Kulaje 8 - Dɔnɔn kə̂ Siki: Tar kə̂ aw arə təbbə

¹ Tɔl kə̂ n̂-tɔl Etiyɛnn le Sɔl ndiki tə̂. Ndɔɛ̂ tə̂ənn njaa, dəwje unnje kutu kula kəm Egilisi kə̂ Jerujalɛm ndoo tə̂. Njê-mə-kunnje sanrɛje naan dɔ nangə tə̂ kə̂ Jude kə Samari, a njê-kaw-kulaje â naynje.

Nɛ̂n-singa kə̂ inga njê-mə-kunnje

² Dəwje kə̂ aw bbəəlje Lubba dubbuje Etiyɛnn ngaâ n̂-nɔɛ̂nje nya.

³ A Sɔl unn kutu tuju Egilisi. Nandə mə kəyje tə̂, nuwa dingawje kə dɛnɛ̂nje kə singa nungude kəy-kula tə̂.

Pilipi tɔju Tar kə̂ Maji Samari

⁴ Dəwje kə̂ sanrɛje naan le aw ilaje mbər tar lə Lubba to Tar kə̂ Maji loje tə̂ kə̂ daw ndayje tə̂.

⁵ Yeenn bba, Pilipi tee aw marə bbe tə̂ kə̂ Samari ngaâ ila mbər tar lə Kristə.

⁶ Njê-bbeje kə̂ ddeeje tokə banya le tɔyn njaa aw tukaje mbide aw ooje nɛ̂n tar lə Pilipi le, mba dooje tar nɛ̂n-mɔrije kə̂ naw dda kə mbide ddəm dooje nɛ̂nje le kə kəmde ddəm.

⁷ Ndilje kə̂ maji ang nya nya teeje mə dəwje tə̂ kə ddang, dundaje əkii bba n̂-teeje nɛ̂n ngaâ dəwje nya kə̂ dəbbə rɔde oy kə njê-mətəje ajije.

⁸ Rɔ dəwje kə̂ mə bbe tə̂ənn le nəəlde nya.

⁹ Marə dəw kə̂ ria nan Simɔn isi mə bbe tə̂ənn ləw baa. N̂-to nje-əmbili ngaâ naw dda nɛ̂nje kə̂ aw dum dɔ dəwje tɔyn kə̂ nangə tə̂ kə̂ Samari. N̂-dda rɔɛ̂ to dəw kə̂ ngəng nya.

¹⁰ Dəwje tɔyn aw tukaje mbide aw ooje nɛ̂n tar laa, unn kute dɔ dəwje tə̂ kə̂ ngaji ndərəng dɔ njê kə̂ tɔkə tə̂. Dəwje paje nan: «Dəw nəənn to singa-mɔngu kə̂ in rɔ Lubba tə̂ kə̂ daw bbar nan Tɔkə singa-mɔngu.»

¹¹ Daw tukaje mbide daw dooje nɛ̂n tar laa, mba n̂-dda nɛ̂nje kə̂ dum dɔde bbal banya nya ddəw nɛ̂n-mɔrije tə̂ laa kə̂ naw dda.

¹² A dəwje tɔyn, dingawje kə dɛnɛ̂nje kə̂ ooje məde tə̂ kə Tar kə̂ Maji kə̂ Pilipi tɔju dɔ Bbe-kɔn tə̂ lə Lubba ddəm dɔ tar tə̂ lə Jeju-Kristə ddəm ingaje batɛm.

¹³ Simɔn njaa kara oo məɛ̂ tə̂ tɔ ngaâ n̂-ddɛɛ̂ batɛm. Ninya go Pilipi ang ngaa. Noo tɔkə nɛ̂n-mɔrije kə nɛ̂nje kə̂ dum dɔ koo kə̂ Pilipi aw dda le a, dɔɛ̂ ayn.

¹⁴ Njê-kaw-kulaje kə̂ Jerujalɛm tə̂ ooje nan dəwje kə̂ Samari taaje tar lə Lubba. Yeenn bba dulaje Piyɛr kə Jan darəde.

¹⁵ N̂-teeje Samari le a, n̂-dujuje Lubba mba dəwje kə̂ Samari le karə dingaje Ndil-mə-nda.

¹⁶ Mba Ndil-mə-nda ddee dɔ marə dəw tə̂ kə̂ Samari kâra ang bbay. Nɛ̂n kə̂ dingaje njaa â to batɛm kə̂ n̂-ddade kə ri Əbbə-dəwje Jeju.

¹⁷ Yeenn bba, Piyɛr de kə Jan dilaje jide dɔde tə̂ darə dingaje Ndil-mə-nda.

¹⁸ Simɔn oo Ndil kə̂ njê-kaw-kulaje ilaje jide dɔ dəwje tə̂ arə dingaje le a, n̂-ddee kə narɛ narəde

¹⁹ n̂-pa nan: «Arəmje singa nəənn tɔ ta bbo dəw njaa mila jim dɔɛ̂ tə̂ a, inga Ndil-mə-nda.»

²⁰ A Piyɛr ilɛ̂ tə̂ nan: «Maji karə oy kə narɛ ləi tɔyn, mba əjə to â kasə ndoko nɛ̂n kə̂ Lubba aw arə dəw baa kə narɛ.

