Luku 16 - Dɔnɔn kə̂ Siki: Tar kə̂ aw arə təbbə

Gusu-tar dɔ nje-nɛ̂n-ngəm tə̂ kə̂ dda nɛ̂n kə gusu

¹ Jeju pa arə njê-njaje goe tə̂ bbay nan: «Marə dəw kə̂ inga nɛ̂n nya, marə nje-ngəm nɛ̂nje laa to. Dəwje paje arə dəw kə̂ nje-nɛ̂n-kinga le nan nje-ngəm nɛ̂nje le aw tuju nɛ̂nje laa.

² N̂-bbar nje-ngəm nɛ̂nje le ngaâ n̂-pa narɛ̂ nan: ‹Tar ddi â maw moo dɔi tə̂ nəənn wa? Ə-tura kɔr nɛ̂nje kə̂ aw ngəm le arə moo, mba â kasə ngəm nɛ̂n ləm ang ngaa.›

³ Nje-ngəm nɛ̂nje le pa məɛ̂ tə̂ nan: ‹Əbbəmje a ta kɔrum ta nɛ̂nje tə̂ laa nəənn, ddi â mâ dda wa? Minga singa ta ndɔɔ ang ngaâ nɛ̂n-kɔy to rɔ-kul ləm nya tɔ.

⁴ M-gərə nɛ̂n kə̂ mâ dda karə bbo n̂-tubbam ta nɛ̂nje tə̂ laa a, marə dəwje taamje kə kəy ləde.›

⁵ Narə n̂-bbar dəwje kâra kâra tɔyn kə̂ bbangə lə əbbeeje to dɔde tə̂ ngaâ n̂-duju dəw kə̂ dɔngɔr nan: ‹Bbangə lə əbbəmje to dɔi tə̂ baânn wa?›

⁶ Dəw le ilɛ̂ tə̂ nan: ‹Ubbu gongo tə̂ kə̂ bo kɔr kâra.› Nje-ngəm nɛ̂nje le pa arɛ̂ nan: ‹Ə-taa makəturu bbangə le bbo ta isi nangə̂ kə tɔkɛ̂ ə-dda kɔrɛ̂ to dɔmin.›

⁷ N̂-pa narə marɛ̂ bbay nan: ‹A əi, bbangə ləi baânn wa?› Dəw le ilɛ̂ tə̂ nan: ‹Waa bbɔl kɔr kâra.› N̂-pa narɛ̂ nan: ‹Ə-taa makəturu bbangə ləi bbo ta ə-dda to kɔrɛ̂ dɔjijoo.›

⁸ Nje-ngəm nɛ̂nje kə̂ to gatə gatə ang le əbbeeje le pite, mba nje-ngəm nɛ̂nje le dda nɛ̂n kə gusu. Dəwje kə̂ nangə̂ nəənn ddaje nɛ̂n kə gusu nya horode tə̂ uta dəwje kə̂ aw njaje dann lo-karɛ tə̂.»

Dəw a kasə dda kula mba Lubba ddəm narɛ ddəm ang

⁹ Jeju pa bbay nan: «A əman, m-pa marəse: Maji karə narɛ̂ kə̂ aw ddaje nɛ̂n nɛ̂n kə̂ gatə gatə ang nangə̂ nəənn, uwaje nɛ̂n buwa-kura kə dəwje. Baann bba karə ndɔ kə̂ narɛ le goto jise tə̂ a, n̂-taase kə kə̂y tə̂ kə̂ a to kə ndɔ kə ndɔ.

¹⁰ Dəw kə̂ dda nɛ̂n kə̂ tɛn kə dɔgɔlɛ̂, a dda nɛ̂n kə̂ bo kə dɔgɔlɛ̂ tɔ. Dəw kə̂ to gatə gatə ang mə nɛ̂n tə̂ kə̂ tɛn, to gatə gatə ang mə nɛ̂n tə̂ kə̂ bo tɔ.

¹¹ Bbo nɛ̂n-kingaje kə̂ nangə̂ nəənn le ə-ddaje nɛ̂n nɛ̂n kə dɔgɔlɛ̂ ang a, nân a kinya yeje kə̂ tɔkɔrɔ jise tə̂ wa?

¹² Bbo nɛ̂n-kinga kə̂ to lə dəw, ə-ddaje nɛ̂n nɛ̂n kə dɔgɔlɛ̂ ang a, nân a karəse nɛ̂n kə̂ to ləse wa?

¹³ «Nje-kula kâra asə dda bbərə lə əbbeejedede joo ang, mba nâ mbətə marɛ̂ kâra, a nâ ndiki marɛ̂ kâra wase nâ kunn rɔɛ̂ karə marɛ̂ kâra, a nâ dabbə marɛ̂ kâra. Asəje ta dda bbərə lə Lubba ddəm narɛ̂ ddəm ang.»

Jeju pa marə tarje dang dang

¹⁴ Parijinyɛje kə̂ ndikije narɛ nya ooje tarjeenn le tɔyn a, aw kokoje Jeju.

