Luku 18 - Dɔnɔn kə̂ Siki: Tar kə̂ aw arə təbbə

Gusu-tar kə̂ dɔ nje-gangə sariya tə̂ kə dɛnɛ̂n-ndubba tə̂

¹ Jeju pa marə gusu-tar arə njê-njaje goe tə̂ ta tɔju nɛ̂n de to, to maji nya ta duju Lubba kə ndɔje tɔyn ddəm kə rɔ-nya ang ddəm.

² N̂-pa nan: «Marə tɔkə bbe tə̂, marə nje-gangə sariya ee tə̂ənn, n̂-bbəəl Lubba ang ddəm noo dəwje to nɛ̂n kəmɛ̂ tə̂ ang ddəm.

³ A marə dɛnɛ̂n-ndubba ee mə bbe tə̂ənn le tɔ. Dɛnɛ̂n-ndubba le ddee rɔɛ̂ tə̂ gɔl banya nya pa arɛ̂ nan: ‹Ə-gangə sariya dɔ nje-baan tə̂ ləm arəm.›

⁴ A nje-gangə sariya le mbətə gɔl banya nya. Goe tə̂ a, nəjə tar məɛ̂ tə̂ nan: ‹Tɔkɔrɔ, m-bbəəl Lubba ang ddəm moo dəwje to nɛ̂n kəmʼm tə̂ ang ddəm njaa.

⁵ A dɛnɛ̂n-ndubba nəənn ɔru wurum nya. Mâ gangə sariya laa karə ta marə ndɔ a, n̂-təl n̂-ddee n̂-jɔkum ang ngaa.› »

⁶ Əbbə-dəwje təl pa bbay nan: «Ooje tar kə̂ nje-gangə sariya kə̂ gatə gatə ang le pa nəənn kə majɛ̂.

⁷ Lubba a gangə sariya lə dəwje laa kə̂ n̂-mbərəde kə̂ aw nɔnje nɔn gɔlɛ̂ tə̂ til kə kar ang wa? Nâ karə n̂-ngəbbə nya wa?

⁸ M-pa marəse, nâ gangə sariya ləde kə ngɔru baa. A ndɔ kə̂ Ngonn lə dəw təl dɔ nangə tə̂ a, nâ kinga njê-mə-kunnje njaa wa?»

Gusu-tar dɔ marə Parijinyɛ tə̂ kə nje-taa narɛ lambo tə̂

⁹ Jeju pa gusu-tar nəənn bbay mba dəwje kə̂ ooje rɔde to dəwje kə̂ gatə gatə, a ooje kəsə dəwje to dəwje kə̂ maji ang.

¹⁰ N̂-pa nan: «Dəwje joo awje kəy-polo Lubba tə̂ ta duju Lubba. Marɛ̂ kâra to Parijinyɛ, a ne kə̂ kâra n̂-to nje-taa narɛ lambo.

¹¹ Parijinyɛ le ar taar ngaâ duju Lubba mba tar dɔɛ̂ njaa nan: ‹Lubba, mari wooyo mba m-to tokə kəsə dəwje ang. Kəseje toje to njê-bbokoje, njê-nɛ̂n-ddaje kə̂ gatə gatə ang, njê-ddaje lo-to-majang. M-to tokə nje-taa narɛ lambo nəənn ang tɔ.

¹² Mə ndɔje tə̂ kə̂ siri, maw mɔku rɔm nɛ̂n-kusa gɔl joo, maw munn dɔ nɛ̂nje tɔyn kə̂ minga maw poloi nɛ̂n.›

¹³ A nje-taa narɛ lambo le ar ddəw əw, naa lo kə̂ darâ ang ddəm ngaâ nunda karɛ̂ nan: ‹Lubba, oo kəm-to-ndoo ləm, əman nje-nɛ̂n-dda kə̂ maji ang.›

¹⁴ M-pa marəse, nje-taa narɛ lambo le ddee to dəw kə̂ gatə gatə kəm Lubba tə̂ ngaâ təl kəy laa, a Parijinyɛ le ddee to dəw kə̂ gatə gatə ang. Mba dəw kə̂ ndiki koo rɔɛ̂ bo a, Lubba a karə n̂-ddee tɛn baa ngaâ dəw kə̂ oo rɔɛ̂ tɛn baa a, Lubba a karə n̂-ddee bo.»

Bbe-kɔn lə Lubba to mba dəwje kə̂ toje tokə ngannje kə̂ kasə

¹⁵ Ngannje kə̂ ta mba tə̂ njaa kara dəwje aw ddeeje kə de rɔ Jeju tə̂, ta karə nɔrude kə jia. Njê-njaje goe tə̂ ooje baann a, aw inje kə dəwje le.

¹⁶ A Jeju arə n̂-bbar ngannje le ngaâ pa nan: «Inyaje ngannje kə̂ mbatə arəje ddeeje rɔm tə̂ bbo ɔkujede ddəw ang. Mba Bbe-kɔn lə Lubba to mba dəwje kə̂ toje tokə dede.

¹⁷ Tɔkɔrɔ, m-pa marəse: Dəw kə̂ taa Bbe-kɔn lə Lubba kə rɔɛ̂ tə̂ tokə ngonn-kasə ang a, a kandə tə̂ ang.»

Tar lə nje-nɛ̂n-kinga

¹⁸ Marə mbay lə Jiipije duju Jeju nan: «Nje-nɛ̂n-tɔju kə̂ maji, ddi â mâ dda bba mâ kinga nɛ̂n təbbə kə̂ to kə ndɔ kə ndɔ wa?»

