Tar kə̂ Maji kə̂ Jan dda makəturu tə̂ 7 - Dɔnɔn kə̂ Siki: Tar kə̂ aw arə təbbə

Ngakɔn Jeju ooje məde tə̂ saa ang

¹ Goe tə̂ a, Jeju aw nja dɔ nangə Galile tə̂ bbay. N̂-ndiki ta kaw Jude ang, mba njê-kɔnje dɔ Jiipije aw sangəje ddəw ta tɔlɛ̂.

² Kusu lə Jiipije kə̂ to kusu Kəy-kam nayn ngɔsi ngaa.

³ Ngakɔn Jeju paje arɛ̂je nan: «Ɔtu lo tə̂ nəənn bbo aw nangə Jude tə̂, arə njê-njaje goi tə̂ kara ooje kulaje kə̂ aw dda tɔ.

⁴ Dəw kə̂ ndiki karə dəwje gəreje a dda nɛ̂n lo-kiyɛ̂ tə̂ ang. Aw ə-dda nɛ̂nje kə̂ bo nya. Yeenn a, ə-tɔju rɔi arə dəwje kə̂ dɔ nangə tə̂ gərije.»

⁵ Mba ngakɔn Jeju kara ooje məde tə̂ saa ang.

⁶ A Jeju ilade tə̂ nan: «Kar ləm asə ang bbay. A sese, kar tɔyn njaa maji arəse to maji dɔrɔ.

⁷ Dəwje kə̂ dɔ nangə tə̂ a kasə ta mbətəse ang. A əman, dəwje mbətəmje, mba m-pa marəde m-pa nan kula-ddade maji ang.

⁸ Sese awje kusu tə̂ le. A əman, mâ kaw ang, mba kar ləm asə ang bbay.»

⁹ Jeju pa tar arəde baann a, təl nayn Galile.

¹⁰ Ngakɔɛ̂nje awje kusu tə̂ le, a ne kara naw lo-kiyɛ̂ tə̂, narə dəw ooe ang.

Jeju tɔju nɛ̂n Jerujalɛm ndɔ kusu tə̂

¹¹ Njê-kɔn dɔ Jiipije aw sangəje Jeju ndɔ kusu tə̂ le. N̂-dujuje tar nan: «Nee dda wa?»

¹² Horo dəwje tə̂ kə̂ banya le, dəwje aw paje tar laa hɔy hɔy. Marɛ̂je paje nan: «N̂-to dəw kə̂ maji.» A marɛ̂je paje nan: «Ngəm, naw nərə dəwje.»

¹³ A dəw kâra tay pa tar laa kə taar ang, mba n̂-bbəəlje Jiipije.

¹⁴ N̂-ddaje kusu le tee dannâ a, Jeju aw kəy-polo Lubba tə̂ ngaâ unn kutu tɔju nɛ̂n.

¹⁵ Nɛ̂n-tɔju laa le dum dɔ njê-kɔnje dɔ Jiipije ngaâ paje nan: «Dəw nəənn ndo makəturu ang, a n̂-gərə nɛ̂nje nəənn nya be tokə baânn wa?»

¹⁶ Jeju ilade tə̂ nan: «Nɛ̂n-tɔju ləm in rɔ dəw tə̂ kə̂ ulam bbo in rɔm tə̂ njaa ang.

¹⁷ Dəw kə̂ ndiki ta dda nɛ̂n kə̂ mə Lubba ndiki a, a gərə se nɛ̂n-tɔju ləm in rɔ Lubba tə̂ wase tarje kə̂ məm tə̂ njaa maw pa wa.

¹⁸ Dəw kə̂ aw pa tar kə̂ məɛ̂ tə̂ njaa, to dəw kə̂ aw sangə piti laa njaa. A dəw kə̂ aw sangə piti lə dəw kə̂ ulɛ̂, aw pa tar kə̂ tɔkɔrɔ, ngaâ nɛ̂n-dda kə̂ gatə gatə ang ɔrɛ̂ ang.

