Tar kə̂ Maji kə̂ Jan dda makəturu tə̂ 19 - Dɔnɔn kə̂ Siki: Tar kə̂ aw arə təbbə

¹ Yeenn ngaâ Pilatə unn ndu karə daw kə Jeju, daw tundɛ̂ kə ndəy.

² Mbambaje peteje kula konn to əjɔkudɔ ngaâ dulaje dɔ Jeju tə̂. Dulɛ̂je tɔkə kubbu kə̂ ngal kə̂ kasɛ.

³ N̂-ddeeje ngɔsi saa ngaâ n̂-paje darɛ̂je nan: «Lapiya ləi, tɔkə mbay lə Jiipije.» Ngaâ n̂-tundaje ka-mbɔrɛ̂.

⁴ Pilatə le təl tee ddaka bbay ngaâ pa arə Jiipije le nan: «Ya! Maw tee saa kə ddaka ta karəse, karə ə-gərəje to minga marə nɛ̂n kâra ta gangə nɛ̂n sariya dɔɛ̂ tə̂ ang.»

⁵ Yeenn ngaâ Jeju tee ddaka. Əjɔkudɔ konn le to dɔɛ̂ tə̂ kə tɔkə kubbu kə̂ kasɛ̂ rɔɛ̂ tə̂. Ngaâ Pilatə pa arəde nan: «Dəw le â nəənn.»

⁶ A kakə mbayje lə njê-poloje Lubba kə njê-ngəmje ta-kəy-polo Lubba ooeje a, duruje əkii nan: «Ə-tɔlɛ̂ dɔ kakə-dəsə tə̂! Ə-tɔlɛ̂ kakə-dəsə tə̂.» Pilatə pa arəde nan: «Sese njaa uwɛ̂je, ə-tɔlɛ̂je dɔ kakə-dəsə tə̂. Mba minga marə nɛ̂n kâra ta gangə nɛ̂n sariya dɔɛ̂ tə̂ ang.»

⁷ Jiipije ilɛ̂je tə̂ nan: «Marə ndu ləje to. Ddəw ndu tə̂ənn le nasə yo, mba n̂-pa nan n̂-to Ngonn lə Lubba.»

⁸ Pilatə oo tarje le a, bbəəl uta dɔɛ̂ nya bbay.

⁹ N̂-təl nandə kəy-mbay tə̂ le ngaâ n̂-duju Jeju nan: «Ə-to dəw kə̂ dda wa?» A Jeju ilɛ̂ tar tə̂ ang.

¹⁰ Yeenn ngaâ Pilatə pa arɛ̂ nan: «Əman â ə-mbətə ta pa səm tar wa? Ə-gərə to mee kə singa ta kinyai ngaâ mee kə singa ta karə n̂-tɔli kakə-dəsə tə̂ tɔ ang wa?»

¹¹ Jeju ilɛ̂ tə̂ nan: «Bbo Lubba ari singa ang a, ee kə marə singa kâra dɔm tə̂ ang. Mba yeenn bba, dəw kə̂ ulam jii tə̂ â dda majang kə̂ bo nya.»

¹² Karɛ̂ tə̂ənn njaa Pilatə aw sangə ddəw ta kinya Jeju. A Jiipije uruje əkii nan: «Bbo inyɛ̂ a, ə-to nam tɔkə mbay kə̂ Rɔm ang. Mba dəw kə̂ dda rɔɛ̂ to mbay, to nje-baan le tɔkə mbay kə̂ Rɔm.»

¹³ Pilatə oo tarje le a, narə n̂-tee kə Jeju. Ngaâ, nisi ngende-gangə sariya tə̂, lo tə̂ kə̂ daw bbar nan: «Lo kə̂ dɔsu kə ər» ngaâ daw bbar nan: «Gabata» kə tar lə ebərəje.

¹⁴ To ndɔ kə̂ lo-karɛ̂ a, to kusu Pakə, a kar ar dannâ ngaa. Pilatə pa arə Jiipije nan: «Tɔkə mbay ləse le â nəənn.»

¹⁵ A duruje əkii nan: «Ə-tɔlɛ̂, ə-tɔlɛ̂. Ə-tɔlɛ̂ kakə-dəsə tə̂.» Pilatə pa arəde nan: «Ta m-tɔl tɔkə mbay ləse le kakə-dəsə tə̂ wa?» Mbayje lə njê-poloje Lubba ilɛ̂je tə̂ nan: «Marə tɔkə mbay ləje dang to ang. Tɔkə mbay ləje kâra baa to tɔkə mbay kə̂ Rɔm.»

