Luku 22 - Dɔnɔn kə̂ Siki: Tar kə̂ aw arə təbbə

Mbayje lə Jiipije sangəje ddəw mba tɔl Jeju

¹ Ndɔ kusu mapa kə̂ n̂-dda kə wum ang ddee ngɔsi. Daw bbar kusu le nan Pakə.

² Mbayje lə njê-poloje Lubba kə njê-gərəje-Ndu aw sangəje gusu kə̂ ta tɔl nɛ̂n Jeju, a n̂-bbəəlje kəm dəwje.

³ Yeenn ngaâ Satan andə mə Judas tə̂ kə̂ daw bbarɛ̂ nan Iskariyotə. Nee horo njê-kaw-kulaje tə̂ lə Jeju kə̂ dɔku gire joo le.

⁴ Judas le aw oo mbayje lə njê-poloje Lubba kə mbayje lə njê-ngəmje ta-kəy-polo Lubba karə dooje ta naan dɔ gusu tə̂ kə̂ nâ kila nɛ̂n Jeju jide tə̂.

⁵ Rɔde nəəlde ngaâ dunnje ndude ta karɛ̂ narɛ.

⁶ Judas ndiki tə̂ kə de ngaâ aw sangə ddəw kə̂ maji kə̂ nâ kila nɛ̂n Jeju jide tə̂ bba karə dəwje kə̂ banya gərəje ang.

Jeju ula njê-kaw-kulaje karə n̂-ddaje muru Pakə

⁷ Ndɔ kusu mapa kə̂ n̂-dda kə wum ang le asə ngaâ ndɔ tɔl ngann batəje dda nɛ̂n muru Pakə le asə tɔ.

⁸ Jeju ula Piyɛr kə Jan. N̂-pa narəde nan: «Awje aw ddaje muru Pakə arəje jaw jɔnje.»

⁹ N̂-paje darɛ̂je nan: «Lo kə̂ dda bba ə-ndiki karə jaw dda muru Pakə le kə tə̂ wa?»

¹⁰ Nilade tə̂ nan: «Ooje, bbo andəje mə tɔkə bbe tə̂ toonn a, marə dəw kə̂ oto jo-maann a kingase. Awje goe tə̂ mə kəy tə̂ kə̂ nâ kandə tə̂

¹¹ ta ə-paje arə nje-kəy le nan: ‹Nje-nɛ̂n-tɔju ulaje rɔi tə̂ nan: Kəy kə̂ dda â əman kə njê-njaje gom tə̂ ja kɔn muru Pakə kə tə̂ wa?›

¹² A nâ tɔjuse marə mə kəy kə̂ tatə kə̂ n̂-gɔl tokə kete mban kə̂ to dɔ marɛ̂ tə̂ taar. Nɛ̂nje tɔyn to məɛ tə̂. Ə-ddaje nɛ̂n-kusa arəjeje lo tə̂ənn le.»

¹³ Dawje ngaâ dingaje nɛ̂nje le tɔyn tokə n̂-pa narəde le ngaâ n̂-ddaje muru Pakə le.

Muru mə-kâra

¹⁴ Kar nɛ̂n-kusa le asə a, Jeju isi ta nɛ̂n-kusa tə̂ le, ne kə njê-kaw-kulaje le.

¹⁵ N̂-pa narəde nan: «M-ndiki nya ta kusa Pakə nəənn kə se kete bba ta koo ndoo.

¹⁶ Tɔkɔrɔ, m-pa marəse, mâ kɔn muru Pakə ang ngaa ndərəng ndɔ kə̂ Lubba a tɔju gəle mə Bbe-kɔn tə̂ laa.»

¹⁷ Nunn maann-binyə kə̂ əngo tə̂, narə wooyo Lubba ngaâ n̂-pa nan: «Ə-taaje maann-binyə kə̂ əngo tə̂ nəənn ə-kaynje naan ayje.

¹⁸ Tɔkɔrɔ, m-pa marəse, unn kute kar tə̂ nəənn, mâ kay maann-binyə ang ndərəng ndɔ kə̂ kɔn-mbay lə Lubba a ddee.»