¹⁹ Mɔyijə â arəse Ndu ang wa? A dəw kâra horose tə̂ aw bbəəl Ndu ang. Yeenn a, mba ddi bba aw sangəje ddəw ta tɔləm wa?»

²⁰ Dəwje le paje arəje Jeju nan: «Ndil kə̂ maji ang to məi tə̂. Nân bba aw sangə ddəw ta tɔli wa?»

²¹ Jeju ilade tə̂ nan: «Nɛ̂n kâra baa njaa m-dda, a dum dɔse tɔyn.

²² Mɔyijə unn ndu karə ujaje ganja ngannse kə̂ dingaw. A kajeje â unn kutu kuja ganja bbo Mɔyijə ang. Mba yeenn bba, ndɔ-kuwa-rɔ kara, aw ujaje dəw ganja.

²³ Bbo ndɔ-kuwa-rɔ tə̂ kara aw ujaje dəw ganja mba Ndu lə Mɔyijə kə̂ aw bbəəlje, a mba ddi bba arəje wungu ɔnse dɔm tə̂ mba dəw kə̂ majɛ̂ ndɔ-kuwa-rɔ tə̂ wa?

²⁴ Maji karə ə-gangəje sariya kə̂ gatə gatə bbo ə-gangəje sariya mba nɛ̂nje kə̂ aw ooje kə kəmse baa ang.»

Jeju to Mesi le wa?

²⁵ Marə njê-bbeje kə̂ Jerujalɛm paje nan: «Dingaw nəənn â daw sangɛ̂ ta tɔlɛ̂ le ang wa?

²⁶ Ooje, naw pa tar kəm dəwje tə̂ tɔyn, a dəw kâra pa marə tar ang. Njê-kɔnje dɔje gərəje to n̂-to Mesi le njaa wa?

²⁷ Ndɔ kə̂ Mesi ddee a, dəw kâra a gərə lo kə̂ nin tə̂ bba n̂-ddee ang. A dingaw nəənn, n-gərə lo kə̂ nin tə̂ bba n̂-ddee.»

²⁸ Yeenn ngaâ Jeju aw tɔju nɛ̂n kəy-polo Lubba tə̂, a pa kə taar nan: «Ə-gərəmje njaa wa? Ə-gərəje lo kə̂ min tə̂ njaa wa? Əman njaa m-ddee kə dɔm baa ang. Ne kə̂ nulam le, n̂-to tɔkɔrɔ. Ne, ə-gəreje ang.

²⁹ Əman, m-gəre mba min rɔɛ̂ tə̂ bba m-ddee ngaâ ne â nulam.»

³⁰ Yeenn ngaâ dəwje le sangəje ddəw ta kuwa Jeju le, a dəw kâra asə ta kuwɛ̂ ang, mba kar laa asə ang bbay.

³¹ A horo dəwje tə̂ kə̂ banya le, dəwje nya ooje məde tə̂ saa. N̂-paje nan: «Ndɔ kə̂ Mesi le ddee a, nâ dda nɛ̂n-mɔrije uta lə dingaw nəənn wa?»

Dula dəwje karə uwaje Jeju

³² Parijinyɛje ooje nɛ̂nje tɔyn kə̂ dəwje kə̂ banya aw paje dɔ Jeju tə̂ aw nyuruje nɛ̂n. Yeenn bba, mbayje lə njê-poloje Lubba kə Parijinyɛje le ulaje njê-ngəmje kəy-polo Lubba karə daw duwɛ̂je.

³³ Jeju pa nan: «M-nayn kə se mba gɔju kar baa ngaa. Goe tə̂ a, mâ təl kə rɔ dəw tə̂ kə̂ ulam le.

³⁴ Â sangəmje, a â kingamje ang, mba lo kə̂ mâ kaw tə̂ le, â kasəje ta kaw tə̂ ang.»

³⁵ Yeenn ngaâ Jiipije dujuje naan nan: «Nâ kaw dda bba ja kasə ta kingɛ̂ ang wa? Nâ kaw rɔ Jiipije tə̂ kə̂ sanrɛje naan horo Gɛrɛkəje tə̂, ta tɔju nɛ̂n Gɛrɛkəje wa?

