Jakə 1 - Dɔnɔn kə̂ Siki: Tar kə̂ aw arə təbbə

Tar lapiya lə Jakə

¹ Əman, Jakə kə̂ m-to bbərə-kula lə Lubba ddəm Əbbə-dəwje Jeju-Kristə ddəm m-dda lapiya dəwje kə̂ toje to Jiipije kə̂ gəl-kujude dɔku gire joo kə̂ sarɛnje naan mə bbeje tə̂ dang dang.

Ndəjə ta kuwa karə ngəng mə nɛ̂n-nan tə̂

² Ngakɔnʼmje, bbo nɛ̂nje dang dang nanse a, maji karə isije kə rɔ-nəəl.

³ Mba ə-gərəje to nɛ̂nje kə̂ aw nanje mə-kunn ləse a dda karə ə-gərəje ddəw kore wurse.

⁴ A maji karə kore-wur ləse dda kula kə̂ maji tɔyn, bba karə ə-ddeeje to dəwje kə̂ maji tɔyn ddəm karə marə nɛ̂n duse ang ddəm.

Tar duju nɛ̂n Lubba ddəw mə-kunn tə̂

⁵ Bbo kəm-karɛ du marə dəw horose tə̂ a, maji karə n̂-duju Lubba. Lubba a karɛ̂ kəm-karɛ le. Mba Lubba aw arə nɛ̂n dəw kə mə-maji laa bbo kɔl kə dəw bba arɛ̂ nɛ̂n ang.

⁶ A maji karə dəw le duju ddəw mə-kunn tə̂ bbo nəjə marə tar dang ang. Mba dəw kə̂ aw əjə marə tar dang to ddəw kâra baa kə ba-katə kə̂ ləl aw unn kə taar arə ləngə.

⁷ Maji karə dəw kə̂ to tokə baann unda məɛ̂ to nâ kinga marə nɛ̂n ji Əbbə-dəwje tə̂ ang,

⁸ mba n̂-to dəw kə̂ aw əjə marə tar dang məɛ̂ tə̂ ngaâ kəjə laa to kâra baa mə nɛ̂nje tə̂ kə̂ naw dda ang.

Tar lə nje-nɛ̂n-kinga kə nje-ndoo

⁹ Maji karə ngokɔnje kə̂ dəwje ooeje to nɛ̂n ang dda rɔ-nəəl, mba Lubba a kundɛ̂ lo tə̂ kə̂ bo.

¹⁰ A ne kə̂ n̂-to nje-nɛ̂n-kinga n̂-dda rɔ-nəəl tɔ, mba Lubba a dda karə dəwje ooeje to nɛ̂n ang, mba nje-nɛ̂n-kinga a nday tokə lə putu kakə kə̂ gayn.

¹¹ Kar tee ngaâ ɔsu, puru kar le tɔl mu arə pute gayn ngaâ kura laa goto. Nje-nɛ̂n-kinga a goto kə nɛ̂n-kinga laa tɔyn tokə baann tɔ.

Nɛ̂nje kə̂ aw ərəje dəw

¹² Maji arə dəw kə̂ ore wure mə nɛ̂n-nanje tə̂ dang dang, mba bbo n̂-nɛɛ̂n doo ngaâ nasə a, nâ kinga kuka. Kuka le kə̂ to təbbə kə̂ Əbbə-dəwje unn ndue ta karə dəwje kə̂ ndikeje.

¹³ Bbo marə nɛ̂n nan dəw a, maji karə n̂-pa nan Lubba â nɛɛ̂ ang, mba nɛ̂n nan Lubba ndɔ kâra ang ddəm Lubba kara nan dəw ang ddəm.

¹⁴ A nɛ̂n kə̂ aw nan dəwje, to bbo kə̂ da-rɔde tə̂ njaa ndɔrude ngaâ ərəde.

¹⁵ Goe tə̂ a, bbo kə̂ da-rɔ tə̂ le uwa səm ngaâ uju majang, majang le bbo tɔkə a, aw kə dəw arə oy.

¹⁶ Ngakɔnʼmje kə̂ m-ndikise nya, ərəje rɔse ang.

¹⁷ Nɛ̂nje tɔyn kə̂ maji kə̂ dəw inga baa, nɛ̂n-karə-baa kə̂ maji tɔyn inje darâ ji Lubba tə̂. Ne kə̂ n̂-dda nɛ̂nje tɔyn kə̂ aw ndokoje mə dara tə̂. Ne kə̂ n̂-turu ndɔ kâra ang ddəm n̂-tuka ndil ang ddəm mba n̂-yəkə ang.

¹⁸ Nujuje tokə siki kə mə-ndiki laa, ddəw tar tə̂ kə̂ tɔkɔrɔ, bba karə n-toje to dəwje kə̂ Lubba undade kete nɔn nɛ̂nje tə̂ tɔyn kə̂ n̂-dda.

Maji ta dda kula kə turu ndu Lubba

¹⁹ Ngakɔnʼmje kə̂ m-ndikise nya, maji karə ə-gərəje nɛ̂n nəənn: Maji karə dəw kâra kâra tuka mbia kə ngɔru oo nɛ̂n tar. A, n̂-pa tar kə ngɔru baa ang ddəm n̂-dda wungu kə ngɔru baa ang ddəm

²⁰ mba wungu lə dəw dda nɛ̂n kə̂ gatə gatə kəm Lubba tə̂ ang.

²¹ Mba yeenn bba, maji karə inyaje nɛ̂n-yərəw tɔyn kə mə-majangje tɔyn, ə-taaje tar kə̂ Lubba dubbu məse tə̂ kə mə ngonn-kasə. Tar le a kasə ta kajise.

²² Ərəje rɔse ang. Ə-ddaje kula kə tar lə Lubba bbo ooje kə mbise baa ang.

²³ Mba bbo dəw oo tar le ngaâ dda nɛ̂n kula ang a, n̂-to ddəw kâra baa kə dəw kə̂ aa kəmɛ̂ mə nɛ̂n-koo-rɔ tə̂

²⁴ ngaâ goe tə̂, nɔtu a, kəmɛ̂ le təl ike njangə baa.

²⁵ A dəw kə̂ unda məɛ̂ ta kuru gəl ndu kə̂ maji tɔyn kə̂ aw ɔru dəw kɔ bbərə tə̂, bbo n̂-nayn ddəwe tə̂, noo tar le a, narə məɛ̂ oy dɔɛ̂ ang ngaâ n̂-dda nɛ̂n kula a, nâ kisi kə rɔ-nəəl mə kula tə̂ laa kə̂ naw dda.

²⁶ Bbo marə dəw oo rɔɛ̂ to nje-polo Lubba, â bbo n̂-ngəm tɛɛ̂ ang a, naw nərə rɔɛ̂, polo Lubba laa to nɛ̂n kə̂ baa.

²⁷ Kə̂ kəm Lubba tə̂ kə̂ to Bɔjeje, dda kə Lubba tɔkɔrɔ tə̂ kə̂ nɛ̂n-yərəw ɔru ang, to kaw koo ngann-ndubbaje kə dɛnɛ̂n-ndubbaje lo-kisi ndoo tə̂ ləde ngaâ ta ngəm-rɔ ddəw kula yərəwje tə̂ kə̂ dɔ nangə tə̂ tɔ.