¹⁵ Jeju pa arəde nan: «Sese aw ddaje rɔse to dəwje kə̂ gatə gatə kəm dəwje tə̂. A Lubba gərə məse, mba nɛ̂n kə̂ dəwje ooje to nɛ̂n kə̂ ngəng kəmde tə̂, to nɛ̂n kə̂ maji ang nya kəm Lubba tə̂.

¹⁶ «Ndu lə Mɔyijə kə tar lə njê-kilaje mbər tar lə Lubba tɔju ddəw dəwje ndərəng ndɔ tə̂ lə Jan-Batisi. Unn kute ndɔɛ̂ tə̂ənn kə̂ daw dila mbər Tar kə̂ Maji dɔ Bbe-kɔn tə̂ lə Lubba darə dəwje, nân nân kara aw dda singa mba kandə tə̂.

¹⁷ To ngəng ang karə dara kə nangə ndayje. A to ngəng nya karə mbita gɔl Makəturu-Ndu kâra oso nangə̂.

¹⁸ «Dəw kə̂ tubba dɛnɛ̂n laa ngaâ taa marɛ̂ dda lo-to-majang ddəm dəw kə̂ taa dɛnɛ̂n kə̂ ngawɛ̂je tubbɛ̂ dda lo-to-majang ddəm.»

Gusu-tar dɔ nje-nɛ̂n-kinga kə Lajar tə̂

¹⁹ Jeju pa bbay nan: «Ləw, marə dəw kə̂ to nje-nɛ̂n-kinga kə̂ aw ula kubbu lɛɛn to. Ndɔ kâra kâra tɔyn naw dda kusu mə kəy tə̂ laa.

²⁰ Marə nje-ndoo kə̂ ria nan Lajar kə̂ rɔɛ̂ tɔyn njaa to do to nangə̂ ta-kəy tə̂ lə nje-nɛ̂n-kinga le.

²¹ N̂-ndiki ta kusa buru nɛ̂n-kusaje kə̂ aw gaynje kɔ tabələ tə̂ lə nje-nɛ̂n-kinga le. A dɔɛ tə̂ənn, bisije â ddeeje aw tɔɔnnje kəm doje laa.

²² Marə ndɔ nje-ndoo le oy ngaâ anjəje unnɛ̂je awje saa mbɔr Abaraham tə̂. Nje-nɛ̂n-kinga le oy tɔ ngaâ n̂-dubbe.

²³ Kəm-to-ndoo aw ddɛɛ̂ lo tə̂ lə dəwje kə̂ oyje ngaâ nunn kəmɛ̂ a, noo Abaraham kə Lajar mbɔr Abaraham tə̂ le ddəw əw.

²⁴ Nuru əkii n̂-pa nan: ‹Bɔy Abaraham, oo kəm-to-ndoo ləm! Ula Lajar arə ula ndɔn-jia maann tə̂ ila ndɔnʼm tə̂ arə wul, mba kəm-to-ndoo aw ddam kəm puru tə̂ nəənn.›

²⁵ Abaraham ilɛ̂ tə̂ nan: ‹Ngonnəm, ole məi, ndɔ kə̂ isi kəm baa bbay le ubba maji, a Lajar tuju â ubba. Bbasinɛn Lubba bɔru maann-nɔn kəmɛ̂ tə̂ lo tə̂ nəənn, a əi, aw oo ndoo.

²⁶ Dɔɛ tə̂ənn bbay, marə tɔkə buwa to horoje tə̂ kə sese, mba karə dəwje kə̂ ndikije ta kin nəənn kaw kə rɔse tə̂, asəje ta kaw ang ddəm mba karə dəw asə ta kin rɔse tə̂ nu ddee kə rɔje tə̂ ang ddəm.›

²⁷ Nje-nɛ̂n-kinga le pa nan: ‹Yeenn a, bɔy, m-duji karə ula Lajar kə̂y lə bɔmje,

²⁸ mba ngakɔnʼmje kə̂ dingaw min eeje nunn. Maji karə naw ndəjəde narə n̂-ddeeje lo kəm-to-ndoo tə̂ nəənn tɔ ang.›

²⁹ Abaraham ila tə̂ nan: ‹Ndu lə Mɔyijə kə tar lə njê-kilaje mbər tar lə Lubba naynje horode tə̂ bbay. Maji karə dooje tar ləde!›

³⁰ Nje-nɛ̂n-kinga le pa nan: ‹Baann ang, bɔy Abaraham, bbo dəw ndol horo dəwje tə̂ kə̂ oyje aw rɔde tə̂ a, dâ turuje məde.›

³¹ Abaraham le pa arɛ̂ nan: ‹Bbo dooje ndu lə Mɔyijə kə tarje lə njê-kilaje mbər tar lə Lubba ang a, le marə dəw kə̂ oy ndol aw pa tar arəde njaa kara dâ kooje tar laa ang tɔ.› »