Luku 14 - Dɔnɔn kə̂ Siki: Tar kə̂ aw arə təbbə

Jeju aji marə dəw ndɔ-kuwa-rɔ tə̂

¹ Marə ndɔ-kuwa-rɔ tə̂, Jeju andə mə kəy tə̂ lə marə tɔkə mbay lə Parijinyɛje ta kusa nɛ̂n.

² Kəm dəwje tɔyn to kə dɔɛ̂ tə̂. Marə dingaw kə̂ məɛ̂ ti ar nɔɛ̂n tə̂.

³ Jeju pa arə Njê-gərəje-Ndu kə Parijinyɛje le nan: «Ndu arə ddəw ta kaji dəw ndɔ-kuwa-rɔ tə̂ wase ndu arə ddəw ang wa?»

⁴ A dilɛ̂je tə̂ ang ngaâ nuwa nje-rɔ-to le najɛ̂ narə nɔtu.

⁵ Goe tə̂ a, n̂-pa narəde nan: «Nân horose tə̂ nəənn bbo ngonnɛ̂ wase mangə laa oso mə buwa-maann tə̂ ndɔ-kuwa-rɔ tə̂ a, nâ kɔrɛ̂ kə ddaka kə tɔkɛ̂ ndɔɛ̂ tə̂ənn njaa ang wa?»

⁶ A dingaje tar kâra ta kila tə̂ ang.

Tar dɔ lo-kisi tə̂ kə̂ kete

⁷ Goe tə̂ a, Jeju pa gusu-tar arə dəwje kə̂ tɔkə mbay lə Parijinyɛje bbarde kə nɛ̂n-kusa, mba noode daw duwaje lo-kisi kə̂ kete ngaâ n̂-pa narəde nan:

⁸ «Bbo marə dəw bbari kusu taa-naan tə̂ a, aw uwa lo-kisi kə̂ kete ang, mba bbo n̂-bbar marə dəw kə̂ utai tɔ

⁹ ngaâ dəw kə̂ bbarse le ddee nan: Inya lo-kisi arɛ̂ a, rɔ-kul a ddai ta kaw kisi lo tə̂ kə̂ guku.

¹⁰ A bbo n̂-bbari a, aw uwa lo-kisi kə̂ guku ta bbo nje-bbari le ddee a, nâ pa nan: Namʼm, aw isi kete. A yeenn a to nɛ̂n wali kəm dəwje tə̂ tɔyn kə̂ a kisije ta nɛ̂n-kusa tə̂ səi.

¹¹ Tɔkɔrɔ, dəw kə̂ dda rɔɛ̂ bo a, dâ dda karə n̂-ddee ngaji baa. A dəw kə̂ dda rɔɛ̂ ngaji, dâ dda karə n̂-ddee bo.»

Tar bbar njê-ndooje kə nɛ̂n-kusa

¹² Jeju pa arə dəw kə̂ bbarɛ̂ le tɔ nan: «Bbo a ta bbar dəwje kə nɛ̂n-kusa kə̂ karâ wase kə̂ lo-kul tə̂ a, ə-bbar njê-buwa-kuraje ləi ang ddəm ngakɔinje ang ddəm njê kə̂ ləi ang ddəm njê-ninn-kəy marije kə̂ toje to njê-nɛ̂n-kingaje ang ddəm mba dâ ddaje nɛ̂n-kusa bbarije nɛ̂n tɔ. Yeenn le a tɔju to inga kuka ləi mban.

¹³ A bbo ə-dda nɛ̂n-kusa tokə bo a, ə-bbar njê-ndooje, njê kə̂ jide wase gɔlde goto, njê-mətəje kə njê-kəm-tɔje.

¹⁴ Yeenn bba a kisi kə rɔ-nəəl, mba dingaje nɛ̂n ta kari ture tə̂ ang. A Lubba a təl nɛ̂n kari ndɔ tə̂ kə̂ dəwje kə̂ gatə gatə kə̂ oyje a ndolje.»

Gusu-tar dɔ dəwje tə̂ kə̂ n̂-bbarde tɔkə kusu tə̂

¹⁵ Marə dəw horo njê kə̂ isije ta nɛ̂n-kusa tə̂ le oo tarjeenn le a, pa arə Jeju nan: «Maji arə dəw kə̂ a kusa nɛ̂n Bbe-kɔn tə̂ lə Lubba!»

¹⁶ A Jeju ilɛ̂ tə̂ nan: «Marə ndɔ, marə dingaw dda tɔkə kusu ngaâ n̂-bbar dəwje nya nya.

¹⁷ Kar nɛ̂n-kusa asə a, nula nje-kula laa narə dəwje kə̂ n̂-bbarde le nan: Ə-ddeeje ngaa, nɛ̂n tɔyn to ngɔsi mban.

