Kulaje 16 - Dɔnɔn kə̂ Siki: Tar kə̂ aw arə təbbə

Timɔte ddee to nje-buwa-nja lə Pɔl kə Silas

¹ Pɔl tee Dɛrbə kə Listərə. Marə nje-nja go Jeju tə̂ kə̂ ria nan Timɔte ee mə bbe tə̂ənn le. Kɔɛ̂nje to Jiipi ngaâ to nje-mə-kunn, a bɔɛ̂je to Gɛrɛkə.

² Njê-mə-kunnje kə̂ Listərə kə Ikoniyɔm paje tar lə Timɔte le maji nya.

³ Pɔl ndiki ta kaw saa. Yeenn bba, nujɛ̂ ganja ɔju dɔ Jiipije kə̂ isije loje tə̂ənn le, mba n̂-gərəje tɔyn to bɔ Timɔteje to Gɛrɛkə.

⁴ Bbeje kə̂ Pɔl de kə Silas n̂-teeje tə̂, n̂-ndajije nduje kə̂ njê-kaw-kulaje kə dəwje kə̂ dɔ Egilisi tə̂ kə̂ Jerujalɛm unnje le darə dəwje. N̂-walde nya karə n̂-ddaje nɛ̂n kə turu nduje le.

⁵ Egilisije aw sangəje ddəw mə-kunn tə̂ ngaâ kə ndɔ kâra kâra kɔr njê-mə-kunnje aw banya kə kete kete.

Lubba bbar Pɔl karə aw nangə tə̂ kə̂ Maseduwann

⁶ Pɔl kə Silas n̂-ndayje nangəje tə̂ kə̂ Piriji kə Galasi mba Ndil-mə-nda ɔkude ddəw karə n̂-tɔjuje tar lə Lubba nangə tə̂ kə̂ Aji.

⁷ N̂-teeje ngɔsi kə nangə kə̂ Misi ngaâ n̂-sangəje ddəw ta tee nangə tə̂ kə̂ Bitini, a Ndil lə Jeju ɔkude ddəw.

⁸ N̂-ndayje nangə tə̂ kə̂ Misi n̂-teeje Torowas.

⁹ Pɔl oo marə nɛ̂n tokə lə ninjeenn til tə̂. Noo marə dəw kə̂ Maseduwann kə̂ ar taar aw duje nan: «Ə-ddee Maseduwann umanje!»

¹⁰ Go nɛ̂n tə̂ kə̂ Pɔl oo le a, kar tə̂ənn njaa n-sangə ddəw ta kaw Maseduwann le, mba n̂-gərə to Lubba bbarje karə jaw pa Tar kə̂ Maji Maseduwann le.

Lidi unn məɛ̂ arə Jeju

¹¹ Junn tɔkə to Torowas jaw njarara dɔ dərə-maann tə̂ kə̂ Samotarasə. Lo-karɛ̂ a, n-tee bbe tə̂ kə̂ Neyapolis.

¹² Jin tə̂ənn n̂-tee Pilipi kə̂ to tɔkə bbe kə̂ Maseduwann kə̂ dəwje kə̂ Rɔm â ɔnje dɔɛ̂. N-dda ndɔ ngaji Pilipi le.

¹³ Ndɔ-kuwa-rɔ tə̂ lə Jiipije, jin mə bbe tə̂ le n-tee jaw kar maann tə̂, mba jəjə to lo duju Lubba lə Jiipije a to lo tə̂ənn. Jisi nangə̂ ngaâ n-pa tar jarə dɛnɛ̂nje kə̂ mbɔnje naan lo tə̂ənn le.

¹⁴ Marə dɛnɛ̂n le kâra to dəw kə̂ Tiyatir, ria nan Lidi. N̂-to nje-labbə kubbu kə̂ kasɛ kə̂ narɛ̂ ngəng ngaâ naw polo Lubba. Noo tarje kə̂ jaw pa ngaâ Əbbə-dəwje unda məɛ̂ arə n̂-tuka mbia noo nɛ̂n tarje kə̂ Pɔl aw pa le.

¹⁵ Lidi kə njê kə̂ kəy laa dingaje batɛm a, n̂-bbarje n̂-pa narəje nan: «Bbo əjəje to moo məm tə̂ tɔkɔrɔ kə Əbbə-dəwje a, ə-ddeeje ə-toje kə̂y ləm.» Numan kə je nya karə n-ndiki bbar tə̂ kə̂ n̂-bbarje le.

Dila Pɔl kə Silas kəy-kula tə̂

¹⁶ Marə ndɔ jaw kə lo duju Lubba tə̂ a, marə ngonn mandə kə̂ to nje-kula lə marə dəw tee ingaje. Ndil nɛ̂n-ndɔn kə̂ maji ang isi mə ngonn mandə tə̂ le. Nɛ̂n-ndɔn laa le dda arə əbbeejedede ingaje nɛ̂n nya.

¹⁷ Nunn goje, jeje kə Pɔl ngaâ naw nuru əkii n̂-pa nan: «Dəwje nəənn toje to njê-kulaje lə Lubba kə̂ nje-kisi ddutu dara tə̂. Daw tɔjujese ddəw kinga kaji.»

¹⁸ N̂-təl dɔ tar tə̂ənn le ndɔ banya nya. Asə ang boy a, Pɔl turu rɔɛ̂ ngaâ pa arə ndil le nan: «Kə ri Jeju-Kristə, munn ndu mari karə ə-tee mə ngonn kə̂ dɛnɛ̂n tə̂ nəənn kə ddang!» Kar tə̂ənn njaa ndil le unda lo tee.

