Tar kə̂ Maji kə̂ Jan dda makəturu tə̂ 18 - Dɔnɔn kə̂ Siki: Tar kə̂ aw arə təbbə

Mbambaje uwaje Jeju

¹ Go tar tə̂ kə̂ Jeju pa baann le a, naw kə njê-njaje goe tə̂ tura wəl maann tə̂ kə̂ Sederɔn. Naw mə marə ngonn ndɔɔ tə̂ kə̂ to lo tə̂ənn le, ne kə njê-njaje goe tə̂.

² Judas kə̂ a ta kunn dɔɛ̂ le kara gərə lo le tɔ, mba Jeju kə njê-njaje goe tə̂ n̂-mbɔnje naan lo tə̂ənn le gɔl banya nya.

³ Judas ɔru nɔn mbambaje kə̂ dɔde banya kə marə njê-ngəmje ta-kəy-polo Lubba kə̂ tɔkə njê-poloje Lubba kə Parijinyɛje ulajede ngaâ naw kə de mə ngonn ndɔɔ tə̂ le. Dawje kə puru-ngeelje kə lambeje kə nɛ̂n-ddɔje jide tə̂.

⁴ Jeju gərə nɛ̂nje tɔyn kə̂ a ta kingɛ̂ le. Yeenn ngaâ n̂-nja kə rɔde tə̂, n̂-dujude nan: «Nân bba aw sangɛ̂je wa?»

⁵ Dilɛ̂je tə̂ nan: «Jeju kə̂ Najarɛtə.» Jeju le pa arəde nan: «Əman â nəənn.» Judas nje-kunn-dɔɛ̂ le ee kə de lo tə̂ənn.

⁶ Kar kə̂ Jeju pa arəde nan: «Əman â nəənn» le a, n̂-təlje kə guku ngaâ n̂-gaynje nangə̂.

⁷ Jeju təl dujude bbay nan: «Nân bba aw sangɛ̂je wa?» Dilɛ̂je tə̂ nan: «Jeju kə̂ Najarɛtə.»

⁸ Jeju ilade tə̂ nan: «M-pa marəse mban, əman â nəənn. A bbo, əman â aw sangəmje a, inyaje dəwje nəənn arəje dawje.»

⁹ Nɛ̂ɛnn to baann bba karə tar kə̂ Jeju pa le ddee to tar kə̂ tɔkɔrɔ. Tar le nan: «Bɔy, dəw kâra horo dəwje tə̂ kə̂ arəm le nayn kɔrɔ̂ ang.»

¹⁰ Marə tɔkə kiya to ji Simɔn Piyɛr tə̂. Nɔru tɔkə kiya le ngaâ n̂-tuka nɛ̂n mbi nje-kula le tɔkə nje-polo Lubba kə̂ kɔl n̂-ti. Nje-kula le ria nan Malkusu.

¹¹ A Jeju pa arə Piyɛr nan: «Ə-təl kə tɔkə kiya ləi le mə bbɔlɛ̂ tə̂. Əngo ndoo kə̂ Bɔy arəm le, mâ kay ang wa?»

¹² Yeenn ngaâ mbambaje kə nje-kɔn dɔde kə njê kə̂ aw ngəmje njê-kɔnje dɔ Jiipije, duwaje Jeju n̂-tɔɛ̂je.

Daw kə Jeju nɔn Ann tə̂

¹³ Dawje kə Jeju rɔ Ann tə̂ dɔngɔr. Ann le to mum Kayipije kə̂ dingaw kə̂ to tɔkə nje-polo Lubba bbalɛ̂ tə̂ənn.

¹⁴ Kayipi le â ndəjə njê-kɔnje dɔ Jiipije kete nan: «To maji nya karə dəw kâra be oy mba kəsə dəwje» le.

