Tar kə̂ Maji kə̂ Jan dda makəturu tə̂ 11 - Dɔnɔn kə̂ Siki: Tar kə̂ aw arə təbbə

Tar yo lə Lajar

¹ Marə dingaw kə̂ ria nan Lajar, rɔɛ̂ toe. Nee Betani, bbe tə̂ kə̂ Mari de kə ngokɔɛ̂n Martə disije tə̂.

² Mari le â ungu yambo gɔl Əbbə-dəwje tə̂ ngaâ bɔru gɔlɛ̂ kə biin-dɔɛ̂ le. Lajar kə̂ ngokɔn Mari le â rɔɛ̂ toe.

³ Ngakɔn-nannɛ̂ ulaje arəje Jeju nan: «Əbbə-dəwje, rɔ nami le toe.»

⁴ Jeju oo tar le a, pa nan: «Rɔ-to lə Lajar to rɔ-to kə̂ nâ koy nɛ̂n ang. A to nɛ̂n-kɔsu gaji Lubba. Ddəwe tə̂ bba dəwje a kɔsuje gaji Ngonn lə Lubba.»

⁵ Jeju ndiki Martə de kə ngokɔɛ̂n kə̂ dɛnɛ̂n ddəm Lajar ddəm.

⁶ Noo nan rɔ Lajar toe, a n̂-təl n̂-nayn ndɔ joo lo tə̂ kə̂ nee tə̂ le bbay.

⁷ Goe tə̂ a, n̂-pa narə njê-njaje goe tə̂ nan: «Maji karə n-təlje jawje nangə tə̂ kə̂ Jude.»

⁸ Njê-njaje goe tə̂ le ilɛ̂je tə̂ nan: «Nje-nɛ̂n-tɔju, bbasinɛn bbay â Jiipije kə̂ nu sangəje ddəw ta tilai kə ər tɔli, a ə-ndiki ta təl kaw bbay wa?»

⁹ Jeju ilade tə̂ nan: «Kə əndɔɔ ndərəng lo-kul, gɔl kar ee dɔku gire joo ang wa? Bbo dəw nja karâ a, nâ tuka gɔlɛ̂ ang, mba lo arɛ kəmɛ̂ tə̂ yərərə.

¹⁰ A bbo dəw nja til tə̂ a, nâ tuka gɔlɛ̂, mba lo ndul kəmɛ̂ tə̂.»

¹¹ Go tar tə̂ kə̂ Jeju pa baann a, təl pa arəde nan: «Namje Lajar tibbi mban. A mâ kaw ndole.»

¹² Njê-njaje goe tə̂ ilɛ̂je tə̂ nan: «Əbbə-dəwje, bbo n̂-tibbi a, nâ kaji.»

¹³ Jeju aw pa tar yo lə Lajar le, a njê-njaje goe tə̂ le əjəje to, tar bbi kə̂ baa â naw pa.

¹⁴ Yeenn ngaâ Jeju pa arəde kə ddaka nan: «Lajar oy mban.

¹⁵ A rɔm nəələm nya mbase, mba mee nunn ang. Baann bba â kooje məse tə̂ səm. A jawje rɔ Lajar tə̂ le.»

¹⁶ Yeenn ngaâ Toma kə̂ daw bbarɛ̂ nan «Ndunga» pa arə kəsə njê-njaje go Jeju tə̂ nan: «Jeje kara, jawje ta joyje kə Jeju tɔ.»

Jeju to nje-karə təbbə

¹⁷ Jeju tee Betani a, oo nan dila niinn Lajar buwa-yo tə̂ dda ndɔ sɔ ngaa.

¹⁸ Betani le to ngɔsi baa kə Jerujalɛm asə nɛ̂n kə̂ kilometere mota.

¹⁹ Mba yeenn bba, Jiipije nya ddeeje rɔ Martə de kə Mari tə̂, ta wul məde go yo tə̂ lə ngokɔnde le.

²⁰ Martə oo nan Jeju aw ddee ngaâ in aw tila kəmɛ̂. A Mari nayn aw isi kə̂y.