¹⁶ Yeenn ngaâ Pilatə uwa Jeju ulɛ̂ jide tə̂ karə n̂-tɔlɛ̂ kakə-dəsə tə̂.

N̂-bbərə Jeju kakə-dəsə tə̂

¹⁷ Jeju njaa oto kakə-dəsə laa in nɛ̂n mə tɔkə bbe tə̂ le aw nɛ̂n lo tə̂ kə̂ daw bbar nan: «Lo ka-dɔ-dəw», kə̂ daw bbar nan: «Gɔlogota» kə tar ebərə tɔ.

¹⁸ Mbambaje bbərəje Jeju kakə-dəsə tə̂ lo tə̂ənn le. Kar tə̂ənn njaa, n̂-bbərə marə dingawje joo kakə-dəsə tə̂ tɔ, marɛ̂ kâra dɔ ji-gəl Jeju tə̂, a marɛ̂ kâra dɔ ji-kɔlɛ̂ tə̂.

¹⁹ Pilatə arə n̂-dda makəturu n̂-bbərə dɔ kakə-dəsə tə̂ le taar nan: «Jeju kə̂ Najarɛtə, tɔkə mbay lə Jiipije.»

²⁰ Jiipije nya njaa turaje makəturu le, mba lo kə̂ n̂-bbərəje Jeju kakə-dəsə tə̂ le to ngɔsi kə tɔkə bbe le. N̂-ddaje makəturu le kə tar ebərə ddəm tar latɛn ddəm tar gɛrɛkə ddəm.

²¹ Mbayje lə njê-poloje Lubba le paje arəje Pilatə nan: «Makəturu kə̂ nan: ‹Tɔkə mbay lə Jiipije› le, maji ta kinya baann ang. Maji karə ə-dda nan: ‹Dingaw nəənn pa nan, n̂-to tɔkə mbay lə Jiipije.› »

²² Pilatə ilade tə̂ nan: «Nɛ̂n kə̂ m-dda mban a, m-dda.»

²³ Mbambaje le bbərəje Jeju le kakə-dəsə tə̂ le mban a, n̂-jinje kubbuje laa, n̂-kaynje dannâ loe sɔ. Mbamba kâra kə laa laa. Dunnje kubbu laa kə̂ ngal tɔ. To bəl-kubbu kâra kə̂ in taar tee bəər. Duru kubbu le to kuru ang.

²⁴ Mbambaje le paje arə naan nan: «N-tirje kubbu nəənn ang. N-ddɔje mbari jooje se nân bba a bu wa?» Baann bba karə tar kə̂ Makəturu lə Lubba pa nəənn ddee to tar kə̂ tɔkɔrɔ. Tar le nan: «N̂-kaynje naan kubbuje ləm, ngaâ dunnje kubbu ləm kə̂ ngal n̂-ddɔje nɛ̂n mbari.» Nɛ̂ɛnn le njaa mbambaje ddaje.

²⁵ Kɔn Jejuje kə ngokɔn kɔɛ̂nje kə̂ dɛnɛ̂n, Mari dɛnɛ̂n lə Kolopas kə Mari kə̂ Magədala, darje ngɔsi kə kakə-dəsə le.

²⁶ Jeju oo kɔɛ̂nje kə nje-nja goe tə̂ kə̂ n̂-ndike nya kə̂ ar mbɔr kɔɛ̂nje tə̂ le ngaâ pa arə kɔɛ̂nje le nan: «Dɛnɛ̂n, ngonni â toonn.»

²⁷ Goe tə̂ a, n̂-pa narə nje-nja goe tə̂ le nan: «Kɔinje â toonn.» Kar tə̂ənn njaa, nje-nja goe tə̂ le unn kɔn Jejuje le aw saa kəy laa.

Koy lə Jeju

²⁸ Goe tə̂ a, Jeju gərə to nɛ̂n tɔyn tunga mban. A karə tar kə̂ Makəturu pa le ddee to tar kə̂ tɔkɔrɔ a, n̂-pa nan: «Kunda ɔnʼm.»

²⁹ Marə jo kə̂ maann-binyə kə̂ masə ddusu ee lo tə̂ənn. Mbambaje le ulaje ta-kubbu mə maann-binyə tə̂ kə̂ masə le ngaâ n̂-tɔ ta kakə ijopə tə̂, dulaje kə ta Jeju tə̂.

