Kulaje 10 - Dɔnɔn kə̂ Siki: Tar kə̂ aw arə təbbə

Marə anjə pa tar kə Kɔrnɛy

¹ Marə dingaw ee bbe tə̂ kə̂ Sejare, ria nan Kɔrnɛy, n̂-to nje-kɔn dɔ mbambaje kə̂ dunda ri mbɔn-naan ləde nan «mbɔn-naan kə̂ Itali».

² Ne de kə njê kə̂ kəy laa tɔyn daw bbəəlje Lubba, naw numan Jiipije kə̂ toje to njê-ndooje ddəm naw duju Lubba kə kar tɔyn ddəm.

³ Marə ndɔ kə gɔl kar mota, noo marə anjə lə Lubba tokə nɛ̂n kə̂ naw ninjeenn. Anjə le andə kəy laa ngaâ bbarɛ̂ nan: «Kɔrnɛy!»

⁴ Kɔrnɛy le ɛɛ̂ kə kəm bbəəl ngaâ pa nan: «Əbbə-dəwje, nan ddi wa?» Anjə le pa arɛ̂ nan: «Lubba oo duju ləi kə kuman kə̂ aw uman njê-ndooje. Məɛ̂ oy dɔi ang.

⁵ Bbasinɛn nəənn njaa, ula bbe tə̂ kə̂ Jope arə marə dəw kə̂ ria nan Simɔn kə̂ daw bbarɛ̂ nan Piyɛr ddee.

⁶ N̂-to kəy lə marə dingaw kə̂ ria nan Simɔn tɔ. N̂-to nje-kula əndaar, kəy laa to mbɔr ba-katə tə̂.»

⁷ Anjə kə̂ pa tar le ɔtu a, Kɔrnɛy le bbar njê-kulaje laa joo kə marə mbamba laa kâra kə̂ aw bbəəl Lubba.

⁸ Nɔru gəl nɛ̂nje le tɔyn narəde ngaâ nulade Jope.

⁹ Lo-karɛ kə̂ daw njaje ddəw-boô bbay ngaâ n̂-teeje ngɔsi kə Jope a, Piyɛr aal aw dɔ kəy tə̂ mba duju Lubba, ngɔsi kə gɔl kar dɔku gire joo tə̂.

¹⁰ Bbo ddɛɛ̂ arə n̂-ndiki ta kusa nɛ̂n. Kar tə̂ kə̂ daw dda nɛ̂n-kusa ta karɛ̂ a, noo nɛ̂n tokə nin â naw nin.

¹¹ Noo kəm dara təəyn ngaâ noo marə nɛ̂n in mə dara tə̂ le aw ddisi. Nɛ̂n le to tokə lə bəl-kubbu kə̂ tatə kə̂ duwa tɛɛ̂ kə̂ sɔ. Nɛ̂n le aw ddisi kə nangə̂.

¹² Daje dang dang tɔyn njaa toje tə̂: Daje kə̂ gɔlde sɔ, daje kə̂ aw akəje nangə̂ kə əəlje dang dang.

¹³ Marə ndu dəw pa arɛ̂ nan: «Piyɛr in taar, ə-tɔl ɔn.»

¹⁴ A Piyɛr ila tə̂ nan: «Baann ang! Əbbəmje. Nɛ̂n kə̂ ndu mbətə kə nɛ̂n kə̂ maji ang, musa ndɔ kâra ang.»

¹⁵ Ndu dəw le təl pa arɛ̂ nan: «Maji karə nɛ̂n kə̂ Lubba dda arə ddee maji mban, oo to nɛ̂n kə̂ maji ang kəmi tə̂ ang.»

¹⁶ Nɛ̂ɛnn le to tokə baann gɔl mota ngaâ dunn nɛ̂n le n̂-təl nɛ̂n darâ.

¹⁷ Piyɛr sangə ddəw ta gərə gəl nɛ̂n kə̂ noo kə nin le pin. A karɛ̂ tə̂ənn njaa dingawje kə̂ Kɔrnɛy ulade le sangəje kəy lə Simɔn ingaje ngaâ arje ta-kəy tə̂ le.

