Tar kə̂ Maji kə̂ Jan dda makəturu tə̂ 4 - Dɔnɔn kə̂ Siki: Tar kə̂ aw arə təbbə

Tar lə Jeju de kə marə dɛnɛ̂n kə̂ Samari

¹ Parijinyɛje ooje nan Jeju aw dda dəwje nya to njê-njaje goe tə̂ ngaâ naw dda dəwje batɛm nya nuta Jan.

² A kə̂ tɔkɔrɔ tə̂, Jeju njaa dda dəw batɛm ang. Njê-njaje goe tə̂ â aw ddaje dəwje batɛm.

³ Jeju oo tar nəənn le a, nin Jude, n̂-təl Galile.

⁴ A, ta kaw Galile le, nâ nday kə ddəw kə̂ Samari.

⁵ N̂-tee ngɔsi kə marə tɔkə bbe kə̂ Samari kə̂ daw bbar nan Sikar. Tɔkə bbe le to ngɔsi kə ndɔɔ kə̂ Jakobbo arə ngonnɛ̂ Jojɛpə.

⁶ Buwa-maann lə Jakobbo to lo tə̂ənn le. Rɔ Jeju nyɛɛ̂ go nja tə̂ le ngaâ isi mbɔr buwa-maann tə̂ le kə kar kə̂ ar dannâ.

⁷ Marə dɛnɛ̂n kə̂ Samari ddee ta to maann a, Jeju pa arɛ̂ nan: «Arəm maann may.»

⁸ Kar tə̂ənn le, njê-njaje goe tə̂ awje mə bbe tə̂ ta ndoko nɛ̂n-kusa.

⁹ Dɛnɛ̂n kə̂ Samari le pa arə Jeju nan: «Əi, ə-to Jiipi, a əman, m-to dəw kə̂ Samari, a â dujum maann-kay tokə baânn wa?» Mba marə nɛ̂n kâra aw mbɔn Jiipije kə dəwje kə̂ Samari naan tə̂ ang.

¹⁰ Jeju ilɛ̂ tə̂ nan: «Bbo ə-gərə nɛ̂n kə̂ Lubba aw arə dəw ngaâ bbo ə-gərə dəw kə̂ aw duji maann-kay nəənn a, əi â, â duje maann-kay, ta nâ kari maann kə̂ aw arə təbbə.»

¹¹ Dɛnɛ̂n le pa arɛ̂ nan: «Əbbəmje, ee kə marə nɛ̂n kâra ta to nɛ̂n maann ang ddəm ngaâ buwa-maann le uru nya, a â kinga maann kə̂ aw arə təbbə le dda wa?

¹² Əi, uta kajeje Jakobbo wa? Ne â narəje buwa-maann nəənn. Ne njaa kə ngannɛ̂ kə daje laa kara dayje maann nəənn tɔ.»

¹³ Jeju ilɛ̂ tə̂ nan: «Dəw ay maann nəənn a, kunda a kɔɛ̂n bbay.

¹⁴ A dəw kə̂ a kay maann kə̂ mâ karɛ̂, kunda a kɔɛ̂n ndɔ kâra ang ngaa. Maann kə̂ mâ karɛ̂ le a təl to kəy-maann kə̂ aw arə təbbə kə̂ to kə ndɔ kə ndɔ.»

¹⁵ Dɛnɛ̂n le pa arɛ̂ nan: «Əbbəmje, arəm maann le arə kunda ɔnʼm ang ngaa ddəm karə m-ddee m-to maann nəənn ang ngaa ddəm.»

¹⁶ Jeju pa arɛ̂ nan: «Aw ə-bbar ngawije ta ə-təl ə-ddee nəənn.»

¹⁷ Dɛnɛ̂n le ilɛ̂ tə̂ nan: «Ngamje goto.» Jeju pa arɛ̂ nan: «Tar kə̂ ə-pa nan: ‹Ngamje goto› le to kə dɔgɔlɛ̂.

¹⁸ Mba ə-taa ngaw gɔl min ngaa. Dingaw kə̂ isi saa bbasinɛn nəənn le to ngawije ang. To tar kə̂ tɔkɔrɔ â ə-pa.»

¹⁹ Yeenn ngaâ dɛnɛ̂n le pa arɛ̂ nan: «Əbbə-dəwje, moo a, ə-to nje-kila mbər tar lə Lubba.