²¹ Martə pa arə Jeju nan: «Əbbə-dəwje, bbo ee nəənn kete a, ngokɔnʼm a koy ang.

²² A bbasinɛn nəənn njaa kara, m-gərə to nɛ̂n tɔyn kə̂ ə-duju Lubba a, nâ kari.»

²³ Jeju pa arɛ̂ nan: «Ngokɔin kə̂ oy le a ndol.»

²⁴ Martə ilɛ̂ tə̂ nan: «M-gərə to ddutu ndɔ a, nâ ndol ndɔ kin tə̂ lə dəwje kə̂ oyje.»

²⁵ Jeju pa arɛ̂ nan: «M-to ndol lə dəwje kə̂ oyje ddəm m-to təbbə ddəm. Dəw kə̂ unn məɛ̂ arəm a, le noy kara nâ kisi kəm baa.

²⁶ Dəw kə̂ isi kəm baa ngaâ unn məɛ̂ arəm, a koy ndɔ kâra ang. Oo məi tə̂ kə tar nəənn wa?»

²⁷ Martə ilɛ̂ tə̂ nan: «Baann njaa, Əbbə-dəwje, moo məm tə̂ to ə-to Mesi, Ngonn lə Lubba, ne kə̂ n̂-ddee dɔ nangə tə̂ le.»

Jeju nɔn

²⁸ Go tar tə̂ənn a, Martə aw bbar ngokɔɛ̂n Mari ngaâ pa arɛ̂ hɔy baa nan: «Nje-nɛ̂n-tɔju le ee nəənn, naw bbari.»

²⁹ Mari oo tar le a, in taar kə ngɔru ngaâ aw rɔ Jeju tə̂ le.

³⁰ Mba Jeju nayn andə mə bbe tə̂ le ang bbay. N̂-nayn lo tə̂ kə̂ Martə ingɛ̂ tə̂ le.

³¹ Jiipije kə̂ isije kə Mari mə kəy tə̂ aw wulje məɛ̂ le ooje Mari kə̂ tee kə ngɔru le a, dɔruje goe. Dəjəje to naw kə ta buwa-yo tə̂ ta nɔn.

³² Mari le aw tee lo tə̂ kə̂ Jeju ee tə̂ le ngaâ ooe a, oso nɔn gɔlɛ̂ tə̂ pa arɛ̂ nan: «Əbbə-dəwje, bbo le to ee nəənn a, ngokɔnʼm a koy ang.»

³³ Jeju oo Mari kə Jiipije kə̂ ddeeje saa kə̂ daw nɔnje le a, ɔru singɛ̂ ddəm rɔɛ̂ nəəle ang ddəm.

³⁴ N̂-dujude nan: «Ilɛ̂je dda wa?» Dəwje le ilɛ̂je tə̂ nan: «Əbbə-dəwje, ə-ddee oo.»

³⁵ Jeju uru dɔ nɔn tə̂.

³⁶ Yeenn ngaâ Jiipije paje nan: «Ooje! N̂-ndiki Lajar nya.»

³⁷ A marɛ̂je paje nan: «Ne kə̂ n̂-dda narə kəm nje-kəm-tɔ təəyn le, nasə ta dda karə Lajar nayn kəm baa ang wa?»

Jeju ndol Lajar

³⁸ Ndoo dda Jeju le bbay ngaâ aw buwa-yo tə̂ le. To marə buja kə̂ dutu tɛɛ̂ kə tɔkə ər.

³⁹ Jeju pa arəde nan: «Ɔruje ər le kə ddang.» Martə kɔn-nann nje-gotoje le pa arə Jeju nan: «Əbbə-dəwje, naw nətə ngaa, mba ndɔ sɔ laa ngaâ â nəənn.»

⁴⁰ A Jeju ilɛ̂ tə̂ nan: «M-pa mari kete m-pa nan: Bbo oo məi tə̂ a, â koo piti lə Lubba.»

⁴¹ Yeenn ngaâ dɔru ər le kə ddang. A Jeju unn kəmɛ̂ aa lo kə darâ ngaâ pa nan: «Bɔy, mari wooyo mba ilam tar tə̂ mban.