²¹ Marə nɛ̂n kə̂ to mbai wase nɛ̂n kə̂ osoi tə̂ kâra to nəənn ang. Mba kəjə ləi to gatə gatə kəm Lubba tə̂ ang.

²² Inya kəjə ləi kə̂ maji ang le ta ə-duju Əbbə-dəwje arə ddəw to a, nɔru tar kəjəje kə̂ maji ang le dɔi tə̂ kə ddang.

²³ Mba moo a, bbo kə̂ maji ang kə̂ to ənga kinga nɛ̂n ddusu məi ngaâ ə-to bbərə lə nɛ̂n-dda kə̂ gatə gatə ang.»

²⁴ Simɔn le ila Piyɛr de kə Jan tə̂ nan: «Sese njaa, ə-dujuje Əbbə-dəwje mbam karə nɛ̂n kə̂ ə-paje nəənn ingam ang.»

²⁵ Piyɛr de kə Jan n̂-paje tar-naji lə Əbbə-dəwje, dilaje mbər tar laa ngaâ n̂-təlje kə Jerujalɛm. Dilaje mbər Tar kə̂ Maji mə bbeje tə̂ nya nya kə ddəw ddəw nangə tə̂ kə̂ Samari.

Tar lə Pilipi kə dəw kə̂ Etiyopi

²⁶ Marə anjə lə Əbbə-dəwje pa arə Pilipi nan: «Unn ddəw kə̂ aw kə dagoo, kə̂ in Jerujalɛm aw kə Gaja. Kar tə̂ənn dəw aw nja ddəw tə̂ le ang.»

²⁷ Pilipi le ɔtu kə ngɔru aw ngaâ inga marə dingaw kə ddəw. Dingaw le to enuku, n̂-to dəw kə̂ Etiyopi. N̂-to tɔkə dəw kə̂ aw ngəm nɛ̂n-kingaje lə Kandas kə̂ to tɔkə mbay-dɛnɛ̂n kə̂ Etiyopi. Dingaw le ddee Jerujalɛm mba polo Lubba

²⁸ ngaâ aw təl kə bbeê laa. Nisi sarɛtə tə̂ laa naw tura makəturu lə Ejayi kə̂ to nje-kila mbər tar lə Lubba.

²⁹ Ndil pa arə Pilipi le nan: «Aw kə ngɔru aw inga sarɛtə toonn.»

³⁰ Pilipi ayn ngɔru aw inga sarɛtə le ngaâ oo ndu dingaw kə̂ Etiyopi le kə̂ a aw tura makəturu lə Ejayi kə̂ to nje-kila mbər tar le. Pilipi duju tar enuku le nan: «Ə-gərə tar kə̂ aw tura makəturu tə̂ nəənn njaa wa?»

³¹ Dingaw le ila tə̂ nan: «Bbo marə dəw umanʼm ang a, mâ gərə tar le tokə baânn wa?» Yeenn bba, n̂-bbar Pilipi le karə aal sarɛtə le isi mbɔrɛ̂ tə̂.

³² Tar kə̂ makəturu tə̂ kə̂ naw tura le tokə be: «N̂-to ddəw kâra baa kə batə kə̂ daw saa kə lo tɔl daje tə̂, n̂-to tokə ngonn batə kə̂ daw duja biiɛ̂n, a nɔn ang. Nɔru tɛɛ̂ n̂-pa nɛ̂n tar ang.

³³ N̂-ddɛɛ̂ darə n̂-ddee to nɛ̂n ang ngaâ darɛ̂ naji laa ang. Nân bba a pa tar lə ngannɛ̂ wa? Mba n̂-dda darə təbbə laa kə̂ dɔ nangə tə̂ unda ngangɛ̂.»

³⁴ Enuku le pa arə Pilipi nan: «M-wali nya, ə-pa arəm moo. Nân njaa gatə bba nje-kila mbər tar lə Lubba le aw pa tar laa nəənn wa? To tar laa ne njaa wase tar lə marə dəw kə̂ dang wa?»

³⁵ Yeenn ngaa, Pilipi unn kutu tar dɔ tar tə̂ kə̂ enuku le tura makəturu tə̂ nəənn le bba tɔjɛ̂ nɛ̂n Tar kə̂ Maji lə Jeju.

³⁶ Daw dawje bbay a, n̂-teeje ta marə maann tə̂ ngaâ enuku le pa nan: «Maann â nəənn, a ddi bba ɔku ddəw karə minga batɛm wa?» [

³⁷ Pilipi le pa nan: «Bbo oo məi tə̂ kə Jeju a, â kasə kinga batɛm.» Dingaw le ilɛ̂ tə̂ nan: «Moo məm tə̂ to Jeju to Ngonn lə Lubba.»]

³⁸ Goe tə̂ a, narə Sarɛtə le ar lo kâra ngaâ de kə Pilipi le joo kəm n̂-ddisije dawje mə maann tə̂ le ngaâ Pilipi ddɛɛ̂ batɛm.

³⁹ Dinje mə maann tə̂ le n̂-teeje a, Ndil lə Əbbə-dəwje unn Pilipi ɔtu nɛ̂n arə enuku le ooe ang. A naw lo laa kə rɔ-nəəl.

⁴⁰ Pilipi le ubba nangə tə̂ kə̂ Ajotə ngaâ tɔju Tar kə̂ Maji mə bbeje tə̂ tɔyn kə ddəw ddəw tee nɛ̂n bbe tə̂ kə̂ Sejare.