¹⁸ N̂-bbarje nɛ̂n n̂-dujuje nan: «Simɔn kə̂ daw bbarɛ̂ nan Piyɛr to nəənn wa?»

¹⁹ Piyɛr nayn aw əjə dɔ nɛ̂n tə̂ kə̂ noo le bbay a, Ndil pa arɛ̂ nan: «Oo, dingawje mota aw sangije.

²⁰ In taar, ə-ddisi aw kə de bbo arə məi sangi ang, mba əman â mulade.»

²¹ Piyɛr ddisi inga dingawje le ngaâ pa arəde nan: «Əman kə̂ aw sangəmje le â mar nəənn. Ə-ddeeje nəənn mba ddi wa?»

²² Dilaje tə̂ nan: «Kɔrnɛy kə̂ to nje-kɔn dɔ mbambaje â ulaje. N̂-to dəw kə̂ gatə gatə ngaâ naw bbəəl Lubba. Jiipije tɔyn aw paje tar laa maji. Anjə lə Lubba pa arɛ̂ karə n̂-bbari mə kəy tə̂ laa, karə noo tar kə̂ a ta pa karɛ̂.»

²³ Piyɛr arə dandə kəy ngaâ arəde lo n̂-toje tə̂. Lo-karɛ̂ a, nunn ddəw naw kə de. Marə njê-mə-kunnje kə̂ Jope dannɛ̂je.

Piyɛr aw rɔ Kɔrnɛy tə̂

²⁴ Lo-karɛ̂ kə̂ goe tə̂ a, n̂-teeje Sejare. Kɔrnɛy bbar njê-nujuje laa kə njê-buwa-kuraje laa kə̂ n̂-ndikide nya naw ngəbbə nɛ̂n Piyɛrdede le.

²⁵ Piyɛr a ta kandə kəy le be a, Kɔrnɛy tila kəmɛ̂ ngaâ oso nɔn gɔlɛ̂ tə̂ ta walɛ̂.

²⁶ A Piyɛr uwɛ̂ kə taar ngaâ pa nan: «In taar, mba əman kara m-to dəw mari.»

²⁷ Piyɛr aw pa tar kə Kɔrnɛy andə nɛ̂n kə kəy a, noo dəwje tokə banya kə̂ mbɔnje naan.

²⁸ Piyɛr pa arəde nan: «Ə-gərəje kə majɛ̂ to darə ddəw Jiipije karə uwaje buwa-kura kə dəwje kə̂ gəlde dang ang ddəm ta kubba mə kəy ləde ang ddəm. A əman, Lubba tɔjum to, to maji karə moo dəw to dəw kə̂ maji ang kəmʼm tə̂ ang wase m-yabbə dəw ang.

²⁹ Mba yeenn bba ula ə-bbarəm a, m-ddee bbo məjə tar kâra ang. M-ndiki ta gərə gəl nɛ̂n kə̂ ə-bbarəm mbɛɛ̂ le.»

³⁰ Kɔrnɛy pa arɛ̂ nan: «Dda ndɔ mota bbokənɛn ngaa, mee mə kəy tə̂ ləm maw duju Lubba gɔl kar mota tə̂. A â ta koo a, marə dəw kə̂ ula kubbu kə ndɔnrɛn ar nɔnʼm tə̂

³¹ ngaâ pa nan: ‹Kɔrnɛy! Lubba oo duju kə̂ ə-duje ngaâ ole məɛ̂ dɔ nɛ̂nje tə̂ kə̂ aw arə njê-ndooje.

³² Maji karə ula bbe tə̂ kə̂ Jope ə-bbar Simɔn kə̂ daw bbarɛ̂ nan Piyɛr. N̂-to bbeê lə Simɔn kə̂ to nje-kula əndaar, kəy laa to ta ba-katə tə̂.›

³³ Kar tə̂ənn njaa mula mari, a ə-ndiki tə̂ â ə-ddee nəənn. Bbasinɛn, jeje tɔyn jee nɔn Lubba tə̂ ta koo tar kə̂ Əbbə-dəwje unda tai tə̂ karə ə-pa arəje.»

