Luku 24 - Dɔnɔn kə̂ Siki: Tar kə̂ aw arə təbbə

Jeju kə̂ oy le ndol

¹ Ndɔ-kuwa-rɔ tə̂ kə əndɔɔ baa, dɛnɛ̂nje le teeje awje kə yamboje kə̂ dede njaa n̂-gɔlje le buwa-yo tə̂ le.

² Dooje a, ər kə̂ dutu nɛ̂n ta buwa-yo le tokə ndubbu kə ddang.

³ Dandəje mə buwa tə̂ le a, dooje niinn Əbbə-dəwje Jeju le ang.

⁴ Dəjəje nɛ̂n kə̂ dooje le pin. A ta koo a, dingawje joo kə̂ ulaje kubbu kə̂ ndɔnrɛn undaje lo tee ingajede.

⁵ Bbəəl uta dɔ dɛnɛ̂nje le ngaâ dulaje dɔde kə nangə̂. Dingawje kə̂ joo le paje arəde nan: «Mba ddi bba aw sangəje dəw kə̂ isi kəm baa horo dəwje tə̂ kə̂ oyje wa?

⁶ Nee nəənn ang, n̂-ndol mban. Oleje məse dɔ tar tə̂ kə̂ n̂-pa narəse, kar tə̂ kə̂ n̂-nayn nɛ̂n Galile le. Kar tə̂ənn le n̂-pa nan:

⁷ Maji karə dula Ngonn lə dəw ji njê-nɛ̂n-ddaje tə̂ kə̂ maji ang. Dâ tɔlɛ̂je kakə-dəsə tə̂ ngaâ ndɔ mota a, nâ ndol.»

⁸ Ngaâ doleje məde dɔ tarje tə̂ lə Jeju le.

⁹ Dinje ta buwa-yo tə̂ le n̂-təlje mba kɔru gəl nɛ̂njeenn tɔyn karə njê-kaw-kulaje lə Jeju kə̂ dɔku gire kâra kə kəsə dəwje tɔyn.

¹⁰ Mari kə̂ Magədala kə Jani kə Mari kɔn Jakəje kə marə dɛnɛ̂nje â paje tar le arə njê-kaw-kulaje le.

¹¹ A dooje tar lə dɛnɛ̂nje le to tar mbə ngaâ n̂-ndikije tə̂ ang.

¹² A Piyɛr in ayn ngɔru aw ta buwa-yo tə̂ le. Nula gɔsɛ̂ a, ta-kubbu kə̂ to nangə̂ â noo ngaâ naw təl kə kə̂y a, dɔɛ̂ ayn mba nɛ̂n kə̂ to le.

Jeju tee inga marə njê-njaje goe tə̂ ddəw Emawus tə̂

¹³ Ndɔɛ̂ tə̂ənn njaa dəwje joo horode tə̂ awje kə marə bbe tə̂ kə̂ ria nan Emawus kə̂ əw asə kilometere dɔku gire kâra kə Jerujalɛm.

¹⁴ Daw tɔnje tam nɛ̂nje tɔyn kə̂ toje le.

¹⁵ Kar tə̂ kə̂ daw tɔnje tam le ngaâ daw maynje naan tar a, Jeju ddee ngɔsi kə de ngaâ aw nja kə de.

¹⁶ Daw dooeje, a marə nɛ̂n ɔkude ddəw karə n̂-gəreje.

¹⁷ N̂-pa narəde nan: «Tar ddi bba aw paje horose tə̂ aw njaje nɛ̂n nəənn wa?» Darje lo kâra, rɔde nəəlde ang.

¹⁸ Marɛ̂ kâra horode tə̂ kə̂ ria nan Kelewopas ilɛ̂ tə̂ nan: «Nɛ̂nje kə̂ toje mə ndɔje tə̂ nəənn, əi kə kari baa njaa ə-to dəw kə̂ Jerujalɛm kə̂ gərə tarɛ̂ ang wa?»

