Kolosinyɛje 2 - Dɔnɔn kə̂ Siki: Tar kə̂ aw arə təbbə

¹ M-ndiki karə ə-gərəje to ddɔ kə̂ maw dda to ddɔ kə̂ ngəng nya: Maw dda ddɔ mba tar ləse, mba tar lə dəwje kə̂ Lawodise kə marə dəwje nya kə̂ oomje ndɔ kâra ang.

² M-ndiki ta karə dingaje singa məde tə̂ ngaâ n̂-ddeeje kâra baa ddəw ndiki naan tə̂, karə nɛ̂n-gərə kə̂ maji dda arə məde oso pɔn. Ngaâ n̂-gərəje nɛ̂n kə̂ Lubba ngəm lo-kiyɛ̂ tə̂. Nɛ̂n le to Kristə.

³ Lubba iya dam kəm-karɛ kə dam nɛ̂n-gərə rɔ Kristə tə̂.

⁴ Maw pa tar nəənn bba karə dəw kâra ərəse kə tarje kə̂ tɛɛ̂ tə̂ kə̂ kura kura ang.

⁵ Tɔkɔrɔ njaa, mee horose tə̂ kə da-rɔm njaa ang. A, ndilim ee horose tə̂. Rɔm nəələm nya mba moo a, kula ləse aw nja kə dɔgɔlɛ̂ ngaâ aw uwaje məse kə̂ unnje arəje Kristə le arə ngəng.

Jinga nɛ̂n tɔyn ddəw tə̂ lə Kristə

⁶ Ə-taaje Jeju-Kristə to Əbbəsese mban. Yeenn a, maji karə ə-naynje ddəw mə-kâra tə̂ kə̂ ə-ddaje saa le.

⁷ Maji karə ə-maanje gɔlse dɔ Kristə tə̂ arəje ngəng, tokə lə kakə kə̂ ngirɛ̂ uwa nangə arə kətərə. Uwaje mə-kunn ləse arəje ngəng ddəw kâra baa kə nɛ̂n kə̂ n̂-tɔjuse, ta arəje wooyo Lubba nya nya mba maji kə̂ n̂-dda kə se.

⁸ Ə-ngəmje rɔse kə majɛ̂ arəje dəw ərəse ddəw kəjəje tə̂ laa ang, mba to ngəmje ddəm to kəjəje lə dəwje baa ddəm. To kəjəje kə̂ inje mə nɛ̂n-ji-bbeje tə̂ lə dəwje ddəm to kəjəje kə̂ dɔ nangə tə̂ nəənn ddəm. To kəjəje kə̂ inje ddəw tə̂ lə Kristə ang.

⁹ Mba ne Kristə kə̂ nunn da-rɔ dəw le, nɛ̂nje kə̂ to rɔ Lubba tə̂ tɔyn njaa to rɔɛ̂ tə̂.

¹⁰ Sese kara, ingaje nɛ̂nje tɔyn kə nangə̂ baa ddəw mə-kâra tə̂ kə̂ ə-ddaje saa, ne kə̂ nɔn dɔ ndilje tɔyn kə̂ aw ɔnje mbay ddəm singa-mɔnguje tɔyn ddəm.

¹¹ Ddəw tə̂ laa, ujaje ganja kə̂ dəw â aw uja ang. To ganja lə Kristə â ujaje. Ganja lə Kristə le ɔru bbo nɛ̂n-dda kə̂ maji ang kə̂ to da-rɔje tə̂ kə ddang.

¹² Batɛm kə̂ ingaje le nayn to n̂-dubbuse kə Kristə naan tə̂. Goe tə̂ a, ə-ndolje saa naan tə̂, mba ooje məse tə̂ to singa lə Lubba â ndole.

¹³ Yeenn a, sese kə̂ ləw, nayn to oyje mba majang ləse ddəm mba ganja kə̂ da-rɔ tə̂ kə̂ ujaje ang le ddəm, Lubba dda arə ə-təlje isije kəm baa kə Kristə. Nɔru tar majangje ləje tɔyn dɔje tə̂.

¹⁴ Tarje kə̂ makəturu tə̂ kə̂ unda tar dɔje tə̂ ngaâ aw dda singa kə je le. Lubba ɔru kə ddang. N̂-bbərə tarje le dɔ kakə-dəsə tə̂, n̂-tuju kə ddang.

¹⁵ Lubba ɔru singa lə ndilje tɔyn kə̂ aw ɔnje mbay. N̂-tɔjude kəm dəwje tə̂ tɔyn ngaâ nuwade to bbərəje narə dɔsuje nja kə go kulɛ̂ go Ngonnɛ̂ tə̂ kə̂ tətə ddɔ le.

¹⁶ Yeenn a, arəje dəw kâra gangə sariya dɔse tə̂ mba nɛ̂n kə̂ aw usaje ang ddəm mba nɛ̂n kə̂ aw ayje ang ddəm mba marə kusu ang ddəm mba kusu nɛyn kə̂ siki wase ndɔ-kuwa-rɔ ang ddəm.

¹⁷ Nɛ̂njeenn tɔyn toje to ndil nɛ̂n kə̂ a ddee ndɔ tə̂ kə̂ bara. A nɛ̂n kə̂ tɔkɔrɔ to da-rɔ Kristə.

¹⁸ Dang bba arəje dəwje kə̂ aw ddaje rɔde tɛn baa kəm dəwje tə̂ ngaâ aw poloje anjəje, undaje tar dɔse tə̂ ang. Dooje ninje ləde kəmde tə̂ to nɛ̂nje kə̂ ngəng nya ngaâ kəjəje ləde kə̂ toje to kəjəje lə dəwje baa ddaje arə dooje rɔde bo nya.

¹⁹ Dinyaje ta nayn kə Kristə kə̂ to tokə dɔ dəw le. Dɔ â aw dda arə da-rɔ tɔyn mbɔn naan to kâra baa. Ddəw tə̂ le dɔ â, mbara-rɔje kə mənrə-rɔje uwaje naan ngaâ ubbaje singa tokə ye kə̂ Lubba ndiki.

Koy kə kisi kəm baa kə Kristə

²⁰ Oyje ddəw kâra baa kə Kristə mban arə singaje kə̂ duninya tə̂ toje to nɛ̂n kâra ang kəmse tə̂. A mba ddi bba kisi ləse to tokə dəwje kə̂ dɔ nangə tə̂ nəənn ngaâ aw bbəəlje nduje wa?

²¹ Nduje tokə ye kə̂ nan: «Unn nɛ̂n nəənn ang, ə-nan nɛ̂n nəənn ang, ɔru nɛ̂n nəənn kə jii ang.»

²² Ndujeenn le to mba nɛ̂nje kə̂ bbo kunn njaa dəw unn dda nɛ̂n kula be a, a goto kə ddang. To nduje kə nɛ̂n-tɔjuje lə dəwje.

²³ Tɔkɔrɔ, ndujeenn le toje to nɛ̂n kəm-karɛ kəm dəwje tə̂: Polo nɛ̂nje kə̂ mə dəw ndiki, dda rɔ tɛn baa kə dda rɔ ndoo tə̂. A ndujeenn toje to nɛ̂nje kə̂ baa, a ta dda karə dəw tɔ bboje kə̂ da-rɔɛ̂ tə̂, ndujeenn le asəje ta dda ang.