Luku 12 - Dɔnɔn kə̂ Siki: Tar kə̂ aw arə təbbə

Maji ta pa tar lo-kiyɛ̂ tə̂ ang

¹ Kar tə̂ənn njaa, dəwje mbɔnje naan tokə banya ngaâ daw dubbaje gɔl naan. Jeju pa arə njê-njaje goe tə̂ dɔngɔr nan: «Aaje rɔse wum tə̂ lə Parijinyɛje kə̂ to ngəm.

² Nɛ̂n tɔyn kə̂ to lo-kiyɛ̂ tə̂ a tee kə ddaka. Nɛ̂n tɔyn kə̂ n̂-kusu dɔɛ̂ a tee kə ddaka kəm dəwje tə̂.

³ Mba yeenn bba, tarje tɔyn kə̂ ə-paje til tə̂, dəwje a kooje dann karâ. Nɛ̂n kə̂ ə-paje mbi dəw tə̂ lo-to tə̂ kəy, dâ kila nɛ̂n mbər lum dɔ kəy tə̂.»

Maji ta Lubba â bbəəle

⁴ «M-pa marəse, see ngakɔnʼmje kə̂ m-ndikise nya, dəwje kə̂ da-rɔ dəw â a kasəje ta tɔl bbo kəwn lə dəw ang, ə-bbəəljede ang.

⁵ Mâ tɔjuse dəw kə̂ maji karə ə-bbəəleje. Lubba kə̂ bbo tɔl dəw a, ee kə singa ta kilɛ̂ kəm puru tə̂, tɔkɔrɔ m-pa marəse, ne â maji karə ə-bbəəleje.

⁶ Daw labbə ngann əəlje min bba kandə narɛ joo ang wa? A mə Lubba oy dɔ marɛ̂ kâra ang.

⁷ Biin dɔse njaa kara Lubba tura kɔrɛ̂. Ə-bbəəlje ang, mba gatəse uta gatə ngann əəlje kə̂ banya.»

Ndil-mə-nda njaa a kuman njê-njaje go Jeju tə̂ nɔn dəwje tə̂

⁸ «M-pa marəse, dəwje kə̂ paje kəm dəwje tə̂ nan n̂-toje to dəwje ləm a, Ngonn lə dəw a pa kəm anjəje tə̂ lə Lubba nan n̂-toje to lə ne tɔ.

⁹ A dəw kə̂ mayn tar ləm kəm dəwje tə̂ nan: ‹M-gərə Jeju ang›, əman kara mâ mayn tar laa kəm anjəje tə̂ lə Lubba pa nan: ‹Dəw nəənn to dəw ləm ang› tɔ.

¹⁰ Dəw kə̂ pa tar lə Ngonn lə dəw maji ang, Lubba a kɔru tar dɔɛ̂ tə̂. A dəw kə̂ taji Ndil-mə-nda, Lubba a kɔru tar dɔɛ̂ tə̂ ang.

¹¹ Bbo daw kə se kəy mbɔn-naan tə̂ lə Jiipije wase nɔn gɔl njê-gangəje sariya tə̂ wase nɔn gɔl njê-kɔn-bbeje tə̂ a, əjəje tar mba gusu kə̂ â kɔruje nɛ̂n naji ləse ang.

¹² Mba mə kar tə̂ənn njaa, Ndil-mə-nda a tɔjuse tar kə̂ â paje.»

Gusu-tar dɔ nje-nɛ̂n-kinga tə̂ kə̂ əjə tar ang

¹³ Marə dəw horo dəwje tə̂ kə̂ banya pa arə Jeju nan: «Nje-nɛ̂n-tɔju, ə-pa arə ngokɔnʼm arə n-kayn naan nɛ̂n-ndubba ləje.»

¹⁴ Jeju ilɛ̂ tə̂ nan: «Dingaw, nân bba undam to nje-gangə sariya horose tə̂ wase to nje-kaynse nɛ̂n wa?»