¹⁹ Əbbeejedede ooje to nɛ̂n kə̂ daw dundaje məde dɔɛ tə̂ le goto ngaa a, duwaje Pɔl kə Silas dawje kə de natâ nɔn njê-kɔn-bbeje tə̂.

²⁰ Dawje kə de nɔn njê-gangəje sariya tə̂ kə̂ toje to dəwje kə̂ Rɔm ngaâ n̂-paje nan: «Dəwje nəənn ilaje tar mə bbe tə̂ ləje. N̂-toje to Jiipije.

²¹ Daw tɔjuje nɛ̂n-ji-bbe kə̂ jeje kə̂ n̂-to ngann njê-bbeje kə̂ Rɔm jasə ta ndiki tə̂ ang ddəm ta nja goe tə̂ ang ddəm.»

²² Dəwje tokə banya inje uruje dɔ Pɔl de kə Silas tə̂ ngaâ njê-gangəje sariya le arə n̂-tɔru kubbu rɔ Pɔl de kə Silas tə̂. Dunnje ndu darə n̂-tundade kə ndəy.

²³ N̂-tundade nya, darəje dilade kəy-kula tə̂ ngaâ dunnje ndu darə nje-ngəm ta kəy-kula le karə ngəmde kə majɛ̂.

²⁴ Nje-ngəm ta kəy-kula le oo ndu kə̂ darɛ̂ le ngaâ ila Pɔl de kə Silas lə suran kəy-kula tə̂ ngaâ ilade kakə.

²⁵ Lo mɔngu nyɛnɛnɛ a, Pɔl de kə Silas daw dujuje Lubba ddəm daw dɔsuje pa n̂-walje nɛ̂n Lubba ddəm ngaâ kəsə dəwje kə̂ duwade le aw ooje ndude.

²⁶ A ta koo a, nangə yəkə kə singa arə gɔl kəy-kula kə̂ dungu nangə̂ le yəkə. Kar tə̂ənn njaa ta-kəyje tɔyn təəyn ngaâ kula njamjije kə̂ n̂-tɔ nɛ̂n dəwje tɔyn kə̂ duwade le gayn nangə̂.

²⁷ Nje-ngəm ta kəy-kula le ndol ngaâ oo ta-kəy kə̂ to takə baa le a, noo to dəwje kə̂ duwade le aynje ngaâ nunn tɔkə kiya laa ta tɔl nɛ̂n rɔɛ̂.

²⁸ A Pɔl uru əkii kə singa nan: «Ə-tɔl rɔi ang, jee nəənn tɔyn.»

²⁹ Nje-ngəm ta kəy-kula le duju puru ta koo nɛ̂n lo ngaâ andə kəy-kula tə̂ le kə ngɔru. Noso kɔ gɔl Pɔl de kə Silas tə̂ naw nisa.

³⁰ Goe tə̂ a, nje-ngəm ta kəy-kula le arə Pɔl de kə Silas n̂-teeje ddaka ngaâ n̂-dujude n̂-pa nan: «Əbbəmjedede ddi â mâ dda bba mâ kinga kaji wa?»

³¹ N̂-paje darɛ̂ nan: «Oo məi tə̂ kə Əbbə-dəwje Jeju a, â kinga kaji, əi ddəm njê kə̂ kə̂y ləi ddəm.»

³² Pɔl de kə Silas le n̂-paje tar lə Əbbə-dəwje darə nje-ngəm ta kəy-kula le ddəm darə dəwje tɔyn kə̂ eeje mə kəy tə̂ laa ddəm.

³³ Til tə̂ənn njaa, nje-ngəm ta kəy-kula le aw kə de aw toko kəm doje ləde. Ngaji goe tə̂ a, n̂-ddɛɛ̂je batɛm kə njê kə̂ kəy laa.

³⁴ Naw kə Pɔl de kə Silas kəy laa naw narəde nɛ̂n-kusa ngaâ n̂-dda rɔ-nəəl kə njê-nujuje laa mba koo kə̂ noo məɛ̂ tə̂ kə Lubba le.

³⁵ Lo arɛ a, tɔkə njê-gangəje sariya ulaje pajaje ləde rɔ nje-ngəm ta kəy-kula tə̂ le nan: «Inya dəwje nəənn arə ɔtuje!»

³⁶ Nje-ngəm ta kəy-kula le ndaji tar le arə Pɔl nan: «Njê-gangəje sariya ulaje karə minyase. Yeenn a, ə-teeje ta awje kə lapiya.»

³⁷ A Pɔl pa nan: «N̂-gangəje sariya dɔje tə̂ ang, a n̂-tundaje kəm dəwje tə̂ ngaâ dilaje kəy-kula tə̂, jeje kə̂ n̂-to ngann njê-bbeje kə̂ Rɔm tɔ. A bbasinɛn, n̂-ndikije ta kɔruje lo-kiyɛ̂ tə̂ wa? Baann ang, maji karə dede njaa n̂-ddee dɔrujeje.»

³⁸ Pajaje le aw ndajije tar le arə njê-gangəje sariya le. Bbəəl uta dɔde mba dooje nan Pɔl de kə Silas n̂-toje to ngann njê-bbeje kə̂ Rɔm.

³⁹ Yeenn bba, njê-gangəje sariya le ddeeje ddee wulje mə Pɔl de kə Silas, dɔrujede kəy-kula tə̂ le ngaâ n̂-dujujede karə dɔtuje mə bbe tə̂ le kə ddang.

⁴⁰ Pɔl de kə Silas dinje kəy-kula tə̂ le n̂-teeje a, daw dingaje Lidi, dooje njê-mə-kunnje, n̂-ndəjəjede ngaâ dɔtuje.