¹⁹ Jeju dujude nan: «Ddi wa?» Dilɛ̂je tə̂ nan: «Nɛ̂n kə̂ inga Jeju kə̂ Najarɛtə. N̂-to nje-kila mbər tar lə Lubba kə̂ ngəng nya ddəw kula tə̂ ddəm ddəw tar tə̂ ddəm nɔn gɔl Lubba tə̂ kə nɔn gɔl dəwje tə̂ tɔyn.

²⁰ Mbayje lə njê-poloje Lubba kə̂ bbeê ləje kə tɔkə mbayje ləje ilɛ̂je ji dəwje tə̂ arə n̂-gangəje sariya-yo dɔɛ̂ tə̂ ngaâ n̂-tɔlɛ̂ kakə-dəsə tə̂.

²¹ Jeje, junda məje to nɛ̂n â nâ kɔru Ijarayɛl kɔ bbərə tə̂. A nɛ̂ɛnn kə̂ to le, ndərəng bbokənɛn to ndɔ mota laa ngaa.

²² Tɔkɔrɔ, marə dɛnɛ̂nje horoje tə̂ ddee paje marə tar kə̂ dum dɔje. Dawje kə əndɔɔ baa dɔbarə tə̂,

²³ a dingaje niinn Jeju le ang. N̂-təlje n̂-ddee n̂-paje tar lə anjəje kə̂ teeje ingajede ngaâ paje nan Jeju le isi kəm baa.

²⁴ Marə dəwje kə̂ eeje kə je awje ta buwa-yo tə̂ le. Dooje nɛ̂nje le tokə dɛnɛ̂nje le paje, a Jeju le dooeje ang.»

²⁵ Jeju pa arəde: «See njê-dɔ-gotoje! Tarje tɔyn kə̂ njê-kilaje mbər tar lə Lubba paje arəse le, ə-ndikije tə̂ kə de kə ngɔru ang mba ddi wa?

²⁶ Maji karə Kristə le oo ndoo tokə baann kete bba karə ninga piti ji Lubba tə̂ ang wa?»

²⁷ Jeju unn kutu kɔru gəl nɛ̂nje kə̂ Mɔyijə kə njê-kilaje mbər tar lə Lubba tɔyn paje dɔɛ̂ tə̂ makəturuje tə̂ le.

²⁸ N̂-teeje ngɔsi kə bbe kə̂ daw dawje kə tə̂ le a, Jeju dda tokə nâ ta nday kaw lo tə̂ kə̂ ddəw əw.

²⁹ A n̂-gangɛ̂je nan: «Ə-nayn kə je, mba lo aw wul ngaâ kar a ta kandə ngaa.» Nandə mə bbe tə̂ le ngaâ n̂-nayn kə de.

³⁰ Nisi ta nɛ̂n-kusa tə̂ kə̂ de a, nunn mapa, narə wooyo Lubba ngaâ goe tə̂ a, n̂-tətə dannâ n̂-kaynde.

³¹ Yeenn ngaâ kəmde uja dɔɛ̂ tə̂ arə n̂-gəreje. A niki kəmde tə̂ nyɔm.

³² N̂-paje tar horode tə̂ nan: «Kar tə̂ kə̂ naw pa tar narəje ddəw-boô ngaâ naw nɔru gəl Makəturuje narəje le, məje aw unda dɔ binya ang wa?»

³³ Mə kar tə̂ənn njaa dinje n̂-təlje Jerujalɛm ngaâ dingaje njê-kaw-kulaje kə̂ dɔku gire kâra kə njê-buwa-njaje ləde le,

³⁴ kə̂ aw paje arəde nan: «Tɔkɔrɔ, Əbbə-dəwje ndol, mba Simɔn ooe kə kəmɛ̂.»