³⁰ Jeju ay maann-binyə kə̂ masə le ngaâ pa nan: «Nɛ̂n tɔyn tunga ngaa.» Yeenn ngaâ nula dɔɛ̂ kə̂ nangə̂ a, noy.

Marə mbamba ɔsu kar Jeju kə ninga

³¹ To ndɔ kə̂ lo-karɛ̂ a ta to ndɔ-kuwa-rɔ lə Jiipije, yeenn bba njê-kɔnje dɔ Jiipije ndikije karə niinn dəwje nayn dɔ kakə-dəsəje tə̂ ndɔ-kuwa-rɔ tə̂ le ang. A ndɔ-kuwa-rɔ kə̂ nəənn to ndɔ-kuwa-rɔ kə̂ ngəng nya. Yeenn bba n̂-dujuje Pilatə karə unn ndu arə n̂-guru gɔl dəwje kə̂ n̂-bbərəde dɔ kakə-dəsə tə̂ le ta n̂-tɔru niinnde kə ddang.

³² Yeenn ngaâ mbambaje ddee guruje gɔl dəw kə̂ dɔngɔr, goe tə̂ a, n̂-guruje gɔl dəw kə̂ to joo laa kə̂ n̂-bbərəde dɔ kakə-dəsə tə̂ kə Jeju le.

³³ Kar kə̂ n̂-teeje dɔ Jeju tə̂ ngaâ dooeje a, noy mban. Mba yeenn bba, n̂-guruje gɔl Jeju le ang.

³⁴ A marə mbamba kâra ɔsu kar Jeju le kə ninga. Njangə baa njaa, məsə ddəm maann ddəm teeje kəm do tə̂ le.

³⁵ Dəw kə̂ oo nɛ̂nje nəənn le kə kəmɛ̂ â aw ɔru gəle nəənn. N̂-gərə to tar kə̂ tɔkɔrɔ â naw pa. N̂-pa baann karə sese kara ooje məse tə̂.

³⁶ Nɛ̂ɛnn to bba karə tar kə̂ Makəturu lə Lubba pa ddee to tar kə̂ tɔkɔrɔ. Tar le nan: «Dâ guru marə singa rɔɛ̂ kâra ang.»

³⁷ Makəturu lə Lubba pa bbay nan: «Dəwje a kooje dəw kə̂ dɔsu karɛ̂ le.»

Jojɛpə de kə Nikodɛm n̂-dubbuje Jeju

³⁸ Goe tə̂ a, Jojɛpə kə̂ to dəw kə̂ tɔkə kə̂ Arimate kə̂ aw nja go Jeju tə̂ lo-kiyɛ̂ tə̂, mba naw bbəəl njê-kɔnje dɔ Jiipije le, n̂-duju Pilatə karə arɛ̂ ddəw karə nɔru niinn le dɔ kakə-dəsə tə̂ kə ddang. Pilatə le arɛ̂ ddəw. Yeenn ngaâ Jojɛpə le aw ɔru niinn Jeju le.

³⁹ Nikodɛm aw tɔ. Ne â ləw naw rɔ Jeju tə̂ til tə̂ le. N̂-ddee kə dukann kə̂ n̂-mbɔn nɛ̂n kə̂ ria nan mir kə alowɛs bba n̂-dda nɛ̂n, dukann le ɔɔy asə kilo dɔmota.

⁴⁰ Jojɛpə de kə Nikodɛm le dunnje niinn Jeju, dunguje yambo le ta-kubbuje tə̂ kə̂ ngal ngaâ n̂-kəje nɛ̂n niinn Jeju le, tokə Jiipije a ta dubbuje niinn a, aw ddaje le.

⁴¹ A marə ngonn ndɔɔ to ngɔsi kə lo kə̂ n̂-tɔl Jeju kakə-dəsə tə̂ kə tə̂ le. N̂-dda marə buwa-yo kə̂ siki mə ər tə̂ lo tə̂ənn tɔ. N̂-nayn dila niinn tə̂ ndɔ kâra ang bbay.

⁴² Lo-karɛ̂ a, to ndɔ-kuwa-rɔ lə Jiipije. Mba yeenn bba Jojɛpə de kə Nikodɛm le dilaje niinn Jeju le mə buwa-yo tə̂ le mba to ngɔsi baa.