Kulaje 15 - Dɔnɔn kə̂ Siki: Tar kə̂ aw arə təbbə

Mayn naan tar dɔ kuja ganja tə̂

¹ Marə dəwje inje Jude ddeeje Antiyos nangə tə̂ kə̂ Siri. N̂-tɔjuje nɛ̂n njê-mə-kunnje kə̂ Antiyos le nan: «Bbo ujaje ganja tokə Ndu lə Mɔyijə pa ang a, â kasəje ta kinga kaji ang.»

² Pɔl de kə Barnabas n̂-mbətəje nɛ̂n-tɔju ləde le ngaâ n̂-maynje kə de tar. Yeenn bba, njê-mə-kunnje unnje ndu karə Pɔl de kə Barnabas kə marə njê-mə-kunnje dawje Jerujalɛm daw dingaje njê-kaw-kulaje kə dəwje kə̂ dɔ Egilisi tə̂ mba tar nəənn le.

³ Egilisi kə̂ Antiyos umande kə marə nɛ̂n nja tə̂ ləde le. N̂-ndayje kə ddəw kə̂ Penisi kə Samari ngaâ n̂-paje tar ddəw kə̂ dəwje kə̂ toje to Jiipije ang ooje nɛ̂n məde tə̂ le darə njê-bbeje le. Tar le arə rɔ-nəəl njê-mə-kunnje tɔyn.

⁴ N̂-teeje Jerujalɛm a, Egilisi kə njê-kaw-kulaje kə dəwje kə̂ dɔ Egilisi tə̂ taajede kə rɔ-nəəl. Dɔruje gəl nɛ̂nje tɔyn kə̂ Lubba dda ddəw tə̂ ləde darə dəwje kə̂ Jerujalɛm.

Tɔkə mbɔn-naan to Egilisi tə̂ kə̂ Jerujalɛm

⁵ Marə Parijinyɛje kə̂ ooje məde tə̂ paje nan: «Maji karə dəwje kə̂ toje to Jiipije ang arə dujade ganja ta n̂-njaje kə turu Ndu lə Mɔyijə.»

⁶ Njê-kaw-kulaje kə dəwje kə̂ dɔ Egilisi tə̂ mbɔnje naan ta kisa mə tar le.

⁷ N̂-maynje naan tar ngəng nya ngaâ Piyɛr in taar pa nan: «Ngakɔnʼmje, ə-gərəje to Lubba bbarəm horose tə̂ ləw baa karə m-pa Tar kə̂ Maji marə dəwje kə̂ toje to Jiipije ang, karə dooje tar le ngaâ dooje məde tə̂.

⁸ Lubba kə̂ gərə mə dəwje tɔju to n̂-taa dəwje kə̂ toje to Jiipije ang kə rɔɛ̂ tə̂. Yeenn bba narəde Ndil-mə-nda tokə narəje le tɔ.

⁹ Nɔru kəmde dang kə jeje ang. Lubba toko məde mba mə-kunn ləde.

¹⁰ Yeenn a, bbasinɛn, mba ddi bba aw taje naan kə Lubba ngaâ aw undaje nɛ̂n-koto kə̂ kajejedede wase jeje njaa kara jasə ta koto ang dɔ njê-njaje go Əbbə-dəwje tə̂ wa?

¹¹ A, n-gərə tɔ to ddəw mə-maji tə̂ lə Əbbə-dəwje Jeju â junda məje to Lubba aji nɛ̂n je tokə najide le.»

¹² Dəwje tɔyn kə̂ mbɔnje naan le isije ddekeke ngaâ tukaje mbide ooje nɛ̂n tar kə̂ Barnabas de kə Pɔl daw paje dɔ nɛ̂n-mɔrije tə̂ kə nɛ̂nje kə̂ dumje dɔ koo tə̂ kə̂ Lubba dda ddəw tə̂ ləde horo dəwje tə̂ kə̂ toje to Jiipije ang le.

¹³ N̂-paje tar n̂-tungaje a, Jakə pa nan: «Ngakɔnʼmje, ooje tar ləm.

¹⁴ Bbasinɛn bbay nəənn Simɔn ole məje dɔ gusu tə̂ kə̂ Lubba gɔl kunn-kutu nɛ̂n tə̂ njaa ta mbərə marə dəwje horo gəl-dəwje tə̂ kə̂ gərəje Lubba ang karə n̂-ddeeje to dəwje laa.

¹⁵ Tar nəənn le dda mə-kâra kə tar lə njê-kilaje mbər tar lə Lubba kə̂ n̂-dda makəturu tə̂ nan:

¹⁶ ‹Goe tə̂ a, mâ təl ddee dda kəy lə Dabbiti kə̂ oso le. Nɛ̂nje kə̂ kəy tə̂ le kə̂ guru, mâ təl nɛ̂n ture tə̂ ngaâ mâ mɔsɛ kəy le kunda taar.

¹⁷ Yeenn bba kəsə dəwje a sangəje Əbbə-dəwje, tɔkɔrɔ, gəl-dəwje tɔyn kə̂ m-bbarde karə n̂-toje to dəwje ləm. Tar kə̂ Əbbə-dəwje pa le â nəənn.

¹⁸ N̂-tɔju dəwje nɛ̂n kə̂ nəjə ta dda le ləw baa.›

¹⁹ Mba yeenn bba, kəjə tə̂ ləm m-ndiki ta karə n-ddaje nɛ̂nje kə̂ a jɔku dəwje kə̂ toje to Jiipije ang kə̂ unnje go Lubba le ang.

