Kulaje 12 - Dɔnɔn kə̂ Siki: Tar kə̂ aw arə təbbə

Erodə tɔl Jakə ngaâ ila Piyɛr kəy-kula tə̂

¹ Dɔ ndɔɛ̂ tə̂ənn, tɔkə mbay Erodə unn kutu dda nɛ̂n kə̂ maji ang kə marə dəwje kə̂ Egilisi tə̂.

² Narə n̂-tɔl Jakə ngokɔn Jan kə tɔkə kiya.

³ Noo a, nɛ̂n kə̂ n̂-dda le arə rɔ-nəəl Jiipije. Yeenn bba narə duwa Piyɛr. Kar kə̂ duwa nɛ̂n Piyɛr le to kar kə̂ Jiipije aw ddaje kusu mapa kə̂ n̂-dda kə wum ang.

⁴ Erodə le arə duwɛ̂ dilɛ̂ kəy-kula tə̂. Ninyɛ̂ ji mbambaje tə̂ dɔku gire misan kə̂ uwaje dɔ naan sɔ sɔ karə n̂-ngəmɛ̂je. Nəjə karə kusu Pakə nday bba ta gangə sariya dɔɛ̂ tə̂ kəm dəwje tə̂ tɔyn.

⁵ Piyɛr ee kəy-kula tə̂, a njê-mə-kunnje aw dujuje Lubba til kə kar mbɛɛ̂.

Anjə lə Əbbə-dəwje ɔru Piyɛr kəy-kula tə̂

⁶ Mə til tə̂ kə̂ lo-karɛ̂ a, Erodə a ta gangə sariya dɔ Piyɛr tə̂ le, Piyɛr le aw tibbi horo mbambaje tə̂ joo. N̂-tɔɛ̂ kə kula njamji joo ngaâ marə mbambaje aw ngəmje ta-kəy le tɔ.

⁷ A ta koo a, marə anjə lə Əbbə-dəwje unda lo tee ngaâ mə kəy-kula le ndoko. Anjə le ɔru kar Piyɛr arə ndol ngaâ pa nan: «In taar njangə.» Kula njamjije kə̂ jia tə̂ le gaynje nangə̂.

⁸ Anjə le pa arɛ̂ nan: «Uwa bbəri kə əndaar-kuwa-bbər ləi ta ula nɛ̂n-gɔl ləi.» Piyɛr le dda tokə baann. Anjə le pa bbay nan: «Ula kubbu-kul ləi ta unn gom!»

⁹ Piyɛr tee mə kəy-kula tə̂ le oso goe tə̂. Nəjə to nɛ̂n kə̂ anjə le aw dda le to nɛ̂n kə̂ tɔkɔrɔ ang, mba noo to nin â naw nin.

¹⁰ N̂-ndayje lo kə̂ dɔngɔr kə ye kə̂ joo kə̂ mbambaje aw ngəmje a, n̂-teeje ta-kəy tə̂ kə̂ n̂-dda kə andə-narɛ. To ta-kəy kə̂ daw dandə nɛ̂n kə mə bbe tə̂ le. Ta-kəy le təəyn kə dɔɛ̂ baa nɔnde tə̂. N̂-teeje ddaka ngaâ dunnje marə ddəw a, kəm naan tə̂ nəənn njaa anjə le tusu Piyɛr inyɛ̂.

¹¹ Yeenn ngaâ Piyɛr gərə rɔɛ̂ ngaâ pa nan: «Bbasinɛn m-gərə ngaa. Tɔkɔrɔ njaa, Əbbə-dəwje ula anjə arə ɔrum ji Erodə tə̂ ddəm mə nɛ̂n tə̂ kə̂ maji ang kə̂ Jiipije ndikije ta dda səm ddəm.»

¹² N̂-gərə nɛ̂n le kə majɛ̂ a, naw kəy lə Mari kɔn Janje. Jan le daw bbarɛ̂ nan Markə tɔ. Lo tə̂ənn, njê-mə-kunnje mbɔnje naan tokə banya aw dujuje Lubba.

¹³ Piyɛr unda ta-ndoko a, marə nje-kula kə̂ dɛnɛ̂n kə̂ ria nan Rodə ddee ta koo.

¹⁴ N̂-gərə ndu Piyɛr le ngaâ rɔɛ̂ nəəle nya, a nɔru ta-ndoko le ang a, n̂-təl kə ngɔru nandə kəy ta kaw pa karəde to Piyɛr â ar ta-ndoko tə̂ le.

¹⁵ N̂-paje darɛ̂je nan: «Ayn wooy wa?» A Rodə le pa bbay nan: «Tɔkɔrɔ njaa nee tə̂ənn!» Dilɛ̂je tə̂ nan: «Yeenn a, to anjə laa.»

¹⁶ Piyɛr unda ta-ndoko le bbay bbay ngaâ n̂-ddee dɔruje ta-ndoko le a, Piyɛr â ar nəənn ngaâ dɔde ayn.

¹⁷ N̂-dda jia narəde karə n̂-paje tar ang ngaâ nɔru gəl gusu kə̂ Əbbə-dəwje ɔrɛ̂ nɛ̂n kə ddang kəy-kula tə̂ le. Ta kutu nɛ̂n dɔ tar laa a, n̂-pa nan: «Aw paje tar nəənn arəje Jakə kə kəsə njê-mə-kunnje.» Goe tə̂ a, nɔtu ngaâ nunn ddəw naw kə marə lo tə̂ dang.

¹⁸ Lo arɛ a, mbambaje le jɔkuje rɔde nya ngaâ n̂-dujuje se ddi bba inga Piyɛr le wa?

¹⁹ Erodə arə daw sangɛ̂, a dingɛ̂ ang. N̂-duju tar njê-ngəmje ta Piyɛr le ngaâ nunn ndu karə n̂-tɔlde. Goe tə̂ a, Piyɛr le in Jude aw Sejare. N̂-dda ndɔ tɛn lo tə̂ənn.

Tar yo lə Erodə Agiripa

²⁰ Wungu ɔn Erodə nya dɔ dəwje tə̂ kə̂ Tir ddəm dəwje tə̂ kə̂ Sidɔn ddəm. A njê kə̂ Tir kə njê kə̂ Sidɔn le ooje ta naan ta ddee kooe. N̂-gɔlje tar kə Balastus kə̂ to nje-ngəm nɛ̂nje le tɔkə mbay le darə noso gode tə̂. N̂-ndikije karə ddekeke to horode tə̂, mba nɛ̂n-kusaje ləde inje nangə tə̂ lə tɔkə mbay le bba aw ddee nangə tə̂ ləde.

²¹ Ndɔɛ̂ kə̂ dɔju le asə a, Erodə ula kubbu mbay laa aw isi ngende-mbay tə̂ laa ngaâ pa tar arəde kəm dəwje tə̂ tɔyn.

²² Dəwje uruje əkii nan: «Tar kə̂ ta Lubba tə̂ â nəənn bbo tar kə̂ ta dəw tə̂ ang.»

²³ A kar tə̂ənn njaa, anjə lə Əbbə-dəwje unda Erodə, mba narə dəwje ɔsuje gajɛ̂ turu Lubba tə̂. Yeenn bba koreje ɔɛ̂nje ngaâ noy.

²⁴ A tar lə Lubba nja kə kete kete ngaâ aw taa lo.

²⁵ Barnabas de kə Sɔl n̂-tungaje kula ləde Jerujalɛm ngaâ daw təlje a, dawje kə Jan kə̂ daw bbarɛ̂ nan Markə jide tə̂.