⁴² M-gərə to aw ilam tar tə̂ kə ndɔ tɔyn njaa. A maw pa tar nəənn mba dəwje kə̂ gukumje nəənn. Baann bba karə dooje məde tə̂ to əi â ulam.»

⁴³ Go tar tə̂ənn a, nuru əkii kə taar nan: «Lajar ə-tee.»

⁴⁴ Lajar kə̂ oy le tee, gɔlɛ̂je kə jiaje tokə tɔ kə ta-kubbu ddəm kəmɛ̂ tokə kiri kə ta-kubbu ddəm. Yeenn ngaâ Jeju pa nan: «Ə-tuteje bbo inyɛ̂je arəje naw.»

⁴⁵ Marə Jiipije nya kə̂ ddeeje rɔ Mari tə̂ ngaâ ooje nɛ̂n kə̂ Jeju dda le ooje məde tə̂ kə Jeju.

⁴⁶ A marɛ̂je horode tə̂ aw ingaje Parijinyɛje, ɔruje gəl nɛ̂n kə̂ Jeju dda le arəde.

⁴⁷ Yeenn ngaâ mbayje lə njê-poloje Lubba kə Parijinyɛje bbarje kəsə njê-gangəje sariya ləde ngaâ paje nan: «Ddi â ja ddaje wa? Dingaw nəənn dda nɛ̂n-mɔrije nya.

⁴⁸ Bbo jinyɛ̂je jarə naw nɛ̂n bbay bbay a, dəwje tɔyn a kooje məde tə̂ saa ngaâ njê-kɔn-bbeje kə̂ Rɔm a kinje, dâ tujuje kəy-polo Lubba ləje ddəm dâ karə gəlje tunga ddəm.»

⁴⁹ Marə dəw kâra horode tə̂, kə̂ ria nan Kayipi, n̂-to tɔkə nje-polo Lubba bbalɛ̂ tə̂ənn, n̂-pa narəde nan: «Ə-gərəje nɛ̂n kâra ang.

⁵⁰ Uwaje dɔse ooje bba. To maji nya karə dəw kâra be oy mba kəsə dəwje. Baann bba karə gəlje tɔyn njaa tunga ang.»

⁵¹ Tar kə̂ Kayipi pa le to tar kə̂ in məɛ̂ tə̂ njaa ang. Mba bbalɛ̂ tə̂ənn, n̂-to tɔkə nje-polo Lubba. To tar yo kə̂ Jeju a koy ɔju dɔ gəl-dəwje kə̂ toje to Jiipije â nila mbəre.

⁵² Nâ koy mbade kə karəde baa ang. Nâ koy mba mbɔn ngann lə Lubba kə̂ sarɛnje naan kâra kâra, karə n̂-ddeeje to dəwje kə̂ kâra baa.

⁵³ Ndɔɛ̂ tə̂ənn njaa, njê-kɔnje dɔ Jiipije unnje ndude ta karə n̂-tɔl Jeju.

⁵⁴ Mba yeenn bba, Jeju nja horo Jiipije tə̂ dɔ kəmde tə̂ tɔyn ang ngaa. A naw nangə tə̂ kə̂ to ngɔsi baa kə dɔ dila-lo, bbe tə̂ kə̂ daw bbar nan Eparayim ngaâ n̂-nayn tə̂ənn kə njê-njaje goe tə̂.

⁵⁵ Ndɔ kusu Pakə lə Jiipije ddee ngɔsi baa ngaa arə dəwje nya awje Jerujalɛm ta karə nɛ̂n-polo Lubba, mba toko nɛ̂n-yərəw ləde kete bba karə ndɔ le asə.

⁵⁶ Daw sangəje Jeju. Kar kə̂ deeje kəy-polo Lubba tə̂ a, n̂-paje darə naan nan: «Kəjə ləse tokə baânn wa? Nâ ddee kusu tə̂ le ang wa?»

⁵⁷ Kete njaa kara, mbayje lə njê-poloje Lubba kə Parijinyɛje unnje ndu nan, dəw kə̂ oo lo kə̂ Jeju ee tə̂ a, pa arəde arə duwɛ̂je.