Galatəje 4 - Dɔnɔn kə̂ Siki: Tar kə̂ aw arə təbbə

Njê-mə-kunnje toje to bbərəje ang ngaa

¹ Tar kə̂ m-ndiki ta pa â nəənn: Kar kə̂ nje-kuwa nɛ̂n-ndubba nayn ngonn bbay le, n̂-to nje-nɛ̂nje le tɔyn njaa. A n̂-to dang kə bbərə ang.

² Naw noo ta dəwje kə̂ aw ngəmɛ̂ ngaâ aw ngəm nɛ̂nje laa le ndərəng karə ndɔ kə̂ bɔɛ̂je ɔju asə.

³ Jeje kara, ləw nayn tokə ngannje, n-toje to bbərəje lə kəjəje kə̂ duninya tə̂ nəənn.

⁴ A tokə karɛ̂ asə a, Lubba ula Ngonnɛ̂, dɛnɛ̂n uje, n̂-ngəmɛ̂ kɔ Ndu tə̂ lə Mɔyijə,

⁵ bba ta tee nɛ̂n kə dəwje kə̂ eeje kɔ Ndu tə̂ kə ddang karə n-ddeeje to ngann lə Lubba.

⁶ Lubba ula Ndil lə Ngonnɛ̂ məje tə̂ ta tɔju to n-to ngannɛ̂ njaa. Ndil le aw uru əkii nan: «Aba», kandə tar le nan «Bɔy!»

⁷ Yeenn a, ə-to bbərə ang ngaa, ə-to Ngonn lə Lubba. A bbo ə-to Ngonn lə Lubba a, nɛ̂nje kə̂ Lubba gɔl mba karə ngannɛ̂ le to mbai tɔ.

Pɔl əjə tar nya mba dəwje kə̂ Galasi

⁸ Ləw, ə-gərəje Lubba ang, ə-toje to bbərəje lə kɔrje kə̂ toje to lubbaje kə̂ tɔkɔrɔ ang.

⁹ A bbasinɛn, ə-gərəje Lubba ngaa, uta tɔyn Lubba gərəse ngaa. A, â təl bbəəlje ndilje kə̂ duninya tə̂ kə̂ singade goto ddəm ture goto ddəm tokə baânn wa?

¹⁰ Aw ooje marə ndɔje, marə nɛynje, marə karje kə marə bbalje to nɛ̂nje kə̂ ngəngje nya kəmse tə̂ bbay.

¹¹ M-bbəəl nya, mba kin karə kulaje tɔyn kə̂ m-dda mba tar ləse təlje to nɛ̂nje kə̂ baa be.

¹² M-walse nya ngakɔnʼmje, maji karə ə-toje tokə əman. Mba m-to tokə sese tɔ. Ə-ddaje marə nɛ̂n kə̂ maji ang səm ndɔ kâra ang.

¹³ Ə-gərəje kə majɛ̂ to, rɔm kə̂ tom â dda arə m-nayn horose tə̂ ngaâ mila mbər Tar kə̂ Maji marəse to dɔngɔrɛ̂ bbay.

¹⁴ Rɔm kə̂ tom le asə karə dəw oom ang. A ə-yabbəmje ang ddəm ə-sangəmje ang ddəm. Ə-taamje kə rɔse tə̂ tokə m-to marə anjə lə Lubba, tokə m-to Jeju-Kristə le njaa.

¹⁵ Yeenn a, rɔ-nəəl ləse to dda wa? Mɔru naji ləse m-pa nan: Bbo ddəw kɔru kandə kəmse karəm to a le â kɔruje karəm.

¹⁶ A bbasinɛn, m-ddee to nje-baan ləse mba tar kə̂ tɔkɔrɔ kə̂ m-pa marəse le wa?

¹⁷ Dəwjeenn le aw dda dda ləse baa, a kəjə ləde maji ang. N̂-ndikije karə ə-tinje səm bba ta unnje rɔse arəde.