¹⁵ Goe tə̂ a, Jeju pa arəde tɔyn nan: «Ə-ngəmje rɔse arə bbo nɛ̂n-kingaje ddase nya nya ang. Mba le dəw to tɔkə nje-nɛ̂n-kinga kara, nɛ̂n-kingaje laa le â nâ kisi nɛ̂n kə təbbə ang!»

¹⁶ Jeju pa marə gusu-tar arəde nan: «Marə nje-nɛ̂n-kinga to, ndɔɔ laa andə nɛ̂n-kusa nya.

¹⁷ Nəjə məɛ̂ tə̂ nan: Ddi â mâ dda wa? Lo kə̂ bo asə ta kuja ko-ndɔɔje ləm kungu tə̂ goto.

¹⁸ Goe tə̂ a, n̂-pa nan: ‹Nɛ̂n kə̂ mâ dda â nəənn: Mâ tin damje ləm, mâ kuru damje kə̂ bo ta mâ mbɔn ko-ndɔɔje ləm kə kəsə nɛ̂n-kingaje ləm tɔyn kungu məɛ tə̂.

¹⁹ Yeenn ngaâ mâ pa karə kəwn ləm mâ pa nan: Kəwn ləm, nɛ̂n-kingaje ləi to mba bbal nya. Uwa rɔi, usa, ay, arə rɔi nəəli.›

²⁰ A Lubba pa arɛ̂ nan: Mbə! Til tə̂ nəənn njaa mâ kɔru kəwn ləi, a nɛ̂nje kə̂ ə-gɔl le a to lə nân ngaa wa?

²¹ Dəw kə̂ mbɔn nɛ̂n-kingaje mba tar dɔɛ̂ njaa bbo mba Lubba ang, dəw le to tokə lə mbə le tɔ.»

Tar kunda-mə kə dɔ Lubba tə̂

²² Goe tə̂ a, Jeju pa arə njê-njaje goe tə̂ nan: «Mba yeenn bba, m-pa marəse: Əjəje tar təbbə ləse mba nɛ̂n-kusa tase ang ddəm mba kubbu kə̂ ta kula rɔse tə̂ ang ddəm.

²³ Mba təbbə to nɛ̂n kə̂ uta nɛ̂n-kusa ngaâ da-rɔ dəw uta kubbu.

²⁴ Ooje əgaanje: N̂-dubbuje nɛ̂n ang ddəm dujaje ko-ndɔɔ ang ddəm lo ngəm nɛ̂n-kusaje ləde goto ddəm dam ləde goto ddəm. A Lubba aw ngəmde kə nɛ̂n-kusa. Ta koo a, gatəse uta gatə əəlje nya bbay!

²⁵ Nân bba horose tə̂, a kasə kila ndɔ ngaji njaa be dɔ ndɔ tə̂ laa kə̂ duninya tə̂, ddəw kəjə-tar tə̂ wa?

²⁶ «Bbo nɛ̂n kə̂ ngaji baa kara asəje ta dda ang a, mba ddi bba kəjə-tar aw uta dɔse mba kəsə nɛ̂nje wa?

²⁷ Ooje gusu kə̂ kakəje kə̂ muû aw nduje nɛ̂n: N̂-ddaje kula ang ddəm dujuje nɛ̂n ang ddəm. A m-pa marəse, Salomɔn njaa kara, ndɔ piti tə̂ laa tɔyn ula kubbu kə̂ kura tokə marɛ̂ kâra horode ang.

²⁸ Bbo Lubba ula kubbu kə̂ kura kakəje kə̂ mə mu tə̂ kə̂ toje bbokənɛn ngaâ bara a, dâ kungude purô a, Lubba a dda kə se karə uta yeenn ang wa, see njê kə̂ mə-kunn ləse ngaji baa!

²⁹ Sese, maji karə ə-sangəje nɛ̂n kə̂ ta kusa ang ddəm, nɛ̂n kə̂ ta kay ang ddəm ta ə-jɔkuje rɔse ang.

³⁰ Mba nɛ̂njeenn tɔyn, dəwje kə̂ duninya tə̂ nəənn kə̂ gərəje Lubba ang â aw sangəje kə kar tɔyn. Bɔsese gərə to ə-ndikije ta kinga nɛ̂njeenn le.

