Galatəje 5 - Dɔnɔn kə̂ Siki: Tar kə̂ aw arə təbbə

Kristə aw ɔru dəwje kɔ bbərə tə̂

¹ Kristə ɔruje kɔ bbərə tə̂ karə jisi to bbərəje ang ngaa. Yeenn a, uwaje arə ngəng bbo arəje n̂-təl kə se kɔ bbərə tə̂ ang.

² Əman Pɔl, m-pa marəse: Bbo arəje dujase ganja a, Kristə a to marə nɛ̂n kâra karəse ang ngaa

³ M-təl m-pa bbay marə dəw kə̂ arə dujɛ̂ ganja: To tar laa ta dda nɛ̂n tɔyn kə̂ Ndu pa.

⁴ Sese kə̂ aw sangəje ta ddee gatə gatə kəm Lubba tə̂ ddəw Ndu tə̂ le ə-tinje naan kə Kristə mban. Mə-maji lə Lubba to mbase ang ngaa.

⁵ Jeje, jaw junda məje dɔ Lubba tə̂ kə̂ a dda karə n-ddee gatə gatə kəmɛ̂ tə̂ ddəw mə-kunn tə̂. Ndil-mə-nda â a dda karə n-nginan nɛ̂ɛnn le.

⁶ Mba dəw kə̂ to lə Jeju-Kristə a, kuja ganja wase kuja ganja ang dda marə nɛ̂n kâra ang. Tɔkə nɛ̂n â to mə-kunn kə̂ aw dda bba dəw aw ndiki nje-marɛ̂.

⁷ Dɔngɔr, aw ddaje nɛ̂n kə majɛ̂. A nân bba gangəse ddəwe tə̂ ngaâ ɔkuse ddəw karə ə-ddaje nɛ̂n ddəw tar tə̂ kə̂ tɔkɔrɔ wa?

⁸ Kəjə kə̂ be nəənn le in rɔ Lubba tə̂ kə̂ bbarse le ang.

⁹ Wum tɛn be kara aw dda arə bɔru nduju aw in.

¹⁰ A Əbbə-dəwje dda arə munda məm dɔse tə̂ to â kəjəje marə tar dang ang. A dəw kə̂ aw turu dɔse le n̂-to nân njaa kara, sariya lə Lubba a to dɔɛ̂ tə̂.

¹¹ A əman, ngakɔnʼmje, m-nayn maw mila mbər kuja ganja bbay wa? A bbo maw mila mbər kuja ganja a, mba ddi bba dəwje a kulaje kəmʼm ndoo tə̂ bbay wa? Bbo mbər kuja ganja â maw mila a, tar koy lə Kristə dɔ kakə-dəsə tə̂ a to marə jiki karə dəw tuka gɔlɛ̂ tə̂ ang ngaa.

¹² Yeenn a, maji karə dəwje kə̂ aw tujuje kəjə ləse nəənn gangəje rɔde kə̂ dingaw njaa tɔyn ilaje kɔrɔ̂.

Maji karə njê-mə-kunnje nja ddəw Ndil tə̂ bbo ddəw da-rɔ tə̂ ang

¹³ See ngakɔnʼmje, Lubba bbarse karə ə-teeje kɔ bbərə tə̂ kə ddang. A maji karə tee ləse kɔ bbərə tə̂ le to ddəw â ɔru arəse karə ə-ddaje nɛ̂n nɛ̂n ddəw bboje tə̂ kə̂ da-rɔ tə̂ ang. Maji karə ə-ndikije naan ta ə-ddaje kula arəje

¹⁴ Mba Ndu lə Mɔyijə tɔyn njaa to mə tar tə̂ kə̂ kâra nəənn. Tar kə̂ nan: «Maji karə ə-ndiki nje-mari tokə da-rɔi njaa.»

¹⁵ A bbo aw tɔnje naan ngaâ aw tiirje naan a, aaje kə majɛ̂ nan â tujuje naan.

¹⁶ Mba yeenn bba, m-pa marəse, arəje Ndil-mə-nda tɔjuse ddəw a, â ddaje nɛ̂n ddəw bbo tə̂ kə̂ da-rɔ tə̂ ang.

¹⁷ Mba nɛ̂nje kə̂ da-rɔ ndiki ta dda toje dang kə nɛ̂nje kə̂ Ndil-mə-nda ndiki. A nɛ̂nje kə̂ Ndil-mə-nda ndiki kara toje dang kə nɛ̂nje kə̂ da-rɔ ndiki tɔ. Daw ddaje ddɔ kə naan. Baann bba karə nɛ̂n kə̂ məse ndiki ta dda a, ə-ddaje ang.

¹⁸ A bbo Ndil-mə-nda â aw tɔjuse ddəw a, eeje kɔ Ndu tə̂ ang ngaa.

¹⁹ N-gərə nɛ̂nje kə̂ bboje kə̂ da-rɔ tə̂ aw dda: Kaya, nɛ̂n-yərəw, lo-to-majang ang,

²⁰ polo kɔr, maal, ndiki naan ang, koo-ta-naan ang, kunda-mə, dda wungu, nɛ̂n-dda kə̂ ta kuta nɛ̂n naan, kar go marə dəw tə̂ a kinya marɛ̂, tin-naan,

²¹ dda bbo nɛ̂n lə dəw, kay koto kə kusa nɛ̂n karə uta dɔɛ̂ kə marə nɛ̂nje kə̂ baann. M-pa marəse kete mban, a m-təl m-pa bbay, dəwje kə̂ aw ddaje nɛ̂nje kə̂ baann le. Bbe-kɔn lə Lubba a to ləde ang.

²² A nɛ̂nje kə̂ Ndil-mə-nda aw ddee nɛ̂n to: Ndiki naan, rɔ-nəəl, mə-wul-lɔm, tɔ-wur, mə-maji, dda maji kə dəwje, mə-kunn,

²³ wul pee, ngəm-rɔ. Ndu mbətə nɛ̂nje kə̂ baann ang.

²⁴ Dəwje kə̂ toje to ənga Jeju-Kristə ddaje arə bboje kə̂ da-rɔde tə̂ oy kakə-dəsə tə̂ mban.

²⁵ Ndil-mə-nda dda arə jisije kəm baa. Yeenn a, maji karə jinya jarə Ndil-mə-nda le tɔjuje ddəw.

Dəw kâra kâra a kuja kandə nɛ̂n kə̂ n̂-dubbu

²⁶ Maji karə boro uta dɔje ang, n-ngaan naan ang, jundaje mə kə naan ang.