Tar kə̂ Maji kə̂ Jan dda makəturu tə̂ 10 - Dɔnɔn kə̂ Siki: Tar kə̂ aw arə təbbə

Jeju to nje-ngəm nɛ̂n-kuulje kə̂ maji

¹ Jeju pa nan: «Tɔkɔrɔ njaa m-pa marəse, dəw kə̂ andə kə ta-ddəw dɔ batəje tə̂ ang, a aal dɔ singa lo tə̂ kə̂ dang bba andə nɛ̂n, to nje-bboko ddəm nje-taa nɛ̂n lə dəwje kə singa ddəm.

² A dəw kə̂ andə kə ta-ddəw mə singa tə̂ to nje-ngəm batəje le njaa.

³ Nje-ngəm ta-ddəw ɔru tɛɛ̂ arɛ̂ ngaâ batəje ooje ndue. N̂-bbar batəje laa kə ride kâra kâra ngaâ n̂-tee kə de ddaka.

⁴ Kar tə̂ kə̂ n̂-tee kə de ddaka tɔyn a, nɔru nɔnde ngaâ batəje laa le unnje goe, mba n̂-gərəje ndue.

⁵ Dâ kunnje go dəw kə̂ dang ndɔ kâra ang. Kayn â dâ kaynje dəw le kaw ddəw əw, mba n̂-gərəje ndu dəwje kə̂ dang ang.»

⁶ Jeju pa gusu-tar nəənn, a dəwje kə̂ aw ooje tar laa le gərəje nɛ̂n kə̂ naw pa le ang.

⁷ Jeju təl pa bbay nan: «Tɔkɔrɔ njaa, m-pa marəse: M-to ta-ddəw singa lə batəje.

⁸ Dəwje tɔyn kə̂ ddeeje kete arəm toje to njê-bbokoje ddəm njê-taaje nɛ̂n lə dəwje kə singa ddəm. A batəje le ooje tade ang.

⁹ M-to ta-ddəw. Dəw kə̂ andə kə ta-ddəw kə̂ to əman le a, a kinga kaji. Nâ kandə, nâ tee ngaâ nâ kinga nɛ̂n-kusa.

¹⁰ Nje-bboko ddee mba bboko nɛ̂n, mba tɔl nɛ̂n, mba tuju nɛ̂n njaa a bbayɛ̂. A əman, m-ddee ta karə dəwje ingaje təbbə tokə banya uta dɔɛ̂.

¹¹ «Əman, m-to nje-ngəm nɛ̂n-kuulje kə̂ maji. Nje-ngəm nɛ̂n-kuulje kə̂ maji ila rɔɛ̂ kɔrɔ̂ mba batəje laa.

¹² A dəw kə̂ to nje-ngəm nɛ̂n-kuul ang, aw dda to kula narɛ̂, mba batəje le toje to laa ang. Bbo noo ənjakəmnjar aw ddee a, n̂-tusude ninyade a nayn. Ənjakəmnjar le uwa marɛ̂je ngaâ kəseje aynje kâra kâra.

¹³ Dəw kə̂ aw dda to kula-narɛ le, tar lə batəje le ɔɛ̂n ang.

¹⁴ Əman, m-to nje-ngəm nɛ̂n-kuul kə̂ maji, m-gərə batəje ləm ngaâ batəje ləm gərəmje,

¹⁵ tokə Bɔ gərəm ngaâ m-gərə Bɔ tɔ le. Munn təbbə ləm marə mba batəje ləm.

¹⁶ Marə batəje ləm toje bbay kə̂ eeje mə singa tə̂ nəənn ang. Dede kara, to tar ləm ta ddee kə de. Dâ kooje ndum. Baann bba kusu batəje a to kâra baa ngaâ nje-ngəmde a to kâra baa tɔ.

¹⁷ «Bɔ ndikim, mba munn təbbə ləm marə bba ta təl kinga təbbə le guku.

¹⁸ Dəw kâra ɔru təbbə ləm jim tə̂ kə singa ang, əman njaa marə kə̂ mə-ndiki ləm. Masə ta karə təbbə ləm ngaâ masə ta təl kinga. Yeenn to ndu kə̂ Bɔ unn arəm.»

¹⁹ Jiipije təl tinje naan ɔju dɔ tarje kə̂ Jeju pa nəənn le.

²⁰ Marɛ̂je nya horode tə̂ paje nan: «Ndil kə̂ maji ang isi məɛ̂ tə̂. Wooy ddɛɛ̂. Aw ooje tar laa mba ddi wa?»