²⁰ Kajeje jee dəwje kə̂ Samari poloje Lubba dɔ ddingiri tə̂ toonn. A see Jiipije, ə-paje nan, lo kə̂ maji polo Lubba tə̂ â to Jerujalɛm.»

²¹ Jeju ilɛ̂ tə̂ nan: «Dɛnɛ̂n, ə-ndiki tar tə̂ ləm: Kar aw ddee kə̂ â kawje dɔ ddingiri tə̂ toonn ang ddəm a kawje Jerujalɛm bba ta polo Bɔy ang ddəm.

²² See dəwje kə̂ Samari, aw poloje nɛ̂n kə̂ ə-gərəje ang. A jee Jiipije, jaw polo nɛ̂n kə̂ jeje n-gərə. Mba kaji in bbe lə Jiipije bba ddee.

²³ A marə kar aw ddee, kar le njaa nəənn, kə̂ dəwje kə̂ aw poloje Lubba tokə tɔkɔrɔ a poloje Bɔy ddəw Ndil tə̂ kə ddəw tar tə̂ kə̂ tɔkɔrɔ. Mba dəwje kə̂ aw poloje Lubba tokə baann â Bɔy aw sangəde.

²⁴ Lubba to ndil arə maji karə dəwje kə̂ aw poloje Lubba poleje kə ndil ddəm kə tar kə̂ tɔkɔrɔ ddəm.»

²⁵ Dɛnɛ̂n le pa arə Jeju nan: «M-gərə to Mesi a ddee, ne kə̂ daw bbarɛ̂ nan Kristə le. Bbo n̂-ddee a, nâ kɔru gəl nɛ̂nje tɔyn karəje.»

²⁶ Jeju ilɛ̂ tə̂ nan: «Əman kə̂ maw pa səi tar nəənn, m-to Mesi le.»

²⁷ Kar tə̂ənn, njê-njaje goe tə̂ təlje ddeeje. A Jeju aw pa tar kə marə dɛnɛ̂n. To nɛ̂n kə̂ dum dɔde. A dəw kâra duje se ddi bba naw duju wase mba ddi bba naw pa saa tar wa ang.

²⁸ Yeenn ngaâ dɛnɛ̂n le inya jo-maann laa a təl aw mə tɔkə bbe tə̂ ngaâ pa arə dəwje nan:

²⁹ «Ə-ddeeje ooje dingaw kə̂ pa tar nɛ̂nje tɔyn kə̂ m-dda arəm nəənn. A du ang, ne â n̂-to Mesi le!»

³⁰ Dəwje inje mə bbe tə̂ le teeje ngaâ ddeeje kə rɔ Jeju tə̂.

³¹ Karɛ̂ tə̂ənn, njê-njaje go Jeju tə̂ aw dujeje nan: «Nje-nɛ̂n-tɔju, usa nɛ̂n bba.»

³² A nilade tə̂ nan: «Nɛ̂n-kusa kə̂ ə-gərəje ang to ta karə musa.»

³³ Yeenn ngaâ njê-njaje go Jeju tə̂ aw dujuje naan nan: «Marə dəw ddee kə nɛ̂n-kusa arɛ̂ wa?»

³⁴ Jeju pa arəde nan: «Nɛ̂n-kusa ləm to ənga dda nɛ̂n kə̂ mə Lubba kə̂ ulam ndiki, ta dda kula kə̂ narəm le tunga.

³⁵ Sese, aw paje nan: ‹Nɛyn nayn sɔ karə juja ko-ndɔɔ.› A əman, m-pa marəse: Aaje ndɔɔje nəənn ooje. Kandə-koje le sangəje asə ta kuja ngaa.

³⁶ Nje-kuja kandə-ko inga kuka laa mban. Naw mbɔn kandə-ko le mba kisi nɛ̂n kə təbbə kə̂ to kə ndɔ kə ndɔ. Yeenn bba karə nje-dubbu ko kə nje-kuja ko, dede joo kəm rɔde nəəlde.

³⁷ Mba dəwje aw paje nan: ‹Marə dəw dubbu ko, a marɛ̂ uja ko le.› Tar le to tar kə̂ tɔkɔrɔ.