³¹ Maji karə ə-sangəje Bbe-kɔn laa dɔngɔr, a nâ karəse nɛ̂njeenn tɔyn dɔɛ̂ tə̂.

³² Sese kə̂ ə-toje tokə lə nɛ̂n-kuulje kə̂ banya ang le ə-bbəəlje ang, mba Bɔsese oo maji ta karəse Bbe-kɔn le.»

Maji ta ngəm nɛ̂n-kingaje rɔ Lubba tə̂

³³ «Ə-labbəje nɛ̂n-kingaje ləse ta ə-kaynje narɛ̂ dangətəje. Uruje bbɔl narɛ kə̂ a ngisi ang ta unguje nɛ̂n-kingaje ləse darâ, lo tə̂ kə̂ nɛ̂nje le a tuju tə̂ ndɔ kâra ang. Lo kə̂ gɔl njê-bbokoje a kɔru ang ddəm sɔlɔlɔ a kɔn nɛ̂n tə̂ ang ddəm.

³⁴ Mba lo kə̂ nɛ̂n-kinga ləse to tə̂ a, məse a to tə̂ tɔ.»

Tar gɔl rɔ nginan nɛ̂n Ngonn lə dəw

³⁵ «Maji karə kubbu dda kula ləse nayn rɔse tə̂. Arəje puru lambe ləse oy ang.

³⁶ Sese, maji karə ə-toje tokə dəwje kə̂ aw ngəbbəje karə əbbədede in lo kusu taa-naan tə̂ ddee ngaâ unda ta-kəy a, ɔruje kə ngɔru arɛ̂je.

³⁷ Maji arəde, dede kə̂ njê-kulaje kə̂ əbbədede a tee kingade dɔ bbi tə̂ ang. Tɔkɔrɔ m-pa marəse, əbbədede le a kula kubbu kula laa, nâ karə disije ta tabələ tə̂ ngaâ nâ ddee karəde nɛ̂n-kusa.

³⁸ Le n̂-təl kar tə̂ kə̂ lo mɔngu wase ta lo-karɛ tə̂ njaa bba ningade baann kara maji arəde.

³⁹ «Ə-gərəje kə majɛ̂, bbo nje-kəy gərə kar kə̂ nje-bboko a ddee nɛ̂n a, nâ kinya karə nandə kə̂y laa ang.

⁴⁰ Sese kara arje dɔ gɔlse tə̂, mba Ngonn lə dəw a ddee kə kar kə̂ aw əjəje to nâ ddee nɛ̂n le ang.»

Nje-kula kə̂ to gatə gatə ngaâ to nje-kəm-karɛ

⁴¹ Piyɛr ilɛ̂ tə̂ nan: «Əbbə-dəwje, jeje â ə-pa gusu-tar nəənn mbaje wase dəwje tɔyn wa?»

⁴² Əbbə-dəwje le ilɛ̂ tə̂ nan: «Nân to nje-ngəm nɛ̂n kə̂ to gatə gatə ddəm to nje-kəm-karɛ ddəm wa? To ne kə̂ əbbeeje a kinya njê-kulaje laa jia tə̂ karə n̂-kaynde nɛ̂n-kusa kə karɛ̂ karɛ̂.

⁴³ Maji arɛ̂, ne kə̂ əbbeeje le təl ddee ingɛ̂ ta kula tə̂ le.

⁴⁴ Tɔkɔrɔ, m-pa marəse, əbbeeje le a kinya nɛ̂n-kingaje laa tɔyn mə jia tə̂ karə n̂-ngəm.

⁴⁵ A bbo nje-kula le pa məɛ̂ tə̂ nan: ‹Əbbəmje a ddee njangə ang bbay!› Ngaâ nuru dɔ njê-kulaje kə̂ dingaw kə njê kə̂ dɛnɛ̂n tə̂ le naw tundade, nusa nɛ̂n ngaâ nay nɛ̂n narə ddɛɛ̂ a,

⁴⁶ əbbeeje le a ddee kə ndɔ kə̂ nəjə ang ddəm kə kar kə̂ nâ gərə ang ddəm. Nâ tubbɛ̂ ngaâ nâ dda saa nɛ̂n ddəw kâra baa tokə daw dda kə bbərəje kə̂ kula-ddade to kə dɔgɔlɛ̂ ang le.

