Kulaje 17 - Dɔnɔn kə̂ Siki: Tar kə̂ aw arə təbbə

Pɔl de kə Silas dawje Tesalonikə

¹ Pɔl de kə Silas n̂-ndayje kə ddəw kə̂ bbe tə̂ kə̂ Ampipolis kə Apoloni ngaâ n̂-teeje Tesalonikə, lo kə̂ marə kəy mbɔn-naan lə Jiipije to tə̂.

² Pɔl aw rɔ Jiipije tə̂ tokə naw dda kə ndɔ tɔyn. N̂-mayn tar kə de dɔ makəturu tə̂ lə Lubba asə ndɔ-kuwa-rɔ mota.

³ Nɔru gəl makəturu le narəde ngaâ n̂-pa nan makəturu lə Lubba pa nan Mesi a koo ndoo ngaâ noy a, nâ ndol. N̂-pa nan: «Jeju kə̂ maw pa tar laa marəse nəənn le to Mesi le.»

⁴ Marə Jiipije le ndikije tar tə̂ le ngaâ unnje go Pɔl de kə Silas. Gɛrɛkəje nya kə̂ aw poloje Lubba kə marə dɛnɛ̂nje kə̂ toje to dəwje kə̂ bo ddaje tokə baann tɔ.

⁵ A Jiipije kə̂ mə ddade mbɔnje dəwje kə̂ toje to njê-dɔ-gotoje kə̂ aw njaje go ddəw tə̂ baa, dɔsuje kutu dəwje kə̂ banya ngaâ n̂-yəkəje lo darə ddekeke goto mə bbe tə̂ le.

⁶ Dingaje Pɔl de kə Silas le ang ngaâ duwaje Jasɔn kə marə njê-mə-kunnje dawje kə de nɔn njê-kɔn-bbeje tə̂ ngaâ n̂-paje kə taar nan: «Dəwje nəənn tujuje lo tɔyn kə̂ dɔ nangə tə̂, a bbasinɛn n̂-teeje nəənn ngaa.

⁷ Jasɔn â taade kə kə̂y laa. Nɛ̂n kə̂ ndu le tɔkə mbay kə̂ Rɔm mbətə â dəwje nəənn le tɔyn aw ddaje. N̂-paje nan marə tɔkə mbay kə̂ dang to, ria nan Jeju.»

⁸ Tarje nəənn le turu dɔ dəwje kə̂ banya ddəm njê-kɔn-bbeje ddəm.

⁹ Duwaje Jasɔn kə njê-mə-kunnje le darə ukaje tɔkə narɛ bba dinyade.

Pɔl de kə Silas n̂-teeje Bere

¹⁰ Lo ndul a, njê-mə-kunnje arə Pɔl de kə Silas dawje bbe tə̂ kə̂ Bere. N̂-teeje a, dawje kəy mbɔn-naan tə̂ lə Jiipije.

¹¹ Kəjə lə Jiipije kə̂ Bərə maji uta kəjə lə njê kə̂ Tesalonikə arə n̂-taaje tar le kə ngɔru baa. Ndɔ kâra kâra daw disaje makəturu lə Lubba ta gərə se tar kə̂ Pɔl aw pa le to kə dɔgɔlɛ̂ njaa wa?

¹² Dəwje nya horode tə̂ ooje məde tə̂. Dɛnɛ̂n Gɛrɛkəje kə̂ toje to dəwje kə̂ isije lo kula tə̂ bo kə marə dingawje nya ooje məde tə̂ tɔ.

¹³ Jiipije kə̂ Tesalonikə ooje nan Pɔl aw tɔju tar lə Lubba Bere tɔ a, n̂-ddeeje ta yəkə lo ngaâ ta kɔsu kutu dəwje kə̂ banya le.

¹⁴ Njangə baa a, njê-mə-kunnje arəje Pɔl unn ddəw ər kə ta tɔkə ba tə̂, a Silas de kə Timɔte n̂-naynje tə̂ənn.

¹⁵ Dəwje kə̂ dannje Pɔl le awje ndərəng teeje Atɛnn bba təlje. Kar təlde a, Pɔl unn ndu arəde karə Silas de kə Timɔte dawje njangə dingɛ̂je Atɛnn le.

Pɔl pa tar arə dəwje kə̂ Atɛnn

¹⁶ Wur Pɔl a ta ti kar tə̂ kə̂ naw nginan nɛ̂n Silas de kə Timɔte le, mba kɔrje ddusu mə bbe kə̂ Atɛnn le.

¹⁷ Naw pa tar kə Jiipije kə dəwje kə̂ aw poloje Lubba mə kəy mbɔn-naan tə̂ lə Jiipije. A kəsə ndɔje, naw pa tar natâ kə kəsə dəwje kə̂ naw ningade kə̂ ndɔ tɔyn.