³⁸ Mulase marə aw ujaje ko mə ndɔ tə̂ kə̂ ə-ddaje kulɛ̂ ang. Marə dəwje ddaje kula, a sese â ingaje nɛ̂n go kula tə̂ ləde le.»

³⁹ Dəwje nya kə̂ Sikar nangə Samari tə̂ ooje məde tə̂ kə̂ Jeju mba tar lə dɛnɛ̂n kə̂ Samari le. Mba n̂-pa narəde nan: «Dingaw le pa nɛ̂nje kə̂ m-dda tɔyn arəm.»

⁴⁰ Mba yeenn bba, dəwje kə̂ Samari ddee teeje rɔ Jeju tə̂ le a, dujeje nan: «Ə-nayn kə je.» Ngaâ Jeju le nayn kə̂ de ndɔ joo.

⁴¹ Yeenn bba, dəwje kə̂ ooje məde tə̂ saa mba tarje kə̂ ne njaa n̂-pa banyaje nya bbay.

⁴² Ngaâ, n̂-paje darəje dɛnɛ̂n le nan: «Bbasinɛn, joo məje tə̂ saa mba tarje ləi kə̂ ə-pa le njaa ang ngaa. Joo məje tə̂ mba jeje njaa joo tarje kə̂ tɛɛ̂ tə̂ ngaâ n-gərə to, ne njaa n̂-to Nje-kaji-dəwje kə̂ duninya tə̂.»

Jeju aji ngonn lə marə baw-ddɔ

⁴³ Go ndɔ tə̂ kə̂ joo le a, Jeju in lo tə̂ənn aw aw kə Galile.

⁴⁴ Mba ne njaa n̂-pa nan: «Dəwje aw walje nje-kila mbər tar lə Lubba bbeê laa ang.»

⁴⁵ A n̂-tee Galile a, dəwje kə̂ Galile tɛɛ̂je kə rɔde tə̂ kə majɛ̂ mba dede njaa kara dawje Jerujalɛm kusu Pakə tə̂ arə dooje nɛ̂nje tɔyn kə̂ n̂-dda.

⁴⁶ Jeju təl ddee Kana, nangə tə̂ kə̂ Galile, lo tə̂ kə̂ n̂-dda narə maann təl ddee to bɛn tə̂ le. Marə nje-kula kə̂ bo kə̂ kəy lə tɔkə mbay, rɔ ngonnɛ̂ kə̂ dingaw toe Kapɛrnawum.

⁴⁷ Nje-kula le oo nan Jeju in Jude ddee Galile a, naw ningɛ̂ ngaâ n̂-pa narɛ̂ nan: «M-wali nya, ngonnəm a ta koy, ə-ddee Kapɛrnawum ajɛ̂.»

⁴⁸ Jeju pa arɛ̂ nan: «Bbo m-dda nɛ̂n-mɔrije kə nɛ̂nje kə̂ dum dɔ koo ang a, â kasəje ta koo məse tə̂ ang.»

⁴⁹ Nje-kula lə tɔkə mbay le ilɛ̂ tə̂ nan: «Əbbə-dəwje, aw bba nan ngonnəm a koy.»

⁵⁰ Jeju pa arɛ̂ nan: «Aw, ngonni nayn kəm baa.» Dingaw le ndiki tə̂ kə tar lə Jeju le ngaâ ɔtu.

⁵¹ Kar tə̂ kə̂ n̂-nayn ddəw-boô bbay a, njê-kulaje laa tilaje kəmɛ̂ ngaâ paje arɛ̂je nan: «Ngonni nayn kəm baa.»

⁵² N̂-dujude nan: «Kar kə̂ baânn â nisi nɛ̂n kə majɛ̂ wa?» Dilɛ̂je tə̂ nan: «Takənɛn kə gɔl kar kâra kə̂ lo-kul tə̂ a rɔɛ̂ wul nɛ̂n.»

⁵³ Mə bɔɛ̂je le ole to kar tə̂ənn njaa â Jeju pa arɛ̂ nan: «Ngonni nayn kəm baa.» Yeenn ngaâ ne kə nje kə̂ laa tɔyn dooje məde tə̂ kə Jeju.

⁵⁴ Joo lə nɛ̂n-mɔri kə̂ Jeju dda â nəənn. N̂-dda nɛ̂ɛnn le kar tə̂ kə̂ nin Jude n̂-ddee Galile.