Kulaje 25 - Dɔnɔn kə̂ Siki: Tar kə̂ aw arə təbbə

Pɔl ɔru naji laa nɔn ngonn mbay Pestus tə̂

¹ Pestus tee nangə tə̂ kə̂ nɔn dɔɛ̂ ngaâ ndɔ mota goe tə̂ a, nin Sejare le naw Jerujalɛm.

² Mbayje lə njê-poloje Lubba kə tɔkə dəwje lə Jiipije awje nɔɛ̂n tə̂ aw səkəje Pɔl. N̂-dujeje nya karə

³ n̂-dda kə de mə-maji, ta narə n̂-təl kə Pɔl Jerujalɛm. Daw ddaje baann ta kiya baan ddəw-boô tɔlje Pɔl.

⁴ A Pestus pa nan: «Kəy-kula kə̂ Sejare â dila Pɔl tə̂. Əman njaa kara mbɔr ang a, mâ təl Sejare tɔ.

⁵ Maji karə marə dəwje kə̂ kəmde ɔru kə̂ eeje horose tə̂ ddee ingamje arə jaw Sejare, â bbo dooje marə nɛ̂n kə̂ to kə dɔgɔlɛ̂ ang dɔ Pɔl tə̂ a, n̂-səkəje Pɔl le.»

⁶ Pestus dda ndɔ asə jijoo wase ndɔ dɔku baa rɔde tə̂ ngaâ n̂-təl Sejare. Lo arɛ a, naw nisi lo gangə sariya tə̂ ngaâ nunn ndu karə n̂-ddee kə Pɔl.

⁷ Pɔl le tee a, Jiipije kə̂ inje Jerujalɛm ddeeje gukuje dɔɛ̂ ngaâ undaje tarje kə̂ ngəng ngəng dɔɛ̂ tə̂. A nɛ̂n kə̂ a kasə ta tɔju to tarje kə̂ dunda dɔɛ̂ tə̂ le to tarje kə̂ tɔkɔrɔ goto.

⁸ Pɔl ɔru naji laa nan: «M-dda nɛ̂n kə̂ majang kə̂ mbətə ndu lə Jiipije ang ddəm kəy-polo Lubba ang ddəm tɔkə mbay kə̂ Rɔm ang ddəm.»

⁹ Pestus ndiki ta dda maji kə Jiipije, yeenn â, n̂-duju Pɔl nan: «Ə-ndiki ta təl Jerujalɛm karə n̂-gangə sariya le nɔnʼm tə̂ wa?»

¹⁰ A Pɔl pa nan: «Lo kə̂ nəənn kara to lo gangə sariya le tɔkə mbay kə̂ Rɔm â mar tə̂ nəənn, lo kə̂ nəənn njaa dâ gangə sariya le tə̂. Moo marə nɛ̂n kə̂ maji ang kə̂ m-dda kə Jiipije ang, əi njaa kara ə-gərə kə majɛ̂.

¹¹ A bbo marə tar uwam wase m-dda marə nɛ̂n kə̂ maji ang kə̂ asə gangə sariya-yo dɔm tə̂ a, m-mbətə ta koy ang. A bbo tarje kə̂ dunda dɔm tə̂ nəənn to ngəm baa a, dəw kâra ee kə ddəw ta kinyam mə jide tə̂ ang. Mâ kaw kə tar le nɔn tɔkə mbay tə̂ kə̂ Rɔm.»

¹² Pestus pa tar kə njê-karɛ̂je ndəjə ngaâ pa arə Pɔl nan: «Ə-ndiki ta kaw kə tar le nɔn tɔkə mbay tə̂ kə̂ Rɔm mban, â kaw nɔɛ̂n tə̂.»

Pɔl aw nɔn Agiripa tə̂

¹³ Dda ndɔ ngaji goe tə̂ a, tɔkə mbay Agiripa de kə kɔn-nannɛ̂ Berenis n̂-ddeeje Sejare ngaâ dawje ta dda lapiya Pestus.

¹⁴ Daw ddaje ndɔ lo tə̂ənn ngaji a, Pestus ɔru gəl tar kə̂ dɔ Pɔl tə̂ le arə tɔkə mbay Agiripa le nan: «Marə dingaw kə̂ Peliksə inyɛ̂ kəy-kula tə̂ ee nəənn.