¹⁸ Marə njê-nɛ̂n-gərəje kə̂ daw bbarde nan Epikurinyɛje kə Isitoyisinyɛje njaa kara ddeeje aw paje saa tar tɔ. Marɛ̂je paje nan: «Tar ddi njaa nje-kunda bula nəənn a ta pa wa?» A marɛ̂je paje nan: «A du ang, nâ to marə nje-kila mbər tar lə marə lubbaje kə̂ dang.» Mba Pɔl aw ila mbər Tar kə̂ Maji lə Jeju kə tar ndol lə dəwje kə̂ oyje.

¹⁹ Duwaje Pɔl dawje saa Ayeropajə ngaâ n̂-dujeje nan: «Ja kasə gərə nɛ̂n-tɔju kə̂ siki kə̂ aw tɔju nəənn wa?

²⁰ Mba tar kə̂ joo kete ang â aw pa nəənn arə n-ndiki ta gərə gəle.»

²¹ Njê-bbeje kə̂ Atɛnn tɔyn kə njê-mbaje ndikije nya ta pa tar nɛ̂n kə̂ siki wase ta koo nɛ̂n kə̂ siki kə̂ tee bbe tə̂.

²² Yeenn bba, Pɔl ar taar dann dəwje tə̂ Ayeropajə le ngaâ pa nan: «Dəwje kə̂ Atɛnn, moose a, ə-toje to dəwje kə̂ ə-ndikije ta polo lubbaje ddəw nɛ̂nje tə̂ tɔyn njaa.

²³ Mba m-nja mə bbe tə̂ le a, moo kɔrje kə̂ aw polojede. A m-tee dɔ marə baann tə̂ kə̂ n̂-dda makəturu tə̂ nan: ‹Bann lə marə lubba kə̂ dəw gəre ang.› Maji, nɛ̂n kə̂ aw poloje, a ə-gərəje ang le â m-ddee maw mila mbəre marəse nəənn.

²⁴ Lubba kə̂ nje-dda duninya kə nɛ̂nje tɔyn kə̂ toje tə̂, ne kə̂ n̂-to nje-dara kə nje-nangə le n̂-to kəy-poloje tə̂ kə̂ dəw dda kə jia ang.

²⁵ N̂-ndiki ta karə ji dəw â umɛ̂n ang, mba nɛ̂n kâra due ang, ne â narə dəwje təbbə, kəwn kə kəsə nɛ̂nje.

²⁶ Dəw kâra baa njaa nunnɛ̂ n̂-dda nɛ̂n dəwje tɔyn narə disije dɔ nangə tə̂ tɔyn. Nɔju ngangə nangə le kâra kâra karə disije tə̂ kə karɛ̂ kə̂ nɔju narəde.

²⁷ N̂-dda baann bba karə dəwje sangɛ̂je. Bbo n̂-mamje lo a, a du ang, dâ kasəje ta kingɛ̂. Ta koo a, jeje kâra kâra tɔyn Lubba ee kə je ddəw əw ang.

²⁸ Mba ddəw tə̂ laa bba jaw jisije nɛ̂n kəm baa, jaw yəkəje nɛ̂n rɔje ngaâ da-rɔje to nɛ̂n. To ddəw kâra baa kə tar kə̂ marə njê-nɔn-paje ləje paje nan: ‹N-toje to ngann lə Lubba.›

²⁹ «Tɔkɔrɔ njaa n-toje to ngann lə Lubba. Yeenn a, ja kasəje ta kəjə to Lubba unn da-rɔ kɔr kə̂ n̂-dda kə andə wase narɛ wase ər kə̂ dəw tɔl to tɔl kə gusu laa wase əjə to kəjə bba dda, tokə baânn wa?

³⁰ Kar kə̂ dəwje gərəje tar kə̂ tɔkɔrɔ ang bbay le. Lubba oo to nɛ̂n ang. A bbasinɛn naw bbar dəwje tɔyn kə̂ isije loje tə̂ tɔyn karə n̂-turu məde.

³¹ Mba nɔju ndɔ kə̂ nâ karə dəw kə̂ n̂-mbəre gangə nɛ̂n sariya kə̂ to gatə gatə dɔ dəwje tə̂ tɔyn kə̂ dɔ nangə tə̂. Narə dəw le oy, a ndol bba ta tɔju karə dəwje tɔyn to ne njaa n̂-mbəre.»

³² Dooje tar ndol lə dəwje kə̂ oyje kə̂ Pɔl pa le a, marɛ̂je kokoje nɛ̂n. A marɛ̂je paje nan: «Marə ndɔ bba ja təl koo tar ləi dɔ tar tə̂ nəənn bbay.»

³³ Go tar tə̂ənn le a, Pɔl inyade.

³⁴ Dɔɛ tə̂ənn njaa kara, marɛ̂je naynje saa ngaâ ooje məde tə̂. Denis kə̂ to dəw kə̂ Ayeropajə, marə dɛnɛ̂n kə̂ ria nan Damaris kə marə dəwje bbay.