⁴⁷ «Nje-kula kə̂ gərə nɛ̂n kə̂ mə əbbeeje ndiki, a gɔl nɛ̂n ang ddəm dda nɛ̂n kə̂ əbbeeje ndiki le ang ddəm a kinga kunda nya.

⁴⁸ A nje-kula kə̂ nɛ̂n kə mə əbbeeje ndiki gərə ang le, bbo n̂-dda nɛ̂n kə̂ asə kunda a, dâ kundɛ̂ ngaji baa. Dəw kə̂ darɛ̂ nɛ̂n bo nya, dâ duju nɛ̂n bo nya jia tə̂. Dəw kə̂ dinya nɛ̂n jia tə̂ nya, dâ duje nɛ̂n nya tɔ.»

Dəwje a tinje naan mba Jeju

⁴⁹ «M-ddee ta kila puru dɔ nangə tə̂. A m-ndiki ta karə puru le ɔn njaa ngaa.

⁵⁰ Marə batɛm kə̂ dâ ddam to. Məm a kar taar ndərəng ndɔ kə̂ dâ ddam nɛ̂n batɛm le a kasə.

⁵¹ Əjəje to m-ddee ta karə mə-wul-lɔm to dɔ nangə tə̂ wa? Baann ang. M-pa marəse, tin-naan â m-ddee nɛ̂n.

⁵² Mba unn kute bbokənɛn, bbo dəwje min isije mə kəy tə̂ a, dâ tinje naan. Njê kə̂ mota a mbətəje njê kə̂ joo ngaâ njê kə̂ joo a mbətəje nje kə̂ mota.

⁵³ Bɔ a mbətə ngonnɛ̂ kə̂ dingaw ngaâ ngonn kə̂ dingaw a mbətə bɔɛ̂je. Kɔn a mbətə ngonnɛ̂ kə̂ dɛnɛ̂n ngaâ ngonn kə̂ dɛnɛ̂n a mbətə kɔɛ̂nje. Kɔn dingawje a mbətə ngonn mumɛ̂ kə̂ dɛnɛ̂n ngaâ dɛnɛ̂n a mbətə mumɛ̂je kə̂ dɛnɛ̂n.»

Maji ta gərə nɛ̂nje kə̂ aw toje mə ndɔje tə̂ nəənn

⁵⁴ Jeju təl pa arə dəwje kə̂ banya nan: «Bbo ndɔ kə̂ ooje ndi il lo kə̂ kar aw andə tə̂ a, ə-paje nan: ‹Ndi aw ddee, a ndi le ddee.›

⁵⁵ Ngaâ ndɔ kə̂ ooje ləl kə̂ dagoo aw ula a, ə-paje nan: ‹Lo a tunga, a tɔkɔrɔ lo tunga.›

⁵⁶ Njê-ngəmje! Bbo aaje dɔ nangə wase mə dara a, ə-gərəje nɛ̂n kə̂ a to. A ə-gərəje nɛ̂nje kə̂ aw toje mə ndɔje tə̂ nəənn ang tokə baânn wa?

⁵⁷ «Mba ddi bba sese kə da-rɔse njaa ə-gərəje nɛ̂n kə̂ to gatə gatə ang wa?

⁵⁸ Bbo nje-baan ləi aw aw səi kə nɔn gɔl nje-gangə sariya tə̂ ngaâ ə-naynje ddəw-boô bbay a, maji karə ə-gɔl saa tar, mba n̂-tee səi nɔn gɔl nje-gangə sariya tə̂ a, nje-gangə sariya a kilai ji mbamba tə̂ ngaâ mbamba le a kilai kəy-kula tə̂.

⁵⁹ M-pa mari, â kuka narɛ kə̂ dâ kɔju dɔi tə̂ ndərəng tunga bba dâ kɔri kəy-kula tə̂ le.»