Kolosinyɛje 4 - Dɔnɔn kə̂ Siki: Tar kə̂ aw arə təbbə

¹ Sese kə̂ eeje kə bbərəje, maji karə ə-ddaje kə de nɛ̂n kə̂ gatə gatə ddəm nɛ̂n kə̂ to kə dɔgɔlɛ̂ ddəm. Mba maji karə ə-gərəje to sese kara eeje kə Əbbəsese darâ tɔ.

Dɔbɔyn ndəjəje

² Maji karə ə-naynje ddəw duju Lubba tə̂. Arəje məse to dɔɛ tə̂ ngaâ arəje wooyo Lubba.

³ Maji karə ə-dujuje Lubba mba tar ləje tɔ, karə nɔru ddəw narə n-pa tar laa. Baann bba karə mila mbər tar lə Kristə kə̂ to lo-kiyɛ̂ tə̂ le. Mba nɛ̂ɛnn le â dilam kəy-kula tə̂ mbɛɛ̂.

⁴ Maji karə ə-dujuje Lubba bba karə m-pa tar nəənn kə̂ ləw nayn lo-kiyɛ̂ tə̂ le kə ddaka kə dɔgɔlɛ̂.

⁵ Maji karə ə-njaje horo dəwje tə̂ kə̂ ooje məde tə̂ ang kə kəm-karɛ. Arəje kar kə̂ Lubba inya arəse nday baa ang.

⁶ Maji karə tar kə̂ tase tə̂ maji to maji dɔrɔ ngaâ nəəl dəwje. Maji karə ə-gərəje gusu kə̂ â kilaje nɛ̂n tar tə̂ lə dəwje kâra kâra.

Dɔbɔyn lapiya

⁷ Ngokɔnje Tisikə kə̂ m-ndike nya â a pa tar kisi ləm kə̂ misi tɔyn karəse. N̂-to nje-kula marəm kə̂ aw dda kula lə Əbbə-dəwje kə dɔgɔlɛ̂.

⁸ Əman njaa m-ndiki tə̂ ta kulɛ̂ karəse karə n̂-pa tar kə̂ dɔje tə̂ narəse karə arəse singa.

⁹ Marə ngokɔnje Onejim kə̂ n-ndike nya ngaâ aw dda kula kə dɔgɔlɛ̂ aw saa tɔ. N̂-to dəw kə̂ bbeê ləse. Dede â dâ paje tar nɛ̂nje tɔyn kə̂ aw nja nəənn karəse.

¹⁰ Aristarkə kə̂ to nje-kəy-kula marəm kə Markə kə̂ to ngonn-nann Barnabas n̂-ddajese lapiya. Ingaje ndu ɔju dɔ Markə le mban. Yeenn bba bbo n̂-tee horose tə̂ a, ə-tɛɛ̂je kə rɔse tə̂ kə majɛ̂.

¹¹ Jeju, kə̂ daw bbarɛ̂ nan Justus ddase lapiya tɔ. Horo Jiipije tə̂ tɔyn kə̂ ooje məde tə̂ kə Jeju, dede kə̂ mota nəənn le â daw dumanʼmje kula tə̂ mba Bbe-kɔn lə Lubba. Dede â minga nɛ̂n singa.

¹² Epaparas kə̂ to dəw kə̂ bbeê ləse ddase lapiya. Ne kə̂ n̂-to bbərə-kula lə Jeju-Kristə le naw dda ddɔ mba tar ləse kə ndɔ tɔyn, ddəw duju Lubba tə̂ bba karə uwaje arəje ngəng, karə ə-ddeeje maji tɔyn, bba karə unnje rɔse tɔyn ta dda nɛ̂n tɔyn kə̂ mə Lubba ndiki.

¹³ Mɔru naji lə Epaparas marəse to naw noo ndoo nya mba tar ləse ddəm mba njê-mə-kunnje kə̂ Lawodise ddəm mba njê kə̂ Iyerapolis ddəm.

¹⁴ Luku kə̂ n-ndike nya, kə̂ to nje-karə-kuman, de kə Demas n̂-ddase lapiya.

¹⁵ Maji karə ə-ddaje lapiya ngakɔnje kə̂ Lawodise, ə-ddaje lapiya Nɛnpa kə̂ njê-mə-kunnje aw mbɔnje naan mə kəy tə̂ laa.

¹⁶ Bbo ə-turaje makəturu nəənn bbeê ləse a, arəje n̂-tura Egilisi tə̂ kə̂ Lawodise tɔ. Ta sese ə-turaje makəturu kə̂ a kin Lawodise ddee.

¹⁷ Ə-paje arəje Arəsipə ə-paje nan, maji karə nunda kəmɛ̂ dɔ kula tə̂ lə Əbbə-dəwje kə̂ darɛ̂, ta n̂-dda kə majɛ̂.

¹⁸ M-ddase lapiya, əman Pɔl njaa muja lapiya nəənn makəturu tə̂ kə jim. Maji karə oleje məse to m-nayn kəy-kula tə̂ bbay. Mə-maji lə Lubba nayn kə se.