Piyɛr mayn pa nan n̂-gərə Jeju ang

¹⁵ Simɔn Piyɛr de kə marə nje-nja go Jeju tə̂ kara dɔruje go Jeju le. Tɔkə nje-polo Lubba gərə nje-nja go Jeju tə̂ kə̂ kâra le. Mba yeenn bba, nje-nja go Jeju tə̂ le andə kə Jeju mə ndoko tə̂ le tɔkə nje-polo Lubba le.

¹⁶ A Piyɛr nayn ddaka, ngɔsi kə ta-doko le. Nje-nja go Jeju tə̂ kə̂ tɔkə nje-polo Lubba gəre le tee ddee pa tar kə dɛnɛ̂n kə̂ aw ngəm ta-kəy le ngaâ darə Piyɛr le andə mə ndoko tə̂ le.

¹⁷ Dɛnɛ̂n kə̂ aw ngəm ta-kəy le pa arə Piyɛr nan: «Əi kara ə-to marə nje-nja go dingaw tə̂ nəənn ang wa?» Piyɛr ilɛ̂ tə̂ nan: «M-to nje-nja goe tə̂ ang.»

¹⁸ Karɛ̂ tə̂ənn kul aw ɔn. Mba yeenn bba, njê-kulaje kə njê-ngəmje ta-kəy-polo Lubba yəlje puru arje tɛɛ tə̂ aw ndibbije. Piyɛr kara aw ar horode tə̂ aw ndibbi puru le tɔ.

Tɔkə nje-polo Lubba duju tar Jeju

¹⁹ Tɔkə nje-polo Lubba duju tar Jeju dɔ njê-njaje goe tə̂ kə dɔ nɛ̂n-tɔjuje tə̂ laa.

²⁰ Jeju ilɛ̂ tə̂ nan: «M-pa tar kə ddaka marə dəwje kə̂ duninya tə̂ tɔyn. M-tɔju nɛ̂n kə ndɔ tɔyn mə kəy mbɔn-naanje tə̂ kə mə kəy-polo Lubba tə̂ kə̂ Jiipije tɔyn aw mbɔnje naan tə̂. M-pa marə tar lo-kiyɛ̂ tə̂ ang.

²¹ Mba ddi bba aw dujum tar wa? Ə-duju dəwje kə̂ ooje tar kə̂ m-pa marəde le. Dede n̂-gərəje tar kə̂ m-pa marəde kə majɛ̂.»

²² Jeju pa tar baann le a, marə mbamba kâra horo marɛ̂je tə̂ kə̂ eeje tə̂ənn unda ka-mbɔrɛ̂ ngaâ pa nan: «Baann â, â kila nɛ̂n tar tə̂ lə tɔkə nje-polo Lubba wa?»

²³ Jeju ilɛ̂ tə̂ nan: «Bbo m-pa tar kə̂ maji ang a, ə-pa arəje joo. A bbo tar kə̂ m-pa le to kə dɔgɔlɛ̂ a, undam mba ddi wa?»

²⁴ Yeenn ngaâ Ann ula Jeju kə lo-tɔɛ̂ kə̂ n̂-tɔɛ̂ nɛ̂n le baa rɔ Kayipi tə̂ kə̂ to tɔkə nje-polo Lubba le.

Piyɛr təl mayn pa nan n̂-gərə Jeju ang

²⁵ A karɛ̂ tə̂ənn, Simɔn Piyɛr nayn tə̂ənn aw ndibbi puru bbay. Marə dəw duje nan: «Əi kara ə-to nje-nja go dingaw tə̂ nəənn ang wa?» A Piyɛr mayn nan: «M-to nje-nja goe tə̂ ang.»

²⁶ Marə nje-kula lə tɔkə nje-polo Lubba kə̂ to nuju lə dəw kə̂ Piyɛr tuka mbia ti le duje nan: «Mooi saa mə ngonn ndɔɔ tə̂ənn ang wa?»

²⁷ Piyɛr le təl mayn bbay. A karɛ̂ tə̂ənn njaa kuran nɔn.