¹⁹ Jeju ilɛ̂ tə̂ nan: «Mba ddi bba ə-bbarəm to dəw kə̂ maji wa? Dəw kə̂ maji goto, Lubba kâra baa â maji.

²⁰ Ə-gərə nduje kə̂ nan: Ə-dda lo-to-majang ang, ə-tɔl dəw ang, ə-bboko ang, ə-pa tar-naji kə̂ to ngəm ang, ə-wal bɔije kə kɔinje.»

²¹ Dingaw le pa nan: «M-ngəm ndujeenn tɔyn kə kasəm baa.»

²² Jeju oo tar laa le a, pa arɛ̂ nan: «Marə nɛ̂n kâra dui bbay. Ə-labbə nɛ̂nje tɔyn kə̂ inga ta ə-kayn narɛ̂ dangətəje a, â kinga nɛ̂n darâ. Goe tə̂ a, ə-ddee unn gom.»

²³ Mbay le oo tar nəənn le a, rɔɛ̂ nəəle ang mba ninga nɛ̂n nya.

²⁴ Jeju ɛɛ̂ a, pa nan: «To ngəng nya kə njê-nɛ̂n-kingaje karə dandəje Bbe-kɔn tə̂ lə Lubba.

²⁵ Karə jambal andə buwa suwa tə̂ ngəng ang wa? Karə nje-nɛ̂n-kinga andə Bbe-kɔn tə̂ lə Lubba a ngəng nya bbay.»

²⁶ Njê kə̂ aw ooje tar laa le paje nan: «Bbo baann a, nân bba a kasə kinga kaji wa?»

²⁷ Jeju ila tə̂ nan: «Nɛ̂n kə̂ nya dəwje nya Lubba ang.»

²⁸ Piyɛr pa nan: «Oo, jinya nɛ̂nje ləje tɔyn a junn goi.»

²⁹ Jeju pa nan: «Tɔkɔrɔ, m-pa marəse, bbo dəw inya kəy laa, dɛnɛ̂n laa, ngakɔɛ̂nje, kɔɛ̂nje kə bɔɛ̂je wase ngannɛ̂ mba Bbe-kɔn lə Lubba a,

³⁰ nâ kinga nɛ̂n nya mə ndɔje tə̂ nəənn ddəm nâ kinga təbbə kə̂ to kə ndɔ kə ndɔ, mə ndɔje tə̂ kə̂ aw ddeeje ddəm.»

Jeju pa tar koy laa kə tar ndol laa

³¹ Jeju bbar njê-kaw-kulaje laa kə̂ dɔku gire joo kə rɔɛ̂ tə̂ ngaâ pa arəde nan: «Ooje, jaw jawje kə Jerujalɛm, nu le, nɛ̂nje tɔyn kə̂ njê-kilaje mbər tar lə Lubba ddaje Makəturu tə̂ dɔ Ngonn lə dəw tə̂ le a ddee to nɛ̂n kə̂ tɔkɔrɔ.

³² Mba dâ kilɛ̂ ji dəwje tə̂ kə̂ toje to Jiipije ang, dəwje a kɔjɛ̂je koko nɛ̂n, dâ ddɛɛ̂je maji ang, dâ tibbije wənrə dɔɛ̂ tə̂.

³³ Dâ tundɛ̂je kə ndəy ngaâ dâ tɔlɛ̂je. Ndɔ mota laa a, nâ ndol.»

³⁴ Njê-kaw-kulaje le gərəje nɛ̂n mə tar tə̂ənn kâra ang. Kandə tarjeenn le iya rɔɛ̂ kə de. N̂-gərəje nɛ̂n kə̂ Jeju a ta pa le ang.

Jeju aji nje-kəm-tɔ kə̂ Jeriko arə təl oo lo

³⁵ Jeju ddee ngɔsi kə Jeriko a, marə nje-kəm-tɔ isi mbɔr ddəw tə̂ aw kɔy nɛ̂n.

³⁶ Noo ndu dəwje kə̂ banya kə̂ aw ndayje a, n̂-duju ta gərə gəle.

³⁷ N̂-pa darɛ̂ nan Jeju kə̂ Najarɛtə â aw nday.

³⁸ Nje-kəm-tɔ le uru əkii nan: «Jeju, Ngonn lə Dabbiti, oo kəm-to-ndoo ləm bbo!»

³⁹ Dəwje kə̂ aw njaje kete aw inje saa karə nutu tɛɛ̂, a nuru əkii kə taar bbay nan: «Ngonn lə Dabbiti, oo kəm-to-ndoo ləm bbo!»

⁴⁰ Jeju ar lo kâra ngaâ unn ndu karə n̂-ddee saa. N̂-ddee ngɔsi a, Jeju duje nan:

⁴¹ «Ddi â ə-ndiki karə m-dda mari wa?» Nje-kəm-tɔ le ilɛ̂ tə̂ nan: «Əbbəmje, arə m-təl moo lo!»

⁴² Jeju pa arɛ̂ nan: «Ə-təl oo lo, mə-kunn ləi aji!»

⁴³ Kar tə̂ənn njaa n̂-təl noo lo ngaâ nunn go Jeju naw nɔsu gaji Lubba. Dəwje tɔyn kə̂ ooje nɛ̂ɛnn le ɔsuje gaji Lubba.