Kulaje 11 - Dɔnɔn kə̂ Siki: Tar kə̂ aw arə təbbə

Piyɛr ɔru gəl tar arə njê-mə-kunnje kə̂ Jerujalɛm

¹ Njê-kaw-kulaje kə njê-mə-kunnje kə̂ eeje nangə tə̂ kə̂ Jude ooje nan dəwje kə̂ toje to Jiipije ang kara taaje tar lə Lubba tɔ.

² Piyɛr təl aw Jerujalɛm a, njê-mə-kunnje kə̂ toje to Jiipije aw inje saa.

³ N̂-paje nan: «Andə kəy lə dəwje kə̂ ujaje ganja ang ngaâ usa nɛ̂n kə de mba ddi wa?»

⁴ Yeenn a, Piyɛr unn kutu kɔru gəl nɛ̂n kə̂ to le kə goe goe arəde. N̂-pa nan:

⁵ «Mee mə bbe tə̂ kə̂ Jope maw duju Lubba a, moo nɛ̂n tokə lə nin. Moo marə nɛ̂n tokə lə bəl-kubbu kə̂ tatə ngaâ duwa tɛɛ̂ kə̂ sɔ. Nɛ̂n le in mə dara tə̂ ddisi ndərəng tee lo tə̂ kə̂ mee tə̂.

⁶ Kəmʼm to kə dɔɛ tə̂ ngaâ m-təənn a, moo daje kə̂ gɔlde sɔ kə̂ dɔ nangə tə̂, daje kə̂ muû, daje kə̂ aw akəje nangə̂ kə əəlje.

⁷ Moo marə ndu dəw pa arəm nan: ‹Piyɛr, in taar ə-tɔl ɔn!›

⁸ Mila tə̂ m-pa nan: ‹Baann ang, Əbbəmje! Mba nɛ̂n kə̂ ndu mbətə wase nɛ̂n kə̂ maji ang, musa ndɔ kâra ang.›

⁹ M-təl moo ndu dəw le mə dara tə̂ nan: ‹Maji karə nɛ̂n kə̂ Lubba dda arə ddee maji a, oo to nɛ̂n kə̂ maji ang kəmi tə̂ ang.›

¹⁰ Nɛ̂ɛnn le to tokə baann gɔl mota ngaâ dunn nɛ̂n le tɔyn n̂-təl nɛ̂n darâ.

¹¹ Kar tə̂ənn njaa, dingawje mota kə̂ dulade rɔm tə̂ inje bbe tə̂ kə̂ Sejare teeje mə kəy tə̂ kə̂ jisi tə̂ le.

¹² Ndil pa arəm nan mɔtu maw kə de bbo məjə ang. Ngakɔnʼmje kə̂ misan nəənn dannəmje ngaâ jandə mə kəy tə̂ lə Kɔrnɛy le.

¹³ Nɔru gəl gusu kə̂ anjə tee ingɛ̂ nɛ̂n mə kəy tə̂ laa ngaâ pa arɛ̂ nan: ‹Ula bbe tə̂ kə̂ Jope arə Simɔn kə̂ daw bbarɛ̂ nan Piyɛr ddee.

¹⁴ Simɔn le a pa tarje kari. Əi kə njê kə̂ kəy ləi â kingaje kaji ddəw tarje tə̂ənn le.›

¹⁵ Munn kutu pa tar a, Ndil-mə-nda ddisi dɔde tə̂ tokə n̂-ddisi dɔje tə̂ kunn-kute tə̂ le.

¹⁶ Yeenn bba, mole məm dɔ tar tə̂ lə Əbbə-dəwje kə̂ pa nan: ‹Jan dda dəwje batɛm maann, a sese, â kingaje batɛm Ndil-mə-nda.›

¹⁷ Lubba arəde Ndil-mə-nda tokə narəje kar tə̂ kə̂ junn nɛ̂n məje jarə Əbbə-dəwje Jeju-Kristə le. Yeenn a, m-to dəw ddi bba mâ kasə kɔku ddəw Lubba karə dda marə nɛ̂n wa?»

