Galatəje 2 - Dɔnɔn kə̂ Siki: Tar kə̂ aw arə təbbə

Pɔl kə njê-kayn-kulaje dooje ta naan Jerujalɛm

¹ Bbal dɔku gire sɔ goe tə̂ a, m-təl maw Jerujalɛm kə Barnabas. Maw kə Titə tɔ.

² Maw nunn, mba Lubba â pa arəm karə maw. Lo tə̂ənn, mɔru gəl Tar kə̂ Maji kə̂ maw mila mbəre marə dəwje kə̂ toje to Jiipije ang le. Mɔru gəle marə tɔkəje kə̂ dɔ Egilisi tə̂ marə mbɔn-naan tə̂ kə̂ m-dda kə de dang tɔ. M-dda baann mba m-ndiki karə kulaje ləm kə̂ takənɛn kə yəje kə̂ bbokənɛn kara toje to kulaje kə̂ baa ang.

³ Titə kə̂ to Gɛrɛkə kə̂ aw səm le, dəw kâra duje karə nuja ganja bba ang.

⁴ A marə ngakɔnje kə̂ tɔkɔrɔ ang dujuje karə nuja ganja bba. To dede kə̂ dandəje horoje tə̂ hɔy baa. N̂-ddeeje horoje tə̂ ta tənn kisi ləje go bbərə tə̂ kə̂ n-tee kɔɛ tə̂ kə ddang ddəw tə̂ lə Jeju-Kristə le koo. N̂-ndikije ta təl kə je kɔ bbərə tə̂ le guku.

⁵ A n-ndiki tə̂ tɛn kə de ang, bba karə tar kə̂ tɔkɔrɔ kə̂ to mə Tar kə̂ Maji tə̂ le nayn kə lo-toe mba tar ləse.

⁶ A ənga tɔkəje kə̂ dɔ Egilisije tə̂ kə̂ dəwje oojede to dəwje kə̂ ngəng nya le, ngəng ləde le osom tə̂ ang. Mba Lubba aw ɔru kəm dəw ang. Dede le marə nɛ̂n dang kə̂ duwamje kə singa karə m-dda goto.

⁷ A dooje a, n̂-gərəje to Lubba inya Tar kə̂ Maji le jim tə̂ karə mila mbəre marə dəwje kə̂ ujaje ganja ang, tokə ninya ji Piyɛr tə̂ karə ila mbəre arə dəwje kə̂ ujaje ganja le.

⁸ Mba Lubba kə̂ dda Piyɛr to nje-kaw-kula lə Jiipije le ddam to nje-kaw-kula lə dəwje kə̂ toje to Jiipije ang tɔ.

⁹ Jakə kə Piyɛr kə Jan kə̂ dəwje oojede to singa Egilisi le ooje mə-maji kə̂ Lubba dda səm le a, duwajeje əman kə Barnabas n̂-ddajeje lapiya ta tɔju to n̂-ddaje mə-kâra kə je. Yeenn bba joo ta naan ta karə jeje jaw kə rɔ dəwje tə̂ kə̂ toje to Jiipije ang. A dede, dawje kə rɔ Jiipije tə̂.

¹⁰ A nɛ̂n kə̂ n̂-dujujeje â to karə jole məje dɔ njê-ndooje tə̂. To nɛ̂n kə̂ to məm tə̂ ta dda njaa.

Pɔl in kə Piyɛr bbe tə̂ Antiyos

¹¹ A kar kə̂ Piyɛr ddee Antiyos a, min saa kəm dəwje tə̂ tɔyn, mba n̂-dda nɛ̂n kə dɔgɔlɛ̂ ang.

¹² Kete bba karə dəwje kə̂ Jakə ulade le ddee teeje a, Piyɛr le aw usa nɛ̂n kə njê-mə-kunnje kə̂ toje to Jiipije ang. A go ddee tə̂ lə dəwje le a, nayn njê-mə-kunnje le ngaâ nusa nɛ̂n kə de ang ngaa, mba n̂-bbəəl dəwje kə̂ aw ngəmje ndu kuja ganja le.

¹³ Marə ngakɔnjejeje kə̂ toje to Jiipije unnje nɛ̂n-dda ngəm laa le tɔ arə Barnabas kara unn gode tɔ.

¹⁴ Moo a, daw njaje ddəw tar tə̂ kə̂ tɔkɔrɔ kə̂ Tar kə̂ Maji pa le ang. Mba yeenn bba, m-pa marə Piyɛr kəm dəwje tə̂ tɔyn m-pa nan: «Bbo əi kə̂ ə-to Jiipi, kisi ləi to tokə dəwje kə̂ toje to Jiipije ang a, â kuwa dəwje kə̂ toje to Jiipije ang le kə singa karə n̂-ddaje nɛ̂n tokə lə Jiipije tokə baânn wa?»

Dəwje tɔyn aw ingaje kaji ddəw mə-kunn tə̂

¹⁵ Jeje, gəl-kujuje tə̂ nu njaa n-toje to Jiipije. N-to kəsə gəl-dəwje kə̂ toje to njê-nɛ̂n-ddaje kə̂ maji ang nəənn le ang.

¹⁶ N-gərə to dəw ddee gatə gatə kəm Lubba tə̂ ddəw məɛ̂ tə̂ kə̂ nunn narə Jeju-Kristə, bbo ddəw ngəm Ndu tə̂ ang. Mba yeenn bba, jeje njaa kara junn məje jarə Jeju-Kristə ta ddee to dəwje kə̂ gatə gatə kəm Lubba tə̂, ddəw mə-kunn tə̂ bbo ddəw ngəm Ndu tə̂ ang. Mba, dəw a kasə ddee gatə gatə kəm Lubba tə̂ ddəw ngəm Ndu tə̂ ang.

¹⁷ Jaw sangə ddəw ta ddee gatə gatə kəm Lubba tə̂ ddəw tə̂ lə Kristə. Jaw dda baann le a, jeje njaa kara joo rɔje to njê-nɛ̂n-ddaje kə̂ maji ang tokə njê kə̂ toje to Jiipije le ang tɔ. Yeenn tɔju to Kristə le to nje-dda karə n-dda majang wa? Baann ang.

¹⁸ Bbo m-təl maw ngəm Ndu kə̂ m-mbətə le a, əman njaa m-dda rɔm to nje-mbətə Ndu le.

¹⁹ Əman, to dəw kə̂ oy yo Ndu mban bba ta nayn kəm baa mba Lubba. Moy kə Kristə naan tə̂ kâra baa dɔ kakə-dəsə tə̂.

²⁰ To əman â misi kəm baa ang ngaa, to Kristə â isi kəm baa mə da-rɔm tə̂. Mba, kisi ləm kəm baa mə da-rɔ tə̂ bbokənɛn nəənn, misi kəm baa mba məm kə̂ munn marə Ngonn lə Lubba kə̂ ndikim ngaâ unn rɔɛ̂ arə yo mbam.

²¹ M-ndiki ta mbətə mə-maji kə̂ Lubba dda le ang. Mba bbo dəw aw ddee gatə gatə ddəw Ndu tə̂ kəm Lubba tə̂ a, yeenn pa nan Kristə oy baa be.