Jakə 5 - Dɔnɔn kə̂ Siki: Tar kə̂ aw arə təbbə

Ndəjə ɔju dɔ njê-nɛ̂n-kingaje

¹ Bbasinɛn, see njê-nɛ̂n-kingaje, ə-nɔnje ta əmje rɔse mba nɛ̂n kəm-to-ndooje kə̂ a koso dɔse tə̂.

² Nɛ̂n-kingaje ləse ndum ngaâ nyɔje ɔnje kubbuje ləse mban.

³ Andə ləse kə narɛ ləse uwaje mbɔrkasɛ mban. Ngaâ mbɔrkasɛ le â to nɛ̂n kə̂ a kunda tar dɔse tə̂. Ngaâ mbɔrkasɛ le a kusase tokə marɛ̂ lə puru kə̂ ɔn nɛ̂n. Ddutu ndɔ mban bba ə-mbɔnje nɛ̂n-kingaje kə dɔ naan tə̂ dɔ naan tə̂.

⁴ Ooje, ndu-nɔn lə njê-kujaje ko-ndɔɔ ləse kə̂ ukajede ang le aw bbar. Nɔn lə njê-kulaje le bbar mbi Əbbə-dəwje tə̂ kə̂ Nje-singa-mɔngu.

⁵ Dɔ nangə tə̂ nəənn, isije kə majɛ̂ ngaâ isije dann nɛ̂n-kingaje tə̂ kə̂ bo. Usaje nɛ̂n arəje məse ndann, ndɔ tə̂ kə̂ dəwje aw oyje mbarakə mbarakə.

⁶ Ə-gangəje sariya dɔ dəwje tə̂ kə̂ gatə gatə ngaâ ə-tɔljede, a n̂-ddaje dɔ-ngəng kə se ang.

Ndəjəje dang dang

⁷ Ngakɔnʼmje, maji karə oreje wurse ndərəng ndɔ təl tə̂ lə Əbbə-dəwje. Ooje nje-ndɔɔ, naw nginan ta kinga nɛ̂n-ndɔɔ kə̂ maji. Nore wure ndərəng n̂-nginan nɛ̂n ndi kə̂ dɔngɔr kə ndi kə̂ to dɔbɔnyɛ̂.

⁸ Sese kara, maji karə oreje wurse, uwaje arə ngəng mba ndɔ ddee lə Əbbə-dəwje nayn ngɔsi ngaa.

⁹ Ngakɔnʼmje, bbo ə-ndikije karə Lubba gangə sariya dɔse tə̂ ang a, əmje rɔse kə ri naan ang. Ooje, nje-gangə sariya ar ta-kəy tə̂ ngɔsi.

¹⁰ Ngakɔnʼmje, njê-kilaje mbər tar lə Əbbə-dəwje kə̂ paje tar kə ria ləw ooje ndoo nya ddəm oreje wurde ddəm. Dede â unnje nɛ̂n-ddaje ləde to nɛ̂n-kɔju-marɛ̂.

¹¹ Ooje, jaw pitije dəwje kə̂ aw oreje wurde. Ooje tar kore-wur lə Jobbo ngaâ ə-gərəje maji kə̂ Əbbə-dəwje dda saa goe tə̂. Mba Əbbə-dəwje to nje-koo kəm-to-ndoo lə dəwje ddəm nje-dda mə-maji kə dəwje ddəm.

¹² Uta tɔyn, ngakɔnʼmje, maji karə undaje yo kə ri dara ang ddəm nangə ang ddəm undaje marə yo-kunda dang ang. A maji karə bbo nɛ̂n kə̂ to ye njaa a, ə-paje nan: «Ye njaa», bbo nɛ̂n kə̂ to ye ang a, ə-paje nan: «Ye ang». Baann bba Lubba a gangə sariya dɔse tə̂ ang.

Tar duju Lubba mba njê-rɔ-toje

¹³ Bbo marə dəw horose tə̂ aw oo ndoo a, maji karə n̂-duju Lubba. A bbo marɛ̂ isi kə rɔ-nəəl a, maji karə nɔsu pa n̂-wal nɛ̂n Lubba.

¹⁴ Bbo marə dəw horose tə̂ rɔɛ̂ toe a, maji karə n̂-bbar dəwje kə̂ dɔ Egilisi tə̂ narə n̂-dujuje Lubba mba tar laa ta dilaje ubbu dɔɛ̂ tə̂ kə ri Əbbə-dəwje.

¹⁵ Duju Lubba ddəw mə-kunn tə̂ le a kaji nje-rɔ-to le ngaâ Əbbə-dəwje a kuwa jia kə taar. Bbo nje-rɔ-to le dda majang a, Lubba a kɔru tar dɔɛ̂ tə̂.

¹⁶ Maji karə ə-paje majang ləse kə ddaka arəje naan, ta ə-dujuje Lubba mba naan arə ta rɔ-toje ləse tunga. Duju Lubba lə dəw kə̂ gatə gatə ee kə singa nya ta dda kula.

¹⁷ Eli to dəw tokə jeje tɔ, a n̂-duju Lubba ngəng karə ta ndi ərə ang ngaâ ndi le ərə dɔ nangə tə̂ ang bbal mota kə nɛyn misan.

¹⁸ Goe tə̂ a, n̂-duju Lubba bbay a, ndi ərə ngaâ koje ubbaje dɔ nangə tə̂.

Tar təl kə dəw kə̂ nayn kɔrɔ̂

¹⁹ Ngakɔnʼmje, bbo marə dəw horose tə̂ ndəəm ddəw tar kə̂ tɔkɔrɔ, â bbo marə ngokɔɛ̂n təl saa ddəw tar tə̂ kə̂ tɔkɔrɔ le a,

²⁰ maji karə ə-gərəje to dəw kə̂ təl kə ngokɔɛ̂n kə ndəəm ddəw tar kə̂ tɔkɔrɔ le taa ngokɔɛ̂n le ta yo tə̂ ngaâ Lubba a kɔru majangje tokə banya dɔ ngokɔɛ̂n tə̂ le.