¹⁸ To maji ta dda bbo nɛ̂n kə̂ maji kə kar tɔyn, bbo ta dda kar tə̂ kə̂ mee nɛ̂n horose tə̂ njaa bba ang.

¹⁹ Ngannəm, maw moo ndoo tokə siki mba tar ləse tokə dɛnɛ̂n kə̂ aw nduru ndo, mâ koo ndoo le ndərəng ndɔ kə̂ kisi ləse a to tokə lə Kristə.

²⁰ M-ndiki nya ta kee horose tə̂ kar tə̂ nəənn, ta gərə gusu kə̂ ta pa nɛ̂n tar karəse. Mba m-gərə nɛ̂n kə̂ ta dda kə se ang.

Agar de kə Sara toje tokə dɔnɔnje kə̂ joo

²¹ Ə-paje arəje moo: Sese kə̂ ə-ndikije ta nayn kɔ Ndu tə̂ le ooje tar kə̂ Ndu pa ang wa?

²² Makəturu lə Lubba pa nan: «Abaraham ee kə ngannje kə̂ dingaw joo. Marɛ̂ kâra nuje kə Agar kə̂ to bbərə. A ne kâra nuje kə Sara kə̂ to bbərə ang.»

²³ Ngonn kə̂ kɔɛ̂nje to bbərə le nuje tokə dəwje aw ujuje ngannje. A ngonn kə̂ kɔɛ̂nje to bbərə ang le nuje ddəw ndu Lubba tə̂ kə̂ unn.

²⁴ Tar nəənn tɔju marə nɛ̂n dang. Dɛnɛ̂nje kə̂ joo le toje tokə dɔnɔnje kə̂ joo. Dɔnɔn kə̂ dɔngɔr to Agar. To dɔnɔn kə̂ dɔ ddingiri tə̂ kə̂ ria nan Sinayi. Naw nuju ngannje kə̂ toje to bbərəje.

²⁵ Mba Agar to ddingiri kə̂ Sinayi kə̂ to nangə tə̂ kə̂ Arabi. Agar le to tokə Jerujalɛm kə̂ bbokənɛn nəənn kə̂ to bbərə ddəm dəwje kə̂ məɛ tə̂ tɔyn ddəm.

²⁶ A Jerujalɛm kə̂ darâ to bbərə ang. Ne a n̂-to kɔnjeje.

²⁷ Mba Makəturu lə Lubba pa nan: «Ə-dda rɔ-nəəl, əi kə̂ uju ang, uru əkii bbo ə-dda rɔ-nəəl, əi kə̂ ə-gərə to lə ndo kə̂ aw to dɛnɛ̂n ang, mba dɛnɛ̂n kə̂ dingaw mbəte a kuju ngannje banya kuta dɛnɛ̂n kə̂ nayn kəy ngaw tə̂.»

²⁸ A see ngakɔnʼmje, ə-toje to ngannje kə̂ dujude ddəw ndu Lubba tə̂ kə̂ unn tokə lə Ijakə.

²⁹ A ləw, ngonn kə̂ duje tokə dəwje aw ujuje le ula kəm ngonn kə̂ duje ddəw Ndil tə̂ lə Lubba ndoo tə̂. Nɛ̂ɛnn le bbokənɛn to tokə baann tɔ.

³⁰ A Makəturu lə Lubba pa nan ddi wa? Makəturu le nan: «Ə-tubba dɛnɛ̂n kə̂ to bbərə le kə ngonnɛ̂. Mba ngonn lə bbərə a kasə kuwa nɛ̂n-ndubba kə ngonn lə dɛnɛ̂n kə̂ to bbərə ang le ang.»

³¹ Yeenn a, ngakɔnʼmje, dɛnɛ̂n kə̂ to bbərə â n-to ngannɛ̂ ang. Dɛnɛ̂n kə̂ to bbərə ang â n-to ngannɛ̂.