Luku 1 - Dɔnɔn kə̂ Siki: Tar kə̂ aw arə təbbə

Gɔju tar dɔ makəturu tə̂ le

^1-2 Dəw kə̂ bo Topil, marə nɛ̂nje njaje horoje tə̂ ngaâ marə dəwje kə̂ ooje nɛ̂nje le kə kəmde, kunn-kute tə̂ njaa paje arəjeje. Dede kə̂ dooje nɛ̂nje le kə kəmde le n̂-təlje n̂-ddeeje to njê-paje tar lə Lubba. Yeenn bba dəwje nya unnje kutu dda makəturu mba kɔru nɛ̂n gəl nɛ̂nje kə̂ ndayje horoje tə̂ ləw.

³ Muru gəl nɛ̂njeenn le tɔyn ndərəng ngirɛ̂ tə̂ kə majɛ̂ ngaâ əman njaa kara moo maji ta kuja nɛ̂njeenn le kə goe goe makəturu tə̂ kari, əi dəw kə̂ bo Topil,

⁴ mba karə ə-gərə to nɛ̂nje tɔyn kə̂ n̂-tɔji to nɛ̂nje kə̂ tɔkɔrɔ.

Mbər kuju Jan-Batisi

⁵ Bbal tə̂ kə̂ Erodə to tɔkə mbay nangə tə̂ kə̂ Jude, marə nje-polo Lubba ee tə̂ənn. Ria nan Jakari, n̂-to marə njê-polo Lubba kə̂ gəl Abiya tə̂. Dɛnɛ̂n laa ria nan Elijabɛtə, n̂-to dəw kə̂ gəl Arɔn tə̂.

⁶ Dede joo kəm n̂-toje gatə gatə kəm Lubba tə̂ ddəm n̂-njaje kə turu ndu lə Əbbə-dəwje ddəm tar to dɔde tə̂ ang.

⁷ A dujuje ngonn ang, mba Elijabɛtə aw katə ngaâ dede joo kəm n̂-bbukaje nya.

⁸ Kar tə̂ kə̂ Jakari aw dda kula nɔn gɔl Lubba tə̂, mba to ndɔ kə̂ kuwa-dɔ-naan ləde â a dda kula.

⁹ Ddəw nɛ̂n-dda tə̂ lə njê-poloje Lubba, əlɛmtɛɛn oso dɔ Jakari tə̂ ta karə andə kəy-polo Əbbə-dəwje tə̂, mba ro dukann.

¹⁰ Dəwje kə̂ banya arje ddaka aw dujuje Lubba, kar tə̂ kə̂ naw ro dukann le.

¹¹ A marə anjə lə Əbbə-dəwje tee inga Jakari, nar mbɔr bann ro dukann tə̂ le ər kɔl.

¹² Jakari unn kəmɛ̂ ooe a, ndile ɔru ngaâ bbəəl uta dɔɛ̂.

¹³ A anjə le pa arɛ̂ nan: «Ə-bbəəl ang Jakari, mba Lubba oo ndu-nɔn ləi. Dɛnɛ̂n ləi Elijabɛtə a kuju ngonn kə̂ dingaw kari ngaâ â kunda ria nan Jan.

¹⁴ A to nɛ̂n kə̂ a kari rɔ-nəəl ddəm dəwje nya a ddaje rɔ-nəəl ddəm mba ngonn kə̂ dâ kuje le.

¹⁵ Mba nâ ddee bo nɔn Əbbə-dəwje tə̂, koto kə̂ to bɛn a kɔru tɛɛ̂ ang ddəm koto kə̂ in a kɔru tɛɛ̂ ang ddəm n̂-nayn mə kɔɛ̂nje tə̂ njaa bbay a, Ndil-mə-nda a dduse.

¹⁶ Nâ dda bba karə ngann Ijarayɛlje nya təlje kə rɔ Əbbə-dəwje tə̂ kə̂ to Lubba ləde.

¹⁷ Nâ nja nɔn Lubba tə̂ kə ndil lə Eli kə̂ to nje-kila mbər tar lə Lubba ddəm kə singa lə Eli le ddəm, mba turu mə bɔje kə rɔ ngannde tə̂ ddəm nâ dda bba karə njê-dɔ-ngəngje təlje unnje ddəw kəm-karɛ lə dəwje kə̂ gatə gatə ddəm nâ gɔl dəwje karə arje dɔ gɔlde tə̂ mba ngəbbə Əbbə-dəwje.»