¹⁹ Goe tə̂ a, nunn mapa, narə wooyo Lubba, n̂-tətə narəde ngaâ n̂-pa nan: «Mapa nəənn to da-rɔm kə̂ munn marə mba tar dɔse. Ə-ddaje nɛ̂n nəənn mba kole nɛ̂n məse dɔm tə̂.»

²⁰ N̂-dda tokə baann kə maann-binyə kə̂ əngo tə̂ le tɔ. Go nɛ̂n-kusa tə̂ le a, nunn maann-binyə kə̂ əngo tə̂ le narəde ngaâ n̂-pa nan: «Maann-binyə kə̂ əngo tə̂ nəənn, to dɔnɔn kə̂ siki kə̂ Lubba ɔsu kə se ddəw məsəm tə̂ kə̂ kayn mba tar dɔse.

²¹ A ooje, dəw kə̂ a kunn dɔm isi səm ta nɛ̂n-kusa tə̂ nəənn.

²² Ngonn lə dəw a koy, mba to nɛ̂n kə̂ Lubba â ɔju. A, a to ndoo nya karə dəw kə̂ a kunn dɔ Ngonn lə dəw le.»

²³ Daw dujuje naan se nân horode tə̂ â, a dda nɛ̂n kə̂ be le wa?

Nân â to dəw kə̂ uta kəseje wa?

²⁴ Njê-njaje go Jeju tə̂ aw maynje naan tar ta gərə se nân dâ kooeje to dəw kə̂ uta marɛ̂je horode tə̂ wa?

²⁵ Jeju pa arəde nan: «Mbay-bbeje aw ɔnje dɔ dəwje ngaâ dəwje kə̂ bo aw ddaje arəje dəwje aw bbarjede to njê-ddaje maji.

²⁶ A əngase to tokə baann ang. Maji karə dəw kə̂ bo horose tə̂ ddee tokə lə ngonn. Maji karə dəw kə̂ ɔn dɔ njê-marɛ̂je to tokə lə nje-kula.

²⁷ Nân â to dəw kə̂ bo wa? Dəw kə̂ isi ta nɛ̂n-kusa tə̂ wase dəw kə̂ aw unda nɛ̂n-kusa nɔn nje-marɛ̂ tə̂ le wa? Dəw kə̂ isi ta nɛ̂n-kusa tə̂ le â to dəw kə̂ bo ang wa? A əman, mee horose tə̂ tokə lə nje-kula lə dəwje.

²⁸ Sese le ə-naynje səm mə nɛ̂n kəm-to-ndoo tə̂ kə̂ ingam.

²⁹ Mba yeenn bba, mâ karəse Bbe-kɔn le tokə Bɔmje arəm le,

³⁰ mba karə usaje nɛ̂n ddəm ayje nɛ̂n ddəm dɔ tabələ tə̂ ləm mə Bbe-kɔn tə̂ ləm ngaâ karə isije ngende-mbayje tə̂, mba gangə sariya dɔ gəl-kuju ngann Ijarayɛlje tə̂ kə̂ dɔku gire joo.»

Jeju pa nan Piyɛr a mayn tar laa

³¹ Əbbə-dəwje pa nan: «Simɔn, Simɔn, Satan duju ta pərəse tokə daw pərə waa.

³² A əman, m-duju Lubba mba tar ləi ta karə mə-kunn ləi oso ang ngaâ karə bbo ə-təl rɔm tə̂ a, ə-dda arə ngakɔinje ingaje singa.»

³³ Piyɛr pa arə Jeju nan: «Əbbə-dəwje, m-to ngɔsi ta kaw səi kəy-kula tə̂ ddəm ta koy səi ddəm.»

³⁴ Jeju ilɛ̂ tə̂ nan: «Piyɛr m-pa mari, kete bba karə kuran nɔn bbokənɛn, â mayn tar ləm gɔl mota, â pa nan ə-gərəm ang.»

Maji karə njê-njaje go Jeju tə̂ ddaje singa dɔ rɔde tə̂

³⁵ Jeju pa arəde bbay nan: «Ndɔ kə̂ mulase marə awje kə narɛ ang ddəm bbɔl ang ddəm nɛ̂n-gɔl ang ddəm le, marə nɛ̂n duse wa?» Dilɛ̂je tə̂ nan: «Nɛ̂n kâra duje ang.»

