Tar kə̂ Maji kə̂ Jan dda makəturu tə̂ 9 - Dɔnɔn kə̂ Siki: Tar kə̂ aw arə təbbə

Jeju aji nje-kəm-tɔ arə oo lo

¹ Kar tə̂ kə̂ Jeju aw nja ddəw-boô a, oo marə dəw kə̂ duje to nje-kəm-tɔ.

² Njê-njaje goe tə̂ dujeje nan: «Nje-nɛ̂n-tɔju, majang le nân bba dda arə duje to nje-kəm-tɔ wa? Majang laa njaa wase majang lə njê-kujeje wa?»

³ Jeju ilade tə̂ nan: «Duje to nje-kəm-tɔ mba majang laa njaa ang ddəm mba majang lə njê-kujeje ang ddəm. A nɛ̂ɛnn to bba karə dəwje ooje kula kə̂ Lubba a ta dda rɔɛ̂ tə̂.

⁴ Kar nayn baa bbay â, maji karə n-ddaje kula lə dəw kə̂ ulam. Mba til aw ddee arə dəw a kasə dda kula ang.

⁵ Kar tə̂ nəənn kə̂ m-nayn duninya tə̂ bbay le, m-to lo-karɛ kə̂ duninya tə̂.»

⁶ Go tar tə̂ənn le a, Jeju ti wənrə nangə̂ ngaâ dda arə to bərə ngaâ ratə kəm nje-kəm-tɔ tə̂ le.

⁷ Goe tə̂ a, n̂-pa narə nje-kəm-tɔ le nan: «Aw toko kəmi maann tə̂ kə̂ Silowe.» Silowe le kandɛ̂ nan: «Ngonn nje-kula.» Nje-kəm-tɔ le aw toko kəmɛ̂ maann tə̂ le ngaâ təl a, oo lo.

⁸ Njê-niinn-kəy marɛ̂je kə dəwje kə̂ aw ooeje lo nɛ̂n-kɔy tə̂ le paje nan: «Ne kə̂ ləw nisi naw kɔy nɛ̂n le a nəənn ang wa?»

⁹ Marɛ̂je paje nan: «Ne njaa.» A marɛ̂je paje nan: «Ne ang, dəw kə̂ unda rɔɛ̂ â nəənn.» A dəw le pa nan: «Əman njaa â nəənn.»

¹⁰ Yeenn ngaâ n̂-dujeje nan: «Kəmi le təəyn tokə baânn wa?»

¹¹ Nilade tə̂ nan: «Dingaw kə̂ daw bbarɛ̂ nan Jeju le â dda bərə ratə kəmʼm tə̂ ngaâ pa arəm nan maw toko kəm maann tə̂ kə̂ Silowe. Yeenn bba, maw toko kəmʼm le kə tə̂, a bbasinɛn moo lo ngaa.»

¹² Dəwje le dujeje nan: «Dingaw le ee dda wa?» Nilade tə̂ nan: «M-gərə ang.»

Parijinyɛje dujuje tar nje-kəm-tɔ kə̂ kəmɛ̂ təəyn le

¹³ Dəwje awje kə dəw kə̂ ləw to nje-kəm-tɔ le rɔ Parijinyɛje tə̂.

¹⁴ Ndɔ kə̂ Jeju dda bərə ratə kəm nje-kəm-tɔ tə̂ arə kəmɛ̂ təəyn le to ndɔ-kuwa-rɔ lə Jiipije.

¹⁵ Yeenn bba, Parijinyɛje kara dujuje dəw le nan: «Ddi â dda nɛ̂n bba bbasinɛn aw oo lo wa?» Dəw le pa arəde nan: «N̂-ratə bərə kəmʼm tə̂ ngaâ maw toko kəmʼm a, bbasinɛn moo lo ngaa.»

¹⁶ Marə Parijinyɛje paje nan: «Dəw kə̂ dda nɛ̂n nəənn in rɔ Lubba tə̂ ang, mba n̂-bbəəl ndɔ-kuwa-rɔ ang.» A marɛ̂je paje nan: «Dəw kə̂ to nje-nɛ̂n-dda kə̂ maji ang a kasə dda nɛ̂n-mɔrije kə̂ be tokə baânn wa?» Tin-naan to horo Parijinyɛje tə̂ le.

¹⁷ Yeenn ngaâ n̂-təl n̂-dujuje dəw kə̂ kəmɛ̂ tɔ ləw le bbay nan: «A əi, tar ddi â ə-pa dɔ dəw tə̂ kə̂ dda arə oo lo le wa?» Nilade tə̂ nan: «N̂-to nje-kila mbər tar lə Lubba.»

¹⁸ Njê-kɔn dɔ Jiipije mbətəje ta ndiki tə̂ to dəw le to nje-kəm-tɔ ləw bba bbasinɛn aw oo lo. Mba yeenn bba n̂-bbarje njê-kujeje

¹⁹ ngaâ n̂-dujude nan: «Ngonnse â nəənn wa? Ə-paje nan duje to nje-kəm-tɔ wa? Dda tokə baânn bba bbasinɛn naw noo lo wa?»