¹⁸ Jakari pa arə anjə le nan: «Ddi â a tɔjum to tar nəənn to tar kə̂ tɔkɔrɔ wa? Mba m-to bbuka ngaâ bbal dɛnɛ̂n ləm nday nya tɔ.»

¹⁹ Anjə le ilɛ̂ tə̂ nan: «Əman m-to Gabriyɛl nje-kar nɔn Lubba tə̂. Lubba ulam ta pa tar kari, ta ndaji tar kə̂ maji kari.

²⁰ Oo, gɔsi a kutu ngaâ â kuman kə pa tar pin ndərəng ndɔ kə̂ nɛ̂njeenn le a toje. Mba tarje kə̂ m-pa mari kə̂ karɛ̂ asə a, a ddee to tar kə̂ tɔkɔrɔ le, ə-ndiki tə̂ ang.»

²¹ Dəwje kə̂ arje ddaka aw ngəbbəje Jakari le aw əjəje tar, mba goe əw nya mə kəy-polo Lubba tə̂.

²² N̂-tee ddaka a, numan kə pa tar pin ngaâ dəwje le gərəje to noo marə nɛ̂n tokə ninjeenn kəy-polo Lubba tə̂ le. N̂-dda jia narəde, gɔsɛ̂ utu nyɔm.

²³ Ndɔ dda kula laa tunga a, n̂-təl naw kə̂y laa.

²⁴ Goe tə̂ ngaji a, dɛnɛ̂n laa Elijabɛtə uwa səm. Niya rɔɛ̂ asə nɛyn min, n̂-pa nan:

²⁵ «Nɛ̂n nəənn to nɛ̂n kə̂ Əbbəmje dda mbam kar tə̂ kə̂ məɛ̂ ndiki, ta kɔru nɛ̂n rɔ-kul kəmʼm tə̂ horo dəwje tə̂.»

Mbər kuju Jeju

²⁶ Elijabɛtə uwa səm kə̂ nɛyn misan a, Lubba təl ula anjə laa Gabriyɛl marə bbe tə̂ kə̂ ria nan Najarɛtə nangə tə̂ kə̂ Galile.

²⁷ Nulɛ̂ rɔ ngonn kə̂ dɛnɛ̂n tə̂ kə̂ gərə ngaw ang bbay kə̂ to nje-mɔrɔ lə Jojɛpə, ngonn kə̂ gəl Dabbiti tə̂. Ri ngonn kə̂ dɛnɛ̂n kə̂ gərə ngaw ang bbay le nan Mari.

²⁸ Anjə le andə dɔɛ̂ tə̂ ngaâ pa nan: «Lapiya! Əi kə̂ Lubba dda səi mə-maji nya. Əbbə-dəwje ee səi.»

²⁹ Mə Mari unda dɔ binya ngaâ nəjə n̂-pa nan: «Lapiya ddi â tokə be nəənn wa?»

³⁰ Anjə le pa arɛ̂ nan: «Ə-bbəəl ang Mari, mba Lubba dda səi mə-maji.

³¹ Oo, â kuwa səm, â kuju ngonn kə̂ dingaw ngaâ â kunda ria nan Jeju.

³² Ngonn le a ddee bo ngaâ dâ bbarɛ̂ nan Ngonn lə Nje-kisi ddutu dara tə̂, Əbbə-dəwje Lubba a karɛ̂ ngende-mbay lə kɛɛ̂je Dabbiti.

³³ Nâ kɔn dɔ njê kə̂ gəl Jakobbo tə̂ ndɔ kə ndɔ. Kɔn-mbay laa a kɔsu kɔyn ndɔ kâra ang.»

³⁴ Mari pa arə anjə le nan: «Nɛ̂ɛnn le a to tokə baânn wa? Mba m-gərə ngaw ang bbay.»

³⁵ Anjə le ilɛ̂ tə̂ nan: «Ndil-mə-nda a ddee dɔi tə̂ ngaâ ndil singa-mɔngu lə Nje-kisi ddutu dara tə̂ a dəbbə dɔi tə̂. Mba yeenn bba Ngonn kə̂ maji tɔyn kə̂ â kuje le, dâ bbarɛ̂ nan Ngonn lə Lubba.

³⁶ Oo, nuju ləi Elijabɛtə kə̂ bbuka nya njaa kara uwa səm arə ne kə̂ daw bbarɛ̂ nan kaw-katə le, nuwa səm kə̂ nɛyn misan ngaa.