²¹ A marɛ̂je paje nan: «Dəw kə̂ ndil kə̂ maji ang isi məɛ̂ tə̂ pa tar tokə be ang. Ndil kə̂ maji ang asə ta dda karə kəm dəw kə̂ tɔ təəyn wa?»

Marə dəwje mbətəje Jeju

²² Jerujalɛm tə̂, daw ddaje kusu kunn kəy-polo karə Lubba. To dɔ nɛyn-kul.

²³ Jeju aw nja lo tə̂ kə̂ daw bbar nan: «baranda lə Salomɔn» mə kəy-polo Lubba tə̂.

²⁴ Jiipije gukeje ngaâ dujeje nan: «Â karə wurje ar taar baann ndərəng ndɔ tə̂ kə̂ dda wa? Bbo ə-to Mesi le a, ə-pa kə ddaka arəje joo.»

²⁵ Jeju ilade tə̂ nan: «M-pa marəse mban, a ə-ndikije tə̂ kə tar ləm le ang. Nɛ̂nje kə̂ maw dda kə ri Bɔmje ɔruje naji ləm.

²⁶ A ooje məse tə̂ ang, mba eeje horo batəje tə̂ ləm ang.

²⁷ Batəje ləm ooje ndum. Əman, m-gərəde ngaâ dunnje gom.

²⁸ Marəde təbbə kə̂ to kə ndɔ kə ndɔ, dâ koyje ndɔ kâra ang ddəm dəw kâra a kɔrude jim tə̂ ang ddəm.

²⁹ Bɔmje kə̂ arəmde bo uta tɔyn. Dəw kâra a kasə kɔrude ji Bɔ tə̂ ang.

³⁰ Əman kə Bɔmje, n-to dəwje kə̂ kâra baa.»

³¹ Jiipije təlje otoje ər ta tila nɛ̂n Jeju tɔlɛ̂.

³² Jeju pa arəde nan: «M-dda nɛ̂nje kə̂ maji nya kə̂ inje rɔ Bɔmje tə̂ marə ooje. A horo nɛ̂nje tə̂ənn, ye kə̂ dda bba ə-ndikije ta tilam kə ər tɔləm mbɛɛ̂ wa?»

³³ Jiipije le ilɛ̂je tə̂ nan: «Nɛ̂n kə̂ maji â n-ndiki ta tilai kə ər tɔli mbɛɛ̂ ang. Taji kə̂ ə-taji Lubba â n-ndiki ta tilai mbɛɛ̂. Ə-to dəw, a ə-dda rɔi to Lubba.»

³⁴ Jeju ilade tə̂ nan: «N̂-dda Makəturu-Ndu tə̂ ləse nan Lubba pa nan: ‹Ə-toje to lubbaje.›

³⁵ Dəw kâra asə kɔru marə tar kə̂ Makəturu-Ndu tə̂ ang. A Makəturu-Ndu tə̂ənn, dəwje kə̂ Lubba aw pa tar arəde â naw bbarde to lubbaje.

³⁶ A əman kə̂ Bɔ undam dang ngaâ ulam dɔ nangə tə̂, m-pa nan m-to Ngonn lə Lubba a, mba ddi bba ə-paje nan maw tuju ri Lubba wa?

³⁷ Bbo m-dda kulaje lə Bɔmje ang a, maji karə ə-ndikije tə̂ kə tar ləm ang.

³⁸ A bbo maw dda kulaje le, a bbo ə-ndikije tə̂ kə tar ləm ang kara, maji karə kulaje le ə-ndikije tə̂. Yeenn bba a gərəje kə majɛ̂ to, əman kə Bɔ, n-to dəwje kə̂ kâra baa.»

³⁹ Jiipije sangəje ddəw ta kuwɛ̂ bbay, a n̂-tee mə jide tə̂ nayn.

⁴⁰ Jeju təl aw tura Jurdɛn tə̂, lo tə̂ kə̂ Jan dda batɛm dəwje tə̂ kə tə̂ le ngaâ nayn tə̂ənn.

⁴¹ Dəwje tokə banya ddeeje rɔɛ̂ tə̂ ngaâ paje nan: «Jan dda marə nɛ̂n-mɔri kâra ang. A tar tɔyn kə̂ n̂-pa dɔ dingaw tə̂ nəənn to tar kə̂ tɔkɔrɔ.»

⁴² Lo tə̂ənn, dəwje nya ooje məde tə̂ kə Jeju.