Kulaje 20 - Dɔnɔn kə̂ Siki: Tar kə̂ aw arə təbbə

Pɔl aw Maseduwann kə Gerɛsə

¹ Tar le gayn a, Pɔl bbar njê-mə-kunnje ndəjəde karə dinga singa, n̂-ddade lapiya ngaâ nunn ddəw kə̂ Maseduwann.

² N̂-nday nangə tə̂ kə̂ Maseduwann n̂-ndəjə njê-mə-kunnje nya karə dinga singa ngaâ naw Gerɛsə.

³ N̂-dda nɛyn mota lo tə̂ənn. Kar tə̂ kə̂ nâ ta kunn tɔkə to ta kaw Siri a, noo nan Jiipije unguje tar mə naan tə̂ ta ddɛɛ̂ maji ang. Yeenn bba, noo maji ta təl kə ddəw kə̂ Maseduwann.

⁴ Dəwje kə̂ dannɛ̂je to Sopatɛr kə̂ to ngonn lə Pirus kə̂ bbe laa Bere, Aristarkə de kə Sekundus kə̂ bbe laa Tesalonikə, Gayus kə̂ bbe laa Dɛrbə, Timɔte kə Tisikə de kə Toropim kə̂ n̂-toje to dəwje kə̂ ngann bbeje tə̂ kə̂ Aji.

⁵ Dəwjeenn le awje kete aw ngəbbəjəje Torowas.

⁶ A jeje, ndɔ kusu mapa kə̂ n̂-dda kə wum ang nday a, junn tɔkə to tɔkə bbe tə̂ kə̂ Pilipi, n-dda ndɔ min a, jingade Torowas. N-nayn lo tə̂ənn ndɔ siri.

Pɔl ndəjə dəwje kə̂ Torowas

⁷ N-mbɔn naan kə ndɔ-kuwa-rɔ ta kɔn muru mə-kâra a, Pɔl pa tar arə njê-mə-kunnje ndərəng lo mɔngu, mba lo-karɛ̂ a, nâ ta kɔtu.

⁸ Lambeje toje nya mə kəy tə̂ kə̂ to dɔ marɛ̂ tə̂ taar kə̂ n-mbɔn naan tə̂ le.

⁹ Marə ngonn kə̂ dingaw kə̂ ria nan Ətik isi ta kəm lo tə̂ kə̂ kar kəy tə̂ le, kar kə̂ Pɔl nayn aw pa tar bbay a, bbi uta dɔɛ̂ arə nin kəy tə̂ kə̂ to dɔ marɛ̂ tə̂ to mota laa le noso nangə̂. Daw ta kuwɛ̂ kə taar a, noy mban.

¹⁰ Pɔl ddisi kə ngɔru aw, nula dɔɛ̂ nangə̂ ngaâ nunnɛ̂ nuwɛ̂ jia tə̂ n̂-pa nan: «Əjəje tar ang, n̂-to kəm baa.»

¹¹ Goe tə̂ a, Pɔl təl aw taar. N̂-tətə mapa nusa. N̂-pa tar narə dəwje ndərəng ta lo-karɛ a, nɔtu.

¹² A dunn ngonn kə̂ dingaw le n̂-ddee saa kəm baa ngaâ mə dəwje oso nangə̂.

Pɔl in Torowas aw Milɛ

¹³ Jeje, junn tɔkə to jɔtu ta kaw bbe tə̂ kə̂ Asos dɔngɔr. Lo tə̂ənn â ja kunn Pɔl mba nunn ndue ta kaw laa kə gɔlɛ̂.

¹⁴ Ningaje Asos le a, jarə naal tɔkə to le ngaâ jaw Mitilɛnn.

¹⁵ Lo-karɛ̂ a, jin tə̂ənn kə tɔkə to n-tee ngɔsi kə bbe kə̂ Kiyo. Ndɔ kâra goe tə̂ bbay a, n-nday kə ddəw kə̂ Samos ngaâ n-dda ndɔ joo a, n-tee Milɛ.

¹⁶ Pɔl ndiki ta kar lo kâra Epɛjə ang, mba n̂-ndiki karə gɔl kar laa nday baa nangə tə̂ kə̂ Aji ang. N̂-ndiki ta kaw kə ngɔru ta bbo ddəw to a, tee Jerujalɛm ndɔ kusu Pantekotə tə̂.

Pɔl ndəjə ansinyɛje kə̂ Epɛjə bba ta kɔtu

¹⁷ Pɔl nayn Milɛ nu njaa a, ula bbar dəwje kə̂ dɔ Egilisi tə̂ kə̂ Epɛjə.

¹⁸ N̂-ddee dingɛ̂je ngaâ n̂-pa narəde nan: «Ə-gərəje ddəw kə̂ maw nja nɛ̂n horose tə̂ kə majɛ̂, unn kute dɔngɔr ndɔ tə̂ kə̂ m-tee nɛ̂n horose tə̂ nangə tə̂ kə̂ Aji.

