Tar kə̂ Maji kə̂ Jan dda makəturu tə̂ 16 - Dɔnɔn kə̂ Siki: Tar kə̂ aw arə təbbə

¹ «M-pa tar nəənn marəse bba karə ə-tusuje mə-kunn ləse inyaje ang.

² Dâ tubbase kəy mbɔn-naanje tə̂. Kar aw ddee karə dəw kə̂ tɔlse a, əjə to polo â naw polo Lubba.

³ Dâ ddaje nɛ̂njeenn mba n̂-gərəje Bɔ ang ddəm n̂-gərəmje ang ddəm.

⁴ M-pa marəse kete ta bbo karɛ̂ tee a, oleje məse to m-pa marəse mban.» «M-pa tar nəənn marəse kunn-kute tə̂ ang, mba m-nayn kə se bbay.

Kula lə Ndil-mə-nda

⁵ Bbasinɛn maw maw kə rɔ dəw tə̂ kə̂ ulam, a dəw kâra kə̂ nje-dujum nan aw kə̂ dda wa goto tokə baânn wa?

⁶ A rɔse nəəlse ang nya mba tar kə̂ m-pa marəse le.

⁷ To tar kə̂ tɔkɔrɔ njaa â m-pa marəse. Maw a, a ddase maji nya. Mba bbo maw ang a, Nje-kumanse le a ddee rɔse tə̂ ang. A bbo maw a, mâ kulɛ̂ karəse.

⁸ Bbo n̂-ddee a, nâ tɔju dəwje kə̂ duninya tə̂ nəənn karə n̂-gərəje nɛ̂n kə̂ ria nan majang, nɛ̂n kə̂ gatə gatə ddəm nɛ̂n kə̂ to sariya lə Lubba ddəm.

⁹ Nâ tɔjude karə n̂-gərəje nɛ̂n kə̂ ria nan majang, mba dooje məde tə̂ səm ang.

¹⁰ Nâ tɔjude karə n̂-gərəje nɛ̂n kə̂ gatə gatə, mba maw maw kə rɔ Bɔ tə̂ ngaâ â koomje ang ngaa.

¹¹ Nâ tɔjude karə n̂-gərəje nɛ̂n kə̂ ria nan sariya lə Lubba, mba Lubba gangə sariya dɔ nje-kɔn dɔ duninya tə̂ nəənn mban.

¹² «Tar to nya ta pa karəse bbay, a kə̂ bbasinɛn nəənn, â kasəje ta gərə kandɛ̂ tɔyn ang.

¹³ Bbo Ndil tar kə̂ tɔkɔrɔ le ddee a, nâ tɔjuse nɛ̂n kə̂ tɔkɔrɔ tɔyn. Tar kə̂ məɛ̂ tə̂ njaa â nâ pa ang. Tarje tɔyn kə̂ noo â nâ pa ngaâ nâ pa nɛ̂nje kə̂ a ta ddeeje karəse.

¹⁴ Nâ tɔju piti ləm kə ddaka, mba nâ kunn nɛ̂nje tɔyn kə̂ m-tɔjuse ta pa karəse.

¹⁵ Nɛ̂nje lə Bɔmje tɔyn to nɛ̂nje ləm tɔ. Mba yeenn bba, m-pa nan, nâ kunn nɛ̂nje tɔyn kə̂ m-tɔjuse ta pa karəse.

¹⁶ «Ngaji a, â koomje ang ngaa. Ngaâ, goe tə̂ ngaji bbay a, â təl koomje bbay.»

¹⁷ Yeenn ngaâ marə njê-njaje go Jeju tə̂ le paje horo naan tə̂ nan: «N̂-pa nan: ‹Ngaji a, â koomje ang. Ngaâ ngaji a, â təl koomje.› N̂-pa bbay nan: ‹Maw maw kə rɔ Bɔ tə̂. Yeenn nan ddi â nəənn wa?›

¹⁸ Tar kə̂ n̂-pa nan: ‹Ngaji› nəənn, nâ ta pa nan ddi â nəənn wa? N-gərə nɛ̂n kə̂ nâ ta pa nəənn ang.»

