Kolosinyɛje 3 - Dɔnɔn kə̂ Siki: Tar kə̂ aw arə təbbə

Pa-nja kə̂ ləw kə ye kə̂ siki

¹ Ə-ndolje kâra baa kə Kristə kə̂ oy ngaâ ndol le mban. Yeenn a, maji karə kəmse to kə dɔ nɛ̂n tə̂ kə̂ darâ, lo tə̂ kə̂ Kristə isi tə̂, dɔ ji-kɔl Lubba tə̂.

² Maji karə əjəje kə dɔ nɛ̂n tə̂ kə̂ darâ, bbo dɔ nɛ̂n tə̂ kə̂ nangə̂ nəənn ang.

³ Mba oyje mban ngaâ təbbə ləse kə̂ tɔkɔrɔ to lo-kiyɛ̂ tə̂ kə Kristə rɔ Lubba tə̂.

⁴ Kar kə̂ Kristə kə̂ to təbbə le unda lo tee a, sese kara â kundaje lo tee saa tɔ ta kinga piti laa saa.

⁵ Mba yeenn bba, maji karə arəje bbo nɛ̂nje kə̂ nangə̂ nəənn oy rɔse tə̂ kə ddang. Nɛ̂nje tokə: Kaya, nɛ̂n-yərəw, dda bbo nɛ̂n karə uta dɔɛ̂, dda bbo nɛ̂nje kə̂ maji ang, kunda kəm-nda kə̂ to ddəw kâra baa kə polo kɔr.

⁶ Yeenn to nɛ̂nje kə̂ aw ddee kə wungu lə Lubba dɔ dəwje tə̂ kə̂ toje to njê-dɔ-kətərəje.

⁷ Kisi ləse ləw to tokə baann, kar tə̂ kə̂ aw ddaje nɛ̂n majangje le.

⁸ A bbasinɛn nəənn, maji karə inyaje nɛ̂njeenn tɔyn. Nɛ̂nje kə̂ tokə: Wungu, rɔ-katə, mə-majang, nɛ̂n-tajije, tar mbəje kə̂ aw tee tase tə̂.

⁹ Maji karə ə-paje tar ngəm arəje naan ang ngaa, mba ɔruje da-rɔ kə̂ ləw kə nɛ̂n-ddaje laa ilaje kɔrɔ̂ tokə lə bar kubbu mban.

¹⁰ Ngaâ ulaje da-rɔ kə̂ siki arə ə-ddeeje to dəwje kə̂ siki. Lubba aw dda arə ə-ddeeje siki kə ndɔ tɔyn ngaâ aw undaje rɔ Lubba kə̂ nje-ddase le kə kete kete. Baann bba â gərəje Lubba le kə majɛ̂.

¹¹ Bbasinɛn, Gɛrɛkə wase Jiipi goto ngaa. Dəw kə̂ uja ganja wase uja ganja ang goto. Dəw kə̂ gəle to dang wase dəw kə̂ kəmɛ̂ ɔru ang goto. Dəw kə̂ to bbərə wase to bbərə ang goto ngaa. A Kristə â to nɛ̂n tɔyn, ne â nee mə dəwje tə̂ tɔyn.

¹² Lubba â mbərəse arə ə-ddeeje to dəwje laa kə̂ n̂-ndikise nya. Yeenn bba, maji karə ooje ndoo lə dəwje, ə-ddaje maji kə dəwje, ə-ddaje rɔse ngaji, ə-wulje pee ngaâ ə-tɔje wurse.

¹³ Maji karə ə-tɔje wurse arəje naan. Bbo dəw dda marə nɛ̂n kə̂ maji ang kə nje-marɛ̂ a, ɔruje tar dɔ naan tə̂. Ddəw kâra baa tokə Əbbə-dəwje ɔru tar dɔse tə̂ le ə-ddaje tokə baann tɔ.

¹⁴ A uta tɔyn, maji karə ndiki to rɔse tə̂ tokə lə kubbu. To nɛ̂n kə̂ a tɔse naan tə̂ kuta nɛ̂n tɔyn.

¹⁵ Maji karə mə-wul-lɔm lə Kristə â ɔn dɔ kəjəje kə̂ məse tə̂. Mba Lubba bbarse karə ingaje mə-wul-lɔm le bba karə ə-ddeeje to da-rɔ kə̂ kâra baa. Maji karə ə-gərəje go maji kə̂ n̂-dda kə se.

¹⁶ Maji karə tar lə Kristə kə̂ nɛ̂nje kə̂ maji to məɛ tə̂ nayn horose tə̂ nya nya. Maji karə ə-tɔjuje naan nɛ̂n ddəm ə-ndəjəje naan ddəm kə kəm-karɛ tɔyn. Ɔsuje paje dang dang kə məse tɔyn ə-walje nɛ̂n Lubba ddəw tə̂ lə Ndil-mə-nda mba majije kə̂ n̂-dda kə se.

¹⁷ Nɛ̂n tɔyn kə̂ aw ddaje wase aw paje, maji karə ə-ddaje kə ri Əbbə-dəwje Jeju ngaâ arəje wooyo Lubba kə̂ Bɔ ddəw tə̂ laa.

Kisi lə njê-mə-kunnje horo naan tə̂

¹⁸ Dɛnɛ̂nje, maji karə ə-bbəəlje ngawsese tokə ye kə̂ Əbbə-dəwje ndiki karə ə-ddaje.

¹⁹ Dingawje, maji karə ə-ndikije dɛnɛ̂nje ləse ngaâ arəje rɔse atəse dɔde tə̂ ang.

²⁰ Ngannje, ooje ta njê-kujuse mə nɛ̂nje tə̂ tɔyn. Yeenn to nɛ̂n kə̂ kura kə̂ Əbbə-dəwje ndiki karə ə-ddaje.

²¹ Bɔ ngannje, ulaje wungu mə ngannse tə̂ ang. Mba rɔde a koy njururu.

²² Bbərəje, maji karə ooje ta əbbəsese kə̂ dɔ nangə tə̂ nəənn mə nɛ̂n tə̂ tɔyn. Ə-ddaje baann mba kunda kə̂ daw dundaje kəmde dɔse tə̂ bba ta nəəl nɛ̂n kəmde tə̂ ang. Ə-ddaje kula arəjede kə mə ngonn-kasə tokə dəwje kə̂ aw bbəəlje Əbbə-dəwje.

²³ Nɛ̂n tɔyn kə̂ aw ddaje a, ə-ddaje kə mə-kâra, tokə nɛ̂n le aw ddaje mba Əbbə-dəwje, bbo mba dəwje ang.

²⁴ Mba ə-gərəje to â kingaje nɛ̂nje kə̂ maji kə̂ Əbbə-dəwje ngəm mba dəwje laa to kuka ləde. Əbbəsese to Kristə, ne â aw ddaje saa.

²⁵ Mba dəw kə̂ aw dda nɛ̂n kə̂ gatə gatə ang, a kinga kuka laa asə kəm nɛ̂n-dda laa kə̂ gatə gatə ang le. Lubba a kɔru kəm dəw kâra ang.