Kolosinyɛje 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl kə̂ Lubba ndiki tə̂ arə m-ddee to nje-kaw-kula lə Jeju-Kristə kə ngokɔnʼm Timɔte,

² n-dda makəturu nəənn jarə ngakɔnje kə̂ toje to dəwje lə Lubba, kə̂ ooje məde tə̂ kə Kristə ngaâ ddaje saa mə-kâra, kə̂ isije tɔkə bbe tə̂ kə̂ Kolosə. Maji karə Bɔjeje Lubba dda kə se mə-maji ddəm arə məse wul lɔm ddəm.

Pɔl arə wooyo Lubba

³ Kar kə̂ jaw nduju Lubba kə̂ to Bɔ Əbbəjeje Jeju-Kristə a, jaw jarɛ̂ wooyo mbase ngaâ jaw jilase duju tə̂ ləje kə ndɔ tɔyn.

⁴ Joo tar məse kə̂ unnje arəje Jeju-Kristə kə tar ndiki kə̂ aw ndikije dəwje lə Lubba tɔyn le.

⁵ Mba aw undaje məse dɔ nɛ̂nje tə̂ kə̂ maji kə̂ Lubba ngəm mba tar ləse mə dara tə̂. Ndɔ kə̂ dila nɛ̂n mbər Tar kə̂ Maji kə̂ to tar kə̂ tɔkɔrɔ darəse njaa ooje nɛ̂n tar nɛ̂n kə̂ Lubba gɔl mba tar ləse mə dara tə̂ le.

⁶ Tar kə̂ Maji nəənn le aw andə kandə aw nɛ̂n kə kete kete dɔ nangə tə̂ tɔyn. Kar kə̂ Tar le tee bbeê ləse le to tokə baann tɔ, unn kute ndɔ tə̂ kə̂ ooje nɛ̂n tar mə-maji kə̂ tɔkɔrɔ kə̂ Lubba dda kə se le.

⁷ Epaparas kə̂ to nje-kula marəje kə̂ n-ndike nya le â tɔjuse nɛ̂ɛnn. Naw dda kula mba tar le, to nje-kula lə Kristə kə̂ aw dda kula laa kə dɔgɔlɛ̂.

⁸ N̂-pa tar ndiki kə̂ Ndil-mə-nda ula məse tə̂ le narəje.

⁹ Mba yeenn bba, jeje kara, unn kute ndɔ tə̂ kə̂ joo nɛ̂n tar le, jaw duju Lubba kə ndɔ tɔyn mba tar ləse. Ngaâ jaw duje karə narə ə-gərəje nɛ̂n kə̂ məɛ̂ ndiki narə ddususe, narə ingaje kəm-karɛ kə nɛ̂n-gərə dang dang kə̂ Ndil-mə-nda aw arə dəwje.

¹⁰ Yeenn bba pa-nja ləse a to tokə ye kə̂ Əbbə-dəwje ndiki ngaâ â ddaje nɛ̂n kə̂ nəəle kə ndɔ tɔyn. Â ddaje kulaje kə̂ maji dang dang ngaâ â gərəje Lubba kə kete kete.

¹¹ Lubba a dda karə ingaje singa mə nɛ̂nje tə̂ tɔyn ddəw singa-mɔngu tə̂ laa kə̂ to nɛ̂n-piti. Baann bba â tɔje wurse ngaâ â kuwaje karə ngəng mə nɛ̂nje tə̂ tɔyn.

¹² Maji karə arəje wooyo Lubba kə̂ Bɔ kə rɔ-nəəl. Ne â n̂-dda narə asəje ta kinga nɛ̂nje kə̂ maji kə̂ to ɔju dɔ dəwje laa lo-karɛ tə̂.

¹³ N̂-tee kə je kɔ singa tə̂ lə mbay kə̂ lo ndul tə̂ kə ddang ngaâ naw kə je mə Bbe-kɔn tə̂ lə Ngonnɛ̂ kə̂ n̂-ndike nya.

¹⁴ Ddəw tə̂ lə Ngonnɛ̂ le, Lubba ɔruje mə majang tə̂ kə ddang ngaâ tar majangje ləje ɔru dɔje tə̂.

Kristə ee dɔ nɛ̂nje tə̂ tɔyn

¹⁵ Dəw kâra oo Lubba ang. A Kristə le dəw kə̂ ooe a, oo Lubba. N̂-to Ngonn-dərə kə̂ uta nɛ̂nje tɔyn kə̂ Lubba dda.