¹⁹ Jeju gərə to njê-njaje goe tə̂ le a ta dujeje tar. Yeenn ngaâ n̂-pa narəde nan: «M-pa marəse m-pa nan: ‹Ngaji a, â koomje ang ngaa. Ngaâ ngaji a, â təl koomje.› Mba tar nəənn le â, aw dujuje nɛ̂n naan tar wa?

²⁰ Tɔkɔrɔ njaa m-pa marəse, â nɔnje ddəm â kəmje rɔse ddəm a rɔ dəwje kə̂ duninya tə̂ a nəəlde. Kəmse a to ndoo, a kəm-to-ndoo ləse le a təl to rɔ-nəəl.

²¹ Bbo dɛnɛ̂n a ta kuju a, noo ndoo mba kar koo ndoo laa â asə. A bbo nuju mban a, məɛ̂ oy dɔ ndoo kə̂ noo le. Rɔɛ̂ nəəle mba nuju dəw nilɛ̂ duninya tə̂.

²² Sese kara, bbasinɛn rɔse nəəlse ang. A mâ təl koose. Rɔ-nəəl ləse a kuta dɔɛ̂ ngaâ dəw kâra a kasə kɔru rɔ-nəəl ləse le kə ddang ang.

²³ «Dɔ ndɔɛ̂ tə̂ənn le, â dujumje tar dɔ marə nɛ̂n tə̂ kâra ang ngaa. Tɔkɔrɔ m-pa marəse, nɛ̂n tɔyn kə̂ ə-dujuje Bɔ kə rim a, nâ karəse.

²⁴ Ndərəng bbokənɛn nəənn, ə-dujuje marə nɛ̂n kâra kə rim ang bbay. Ə-dujuje nɛ̂n a, â kingaje bba karə rɔ-nəəl ləse asə loe.

²⁵ «Gusu-tar â m-pa nɛ̂n tarje nəənn le tɔyn marəse. A tee marə kar tə̂ a, mâ pa tar karəse ddəw gusu-tar tə̂ ang ngaa. Mâ pa tar dɔ Bɔy tə̂ kə ddaka karəse.

²⁶ Dɔ ndɔɛ̂ tə̂ənn, â dujuje nɛ̂n Bɔy kə rim. A m-pa marəse: Mâ duju Bɔy mba tar ləse ang,

²⁷ mba Bɔy le njaa ndikise. N̂-ndikise mba ə-ndikimje ngaâ ooje məse tə̂ mban to min rɔ Lubba tə̂ bba m-ddee.

²⁸ Min rɔ Bɔy tə̂ bba m-ddee duninya tə̂. Bbasinɛn, maw minya duninya ta təl kə rɔ Bɔy tə̂.»

²⁹ Njê-njaje go Jeju tə̂ le paje arɛ̂je nan: «Bbasinɛn aw pa tar kə ddaka arə ujaje ngaa, bbo ə-pa kə gusu-tar ang.

³⁰ Bbasinɛn n-gərə to ə-gərə nɛ̂n tɔyn bbo asə karə dəw duji tar ang. Mba yeenn bba, joo məje tə̂ to in rɔ Lubba tə̂ bba ə-ddee.»

³¹ Jeju ilade tə̂ nan: «Bbasinɛn ooje məse tə̂ ngaa wa?

³² Ooje! Kar aw ddee. Kar le ddee mban karə ə-sarɛnje naan kâra kâra, ta â kinyamje kə karəm baa. A m-nayn kə karəm ang, mba Bɔy ee səm.

³³ M-pa nɛ̂njeenn tɔyn marəse karə məse wul lɔm ddəw tə̂ ləm. A kooje ndoo duninya tə̂. A maji karə uwaje arəje ngəng, mba əman m-tətə duninya nəənn kə ddɔ mban.»