²⁰ Njê-kujeje le ilajede tə̂ nan: «N-gərə to ngonnje njaa â nəənn. Juje to nje-kəm-tɔ njaa.

²¹ A nɛ̂n kə̂ dda bba naw noo lo bbasinɛn le, n-gərə ang. N-gərə dəw kə̂ dda bba kəmɛ̂ le təəyn ang. Nasə dingaw ngaa, ə-dujeje a, ne njaa nâ pa karəse.»

²² N̂-paje baann mba n̂-bbəəlje njê-kɔnje dɔ Jiipije. Mba dooje ta naan ta bbo dəw njaa pa kə ddaka nan Jeju to Mesi a, tubba dəw le kəy mbɔn-naan tə̂ ləde kə ddang.

²³ Mba yeenn bba njê-kujuje nje-kəm-tɔ le paje nan: «Nasə dingaw ngaa, ə-dujeje.»

²⁴ Yeenn ngaâ Parijinyɛje le təl bbarje nje-kəm-tɔ kə̂ təl oo lo le ngaâ paje arɛ̂je nan: «Ɔsu gaji Lubba. Jeje, n-gərə to dəw kə̂ dda arə oo lo le to nje-nɛ̂n-dda kə̂ maji ang.»

²⁵ Dəw le ilade tə̂ nan: «N̂-to nje-nɛ̂n-dda kə̂ maji ang kara m-gərə ang. A nɛ̂n kâra kə̂ m-gərə, m-to nje-kəm-tɔ ləw, a bbasinɛn nəənn moo lo.»

²⁶ N̂-dujeje nan: «Ddi a n̂-dda səi wa? N̂-dda tokə baânn bba kəmi le təəyn wa?»

²⁷ Nilade tə̂ nan: «M-pa marəse mban, a ə-ndikije tə̂ ang. Ə-ndikije karə m-təl m-pa bbay mba ddi wa? Ə-ndikije ta ddee to njê-njaje goe tə̂ tɔ wa?»

²⁸ Yeenn ngaâ n̂-tajɛ̂je nan: «Əi â ə-to nje-nja goe tə̂. Jeje, n-to njê-njaje go Mɔyijə tə̂.

²⁹ Jeje, n-gərə to Lubba pa tar kə Mɔyijə. A dəw nəənn, n-gərə lo kə̂ nin tə̂ bba n̂-ddee ang.»

³⁰ Dəw le ilade tə̂ nan: «Nɛ̂n kə̂ dum dɔm le â nəənn. N̂-dda narə kəmʼm təəyn, a ə-gərəje lo kə̂ nin tə̂ bba n̂-ddee ang wa?

³¹ N-gərə to njê-nɛ̂n-ddaje kə̂ maji ang, Lubba aw oo ndu nɔn ləde ang njaa. A naw noo ndu nɔn lə dəw kə̂ aw oo tɛɛ̂ ngaâ aw dda nɛ̂n kə̂ məɛ̂ ndiki.

³² Joo nan marə dəw təəyn kəm dəw kə̂ duje to nje-kəm-tɔ ndɔ kâra ang.

³³ Bbo dəw nəənn in rɔ Lubba tə̂ ang a, nâ kasə dda nɛ̂n kâra ang.»

³⁴ Parijinyɛje le ilɛ̂je tə̂ nan: «Duji mə majang tə̂ ngaâ ə-tɔku məɛ tə̂. A ə-ndiki ta tɔjuje nɛ̂n wa?» Yeenn ngaâ n̂-tubbɛ̂je kəy-mbɔ-naan tə̂ le.

Njê-kəm-tɔje kə̂ tɔkɔrɔ

³⁵ Jeju oo nan Parijinyɛje tubbaje dəw kə̂ kəmɛ̂ təəyn le kəy mbɔn-naan tə̂ ləde. Naw ningɛ̂ ngaâ n̂-duje nan: «Oo məi tə̂ kə Ngonn lə dəw wa?»

³⁶ Dəw le ilɛ̂ tə̂ nan: «Əbbə-dəwje, Ngonn lə dəw le to nân bba karə moo məm tə̂ saa wa?»

³⁷ Jeju pa arɛ̂ nan: «Ooe mban. Ne â naw pa səi tar nəənn.»

³⁸ Yeenn ngaâ dingaw le pa nan: «Əbbə-dəwje, moo məm tə̂.» Ngaâ nɔsu məkəjə-gɔlɛ̂ nɔn Jeju tə̂ le.

³⁹ Goe tə̂ a, Jeju pa nan: «M-ddee dɔ nangə tə̂ nəənn ta gangə sariya, yeenn bba karə dəwje kə̂ ooje lo ang, ooje lo ngaâ ta karə dəwje kə̂ aw ooje lo, ooje lo ang ngaa.»

⁴⁰ Marə Parijinyɛje kə̂ eeje tə̂ənn le ooje tar lə Jeju le ngaâ dujeje nan: «Jeje kara n-to njê-kəm-tɔje tɔ wa?»

⁴¹ Jeju ilade tə̂ nan: «Bbo ə-toje to njê-kəm-tɔje a, â ddaje majang ang. A bbasinɛn, ə-paje nan: ‹Jaw joo lo› a ə-naynje mə majang tə̂.»