le.

²⁰ Jeju oo mə-kunn ləde a, pa arə dəw le nan: «Tar majangje ləi ɔru dɔi tə̂ ngaa.»

²¹ Njê-gərəje-Ndu kə Parijinyɛje aw əjəje tar ngaâ paje nan: «Dəw nəənn to dəw ddi bba aw tuju ri Lubba wa? Lubba kâra baa â asə ta kɔru tar majangje bbo marə dəw dang ang»

²² Jeju gərə kəjə ləde le ngaâ pa arəde nan: «Mba ddi bba aw əjəje tar tokə baann məse tə̂ wa?

²³ Ta pa nan: ‹Tar majang ləi ɔru dɔi tə̂›, wase ta pa nan: ‹In taar bbo ə-nja.› Ye kə̂ dda ngəng ang ta pa wa?

²⁴ Maji karə ə-gərəje to Ngonn lə dəw ee kə singa ta kɔru tar majang dɔ nangə tə̂.» Yeenn ngaâ Jeju pa arə dəw kə̂ dəbbə rɔɛ̂ oy le nan: «M-pa mari, in taar, unn tuwa ləi bbo aw kə̂y ləi.»

²⁵ Kar tə̂ənn njaa nin taar kəmde tə̂, nunn tuwa laa ngaâ nɔsu gaji Lubba naw nɛ̂n kə kə̂y laa.

²⁶ Dəwje tɔyn ooje a, dɔde ayn ngaâ ɔsuje gaji Lubba. Bbəəl uta dɔde ngaâ n̂-paje nan: «Joo nɛ̂n-kɔbbu bbokənɛn.»

Jeju bbar Lebi

²⁷ Goe tə̂ a, Jeju tee ddaka ngaâ oo marə nje-taa narɛ lambo kə̂ ria nan Lebi kə̂ isi lo taa narɛ lambo tə̂. N̂-pa narɛ̂ nan: «Unn gom.»

²⁸ Lebi le tusu nɛ̂nje tɔyn inya ngaâ unn goe.

²⁹ Lebi dda nɛ̂n-kusa tokə bo arə Jeju mə kəy tə̂ laa ngaâ njê-taaje narɛ lambo tokə banya kə marə dəwje nya isije kə de ta nɛ̂n-kusa tə̂ le.

³⁰ Parijinyɛje kə njê-gərəje-Ndu aw nyuruje ngaâ paje arə njê-njaje goe tə̂ nan: «Mba ddi bba aw usaje nɛ̂n ddəm aw ayje nɛ̂n ddəm kə njê-taaje narɛ lambo kə njê-nɛ̂n-ddaje kə̂ maji ang wa?»

³¹ Jeju ilade tə̂ nan: «Dəwje kə̂ rɔde to kə majɛ̂ aw ndikije ta koo nje-karə-kuman ang, dəwje kə̂ rɔde tode bba.

³² Dəwje kə̂ gatə gatə â m-ddee ta bbarde ang. Njê-nɛ̂n-ddaje kə̂ maji ang â m-ddee ta bbarde karə n̂-turuje məde.»

Jeju pa tar dɔ kɔku rɔ nɛ̂n-kusa tə̂

³³ Parijinyɛje paje arə Jeju nan: «Njê-njaje go Jan tə̂ ddəw kâra baa kə njê-njaje goje tə̂ aw ɔkuje rɔde nɛ̂n-kusa marə ndɔje tə̂ ngaâ aw dujuje Lubba, a njê-njaje goi tə̂ aw usaje nɛ̂n ddəm aw ayje nɛ̂n ddəm.»

³⁴ Jeju ilade tə̂ nan: «Əjəje to dəwje kə̂ n̂-bbarde kusu taa-naan tə̂ a kɔkuje rɔde nɛ̂n-kusa kar tə̂ kə̂ nje-dɛnɛ̂n le isi kə de bbay wa?

³⁵ Marə ndɔ aw ddee kə̂ dâ kunn nje-dɛnɛ̂n kə̂ siki le horode tə̂ kə ddang. A mə ndɔje tə̂ənn ngaa â dâ kɔkuje rɔde nɛ̂n-kusa.»

³⁶ Jeju pa gusu-tar arəde bbay nan: «Ndɔ kâra dəw a tiir ta-kubbu kə̂ siki kila nɛ̂n kəm bar kubbu ang. A bbo n̂-dda tokə baann a, nâ tiir kubbu kə̂ siki le ngaâ ta-kubbu kə̂ siki le a kaw naan tə̂ kə barɛ̂ le ang tɔ.

³⁷ Ddəm, ndɔ kâra dəw a kungu bɛn kə̂ n̂-dda siki bbay mə ku-əndaarje tə̂ kə̂ to konn nɛ̂n ang. Baann ang a, bɛn kə̂ siki le a dda karə kuje le ujaje. Bɛn le a kula kɔrɔ̂ ngaâ kuje le a tujuje nyɔm.

³⁸ To maji ta kungu bɛn kə̂ n̂-dda siki bbay mə ku-əndaar tə̂ kə̂ siki tɔ.

³⁹ Ddəm, bbo dəw ay bɛn kə̂ n̂-dda kure əw a, nâ ndiki ta kay ye kə̂ n̂-dda bbasinɛn bbay ang. Mba nâ pa nan: Ye kə̂ kure əw â maji.»