¹⁸ Dəwje le ooje tarjeenn le a, əwje rɔde ngaâ ɔsuje gaji Lubba paje nan: «Lubba arə ddəw dəwje kə̂ toje to Jiipije ang karə n̂-turuje məde mba kinga nɛ̂n təbbə tɔ.»

Kunn-kutu Egilisi kə̂ Antiyos

¹⁹ Njê-mə-kunnje kə̂ sanrɛje naan mba nɛ̂n-singa kə̂ ingade go yo tə̂ lə Etiyɛnn le awje ndərəng teeje bbe tə̂ kə̂ Penisi, Sipərə kə Antiyos. A mə bbeje tə̂ənn le Jiipije kə karəde baa â n̂-tɔjude tar lə Lubba.

²⁰ A marɛ̂je horode tə̂ kə̂ gəlde to dəwje kə̂ Sipərə kə dəwje kə̂ Sirɛnn ddeeje bbe tə̂ kə̂ Antiyos a, paje Tar kə̂ Maji lə Əbbə-dəwje Jeju arə dəwje kə̂ aw paje ndɔn-tar gɛrɛkə tɔ.

²¹ Singa-mɔngu lə Əbbə-dəwje to dɔde tə̂ arə dəwje nya ooje məde tə̂ kə Əbbə-dəwje ngaâ n̂-turuje ddəw ləde.

²² Njê-mə-kunnje kə̂ Egilisi tə̂ kə̂ Jerujalɛm ooje tar nəənn le ngaâ ulaje Barnabas Antiyos.

²³ Barnabas le ddee tee ngaâ oo mə-maji kə̂ Lubba dda kə njê-mə-kunnje le a, inga rɔ-nəəl nya ngaâ ndəjəde karə dundaje məde tɔyn dɔ Əbbə-dəwje tə̂.

²⁴ Mba Barnabas le to dəw kə̂ maji ddəm dəw kə̂ Ndil-mə-nda dduse ddəm mə-kunn laa bo nya ddəm arə dəwje nya ddeeje to dəwje lə Əbbə-dəwje.

²⁵ Goe tə̂ a, Barnabas le ɔtu aw bbe tə̂ kə̂ Tarsə mba sangə Sɔl.

²⁶ Ningɛ̂ a, n̂-ddee saa Antiyos. N̂-ddaje bbal kâra Egilisi tə̂ kə̂ Antiyos ngaâ n̂-tɔjuje nɛ̂n dəwje nya nya. Bbe tə̂ kə̂ Antiyos â dəwje unn kutu bbar ri njê-njaje go Jeju tə̂ to «dəwje lə Kristə.»

²⁷ Dɔ ndɔɛ̂ tə̂ənn, marə njê-kilaje mbər tar lə Lubba inje Jerujalɛm awje bbe tə̂ kə̂ Antiyos.

²⁸ Ndil unda tar ta marɛ̂ tə̂ kâra kə̂ ria nan Agabus. Nin taar ngaâ n̂-pa nan: «Marə ndɔ a, tɔkə bbo a koso dɔ nangə tə̂ tɔyn.» A tɔkɔrɔ njaa bbo le oso dɔ ndɔ tə̂ kə̂ Kolodə to nɛ̂n to tɔkə mbay.

²⁹ Njê-njaje go Jeju tə̂ ooje ta naan karə dəw kâra kâra unn nɛ̂n kə̂ asə singɛ̂ mba kula nɛ̂n karə duman nɛ̂n njê-mə-kunnje kə̂ Jude.

³⁰ N̂-ddaje tokə baann. Darəje nɛ̂nje le Barnabas de kə Sɔl darə dawje nɛ̂n darə dəwje kə̂ dɔ Egilisi tə̂ kə̂ nangə tə̂ kə̂ Jude.