Daw kə Jeju nɔn Pilatə tə̂

²⁸ Goe tə̂ a, din kə Jeju bbeê lə Kayipi daw saa kə əndɔɔ baa kəy-mbay tə̂ lə ngonn mbay kə̂ Rɔm. A njê-kɔnje dɔ Jiipije andəje kəy-mbay tə̂ le ang. Mba, n̂-ndikije karə nɛ̂n-yərəw ɔrude ang. Baann bba dâ kasəje ta kɔn muru Pakə.

²⁹ Mba yeenn bba Pilatə ddee ingade ddaka. N̂-dujude nan: «Tar ddi bba undaje dɔ dingaw tə̂ nəənn wa?»

³⁰ Dilɛ̂je tə̂ nan: «Bbo dingaw nəənn dda marə nɛ̂n kə̂ maji ang kâra ang a, ja ddee saa kari ang.»

³¹ Yeenn ngaâ Pilatə le pa arəde nan: «Uwɛ̂je ta sese njaa ə-gangəje sariya dɔɛ̂ tə̂ tokə ndu ləse pa.» Jiipije le ilɛ̂je tə̂ nan: «Ndu arəje ddəw karə n-gangə sariya-yo dɔ dəw tə̂ ang.»

³² Baann bba karə tar kə̂ Jeju pa mba tɔju nɛ̂n gar yo kə̂ nâ koy le ddee to nɛ̂n kə̂ tɔkɔrɔ.

³³ Yeenn ngaâ Pilatə andə kəy-mbay tə̂. N̂-bbar Jeju ngaâ n̂-duje nan: «Ə-to tɔkə mbay lə Jiipije wa?»

³⁴ Jeju ilɛ̂ tə̂ nan: «Tar kə̂ ə-pa nəənn in məi tə̂ njaa wase marə dəwje â paje tar dɔm tə̂ baann ari wa?»

³⁵ Pilatə ilɛ̂ tə̂ nan: «Əman, m-to Jiipi wa? Njê kə̂ gəli tə̂ kə mbayje lə njê-poloje Lubba â unnije ulaije jim tə̂. Ddi â ə-dda wa?»

³⁶ Jeju ilɛ̂ tə̂ nan: «Bbe-kɔn ləm to Bbe-kɔn kə̂ duninya tə̂ nəənn ang. Bbo Bbe-kɔn ləm to bbe-kɔn kə̂ duninya tə̂ nəənn a, njê-kulaje ləm a ddaje ddɔ dɔm tə̂ mba karə dulam ji Jiipije tə̂ ang. A Bbe-kɔn ləm to bbe-kɔn kə̂ duninya tə̂ nəənn ang.»

³⁷ Pilatə duje nan: «Yeenn a, ə-to tɔkə mbay wa?» Jeju ilɛ̂ tə̂ nan: «Əi njaa ə-pa. M-to tɔkə mbay. Nɛ̂n kə̂ dujum mbɛɛ̂ ngaâ nɛ̂n kə̂ m-ddee duninya tə̂ mbɛɛ̂ â nəənn: M-ddee ta kɔru naji lə tar kə̂ tɔkɔrɔ. Dəw kə̂ to ənga tar kə̂ tɔkɔrɔ aw oo tar kə̂ maw pa.»

³⁸ Pilatə duje nan: «Tar kə̂ tɔkɔrɔ â to ddi wa?» Go tarje tə̂ənn a, Pilatə təl aw inga Jiipije ddaka ngaâ pa arəde nan: «Moo marə nɛ̂n kâra ta gangə nɛ̂n sariya dɔ dingaw tə̂ nəənn ang.

³⁹ A tokə aw ddaje kə ndɔ tɔyn le, kusu Pakə asə a, maw mɔru dəw kâra kəy-kula tə̂ marəse. Ə-ndikije karə mɔru tɔkə mbay lə Jiipije marəse wa?»

⁴⁰ Duruje əkii nan: «Ne ang! Barabas â ɔrɛ̂.» Barabas le to dəw kə̂ aw uwa nɛ̂n lə dəwje aw taa kə singa.