³⁶ Yeenn ngaâ n̂-pa narəde nan: «Kə̂ bbasinɛn, dəw kə̂ narɛ laa to a, unn, ddəw kâra baa, dəw kə̂ bbɔl laa to a, unn. A bbo dəw kə̂ tɔkə kiya laa goto a, labbə kubbu-kul laa ndoko nɛ̂n tɔkə kiya.

³⁷ Mba m-pa marəse: Maji karə tar nɛ̂nje kə̂ n̂-pa dɔm tə̂ mə Makəturu tə̂ lə Lubba nəənn ingam njaa. Tar le nan: ‹Dəwje ooeje to marə dəw kə̂ maji ang.› Tar kə̂ dɔm tə̂ nəənn le ddee ngɔsi ta kɔsu kɔnyɛ̂ baann tɔkɔrɔ ngaa.»

³⁸ Njê-njaje go Jeju tə̂ le paje arɛ̂ nan: «Əbbə-dəwje, tɔkə kiya â ee joo nəənn.» Jeju pa arəde nan: «Yeenn njaa asə.»

Jeju duju Lubba dɔ ddingiri olibəje tə̂

³⁹ Jeju in mə kəy tə̂ le tee ngaâ aw dɔ ddingiri Olibəje tə̂ tokə naw dda kə ndɔ tɔyn. Njê-njaje goe tə̂ awje goe tə̂.

⁴⁰ N̂-tee lo tə̂ənn le a, n̂-pa narəde nan: «Ə-dujuje Lubba, mba karə osoje mə nɛ̂n-nan tə̂ ang.»

⁴¹ Goe tə̂ a, nɔru rɔɛ̂ naw ddəw əw asə kɔr ər kə̂ dəw ila ngaâ nɔsu gɔlɛ̂ nangə̂, n̂-duju Lubba,

⁴² n̂-pa nan: «Bɔy, bbo ə-ndiki a, uta əngo kəm-to-ndoo nəənn dɔm tə̂ kə ddang. Ə-dda tokə ye kə̂ məi ndiki bbo tokə ye kə̂ məm ndiki ang.»

⁴³ Karɛ̂ tə̂ənn njaa marə anjə tee ingɛ̂ mba karɛ̂ singa.

⁴⁴ Bbəəl uta dɔ Jeju arə n̂-duju Lubba nya. Tətə kə̂ rɔɛ̂ tə̂ təl ddee tokə lə kɔr məsə ngaâ aw gayn nangə̂.

⁴⁵ Go duju tə̂ kə̂ n̂-duju Lubba le a, nin taar n̂-ddee rɔ njê-njaje goe tə̂ le, a ningade dɔ bbi tə̂ mba rɔde nəəlde ang nyɔm.

⁴⁶ N̂-pa narəde nan: «Mba ddi bba aw tibbije wa? Inje taar, ə-dujuje Lubba, mba karə osoje mə nɛ̂n-nan tə̂ ang.»

Duwa Jeju

⁴⁷ Jeju aw pa tar bbay a, dəwje kə̂ banya ddee teeje. Marə nje-kaw-kula laa kâra horode tə̂ kə̂ dɔku gire joo kə̂ ria nan Judas ɔru nɔn dəwje kə̂ banya le. Judas le ddee ngɔsi kə Jeju ta to mbia.

⁴⁸ Jeju pa arɛ̂ nan: «Judas, ə-to mbi Ngonn lə dəw mba kilɛ̂ nɛ̂n ji dəwje tə̂ wa?»

⁴⁹ Njê-njaje go Jeju tə̂ le ooje nɛ̂n kə̂ a ta to le a, n̂-paje nan: «Əbbə-dəwje, n-tuka dəwje kə tɔkə kiyaje ləje le wa?»

⁵⁰ Marɛ̂ kâra horode tə̂ tuka mbi nje-kula lə tɔkə nje-polo Lubba ti, to mbia kə̂ kɔl.

⁵¹ A Jeju pa nan: «Asə baann!» Nula jia nɔru nɛ̂n mbi dingaw le narə mbia le təl ture tə̂.

