Kulaje 21 - Dɔnɔn kə̂ Siki: Tar kə̂ aw arə təbbə

Kaw lə Pɔl kə Jerujalɛm

¹ Jinya ansinyɛje Epɛjə ngaâ jaw kə tɔkə to njarara jaw tee Kos. Lo-karɛ̂ a, jaw tee Rodə ngaâ jin tə̂ənn jaw tee Patara.

² Jinga tɔkə to kə̂ a ta kaw ər kə Penisi ngaâ junn jɔtu.

³ N-tee ngɔsi kə Sipərə ngaâ jaw joo dɔɛ̂. Jinya Sipərə le, a n-nday bəər ngaâ junn ddəw kə̂ Siri. Jaw juru nangə̂ Tir, mba nje-tɔkə to le a ta kungu nɛ̂n-kotoje lo tə̂ənn.

⁴ N-nayn lo tə̂ənn le ndɔ siri mba jinga njê-mə-kunnje lo tə̂ənn. Ndil-mə-nda ula njê-mə-kunnje le arə n̂-paje darə Pɔl karə naw Jerujalɛm ang.

⁵ Ndɔ le asə ngaâ junn ddəw ta kɔtu a, dəwje tɔyn dannjeje, dede kə dɛnɛ̂nje ləde kə ngannde ndərəng n̂-teeje kə je mə bbe tə̂ le ddaka. Jungu məkəjə-gɔlje nangə̂ ta ba-katə tə̂ ngaâ n̂-duju Lubba.

⁶ Goe tə̂ a, n-dda naan lapiya ngaâ junn tɔkə to, a njê-mə-kunnje le təlje kəy ləde.

⁷ Jin Tir n-tee Petolemayis a, junda ngangə nja le lo tə̂ənn. N-dda lapiya njê-mə-kunnje ngaâ n-nayn kə de ndɔ kâra.

⁸ Lo-karɛ̂ a, n-təl junn ddəw jaw tee Sejare. Lo tə̂ənn jaw kə̂y lə Pilipi kə̂ to nje-tɔju Tar kə̂ Maji lə Lubba kə̂ ee horo marɛ̂je tə̂ kə̂ siri kə̂ n̂-mbərəde Jerujalɛm ngaâ n-to kə̂y laa.

⁹ Ngannɛ̂ kə̂ dɛnɛ̂n eeje sɔ kə̂ gərəje ngaw ang bbay ngaâ aw ilaje mbər tar lə Lubba.

¹⁰ N-nayn lo tə̂ənn ndɔ banya nya ngaâ marə nje-kila mbər tar lə Lubba kə̂ ria nan Agabus in Jude tə̂ ddee.

¹¹ N̂-ddee ningaje ngaâ n̂-taa əndaar-kuwa-bbər lə Pɔl, n̂-tɔ nɛ̂n gɔlɛ̂ kə jia ne njaa ngaâ n̂-pa nan: «Ndil-mə-nda pa nan Jiipije a tɔje nje-əndaar kuwa-bbər nəənn Jerujalɛm tokə be ngaâ dâ kulɛ̂je ji dəwje tə̂ kə̂ gərəje Lubba ang.»

¹² Joo tar le baann a, jeje ddəm njê-mə-kunnje kə̂ bbe tə̂ le ddəm n-dda rɔje to ndoo rɔ Pɔl tə̂ karə naw Jerujalɛm ang.

¹³ A Pɔl ila tə̂ nan: «Mba ddi bba aw nɔnje ngaâ aw ddaje arə məm aw gangə maann wa? Bbo n̂-tɔm kə kula wase n̂-tɔləm Jerujalɛm mba ri Əbbə-dəwje Jeju njaa kara m-ndiki tə̂.»

¹⁴ Juman saa pin n̂-ndiki ang ngaâ jəw rɔje. N-pa nan: «Maji karə Əbbə-dəwje dda nɛ̂n kə̂ məɛ̂ ndiki.»

