Tar kə̂ Maji kə̂ Jan dda makəturu tə̂ 17 - Dɔnɔn kə̂ Siki: Tar kə̂ aw arə təbbə

Jeju duju Lubba mba njê-njaje goe tə̂

¹ Go tar tə̂ kə̂ Jeju pa baann le a, aa lo kə darâ ngaâ pa nan: «Bɔy, kar le asə ngaa. Ə-piti Ngonni, arə Ngonni kara pitii tɔ.

² Mba arə Ngonni singa dɔ dəwje tə̂ tɔyn, karə dəwje kə̂ ungude mə jia tə̂ le, narəde təbbə kə̂ to kə ndɔ kə ndɔ.

³ Təbbə kə̂ to kə ndɔ kə ndɔ le, to karə n̂-gərije, əi kâra baa kə̂ ə-to Lubba kə̂ tɔkɔrɔ ddəm Jeju-Kristə kə̂ ulɛ̂ ddəm.

⁴ M-pitii dɔ nangə tə̂. M-dda kula kə̂ arəm karə m-dda le m-tunga.

⁵ Bbasinɛn nəənn, Bɔy, ə-pitim lo tə̂ kə̂ ee tə̂ kə piti kə̂ aw pitim nɛ̂n mbɔri tə̂ kete bba duninya to le.

⁶ M-dda marə dəwje kə̂ ə-mbərəde horo marɛ̂je tə̂ duninya tə̂ ungude mə jim tə̂ le gərije. N̂-toje to dəwje ləi â ungude mə jim tə̂ ngaâ n̂-ddaje nɛ̂n kə turu ndui.

⁷ Bbasinɛn n̂-gərəje to nɛ̂nje tɔyn kə̂ arəm inje jii tə̂,

⁸ mba m-ndaji tar kə̂ ə-pa arəm marəde ngaâ n̂-taaje. N̂-gərəje to min rɔi tə̂ bba m-ddee tokə tɔkɔrɔ ngaâ dooje məde tə̂ to əi â ulam.

⁹ «Dede â maw duji mbade. Maw duji mba dəwje kə̂ duninya tə̂ nəənn ang, a maw duji mba dəwje kə̂ ungude mə jim tə̂, mba n̂-toje to dəwje ləi.

¹⁰ Nɛ̂nje ləm tɔyn toje to ləi ngaâ nɛ̂nje ləi tɔyn toje to ləm. Minga piti ddəw nɛ̂nje tə̂ənn le.

¹¹ Mee duninya tə̂ ang ngaa, a dede deeje duninya tə̂ nəənn. Əman maw kə rɔi tə̂. Bɔ kə̂ maji tɔyn, maji karə ə-ngəmde ddəw singa tə̂ ləi, singa kə̂ arəm le karə n̂-toje kâra baa tokə əman je səi n-to kâra baa.

¹² Kar kə̂ m-nayn kə de bbay le, maw ngəmde ddəw singa tə̂ ləi kə̂ arəm. M-ngəmde marə dəw kâra horode tə̂ nayn kɔrɔ̂ ang. Bbayɛ̂ â to ne kə̂ nâ nayn kə kɔrɔ̂ le, yeenn bba karə tar kə̂ Makəturu tə̂ ləi ddee to tar kə̂ tɔkɔrɔ.

¹³ «Bbasinɛn, maw maw kə rɔi tə̂. A maw pa tar be duninya tə̂ bba karə rɔ-nəəl kə̂ minga le dingaje məde tə̂ tɔ, rɔ-nəəl kə̂ asə loe njaa.

¹⁴ M-pa tar ləi marəde ngaâ duninya mbətəde mba n̂-toje to dəwje kə̂ duninya tə̂ nəənn ang, ddəw kâra baa tokə əman m-to dəw kə̂ duninya tə̂ nəənn ang le.

¹⁵ Maw duji karə ɔrude duninya tə̂ nəənn kə ddang ang. A ta karə ə-ngəmde bba karə Nje-mə-majang le dda marə nɛ̂n kə de ang.

¹⁶ N̂-toje to dəwje kə̂ duninya tə̂ nəənn ang, tokə əman m-to dəw kə̂ duninya tə̂ nəənn ang le.

¹⁷ Maji karə ə-dda arə n̂-ddeeje maji tɔyn ddəw tar tə̂ kə̂ tɔkɔrɔ: Tar ləi to tar kə̂ tɔkɔrɔ.

¹⁸ Dede le, mulade duninya tə̂ tɔ tokə əi ulam duninya tə̂ le.

¹⁹ Ngaâ, m-ngəm rɔm dang mbade, bba karə dede kara n̂-ngəmje rɔde dang ddəw tar tə̂ kə̂ tɔkɔrɔ.

²⁰ Maw duji mba tar ləde kə karəde baa ang, maw duju mba tar lə dəwje kə̂ a kooje məde tə̂ səm ddəw mbər tar tə̂ kə̂ dâ kilaje tɔ.

²¹ M-duji karə dede tɔyn n̂-ddeeje to dəwje kə̂ kâra baa. Bɔy, maji karə n̂-ddaje mə-kâra kə je, ddəw kâra baa tokə əi ə-dda mə-kâra səm ngaâ əman m-dda mə-kâra səi le. Maji karə n̂-ddeeje to dəwje kə̂ kâra baa ddəw mə-kâra tə̂ kə̂ n̂-ddaje kə je, bba karə dəwje kə̂ duninya tə̂ gərəje to əi â ulam.

²² «Ngaâ əman, marə dingaje piti kə̂ arə minga le tɔ bba karə n̂-ddeeje to dəwje kə̂ kâra baa, tokə əman je səi n-to kâra baa le.

²³ M-dda mə-kâra kə de ngaâ əi ə-dda mə-kâra səm. Baann bba dâ ddeeje kâra baa tokə tɔkɔrɔ, bba karə dəwje kə̂ duninya tə̂ gərəje to əi â ulam. Ngaâ, ə-ndikide tokə ə-ndikim.

²⁴ Bɔy, əi â arəm dəwje le, yeenn bba m-ndiki karə deeje səm lo tə̂ kə̂ mee tə̂. Baann bba karə dooje piti kə̂ ə-pitim, mba ə-ndikim kete bba ə-dda duninya.

²⁵ Bɔ kə̂ gatə gatə, dəwje kə̂ duninya tə̂ gərije ang. A əman m-gəri ngaâ njê-njaje gom tə̂ nəənn gərəje to əi â ulam.

²⁶ M-dda marə n̂-gərije ngaâ mâ dda karə n̂-təl n̂-gərije bbay bba karə ndiki kə̂ ə-ndikim to məde tə̂ ngaâ əman kara mee məde tə̂ tɔ.»