⁵² Goe tə̂ a, Jeju pa arə mbayje lə njê-poloje Lubba kə nje-kɔn dɔ dəwje kə̂ aw ngəmje kəy-polo Lubba kə tɔkəje kə̂ ddeeje ta kuwɛ̂ le nan: «Oomje to dəw kə̂ maji ang bba ə-ddeeje kə tɔkə kiya kə kakəje bba ta kuwam nɛ̂n wa?

⁵³ Mee kə se kəy-polo Lubba tə̂ kə ndɔ tɔyn, a dəw uwam ang. A bbasinɛn kar nəənn to ləse ddəm to kar lə singaje kə̂ lo ndul tə̂ karə dɔnje mbay ləde ddəm.»

Piyɛr mayn tar lə Jeju

⁵⁴ Dəwje le uwaje Jeju ngaâ awje saa, andəje saa kəy lə tɔkə nje-polo Lubba. A Piyɛr unn gode aw nja ddəw əw.

⁵⁵ N̂-yəlje puru dann lo tə̂ mə ndoko tə̂ le disije tɛɛ̂ tə̂. A Piyɛr isi horode tə̂.

⁵⁶ Marə nje-kula kə̂ dɛnɛ̂n ooe ta puru tə̂ le ngaâ ɛɛ̂ a, pa nan: «Dingaw nəənn nja kə Jeju tɔ.»

⁵⁷ A Piyɛr mayn nan: «Dɛnɛ̂n, m-gəre ang.»

⁵⁸ Ngaji goe tə̂ a, marə dəw ooe ngaâ pa nan: «Əi, ee horo njê-njaje go Jeju tə̂ tɔ.» A Piyɛr pa arə dəw le nan: «Mee horode tə̂ ang!»

⁵⁹ Asə gɔl kar kâra a, marə dəw pa arə ngəng bbay nan: «Tɔkɔrɔ, dingaw nəənn nja saa, mba n̂-to dəw kə̂ Galile.»

⁶⁰ A Piyɛr ilɛ̂ tə̂ nan: «Ya, m-gərə tar kə̂ a ta pa nəənn ang.» Piyɛr aw pa tar bbay a, kar tə̂ənn njaa kuran nɔn.

⁶¹ Əbbə-dəwje turu rɔɛ̂ ngaâ aa Piyɛr le. Piyɛr le ole məɛ̂ dɔ tar tə̂ kə̂ Əbbə-dəwje pa arɛ̂ nan: «Kete bba karə kuran nɔn bbokənɛn, â mayn pa nan ə-gərəm ang gɔl mota le.»

⁶² Piyɛr tee ddaka ngaâ nɔn nya.

Dəwje tajije Jeju

⁶³ Dəwje kə̂ aw ngəmje Jeju le aw kokeje ngaâ aw tundɛ̂je.

⁶⁴ N̂-tɔje kəmɛ̂ kə kubbu ngaâ n̂-dujeje nan: «Nân â undai wa? Ə-pa arə joo.»

⁶⁵ N̂-tajɛ̂je nya kə nɛ̂n-tajije dang dang.

Daw kə Jeju lo gangə sariya tə̂

⁶⁶ Lo arɛ a, mbɔn-naan lə tɔkəje lə Jiipije, mbayje lə njê-poloje Lubba kə njê-gərəje-Ndu mbɔnje naan ngaâ arəje n̂-ddee kə Jeju lo gangə sariya tə̂.

⁶⁷ N̂-paje nan: «Bbo ə-to Kristə le a, ə-pa arəje.» Jeju ilade tə̂ nan: «Bbo m-pa marəse a, â ndikije tə̂ səm ang.

⁶⁸ Ngaâ bbo m-dujuse tar a, â kilamje tə̂ ang.

⁶⁹ A kunn-kute bbasinɛn, Ngonn lə dəw a kisi dɔ ji-kɔl Lubba tə̂ kə̂ to nje-singa-mɔngu.»

⁷⁰ Dede tɔyn n̂-paje nan: «Yeenn a, ə-to Ngonn lə Lubba wa?» Nilade tə̂ nan: «Sese njaa ə-paje mban, m-to ne le.»

⁷¹ Yeenn ngaâ n̂-paje bbay nan: «Ddi â ta koo tar lə njê-tar-najije dda nɛ̂n bbay wa? Jeje njaa joo tar kə̂ tɛɛ̂ tə̂ mban.»