³⁷ Mba marə nɛ̂n kâra kə̂ nya Lubba goto.»

³⁸ Mari pa nan: «M-to bbərə lə Əbbə-dəwje. Maji karə nɛ̂n tɔyn kə̂ ə-pa arəm le ddee to nɛ̂n kə̂ tɔkɔrɔ mbam.» Anjə le inyɛ̂ a ɔtu.

Mari aw oo Elijabɛtə

³⁹ Mə ndɔje tə̂ənn, Mari in taar unn ddəw kə ngɔru aw dɔ ddingirije tə̂ kə̂ marə bbe tə̂ kə̂ Juda.

⁴⁰ Nandə kəy lə Jakari ngaâ n̂-dda lapiya Elijabɛtə.

⁴¹ Elijabɛtə oo ndu Mari kə̂ arɛ̂ nɛ̂n lapiya le a, ngonn kə̂ məɛ̂ tə̂ in njururu. Ndil-mə-nda ddusu Elijabɛtə,

⁴² ngaâ uru əkii nan: «Lubba bbar tar kə̂ maji dɔi tə̂ uta dɛnɛ̂nje tɔyn, n̂-bbar tar kə̂ maji dɔ ngonn tə̂ kə̂ â kuje le tɔ!

⁴³ Əman nəənn m-to dəw ddi bba kɔn Əbbəmjeje ddee rɔm tə̂ wa?

⁴⁴ Mba oo, ndui kə̂ arəm nɛ̂n lapiya le njaa moo a, ngonn kə̂ məm tə̂ in njururu kə rɔ-nəəl.

⁴⁵ Maji ari, əi dɛnɛ̂n kə̂ unda məi to tar kə̂ Əbbə-dəwje arə n̂-pa dari, a ddee to tar kə̂ tɔkɔrɔ.»

Mari ɔsu pa wal nɛ̂n Lubba

⁴⁶ Mari pa nan: «Mɔsu gaji Əbbə-dəwje ddəm

⁴⁷ m-dda rɔ-nəəl mba Lubba kə̂ Nje-kajim ddəm

⁴⁸ mba nunn kəmɛ̂ noo bbərə dɛnɛ̂n laa kə̂ to nɛ̂n ang. Tɔkɔrɔ njaa, a kunn-kute bbokənɛn, gəl-dəwje tɔyn a bbarəmje to dɛnɛ̂n kə̂ nje-rɔ-nəəl,

⁴⁹ mba Nje-singa-mɔngu dda nɛ̂nje kə̂ bo nya mbam, ria nan Nje-mə-nda.

⁵⁰ Maji laa to kə ndɔ kə ndɔ mba dəwje tɔyn kə̂ aw bbəəleje.

⁵¹ N̂-tɔju singa-mɔngu laa kə jia. Dəwje kə̂ kəjə koo-rɔ-bo to məde tə̂ n̂-sanrɛde kâra kâra.

⁵² Nuwa tɔkə mbayje ngende-mbay tə̂ ləde nundade nangə̂ ngaâ nuwa ji njê kə̂ məde to mə ngonn-kasə kə taar.

⁵³ Narə nɛ̂n-kinga njê kə̂ bbo ddade ngaâ n̂-tubba njê-nɛ̂n-kingaje jide baa.

⁵⁴ Numan bbərəje laa kə̂ to ngann Ijarayɛlje mba nole məɛ̂ dɔ maji tə̂ laa

⁵⁵ ddəw ndue tə̂ kə̂ nunn narə Abaraham, kə ngann məɛ̂ kə ndɔ kə ndɔ le.»

⁵⁶ Mari dda asə nɛyn mota rɔ Elijabɛtə tə̂ bba təl aw bbeê laa.

Tar kuju Jan-Batisi

⁵⁷ Kar kuju lə Elijabɛtə asə ngaâ nuju ngonn kə̂ dingaw.

⁵⁸ Njê-ninn-kəy marɛ̂je kə njê-nujuje laa ooje tar maji kə̂ ngəng kə̂ Əbbə-dəwje dda saa le a, n̂-ddaje rɔ-nəəl saa tɔ.

⁵⁹ Duju ngonn le ngaâ ndɔ jijoo goe tə̂ a, dəwje ddeeje ta kuja ganja ngonn-əngutay le ngaâ n̂-ndikije ta kunda ri bɔɛ̂je Jakari dɔɛ̂ tə̂.