¹⁵ Kar tə̂ kə̂ maw Jerujalɛm a, mbayje lə njê-poloje Lubba kə tɔkəje lə Jiipije n̂-səkeje tam tə̂ ngaâ n̂-dujuje karə m-gangə sariya dɔɛ̂ tə̂.

¹⁶ A milade tə̂ m-pa nan: ‹Dəwje kə̂ Rɔm aw gangəje sariya dɔ dəw tə̂ baa baann ang. Maji karə nɔru naji laa kəm dəwje tə̂ kə̂ undaje tar dɔɛ̂ tə̂ le bba dâ gangə sariya dɔɛ̂ tə̂.›

¹⁷ Kar tə̂ kə̂ əman kə de n-ddee Sejare nəənn a, m-nginan ang. Lo-karɛ̂ njaa maw misi lo gangə sariya tə̂ ngaâ munn ndu marə n̂-ddee kə dingaw le nəənn.

¹⁸ Njê-tarje laa le ddeeje a, nɛ̂n kə̂ maji ang kə̂ məjə to n̂-dda bba dundaje nɛ̂n tar dɔɛ̂ tə̂ le moo ang.

¹⁹ Bbayɛ̂ njaa to tar kə̂ n̂-maynje naan dɔ ddəw kə̂ ta polo nɛ̂n Lubba le njaa kə dɔ marə dingaw tə̂ kə̂ ria nan Jeju kə̂ oy mban, a Pɔl aw pa nan nisi kəm baa.

²⁰ A m-gərə nɛ̂n kə̂ mâ dda ɔju dɔ tar nəənn ang. Yeenn bba, m-pa marɛ̂ karə bbo n̂-ndiki a, naw Jerujalɛm bba ta n̂-gangə sariya dɔ tar tə̂ laa le.

²¹ A Pɔl le ndiki ta kaw kə tar laa le nɔn tɔkə mbay tə̂ kə̂ Rɔm. Yeenn bba munn ndu karə n̂-ngəmɛ̂ ndərəng ta mulɛ̂ nɔn tɔkə mbay tə̂ kə̂ Rɔm le.»

²² Agiripa pa arə Pestus nan: «Əman njaa kara m-ndiki nya ta koo tar kə̂ ta dingaw tə̂ nəənn.» Pestus le pa nan: «Bara njaa a, â koo tar kə̂ tɛɛ̂ tə̂.»

²³ Lo-karɛ̂ a, Agiripa de kə Berenis n̂-ddeeje kə dəwje gode tə̂ tokə banya kə mbayje lə mbambaje kə tɔkə dəwje kə̂ mə bbe tə̂, dawje lo gangə sariya tə̂. Pestus unn ndu arə n̂-ddee kə Pɔl.

²⁴ Pestus unn kutu pa tar nan: «Mbay Agiripa, sese tɔyn kə̂ eeje kə je nəənn ooje dingaw nəənn. Dəwje kə̂ toje to Jiipije tɔyn ddeeje oomje kə tar laa. Jiipije kə̂ Jerujalɛm ddəm njê kə̂ nəənn ddəm aw uruje əkii nan nasə ta nayn kəm baa ang.

²⁵ Əman, moo marə nɛ̂n kə̂ n̂-dda kə̂ asə yo ang. A ne njaa n̂-duju ta koo tɔkə mbay kə̂ Rɔm. Yeenn bba, moo maji ta kulɛ̂ nɔn tɔkə mbay tə̂ kə̂ Rɔm le.

²⁶ A minga marə nɛ̂n kâra kə̂ mâ dda dɔɛ̂ tə̂ makəturu tə̂ kula nɛ̂n karə tɔkə mbay kə̂ Rɔm le ang. Mba yeenn bba m-ddee saa nɔnse tə̂ tɔyn, uta tɔyn, nɔn əi tɔkə mbay Agiripa tə̂ ta kisa mə tar laa le. Goe tə̂ a, mâ gərə nɛ̂n kə̂ mâ dda makəturu tə̂ karə tɔkə mbay kə̂ Rɔm le.

²⁷ Mba kəjə tə̂ ləm, kula dəw Rɔm, a pa gəl nɛ̂n kə̂ dunda nɛ̂n tar dɔɛ̂ tə̂ ang to kula mbə.»