¹⁸ A dəwje le tɔyn unnje kutu pa nɛ̂nje kə̂ ɔkude ddəw karə n̂-ddeeje arɛ̂je go naan tə̂. Dəw kə̂ dɔngɔr pa nan: ‹M-ndoko ndɔɔ arə mâ kaw koo bba. M-wali nya, ɔru tar dɔm tə̂.›

¹⁹ Marɛ̂ pa nan: ‹M-ndoko mangəje dɔku arə m-ndiki ta nande koo. M-wali nya, ɔru tar dɔm tə̂.›

²⁰ Marɛ̂ pa bbay nan: ‹M-taa dɛnɛ̂n bbasinɛn bbay arə minga ddəw ta ddee ang.›

²¹ Nje-kula le təl ngaâ ndaji tarjeenn le arə əbbeeje le. A wungu ɔn nje-kəy le ngaâ pa arə nje-kula laa le nan: ‹Aw njangə lo tə̂ kə̂ dəwje banya tə̂ kə dɔ ddəwje tə̂ kə̂ tɔkə bbe tə̂ nəənn, ə-ddee kə njê-ndooje kə njê kə̂ jide wase gɔlde goto, njê-kəm-tɔje kə njê-mətəje lo tə̂ nəənn.›

²² Nje-kula le pa nan: ‹Dəw kə̂ tɔkə, m-dda nɛ̂n kə̂ ndui pa le mban, a kəsə lo nayn baa bbay.›

²³ Əbbə-nje-kulaje le pa arɛ̂ nan: ‹Aw ngann ddəwje tə̂ kə kar ndokoje tə̂, uwa dəwje kə singa arə dandəje kəy ta n̂-ddusu mə kəy ləm tɔyn.›

²⁴ M-pa mari, dəwje kə̂ m-bbarde dɔngɔr le, nɛ̂n-kusa ləm a kɔru ta dəw kâra horode tə̂ ang.»

Ddəw kə̂ ta kunn nɛ̂n go Jeju

²⁵ Dəwje kə̂ banya aw njaje kə Jeju ddəw-boô. N̂-kəl goe ngaâ n̂-pa narəde nan:

²⁶ «Bbo dəw ddee rɔm tə̂ ngaâ ndikim uta bɔɛ̂je kə kɔɛ̂nje kə dɛnɛ̂n laa kə ngannɛ̂ kə ngakɔɛ̂nje kə ngakɔn-nannɛ̂je kə da-rɔɛ̂ njaa ang a, nân to nje-nja gom tə̂ ang.

²⁷ Dəw kə̂ oto kakə-dəsə laa ang ddəm uwa gom ang ddəm a kasə ta to nje-nja gom tə̂ ang.

²⁸ «Mba horose tə̂ nəənn, bbo marə dəw ndiki ta dda tɔkə kəy kə̂ ndəw a, nisi nangə̂ dɔngɔr n̂-tura kɔr narɛ̂ kə̂ nâ tuju noo, bbo n̂-gərə to narɛ le asə ta tunga nɛ̂n kəy le bba nâ kunn-kutu dda kəy le.

²⁹ Mba bbo nungu gɔl kəy le nangə̂ ngaâ nasə ta dda tunga ang a, dəwje tɔyn kə̂ a kooje kəy le a kokeje ngaâ a paje nan:

³⁰ ‹Dəw nəənn unn kutu dda kəy a, asə ta dda tunga ang!›

³¹ Tɔ bbay, bbo tɔkə mbay aw ta ddɔ kə marə tɔkə mbay marɛ̂ a, nisi nangə̂ dɔngɔr nuwa dɔɛ̂ noo, bbo n̂-gərə to nasə ta kaw kə dəwje doro dɔku ddɔ nɛ̂n kə mbay kə̂ dəwje laa ee doro dɔjoo mba tətə nɛ̂n ddɔ le bba nâ kaw.

³² Bbo noo to singɛ̂ asə ang ngaâ nje-marɛ̂ le nayn ddəw əw bbay a, nâ kula dəw karɛ̂ mba duje nɛ̂n kə̂ dâ kasəje ta dda bba karə mə-wul-lɔm təl horode tə̂.»

³³ Yeenn le bba Jeju ila tə̂ nan bbo marə dəw horose tə̂ mbətə nɛ̂n-kingaje laa tɔyn ang a, nâ to nje-nja gom tə̂ ang.

³⁴ «Katə to nɛ̂n kə̂ maji. A bbo dɔɔn lə katə goto kə ddang a, ddi bba dəw a dda kə katə le bba a təl dɔɔn bbay wa?

³⁵ Nɛ̂n kə̂ maji kə̂ katə le a dda karə nangə wase ndɔɔ goto. Dâ kungu katə le kɔrɔ̂. Dəw kə̂ mbia to a, maji karə oo tar nəənn!»