¹⁶ Mba ddəw tə̂ laa â Lubba dda nɛ̂nje tɔyn kə̂ mə dara tə̂ ddəm dɔ nangə tə̂ ddəm nɛ̂nje kə̂ kəm dəw oo ddəm yeje kə̂ kəm dəw oo ang ddəm. N̂-dda ndilje kə̂ toje to njê-singaje, ndilje kə̂ aw ɔnje mbay. Lubba dda nɛ̂nje tɔyn ddəw tə̂ lə Kristə le ddəm mba Kristə le ddəm.

¹⁷ Kristə to kete arə nɛ̂nje tɔyn ngaâ nɛ̂nje tɔyn aw naynje kə lo-tode ddəw tə̂ laa.

¹⁸ Ne â n̂-to dɔ Egilisi kə̂ to da-rɔɛ̂. N̂-to kunn-kutu nɛ̂n, n̂-to dɔngɔr dəw kə̂ oy, a ndol, baann bba nâ kuta dəwje tɔyn ngaâ nâ kuta nɛ̂nje tɔyn.

¹⁹ Mba Lubba oo maji ta kisi tɔyn njaa mə ngonnɛ̂ tə̂ ta dduse tɔyn.

²⁰ Ddəw tə̂ lə Ngonnɛ̂ le n̂-ndiki ta təl kula nuju naan tə̂ kə nɛ̂nje tɔyn kə̂ dɔ nangə tə̂ ddəm nɛ̂nje tɔyn kə̂ darâ ddəm. Ddəw məsə Ngonnɛ̂ tə̂ kə̂ kayn kakə-dəsə tə̂ le, n̂-dda narə mə-wul-lɔm to dɔ nangə tə̂ ddəm darâ ddəm.

²¹ Ləw, ə-tinje naan kə Lubba. Ə-toje to njê-baanje laa mba majangje kə̂ aw əjəje məse tə̂ ddəm aw ddaje ddəm.

²² A bbasinɛn, Lubba unguse naan tə̂ saa ddəw koy tə̂ lə Ngonnɛ̂ kə̂ unn da-rɔ dəw ngaâ oo ndoo. N̂-dda baann bba karə ə-ddeeje maji kəmɛ̂ tə̂, karə nɛ̂n kâra tuju rɔse tə̂ ang, karə tar kâra to dɔse tə̂ ang.

²³ A maji karə ə-naynje ddəw mə-kunn tə̂ le ta arje dɔɛ tə̂ arə ngəng tokə kəy kə̂ gɔlɛ̂ uwa nangə kə majɛ̂. Nɛ̂n kə̂ Tar kə̂ Maji dda arə aw undaje məse dɔɛ tə̂ le, inyaje ddəwe ang. Tar kə̂ Maji le dila mbəre darə dəwje tɔyn kə̂ dɔ nangə tə̂. Ngaâ əman Pɔl, m-ddee to nje-kula Tar kə̂ Maji le.

Pɔl oo ndoo ngaâ dda ddɔ mba Egilisi

²⁴ Bbasinɛn maw dda rɔ-nəəl mba ndoo kə̂ maw moo mba tar ləse. Ngaâ, maw moo kəsə ndoo lə Kristə mba Egilisi kə̂ to da-rɔɛ̂.

²⁵ Egilisi le â m-ddee to nje-kulɛ̂ mba Lubba â inya kula le jim tə̂ karə mila mbər tar laa tɔyn marəse.

²⁶ Nɛ̂n nəənn le Lubba ngəm lo-kiyɛ̂ tə̂ bbal kə bbal ləw baa arə dəwje tɔyn gərəje ang. A bbasinɛn n̂-tee nɛ̂n kə ddaka narə dəwje laa.

²⁷ N̂-ndiki ta dda bba karə dəwje laa le gərəje nɛ̂n kə̂ n̂-ngəm lo-kiyɛ̂ tə̂ le kə̂ to nɛ̂n-piti ddəm nɛ̂n-kinga ddəm horo dəwje tə̂ tɔyn. Nɛ̂n kə̂ n̂-ngəm lo-kiyɛ̂ tə̂ le â nəənn: Kristə kə̂ to məse tə̂ le, asəje ta kunda məse to â kingaje piti lə Lubba tɔ.

²⁸ Kristə le â jaw jila mbər laa. Jaw jarə ndəjə dəwje tɔyn ngaâ jaw tɔjude nɛ̂n dəwje tɔyn ddəw kəm-karɛ tə̂ dang dang, karə dəwje tɔyn sangəje ddəw tə̂ lə Kristə.

²⁹ Mba yeenn bba maw dda kula ddəm maw dda ddɔ ddəm ddəw singa tə̂ kə̂ Kristə arəm ngaâ aw dda kula rɔm tə̂ ngəng nya.