¹⁵ Go ndɔje tə̂ kə̂ n-dda tə̂ənn le a, n-gɔl rɔje tɔyn ngaâ junn ddəw jaw Jerujalɛm.

¹⁶ Marə njê-mə-kunnje kə̂ Sejare kə̂ aw dannjeje Jerujalɛm awje kə je arə n-to kəy lə Nasɔn bbe tə̂ kə̂ Sipərə. Nasɔn le to nje-mə-kunn ləw baa.

Pɔl aw ta koo Jakə

¹⁷ N-tee Jerujalɛm a, njê-mə-kunnje taajeje kə rɔ-nəəl.

¹⁸ Lo-karɛ̂ a, Pɔl aw kə je rɔ Jakə tə̂. Dəwje kə̂ dɔ Egilisi tə̂ tɔyn mbɔnje naan lo tə̂ənn le.

¹⁹ Pɔl ddade lapiya ngaâ ɔru gəl nɛ̂n kə̂ Lubba dda ddəw tə̂ laa horo dəwje tə̂ kə̂ toje to Jiipije ang kâra kâra arəde.

²⁰ Dəwje kə̂ ooje tar lə Pɔl ɔsuje gaji Lubba ngaâ paje arɛ̂ nan: «Oo, ngokɔnje, Jiipije nya nya ooje məde tə̂ ngaâ daw ngəmje Ndu lə Mɔyijə kə majɛ̂ njaa.

²¹ Dooje tar kə̂ aw nja kə rii kə majɛ̂. Dooje nan aw tɔju nɛ̂n Jiipije tɔyn kə̂ isije horo dəwje tə̂ kə̂ toje to Jiipije ang karə n̂-mbətəje Ndu lə Mɔyijə. Dooje nan əi â ə-pa arəde tɔ ta karə duja ganja ngannde ang ngaâ karə n̂-ddaje nɛ̂n gəl-bbe lə Jiipije ang ngaa.

²² Ddi â ja dda wa? A du ang, dâ kooje nan ee nəənn.

²³ Maji karə ə-dda nɛ̂n kə̂ ja ta pa kari nəənn: Dəwje sɔ eeje nəənn kə̂ unnje ndude.

²⁴ Aw kə de, əi kə de ə-tokoje nɛ̂n-yərəw ləse naan tə̂, uka nɛ̂nje dɔde tə̂ arə n̂-ngisaje dɔde. Baann bba, dəwje tɔyn a gərəje to tarje kə̂ dooje dɔi tə̂ le to ngəm ngaâ dâ gərəje to əi kara aw ngəm Ndu lə Mɔyijə tɔ.

²⁵ A tar kə̂ ɔju dɔ dəwje kə̂ toje to Jiipije ang kə̂ ooje məde tə̂ le, joo maji ta kunn ndu makəturu tə̂ kula nɛ̂n karəde mban karə dusaje da kə̂ n̂-polo nɛ̂n kɔrje ang, dusaje məsə ang, dɔnje da kə̂ dute kəwn tɔlɛ̂ ang ngaâ ta n̂-ddaje kaya ang.»

²⁶ Ndɔ kâra goe tə̂ a, Pɔl aw kə dəwje kə̂ sɔ le arə ne kə de n̂-tokoje nɛ̂n-yərəw ləde naan tə̂. Naw kəy-polo Lubba tə̂ ta tɔju ndɔ kə̂ nâ karə nɛ̂n nɛ̂n-polo ɔju dɔde kâra kâra kar tə̂ kə̂ ndɔ toko nɛ̂n-yərəw le a tunga nɛ̂n.

Duwa Pɔl mə kəy-polo Lubba tə̂

²⁷ Ndɔ siri kə̂ to ənga toko nɛ̂n-yərəw le nayn ngɔsi ta tunga a, Jiipije kə̂ Aji ooje Pɔl kəy-polo Lubba tə̂. Dɔsuje kutu dəwje kə̂ banya darə wungu ɔnde ngaâ duwaje Pɔl.