Tar kə̂ Piyɛr pa kəy lə Kɔrnɛy

³⁴ Piyɛr ila tə̂ nan: «Bbasinɛn m-gərə ngaa to tɔkɔrɔ njaa Lubba ɔru kəm dəw ang.

³⁵ Horo gəl-dəwje tə̂ tɔyn, dəw kə̂ bbəəl Lubba ddəm dda nɛ̂n kə̂ gatə gatə ddəm a, a ddee maji kəm Lubba tə̂.

³⁶ Nula kə tar laa narə ngann Ijarayɛlje, to Tar kə̂ Maji kə̂ arə mə-wul-lɔm ddəw tə̂ lə Jeju-Kristə kə̂ to Əbbə-dəwje tɔyn.

³⁷ Sese, ə-gərəje nɛ̂n kə̂ tee nangə tə̂ kə̂ Galile ngaâ taa dɔ nangə Jude tɔyn go batɛm tə̂ kə̂ Jan ila mbəre le.

³⁸ Ə-gərəje ddəw kə̂ Lubba ula nɛ̂n singa-mɔngu kə Ndil-mə-nda dɔ Jeju kə̂ Najarɛtə tə̂ kə majɛ̂. Narə n̂-dda maji kə dəwje tɔyn kə lo lo ddəm naji dəwje tɔyn kə̂ Əsu uwade bbərə tə̂ ddəm mba Lubba ee saa.

³⁹ A jeje n-toje to njê-tar-naji nɛ̂nje tɔyn kə̂ n̂-dda dɔ nangə tə̂ lə Jiipije ddəm bbe tə̂ kə̂ Jerujalɛm ddəm. Ne kə̂ n̂-tɔɛ̂je kakə-dəsə tə̂ n̂-tɔlɛ̂je le.

⁴⁰ A ndɔ mota laa a, Lubba ndole ngaâ arə n̂-tɔju rɔɛ̂.

⁴¹ N̂-tɔju rɔɛ̂ dəwje tɔyn ang. Njê-tar-najije kə̂ Lubba mbərəde kete kə jeje kə̂ jusa saa nɛ̂n ngaâ jay saa nɛ̂n â go ndol tə̂ laa le n̂-tɔju rɔɛ̂ narəje.

⁴² Nunn ndu narəje karə jila mbər Tar kə̂ Maji jarə dəwje, ta n-pa jarəde to Lubba undɛ̂ to nje-gangə sariya dɔ dəwje tə̂ kə̂ isije kəm baa ddəm dɔ dəwje kə̂ oyje ddəm.

⁴³ Njê-kilaje mbər tar lə Lubba tɔyn paje tar laa nan: ‹Dəw kə̂ unn məɛ̂ arə Jeju a, Lubba ɔru tar majang laa dɔɛ̂ tə̂ kə ri Jeju le.› »

Ndil-mə-nda ddee dɔ dəwje tə̂ kə̂ toje to Jiipije ang

⁴⁴ Piyɛr nayn aw ɔru gəl nɛ̂njeenn bbay a, Ndil-mə-nda ddee isi dɔ dəwje tə̂ tɔyn kə̂ aw ooje tar le.

⁴⁵ Njê-mə-kunnje kə̂ toje to Jiipije kə̂ dannje Piyɛr le dɔde ayn, mba dooje a, Lubba arə Ndil-mə-nda dəwje kə̂ toje to Jiipije ang tɔ.

⁴⁶ Dooje dəwje kə̂ toje to Jiipije ang aw paje tar kə ndɔn-tarje kə̂ dang dang ddəm aw ɔsuje gaji tɔkə-mbangə lə Lubba ddəm. Yeenn ngaâ Piyɛr pa nan:

⁴⁷ «Dəwje le ingaje Ndil-mə-nda tokə jeje tɔ, a marə dəw a kasə kɔku ddəw karə dingaje batɛm maann wa?»

⁴⁸ Piyɛr le arə ddəw karə n̂-ddade batɛm kə ri Jeju-Kristə ngaâ dəwje le dujuje Piyɛr le karə dda ndɔ rɔde tə̂ ngaji bbay.