³⁶ N̂-pa narəje nan: ‹A sangəmje, a â kingamje ang, mba asəje ta kaw lo tə̂ kə̂ maw maw tə̂ ang. Nâ ta pa nan ddi â nəənn wa?› »

Jeju pa tar lə Ndil-mə-nda kə̂ a ddee

³⁷ Ddutu ndɔ kusu tə̂ kə̂ to ndɔ kə̂ ngəng nya njaa, Jeju ar taar ngaâ pa nan: «Bbo kunda ɔn marə dəw a, maji karə n̂-ddee rɔm tə̂, nay maann.

³⁸ Makəturu lə Lubba pa nan: Dəw kə̂ unn məɛ̂ arəm a, baje kə̂ aw arəje təbbə a kinje rɔɛ̂ tə̂ kula.»

³⁹ Jeju pa tar nəənn ɔju dɔ Ndil kə̂ dəwje kə̂ ooje məde tə̂ saa a kingaje le. Kar tə̂ənn, Ndil-mə-nda ddee ang bbay, mba Jeju nayn inga piti lə Lubba ang bbay.

Dəwje kə̂ banya tinje naan ɔju dɔ Jeju

⁴⁰ Dəwje kə̂ banya le ooje tar lə Jeju le ngaâ marɛ̂je paje nan: «Dəw nəənn to Nje-kila mbər tar lə Lubba le njaa.»

⁴¹ Marɛ̂je paje nan: «Ne â n̂-to Mesi le.» A marɛ̂je paje nan: «Galile â Mesi le a kin tə̂ ddee wa?»

⁴² Mba Makəturu lə Lubba pa nan: Mesi a kin gəl Dabbiti tə̂, nâ kin Betelehɛm ngonn bbe tə̂ kə̂ duju Dabbiti kə tə̂.

⁴³ Yeenn bba, dəwje tinje naan ɔju dɔɛ̂.

⁴⁴ Marɛ̂je horode tə̂ ndikije ta kuwɛ̂, a dəw kâra uwɛ̂ ang.

⁴⁵ Njê-ngəmje kəy-polo Lubba le təlje ddeeje rɔ mbayje tə̂ lə njê-poloje Lubba kə Parijinyɛje tə̂ le a, n̂-dujujede nan: «Mba ddi bba ə-ddeeje kə Jeju le ang wa?»

⁴⁶ Njê-ngəmje kəy-polo Lubba le ilajede tə̂ nan: «Ndɔ kâra dəw pa tar tokə dingaw nəənn ang.»

⁴⁷ Yeenn ngaâ Parijinyɛje le paje arəjede nan: «Sese kara nərəse tɔ wa?

⁴⁸ Marə nje-kɔn dɔje wase marə Parijinyɛ kə̂ unn məɛ̂ arə dingaw nəənn to wa?

⁴⁹ Bbayɛ̂ njaa to dəwje kə̂ banya kə̂ gərəje Ndu lə Mɔyijə ang. N̂-toje to dəwje kə̂ ndu-ndɔɔl to dɔde tə̂ mban.»

⁵⁰ Nikodɛm kə̂ to marə Parijinyɛ kə̂ aw rɔ Jeju tə̂ kete le pa arəde nan:

⁵¹ «Koo tar kə̂ ta dəw tə̂ ang ddəm gərə nɛ̂n kə̂ n̂-dda ang ddəm a gangə sariya dɔɛ̂ tə̂, Ndu arəje ddəw karə n-dda baann ang»

⁵² A kəseje ilɛ̂je tə̂ nan: «Ə-to dəw kə̂ Galile tɔ wa? Ə-sangə mə Makəturu tə̂ lə Lubba kə majɛ̂ oo a, â gərə. Marə nje-kila mbər tar lə Lubba in Galile tə̂ ddee ndɔ kâra ang.»

⁵³ Goe tə̂ a, dəw kâra kâra təl aw kə̂y laa.