²⁸ N̂-paje kə taar nan: «Ngann Ijarayɛlje, ə-ddeeje bbo! Ne le â nar nəənn! Dəw kə̂ aw tɔju nɛ̂n dəwje tɔyn loje tə̂ tɔyn mbətə nɛ̂n dəwje ləje ddəm Ndu lə Mɔyijə ddəm kəy-polo Lubba ddəm le. Gɛrɛkəje kara n̂-ddee kə de kəy-polo Lubba tə̂ nəənn narə lo nəənn kə̂ maji tɔyn le ddee to lo kə̂ maji ang.»

²⁹ Kete, dooje Toropim kə̂ to dəw kə̂ Epɛjə mbɔr Pɔl tə̂ le Jerujalɛm nəənn arə dəjəje to naw saa kəy-polo Lubba tə̂.

³⁰ Lo yəkə mə bbe tə̂ le tɔyn arə dəwje inje loje tə̂ dang dang ddeeje tokə banya. Duwaje Pɔl n̂-teeje saa kəy-polo Lubba tə̂ ddaka ngaâ dutuje ta-kəy-polo Lubba le kə ngɔru.

³¹ Daw sangəje ddəw ta tɔlɛ̂, a tarɛ̂ aw oso mbi mbay tə̂ lə mbambaje kə̂ Rɔm nan mə bbe kə̂ Jerujalɛm aw yəkə.

³² Njangə njangə njaa n̂-bbar mbayje lə mbambaje kə mbambaje karə dawje rɔ dəwje tə̂ kə̂ banya le. Dulaje kəmde dooje mbayje lə mbambaje kə mbambaje le a, dəwje rɔde kunda Pɔl le.

³³ Yeenn ngaâ, mbay lə mbambaje le ddee ngɔsi kə Pɔl le. Nunn ndu karə duwɛ̂ n̂-tɔɛ̂ kə kula njamji joo. Goe tə̂ a, n̂-duju nan n̂-to nân wa? Ddi â n̂-dda wa?

³⁴ Dəwje kə̂ banya le paje tar dang dang. Bula to nya arə ddəw kə̂ nâ kasə ta gərə nɛ̂n gəl tar le kə majɛ̂ goto. Yeenn bba, nunn ndu narə daw kə Pɔl mə ndoko tə̂ lə mbambaje.

³⁵ Pɔl tee dɔ esekaliye tə̂ a, mbambaje le bangɛ̂je, mba dəwje kə̂ banya le aw ddaje singa.

³⁶ Dəwje le tɔyn ndoleje goe aw uruje əkii nan: «Ə-tɔlɛ̂je!»

Pɔl ɔru gəl tar nɔn dəwje tə̂ kə̂ Jerujalɛm

³⁷ Kar tə̂ kə̂ daw ta kandə kə Pɔl mə ndoko tə̂ lə mbambaje a, Pɔl pa arə mbay lə mbambaje nan: «Ddəw karə m-pa səi tar to wa?» Nilɛ̂ tə̂ nan: «Ə-gərə tar gɛrɛkə wa?

³⁸ Əi â ə-to dəw kə̂ Ejipitə tə̂ kə̂ bbasinɛn bbay nəənn ɔsu kutu dəwje arə ddaje dɔ-ngəng ngaâ oto njê-tɔl dəwje doro sɔ aw kə de mə kɔr tə̂ le ang wa?»

³⁹ Pɔl ila tə̂ nan: «M-to Jiipi kə̂ dujum Tarsə, nangə tə̂ kə̂ Silisi, m-to dəw kə̂ bbe tə̂ kə̂ ria bbar nya. M-wali nya karə arəm ddəw m-pa tar marə dəwje nəənn.»

⁴⁰ Mbay lə mbambaje le arə ddəw Pɔl karə pa tar. Pɔl le ar dɔ esekaliye tə̂, dda jia arə dəwje le. Lo to nyɛnɛnɛ ngaâ n̂-pa tar narəde kə tar ebərə n̂-pa nan: