Tar kə̂ Maji kə̂ Jan dda makəturu tə̂ 5 - Dɔnɔn kə̂ Siki: Tar kə̂ aw arə təbbə

Jeju dda arə dəw kə̂ dəbbə rɔɛ̂ oy ddee maji

¹ Goe tə̂ a, Jeju aw Jerujalɛm mba marə kusu lə Jiipije to.

² Jerujalɛm tə̂ənn, marə maann to ngɔsi baa kə ta-kəy kə̂ daw dandə nɛ̂n kə batəje. Ri maann le kə tar ebərə nan Beteseda. Dɔsu baranda min mbɔrɛ̂ tə̂.

³ Njê-rɔ-toje, njê-kəm-tɔje, njê-mətəje kə njê kə̂ dəbbə rɔde oy tokə banya toje kɔ barandaje tə̂ le. [Daw nginanje kar kə̂ maann le a ləngə.

⁴ Mba marə karje a, marə anjə aw uru mə maann tə̂ le aw bu maann le. Yeenn bba bbo nje-rɔ-to kə̂ uru mə maann tə̂ kə̂ aw ləngə le dɔngɔr a, rɔ-to laa le, to rɔ-to ddi wa njaa kara tunga.]

⁵ Horo njê-rɔ-toje tə̂ənn le, marə dingaw kə̂ dəbbə rɔɛ̂ oy dda bbal dɔmota gire jijoo ee tə̂ənn.

⁶ Jeju ooe, n̂-to nangə̂. A noo nan rɔɛ̂ toe bbal banya ngaâ n̂-duje nan: «Ə-ndiki karə rɔi ddee maji wa?»

⁷ Nje-rɔ-to le ilɛ̂ tə̂ nan: «Əbbəmje, dəw ləm kə̂ ta kunnum kurum mə maann tə̂ kə̂ aw ləngə le goto. Bbo kar kə̂ maw maw a, marə dəw uru məɛ tə̂ kete arəm.»

⁸ Jeju pa arɛ̂ nan: «In taar, unn tuwa ləi bbo ə-nja.»

⁹ Njangə baa njaa rɔ dingaw le ddee maji. Nunn tuwa laa ngaâ nunn kutu nja. Nɛ̂ɛnn le to ndɔ-kuwa-rɔ tə̂.

¹⁰ Yeenn ngaâ njê-kɔnje dɔ Jiipije paje arə dəw kə̂ rɔɛ̂ ddee maji le nan: «To ndɔ-kuwa-rɔ, ndu ari ddəw karə oto tuwa ləi ang.»

¹¹ A nilade tə̂ nan: «Dəw kə̂ dda arə rɔm ddee maji le â pa arəm nan: Unn tuwa ləi bbo ə-nja.»

¹² N̂-dujeje nan: «Dəw kə̂ pa ari nan unn tuwa ləi bbo ə-nja le to nân wa?»

¹³ A dəw kə̂ rɔɛ̂ ddee maji le gərə dəw le ang. Mba Jeju le andə horo dəwje tə̂ kə̂ banya kə̂ eeje lo tə̂ənn le arə nooe ang.

¹⁴ Goe tə̂ a, Jeju ingɛ̂ mə kəy-polo Lubba tə̂ ngaâ pa arɛ̂ nan: «Oo, rɔi ddee maji ngaa. A ə-dda majang ang ngaa. Baann ang a, nɛ̂n kə̂ ngəng nya uta ye kə̂ kete le a kingai.»

¹⁵ Dingaw le aw pa arə njê-kɔnje dɔ Jiipije le nan Jeju â dda arə rɔɛ̂ le ddee maji.

¹⁶ Mba yeenn bba, njê-kɔnje dɔ Jiipije le unnje kutu sangə ddəw ta dda Jeju maji ang, mba nɛ̂n kə̂ n̂-dda ndɔ-kuwa-rɔ tə̂ lə Jiipije le.

¹⁷ A Jeju pa arəde nan: «Bɔmje aw dda kula ndərəng bbasinɛn. Əman kara maw dda kula tɔ.»

¹⁸ Mba tar nəənn le, njê-kɔnje dɔ Jiipije aw sangəje ddəw kə kete kete ta tɔl Jeju. Mba n̂-bbəəl ndɔ-kuwa-rɔ lə Jiipije ang ngaâ dɔɛ tə̂ bbay, n̂-pa nan Lubba to Bɔɛ̂je njaa. Yeenn tɔju to n̂-dda rɔɛ̂ to dəw kə̂ asə naan kə Lubba.

Singa-mɔngu lə Ngonn lə Lubba

¹⁹ Jeju təl pa arəde nan: «Tɔkɔrɔ njaa, m-pa marəse: Ngonn asə ta dda nɛ̂n kə dɔɛ̂ baa ang. Nɛ̂n kə̂ noo Bɔɛ̂je dda bba n̂-dda. Nɛ̂n tɔyn kə̂ Bɔ dda a, Ngonn dda tɔ.

²⁰ Mba, Bɔ ndiki Ngonn ngaâ n̂-tɔjɛ̂ nɛ̂n tɔyn kə̂ naw dda. Nâ tɔjɛ̂ nɛ̂n-ddaje kə̂ bo uta yeje nəənn karə ooje a, dum dɔse bbay.

²¹ Ddəw kâra baa tokə Bɔ aw ndol dəwje kə̂ oyje ngaâ arə disije kəm baa le, Ngonn aw dda arə dəw isi kəm baa tokə məɛ̂ ndiki tɔ.

²² Tɔ bbay, Bɔ gangə sariya dɔ dəw tə̂ kâra ang. Ninya sariya tɔyn ji Ngonn tə̂.

²³ Yeenn bba karə dəwje tɔyn walje Ngonn le, ddəw kâra baa tokə dəwje tɔyn walje Bɔ. Dəw kə̂ wal Ngonn ang, wal Bɔ kə̂ ulɛ̂ le ang tɔ.

²⁴ «Tɔkɔrɔ njaa m-pa marəse: Dəw kə̂ oo tar ləm ngaâ unn məɛ̂ arə dəw kə̂ ulam a, nâ kisi kə təbbə kə̂ to kə ndɔ kə ndɔ. Dâ gangə sariya dɔɛ̂ tə̂ ang, n̂-tee ta yo tə̂ ninga təbbə mban.

²⁵ Tɔkɔrɔ njaa, m-pa marəse, kar aw ddee ngaâ karɛ̂ le asə mban. Dəwje kə̂ oyje a kooje ndu Ngonn lə Lubba ngaâ njê kə̂ a kooje ndue le a kisije kəm baa.

²⁶ Mba, təbbə to rɔ Bɔ tə̂ njaa, yeenn bba narə təbbə to rɔ Ngonn tə̂ njaa tɔ.

²⁷ Ngaâ narə Ngonnɛ̂ singa kə̂ ta gangə nɛ̂n sariya, mba n̂-to Ngonn lə dəw.

²⁸ Ooje nɛ̂njeenn a, arəje məse unda dɔ binya ang. Kar aw ddee karə dəwje tɔyn kə̂ oyje ngaâ toje mə buwa-yo tə̂ ooje ndu Ngonn lə dəw a,

²⁹ inje mə buwa-yo tə̂ teeje. Njê kə̂ ddaje maji a kinje ta kisije kə təbbə. A njê kə̂ ddaje maji ang a kinje karə n̂-gangə sariya dɔde tə̂.»

Tar-najije kə̂ dɔ Jeju tə̂

³⁰ «Əman, masə ta dda marə nɛ̂n kâra kə dɔm baa ang. Maw gangə sariya kə turu ndu Bɔ ngaâ sariya kə̂ maw gangə to kə dɔgɔlɛ̂. Mba nɛ̂n kə̂ məm ndiki â maw sangə ddəw ta dda ang. Nɛ̂n kə̂ mə dəw kə̂ ulam le ndiki â maw sangə ddəw ta dda.

³¹ «Bbo əman njaa maw pa tar-naji ləm a, tar-naji ləm kə̂ maw pa le to tar kə̂ tɔkɔrɔ ang.

³² A dəw kə̂ dang â aw pa tar-naji ləm. Ngaâ m-gərə to tar-naji ləm kə̂ naw pa le to tar kə̂ tɔkɔrɔ.

³³ Ulaje dəwje rɔ Jan-Batisi tə̂ ngaâ n̂-pa tar-naji dɔ tar tə̂ kə̂ tɔkɔrɔ le.

³⁴ Əman, dəw â aw pa tar-naji ləm ang. A m-pa yeenn mba karə ingaje kaji.

³⁵ Jan nayn tokə puru lambe kə̂ aw ɔn ngaâ aw ndoko. Ngaâ ə-ndikije tə̂ ta dda rɔ-nəəl mba gɔju kar kɔ puru tə̂ laa le.

³⁶ «A tar-naji kə̂ dɔm tə̂, kə̂ ngəng uta ye kə̂ Jan pa to. Mba kula kə̂ Bɔ ulam arə maw dda le njaa aw pa tar-naji ləm ngaâ tɔju to Bɔ â ulam.

³⁷ Ngaâ, Bɔ kə̂ ulam le njaa pa tar-naji ləm. A ooje ndue ndɔ kâra ang ddəm ooje kəmɛ̂ ndɔ kâra ang ddəm.

³⁸ Tar laa le nayn məse tə̂ ang, mba ooje məse tə̂ kə dəw kə̂ nulɛ̂ le ang.

³⁹ «Aw kinyaje mə Makəturu lə Lubba, mba əjəje to Makəturu le a karəse təbbə kə̂ to kə ndɔ kə ndɔ. Makəturuje le paje tar-naji ləm.

⁴⁰ A ə-ndikije ta ddee rɔm tə̂ ta kinga təbbə kə̂ tɔkɔrɔ ang.

⁴¹ «Maw sangə karə dəwje pitimje ang.

⁴² M-gərəse. Ndiki lə Lubba to məse tə̂ ang.

⁴³ Əman, m-ddee kə ri Bɔmje, a ə-taamje kə rɔse tə̂ ang. A bbo marə dəw ddee kə ria njaa a, ə-tɛɛ̂je kə rɔse tə̂.

⁴⁴ Sese aw pitije naan horose tə̂. A ə-sangəje piti kə̂ in rɔ Lubba tə̂ njaa ang. Yeenn a, â kasəje ta koo məse tə̂ tokə baânn wa?

⁴⁵ «Əman â mâ kunda tar dɔse tə̂ nɔn Bɔ tə̂ ang. Dəw kə̂ a kunda tar dɔse tə̂ to Mɔyijə kə̂ undaje məse dɔɛ̂ tə̂ le.

⁴⁶ Bbo ə-ndikije tarje tə̂ lə Mɔyijə a, â ndikije tarje tə̂ ləm tɔ, mba Mɔyijə pa tar ləm makəturuje tə̂ laa.

⁴⁷ A ə-ndikije tarje tə̂ kə̂ Mɔyijə pa makəturu tə̂ le ang. Yeenn a, â ndikije tarje tə̂ kə̂ maw pa tokə baânn wa?»