Galatəje 3 - Dɔnɔn kə̂ Siki: Tar kə̂ aw arə təbbə

Pɔl duju tar dəwje kə̂ Galasi

¹ See dəwje kə̂ Galasi, mbə ddi â ə-mbəje be wa? N̂-tɔjuse tar koy lə Jeju-Kristə kakə-dəsə tə̂ kə majɛ̂, a nân bba n̂-turu kəmse wa?

² M-ndiki karə tar nəənn njaa ilamje tə̂: Ngəm kə̂ ə-ngəmje Ndu lə Mɔyijə â ingaje nɛ̂n Ndil-mə-nda wase mə-kunn â ingaje nɛ̂n Ndil-mə-nda le wa?

³ Mbə ddi bba uta dɔse be wa? Nɛ̂n kə̂ unnje kute ddəw Ndil tə̂ le ə-ndikije ta tunga ddəw da-rɔ tə̂ wa?

⁴ Nɛ̂nje tɔyn kə̂ ingase le ingase baa be wa? A to baa ang.

⁵ Lubba kə̂ arəse Ndil ngaâ aw dda nɛ̂n-mɔrije horose tə̂ le aw dda mba Ndu lə Mɔyijə kə̂ aw ngəmje wase mba mə-kunn wa?

Dəw a kasə ddee gatə gatə ddəw Ndu tə̂ ang

⁶ Makəturu lə Lubba pa nan: «Abaraham unn məɛ̂ arə Lubba. Yeenn bba Lubba ooe to dəw kə̂ gatə gatə mba mə-kunn laa le.»

⁷ Yeenn a, maji karə ə-gərəje to njê kə̂ unnje məde â toje to ngann lə Abaraham.

⁸ Tɔ bbay, Makəturu lə Lubba pa kete mban nan Lubba a koo dəwje kə̂ toje to Jiipije ang to dəwje kə̂ gatə gatə kəmɛ̂ tə̂ ddəw mə-kunn tə̂ le. Mba yeenn bba, Makəturu le pa tar kə̂ maji nəənn tokə kete arə Abaraham nan: «Lubba a bbar tar kə̂ maji dɔ kəsə gəl-dəwje tə̂ tɔyn ddəw tə̂ ləi.»

⁹ Yeenn a, Lubba bbar tar kə̂ maji dɔ dəwje tə̂ tɔyn kə̂ unnje məde le naan tə̂ kə Abaraham kə̂ to nje-mə-kunn.

¹⁰ A ndu-ndɔɔl to dɔ dəwje tə̂ tɔyn kə̂ aw undaje məde dɔ ngəm Ndu tə̂. Mba Makəturu lə Lubba pa nan: «Tarje tɔyn kə̂ to Makəturu-Ndu tə̂, bbo dəw ngəm ang ddəm dda nɛ̂n kula ang ddəm a, Ndu-ndɔɔl to dɔɛ̂ tə̂.»

¹¹ Tɔkɔrɔ njaa, dəw a kasə ddee gatə gatə kəm Lubba tə̂ ddəw ngəm Ndu tə̂ ang. Mba Makəturu lə Lubba pa nan: «Dəw kə̂ ddee gatə gatə ddəw mə-kunn tə̂ a kisi kə təbbə.»

¹² Ndu ar dɔ mə-kunn ang. A Makəturu lə Lubba pa tɔ nan: «Dəw kə̂ dda nɛ̂n kə turu Ndu a kisi kə təbbə ɔju dɔ Ndu le.»

¹³ A Kristə ɔruje kɔ ndu-ndɔɔl tə̂ kə̂ Ndu ddee nɛ̂n dɔje tə̂ mban, n̂-ddee to dəw kə̂ ndu-ndɔɔl to dɔɛ̂ tə̂ ɔju dɔje. Mba Makəturu lə Lubba pa nan: «Dəw kə̂ n̂-tɔɛ̂ kakə tə̂ n̂-tɔlɛ̂ to dəw kə̂ ndu-ndɔɔl to dɔɛ̂ tə̂.»

¹⁴ Baann bba karə tar kə̂ maji kə̂ Lubba bbar dɔ Abaraham tə̂ le ddee dɔ dəwje tə̂ kə̂ toje to Jiipije ang le ddəw tə̂ lə Jeju-Kristə. Ngaâ karə jingaje Ndil kə̂ Lubba unn ndue ta karə le ddəw mə-kunn tə̂.

