Galatəje 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl, m-to nje-kaw-kula. To dəwje â bbarəmje karə m-ddee to nje-kaw-kula le ang ddəm ddəw tə̂ lə marə dəw ang ddəm. Jeju-Kristə kə Lubba kə̂ Bɔ kə̂ ndol Jeju kə̂ oy â n̂-bbarəmje.

² Əman kə njê-mə-kunnje tɔyn kə̂ eeje səm nəənn n-dda makəturu nəənn jarəse, sese kə̂ Egilisije tə̂ kə̂ Galasi.

³ Maji karə Bɔjeje Lubba de kə Əbbə-dəwje Jeju-Kristə n̂-ddaje kə se mə-maji ddəm darə məse wul lɔm ddəm.

⁴ Jeju njaa unn rɔɛ̂ arə yo mba majangje ləje, mba tee nɛ̂n kə je mə karje tə̂ kə̂ maji ang nəənn kə ddang, tokə ye kə̂ mə Lubba kə̂ to Bɔjeje ndiki.

⁵ Maji karə dəwje piteje kə ndɔ kə ndɔ. Amɛnn.

Tar kə̂ Maji kâra baa

⁶ Nɛ̂n kə̂ ə-ddaje le məjə pin. Lubba kə̂ bbarse ddəw mə-maji tə̂ lə Kristə le â ə-tuseje njangə baa inyɛ̂je a unnje go marə Tar kə̂ Maji kə̂ dang wa?

⁷ To marə Tar kə̂ Maji kə̂ dang bba to ang. Marə dəwje â aw turuje dɔse ngaâ ndikije ta turu Tar kə̂ Maji lə Kristə le.

⁸ A bbo marə dəw wase jeje njaa wase marə anjə kə̂ darâ bba ddee ila mbər marə Tar kə̂ Maji kə̂ dang kə ye kə̂ jila mbəre jarəse le a, maji karə ndu-ndɔɔl to dɔɛ̂ tə̂.

⁹ N-pa kete mban. A m-təl m-pa bbay: Bbo marə dəw ddee ila mbər marə Tar kə̂ Maji kə̂ dang kə ye kə̂ ooje le a, maji karə ndu-ndɔɔl to dɔɛ̂ tə̂.

¹⁰ A bbasinɛn nəənn, maw sangə ddəw ta ddee maji kəm dəwje tə̂ wase kəm Lubba tə̂ wa? Maw sangə ddəw ta nəəl kəm dəwje tə̂ wa? A bbo maw sangə ddəw ta nəəl kəm dəwje tə̂ a, mâ to bbərə-kula lə Kristə ang ngaa.

Lubba mbərə Pɔl to nje-kaw-kula

¹¹ Ngakɔnʼmje, m-pa marəse: Tar kə̂ Maji kə̂ mila mbəre marəse le in rɔ dəw tə̂ ang.

¹² Dəw â ndaji tar le arəm ang ddəm dəw â tɔjum ang ddəm. Jeju-Kristə â tee kə tar le kə ddaka arə m-gərə.

¹³ Mba ooje tar nɛ̂n-ddaje ləm kə̂ dɔngɔr, kar tə̂ kə̂ m-nayn maw polo nɛ̂n Lubba tokə lə Jiipije le. Maw mula kəm Egilisi lə Lubba ndoo tə̂ nya ddəm maw tuju Egilisi le ddəm.

¹⁴ Karɛ̂ tə̂ənn le ngamarəm Jiipije kə̂ bbaləm kə de asə naan, mutade tɔyn ddəwe tə̂, mba munn rɔm tɔyn ta ngəm nɛ̂n-ji-bbeje lə kajeje.

¹⁵ A Lubba bbarəm ddəw mə-maji tə̂ laa, kar tə̂ kə̂ m-nayn mə kɔnʼmje tə̂ bbay undam dang.

¹⁶ Noo maji kəmɛ̂ tə̂ ta karə m-gərə Ngonnɛ̂ ngaâ karə mila mbər tar laa marə dəwje kə̂ toje to Jiipije ang. Karɛ̂ tə̂ənn le m-duju dəw ndəjə ang ddəm

¹⁷ njê-kaw-kulaje kə̂ toje dɔngɔr arəm, maw rɔde tə̂ Jerujalɛm ang ddəm a mɔtu maw nangə tə̂ kə̂ Arabi, goe tə̂ a, m-təl m-ddee Damas.

¹⁸ Bbal mota goe tə̂ a, maw Jerujalɛm ta koo Piyɛr ta gəre ngaâ m-nayn saa ndɔ dɔku gire min.

¹⁹ Karɛ̂ tə̂ənn, moo marə nje-kaw-kula dang ang. Bbayɛ̂ njaa to Jakə ngokɔn Əbbə-dəwje â mooe.

²⁰ Tar kə̂ maw dda makəturu tə̂ marəse nəənn, maw pa kəm Lubba tə̂, to ngəm ang.

²¹ Goe tə̂ a, maw nangə tə̂ kə̂ Siri kə Silisi.

²² A Egilisije kə̂ Jude, dede kə̂ n̂-toje ənga Kristə, n̂-gərəmje to əman le ang.

²³ Tar kə̂ dooje â nan: «Dəw kə̂ aw ula kəmje ndoo tə̂ le, bbasinɛn aw ila mbər tar mə-kunn kə̂ n̂-ndiki ta tuju ddəwe le ngaa.»

²⁴ Ngaâ, njê-mə-kunnje le aw ɔsuje gaji Lubba mbam.