¹⁹ M-dda kula lə Əbbə-dəwje kə mə ngonn-kasə kə maann-nɔn kə kəm-to-ndoo, mba Jiipije unguje tar mə naan tə̂ ta ddam maji ang.

²⁰ Nɛ̂n kə̂ a ddase maji tɔyn njaa m-tɔjuse. M-pa nɛ̂nje tɔyn marəse, m-tɔjuse nɛ̂n kəm dəwje tə̂ ddəm mə kəyje tə̂ ləse ddəm.

²¹ Mila mbər marə Jiipije kə Gɛrɛkəje karə n̂-turuje məde nyɔm ta n̂-təlje rɔ Lubba tə̂ ngaâ ta karə dundaje məde kə dɔ Əbbə-dəwje Jeju tə̂.

²² A bbasinɛn Ndil-mə-nda uwam kə singa karə maw Jerujalɛm. M-gərə nɛ̂n kə̂ a kingam nu ang.

²³ Uta tɔyn, mə bbe tə̂ kâra kâra tɔyn kə̂ m-tee tə̂, Ndil-mə-nda pa arəm nan kəy-kula, kula njamji kə nɛ̂n kəm-to-ndoo aw nginanʼmje.

²⁴ Moo təbbə ləm to nɛ̂n kəmʼm tə̂ ang. Nɛ̂n kə̂ m-ndiki njaa to ənga dda kula kə̂ Əbbə-dəwje Jeju inya jim tə̂ ndərəng kɔsu kɔnyɛ̂. Kula le to kula kila mbər Tar kə̂ Maji kə̂ to mə-maji lə Lubba.

²⁵ «M-nja horose tə̂ tɔyn mila mbər tar kɔn-mbay lə Lubba. A bbasinɛn nəənn m-gərə to â təlje kooje kəm ang ngaa.

²⁶ Yeenn bba m-pa marəse bbokənɛn: Tar məsəse a kuwa dɔm ang. Nɛ̂n kə̂ asə ta dda kə̂ m-dda ang goto.

²⁷ Mba miyase marə nɛ̂n ang, m-tɔjuse nɛ̂n tɔyn kə̂ Lubba gɔl ta dda.

²⁸ Maji karə undaje kəmse dɔ rɔse tə̂ kə dɔ nɛ̂n-kuulje tə̂ kə̂ Ndil-mə-nda undase karə ə-ngəmjede. Ə-ngəmje Egilisi kə̂ Lubba ndoko kə məse njaa le.

²⁹ M-gərə kə majɛ̂ to gom tə̂ a, dəwje kə̂ toje tokə ənjakəmnjarje kə̂ maji ang a ddeeje kandəje horose tə̂ ta ddase maji ang.

³⁰ Marə njê-ngəmje a kinje horose tə̂ njaa ta dda karə marə njê-mə-kunnje unnje gode.

³¹ Maji karə undaje kəmse dɔ rɔse tə̂, oleje məse to bbal mota njaa, til tə̂ ddəm karâ ddəm m-ndəjəse kâra kâra tɔyn kə maann-nɔn kəmʼm tə̂.

³² «A bbasinɛn minyase ji Lubba tə̂ kə tar mə-maji tə̂ laa kə̂ asə ta dda karə ə-sangəje ddəm karə ingaje nɛ̂nje kə̂ maji kə̂ n̂-gɔl mba dəwje laa ddəm.

³³ M-dda bbo narɛ, bbo andə wase bbo kubbu lə dəw ang.

³⁴ Sese njaa kara ə-gərəje kə majɛ̂, əman njaa m-dda kula kə jim bba minga nɛ̂n nɛ̂n kə̂ məm ndiki kə nɛ̂n kə̂ a kuman njê-buwa-njaje ləm.

³⁵ Kə ndɔ tɔyn, maw tɔjuse to, to maji ta dda kula tokə baann mba kuman nɛ̂n njê-ndooje, ta kole nɛ̂n məse dɔ tar tə̂ kə̂ Əbbə-dəwje Jeju njaa pa. Tar le nan: ‹Dəw kə̂ nje-karə nɛ̂n, rɔɛ̂ nəəle uta dəw kə̂ nje-taa nɛ̂n le.› »

³⁶ Pɔl pa tarjeenn le ngaâ ne de kə ansinyɛje dunguje məkəjə-gɔlde nangə̂ n̂-dujuje Lubba.

³⁷ Dede tɔyn duruje dɔ nɔn tə̂. Dilaje Pɔl duwɛ̂je karde tə̂ ngaâ n̂-toje mbia.

³⁸ Ndoo ddade mba Pɔl pa arəde nan dâ təl koo kəmɛ̂ ang ngaa. Goe tə̂ a, n̂-dannɛ̂je ndərəng ta tɔkə to tə̂.