Lubba unn ndue kete bba Ndu lə Mɔyijə tee

¹⁵ Ngakɔnʼmje, junnje nɛ̂n-kɔju-marɛ̂ dɔ nɛ̂n-ddaje tə̂ lə dəwje. Bbo dəw gɔl makəturu nɛ̂n-ndubba laa kə dɔgɔlɛ̂ a, dəw a kasə tuju ang ddəm a kasə kila marə nɛ̂n dɔɛ̂ tə̂ ang ddəm.

¹⁶ Abaraham kə Ngokɛɛ̂ â Lubba unn ndue ta karəde nɛ̂nje. Makəturu lə Lubba pa nan: «Ngakɛɛ̂» ang. Lubba unn ndue le arə dəwje kə̂ banya ang. Makəturu le nan: «Ngokɛɛ̂.» Yeenn pa nan nunn ndue le narə dəw kâra baa kə̂ to Kristə.

¹⁷ Tar kə̂ m-ndiki ta pa â nəənn: Lubba dda makəturu nɛ̂n-ndubba kə dɔgɔlɛ̂ tokə kete mban. A Ndu lə Mɔyijə kə̂ tee bbal kɔr sɔ gire dɔmota goe tə̂ a kasə tuju makəturu kə̂ Lubba dda le ang. Bbo baann a, ndu Lubba kə̂ unn le a to nɛ̂n kə̂ baa.

¹⁸ Mba bbo ddəw ngəm Ndu tə̂ Lubba bba a kasə karə nɛ̂n nɛ̂n dəw a, yeenn tɔju to nâ kasə karə nɛ̂n dəw ddəw ndu-kunn tə̂ ang ngaa. Lubba dda mə-maji kə Abaraham ddəw ndue ne Lubba tə̂ kə̂ nunn.

¹⁹ Yeenn a, Ndu to mba ddi bbay wa? Lubba arə Ndu to bba karə n-gərəje nɛ̂n nɛ̂nje kə̂ dəwje aw ddaje kə dɔgɔlɛ̂ ang, ndərəng ta nginan nɛ̂n ddee lə ngoka Abaraham kə̂ Lubba unn ndue ta karɛ̂ nɛ̂n le. Lubba ula anjəje kə Ndu le ddəw tə̂ lə marə nje-gɔl-tar.

²⁰ Nje-gɔl-tar to mba dəw kâra baa ang. A Lubba kâra baa.

²¹ Yeenn pa nan, Ndu lə Mɔyijə mbətə ndu-kunnje lə Lubba le wa? Baann ang. Mba bbo marə Ndu aw dda arə dəw aw isi kəm baa a, Ndu a dda karə dəw ddee gatə gatə kəm Lubba tə̂ tɔ.

²² A Makəturu lə Lubba pa nan majang ɔn dɔ dəwje tɔyn. Baann bba dəwje tɔyn kə̂ unnje məde a kingaje nɛ̂n kə̂ Lubba unn ndue ta karəde mba məde kə̂ dunn darə Jeju-Kristə.

²³ Kete bba karə tar mə-kunn tee le, jee kɔ Ndu tə̂ tokə dəwje kə̂ eeje kəy-kula tə̂ ta nginan nɛ̂n kar kə̂ Lubba a tee nɛ̂n kə tar mə-kunn kə ddaka.

²⁴ Yeenn a, Ndu to nje-kaa dɔje ndərəng ndɔ ddee tə̂ lə Kristə, bba karə mə-kunn le dda arə n-ddeeje gatə gatə kəm Lubba tə̂.

²⁵ A kar kə̂ tar mə-kunn le tee, jee kɔ nje-kaa dɔje tə̂ le ang ngaa.

²⁶ Mba sese tɔyn ə-ddeeje to ngann lə Lubba ddəw məse tə̂ kə̂ unnje arəje Jeju-Kristə le.

²⁷ Sese tɔyn n̂-ddase batɛm kə ri Kristə arə ə-ddeeje tokə Kristə ngaa.

²⁸ Jiipi wase Gɛrɛkə goto ngaa, bbərə wase dəw kə̂ to bbərə ang goto ngaa, dingaw wase dɛnɛ̂n goto ngaa. Mba sese tɔyn ə-ddeeje to dəwje kə̂ kâra baa ddəw mə-kâra tə̂ kə̂ ə-ddaje kə Jeju-Kristə.

²⁹ Bbo ə-toje to ənga Kristə a, yeenn pa nan, ə-toje to ngaka Abaraham. Ə-toje to dəwje kə̂ Lubba unn ndue ta karəse nɛ̂n le.