³⁵ Njê-njaje go Jeju tə̂ kə̂ joo le ɔruje gəl nɛ̂n kə̂ ingade ddəw-boô kə ddəw kə̂ n̂-gərəje nɛ̂n Jeju le, kar tə̂ kə̂ naw kayn nɛ̂n de mapa le.

Jeju tee inga njê-njaje goe tə̂

³⁶ Daw paje tar baann bbay a, Jeju le njaa tee ar dannde tə̂ ngaâ n̂-pa narəde nan: «Mə-wul-lɔm ee kə se.»

³⁷ Ndilde ɔru ddəm bbəəl uta dɔde ddəm ngaâ dəjəje to uman â dooeje.

³⁸ A n̂-pa narəde nan: «Mba ddi bba arəje məse aw sangəse wa? Mba ddi bba aw maynje tar məse tə̂ wa?

³⁹ Aaje jimje kə gɔləmje ooje, əman njaa mar nəənn, ɔrumje ooje, taal rɔ uman to ang ddəm singa rɔɛ̂ to ang ddəm. A əman, taal rɔm to ddəm singa rɔm to ddəm.»

⁴⁰ Naw pa tar le a, n̂-tɔjude jiaje kə gɔlɛ̂je le.

⁴¹ Rɔde nəəlde nya, rɔ-nəəl le dda bba dooje nɛ̂n le to nɛ̂n kə̂ tɔkɔrɔ ang bbay ngaâ dɔde ayn. Yeenn le bba Jeju dujude nan: «Eeje kə marə nɛ̂n-kusa nəənn ang wa?»

⁴² Darɛ̂je marə gɔju kanji kə̂ kɔbbu.

⁴³ N̂-taa nusa kəmde tə̂.

⁴⁴ Goe tə̂ a, n̂-pa narəde nan: «Nɛ̂n kə̂ m-pa marəse kar tə̂ kə̂ m-nayn kə se le â nəənn. Maji karə tar kə̂ dɔm tə̂ kə̂ mə makəturu-ndu tə̂ lə Mɔyijə kə makəturu tə̂ lə njê-kilaje mbər tar lə Lubba kə makəturu Sɔmje tə̂ ddee to nɛ̂n kə̂ tɔkɔrɔ.»

⁴⁵ Yeenn ngaâ n̂-təəyn nɛ̂n-gərə ləde narə n̂-gərəje nɛ̂nje kə̂ Makəturu lə Lubba pa le.

⁴⁶ N̂-pa narəde nan: «Makəturu lə Lubba pa nan: ‹Kristə le a koo ndoo ngaâ ndɔ mota a, nâ ndol.

⁴⁷ Dâ kila mbər tar kə ri Kristə le karə gəl-dəwje tɔyn turuje nɛ̂n məde, mba karə tar majang ləde ɔru dɔde tə̂. Mbər tar le a kunn-kute Jerujalɛm tə̂.›

⁴⁸ Ə-toje to njê-tar-naji nɛ̂nje nəənn le.

⁴⁹ Əman, mâ kula nɛ̂n kə̂ Bɔy unn ndue ta karəse le dɔse tə̂. Sese, maji karə ə-naynje Jerujalɛm nəənn ndərəng ndɔ kə̂ â kingaje nɛ̂n singa-mɔngu kə̂ in darâ.»

Jeju təl kə darâ

⁵⁰ Goe tə̂ a, Jeju ɔrude aw kə de ər kə Betani, nula jia kə taar ngaâ n̂-bbar tar kə̂ maji dɔde tə̂.

⁵¹ Kar tə̂ kə̂ naw bbar tar kə̂ maji dɔde tə̂ le a, nɔtu ninyade ngaâ dunnɛ̂ daw saa darâ.

⁵² Dede le, n̂-poleje ngaâ goe tə̂ a, n̂-təlje Jerujalɛm kə rɔ-nəəl.

⁵³ Ndɔ tɔyn njaa, deeje mə kəy-polo Lubba tə̂ daw dɔsuje gaji Lubba.