²⁰ Maji karə n-ddaje makəturu julaje jarəde karə dusaje nɛ̂n kə̂ n̂-polo nɛ̂n kɔr ang, mba to nɛ̂n-yərəw, n̂-ddaje kaya ang, dɔnje da kə̂ dute kəwn bba n̂-tɔlɛ̂ ang, dusaje məsə ang.

²¹ Mba ləw baa njaa dəwje aw ilaje mbər Ndu lə Mɔyijə mə bbeje tə̂ kâra kâra ngaâ kə ndɔ-kuwa-rɔ kâra kâra, daw tura Makəturu-Ndu le kəy mbɔn-naan tə̂ lə Jiipije.»

Dula kə makəturu darə njê-mə-kunnje kə̂ Antiyos

²² Njê-kaw-kulaje, dəwje kə̂ dɔ Egilisi tə̂ kə Egilisi le dooje maji ta mbərə marə dəwje horode tə̂ karə dawje kə Pɔl de kə Barnabas Antiyos. Dəwje kə̂ n̂-mbərəde le to Judə kə̂ daw bbarɛ̂ nan Barsabas kə Silas. Ngakɔnje kə̂ joo nəənn le njê-mə-kunnje oojede to dəwje kə̂ asəje njaa.

²³ Tar kə̂ n̂-ddaje makəturu tə̂ darəde le tokə be: «Jee njê-kaw-kulaje, dəwje kə̂ dɔ Egilisi tə̂ kə ngakɔnse, n-dda lapiya ngakɔnjeje kə̂ toje to Jiipije ang kə̂ eeje Antiyos nangə tə̂ kə̂ Siri kə Silisi.

²⁴ Joo nan marə dəwje ləje kə̂ inje horoje tə̂ kə̂ jarəde ndu ang ddəm aw tujuje kəjə ləse arə aw jɔkuse.

²⁵ Mba yeenn bba, jeje tɔyn njaa junn nduje mba mbərə marə dəwje kulade turuje tə̂ karə n̂-dannje Barnabas de kə Pɔl kə̂ n-ndikide nya.

²⁶ N̂-toje to dəwje kə̂ ilaje rɔde kɔrɔ̂ mba kula lə Əbbə-dəwje Jeju-Kristə.

²⁷ Yeenn bba, jula Judə de kə Silas jarəse karə n̂-paje tar kə̂ makəturu tə̂ le kə tade darəse.

²⁸ Ndil-mə-nda ddəm jeje ddəm n-ndiki ta kunda marə nɛ̂n-koto dang dɔ nɛ̂n tə̂ kə̂ to ta karə ə-ddaje le ang ngaa. Nɛ̂n kə̂ ta dda â nəənn:

²⁹ Maji karə usaje da kə̂ n̂-polo nɛ̂n kɔr ang, usaje məsə ang, ɔnje da kə̂ dute kəwn n̂-tɔlɛ̂ ang, ə-ddaje kaya ang. Bbo ə-ngəmje rɔse ddəw nɛ̂nje tə̂ənn tɔyn a, to nɛ̂n kə̂ maji. N-ddase lapiya nya.»

³⁰ Pɔl, Barnabas, Judə kə Silas, dɔtuje dawje Antiyos ngaâ n̂-mbɔnje njê-mə-kunnje darəde makəturu le.

³¹ N̂-turaje makəturu le a, n̂-ddaje rɔ-nəəl nya mba tar kə̂ makəturu tə̂ le arəde singa.

³² Judə de kə Silas kə̂ n̂-toje to njê-kilaje mbər tar lə Lubba le ndəjəde nya karə dingaje nɛ̂n singa.

³³ N̂-ddaje ndɔ ngaji a, njê-mə-kunnje le inyajede karə n̂-təlje kə mə-wul-lɔm rɔ dəwje tə̂ kə̂ ulajede le. [

³⁴ A, Silas oo maji ta nayn Antiyos.]

³⁵ Pɔl de kə Barnabas n̂-naynje Antiyos ngaâ marə dəwje osoje dɔde tə̂ arə n̂-tɔjuje nɛ̂n ngaâ n̂-paje Tar kə̂ Maji lə Əbbə-dəwje darə dəwje.

Pɔl de kə Barnabas n̂-tinje naan

³⁶ Goe tə̂ ngaji a, Pɔl pa arə Barnabas nan: «N-təl mə bbeje tə̂ kâra kâra kə̂ n-pa tar lə Əbbə-dəwje tə̂ le, jaa njê-mə-kunnje joo se disije tokə baânn wa?»

³⁷ Barnabas ndiki karə Jan kə̂ daw bbarɛ̂ nan Markə aw kə de tɔ.

³⁸ A kəjə tə̂ lə Pɔl, to maji ta kunn Jan-Markə kə̂ tusude inyade ta kula tə̂ Pampili le kaw saa ang.

³⁹ Tar ləde aw naan tə̂ ang ngaâ nân nân kara unn ddəw laa. Barnabas ila Markə goe tə̂ ngaâ dunnje tɔkə to dawje Sipərə.

⁴⁰ A Pɔl unn Silas ilɛ̂ goe tə̂. Goe tə̂ a, njê-mə-kunnje ilaje Pɔl ji Əbbə-dəwje tə̂ karə dda saa mə-maji ngaâ nɔtu.

⁴¹ Pɔl nday nangə tə̂ kə̂ Siri kə Silisi, n̂-ndəjə dəwje kə̂ Egilisije tə̂ le karə duwaje mə-kunn ləde darə ngəng.