⁶⁰ A kɔɛ̂nje pa nan: «Baann ang, ria nan Jan.»

⁶¹ Dəwje le paje nan: «Marə dəw kâra kə̂ ria tokə baann goto horo nujuje tə̂ ləi.»

⁶² Ngaâ n̂-ddaje jide darə bɔɛ̂je ta gərə se ri kə̂ baânn bba nâ kunda dɔ ngonn tə̂ le wa?

⁶³ Jakari duju bəkərə kuja makəturu ngaâ uja makəturu tə̂ nan: «Ria nan Jan.» Dɔ dəwje ayn.

⁶⁴ Karɛ̂ tə̂ənn njaa gɔsɛ̂ uja, ndɔɛ̂n tutu. N̂-pa tar ngaâ narə wooyo Lubba.

⁶⁵ Dəwje tɔyn kə̂ ddaje bbe mbɔrde tə̂ ddəm dəwje tɔyn kə̂ isije dɔ ddingirije tə̂ kə̂ dɔ nangə tə̂ kə̂ Jude ddəm bbəəlje. Daw paje tar dɔ nɛ̂nje tə̂ kə̂ toje le.

⁶⁶ Dəwje tɔyn kə̂ ooje tar le aw əjəje ngaâ paje nan Ngonn nəənn a to dəw ddi â nəənn wa? Tɔkɔrɔ njaa ji Əbbə-dəwje to dɔɛ̂ tə̂.

Jakari ɔsu pa wal Lubba

⁶⁷ Ndil-mə-nda ddusu bɔɛ̂je Jakari ngaâ n̂-ndaji tar lə Lubba tokə lə nje-kila mbər tar lə Lubba, n̂-pa nan:

⁶⁸ «Jɔsuje gaji Əbbə-dəwje, Lubba lə Ijarayɛl, mba n̂-ddee numan dəwje laa ddəm nuka dɔde ddəm.

⁶⁹ Ngaâ narəje Nje-kaji-dəwje kə̂ to nje-singa-mɔngu, kə̂ in gəl bbərə tə̂ laa Dabbiti,

⁷⁰ tokə narə njê-kilaje mbər tar laa kə̂ maji tɔyn paje tarɛ̂ ləw baa le,

⁷¹ tar tee ləje ji njê-baanje tə̂ ddəm ji dəwje tə̂ tɔyn kə̂ məde mbətəje ddəm

⁷² mba n̂-dda mə-maji kə bɔjejedede ddəm nole məɛ̂ dɔ dɔnɔn tə̂ laa kə̂ maji tɔyn kə̂ nɔsu kə bɔjejedede ddəm

⁷³ ddəw kâra baa kə yo kə̂ nunda narə bɔjeje Abaraham.

⁷⁴ Yeenn bba nɔruje ji njê-baanje tə̂ ngaâ narəje ddəw ta karə n̂-pole kə bbəəl ang,

⁷⁵ ngaâ karə n-ddee maji tɔyn ddəm n-to gatə gatə ddəm kəmɛ̂ tə̂, ndɔje tə̂ ləje tɔyn kə̂ dɔ nangə tə̂.

⁷⁶ A əi, ngonnəm le, dâ bbari nan nje-kila mbər tar lə Nje-kisi ddutu dara tə̂. Mba â nja nɔn Əbbə-dəwje tə̂ ta dda ddəwje laa,

⁷⁷ ta tɔju dəwje laa tar kaji ddəw kɔru tar majangje ləde dɔde tə̂.

⁷⁸ Ddəw maji tə̂ lə Lubba ləje kə̂ ndiki nɛ̂n je nya, ddəw maji tə̂ənn le bba, bbo kar ubba mə dara tə̂ a, aw uru dɔje tə̂,

⁷⁹ mba karə njê kə̂ isije lo ndul tə̂, kə njê kə̂ isije kɔ ndil yo tə̂, kəmde uja ddəm, mba tɔjuje ddəw kə̂ ja kinga nɛ̂n mə-wul-lɔm ddəm tɔ.»

Jan aw tɔkə

⁸⁰ Ngonn le aw tɔkə ddəm kəjə laa aw sangə ddəm. N̂-nayn mə kɔr tə̂ ndərəng ndɔ kə̂ naw tɔju nɛ̂n rɔɛ̂ nɔn ngann Ijarayɛlje tə̂.