Epɛjinyɛje 6 - Dɔnɔn kə̂ Siki: Tar kə̂ aw arə təbbə

Tar lə ngannje kə njê-kujudeje

¹ Ngannje, Əbbə-dəwje ndiki karə ooje ta kɔnsese kə bɔsese. Mba yeenn to nɛ̂n kə̂ to kə dɔgɔlɛ̂.

² «Maji karə ə-bbəəl bɔije kə kɔinje.» Yeenn to dɔngɔr tar kə̂ mə Ndu tə̂ lə Lubba kə̂ ndu-kunn to dɔɛ tə̂.

³ Ndu-kunn le nan: «Bbo ə-dda tokə baann a, â kisi kə majɛ̂ ngaâ ndɔi a banya dɔ nangə tə̂.»

⁴ See bɔje, arəje wungu ngannse ang. Ə-ngəmjede, ə-tɔjujede nɛ̂n ta ə-ndɔruje mbide kə turu ndu Əbbə-dəwje.

Tar lə bbərəje kə lə əbbədedeje

⁵ See bbərəje, ooje ta əbbəsese kə̂ nangə̂ nəənn, ə-bbəəljede, ə-ddaje kula arəjede kə mə ngonn-kasə tokə Kristə â aw ddaje kula laa.

⁶ Ə-ddaje kə de baann mba nəəl nɛ̂n kəmde tə̂ ang. A ə-ddaje tokə bbərəje lə Kristə kə̂ unnje rɔde tɔyn ta dda nɛ̂n nɛ̂n kə̂ mə Lubba ndiki.

⁷ Ə-ddaje kə əbbəseseje kə mə-kâra, tokə lə Əbbə-dəwje â aw ddaje saa bbo dəwje ang.

⁸ Ə-gərəje kə majɛ̂: Dəw kə̂ to bbərə wase dəw kə̂ to bbərə ang kara a kinga kuka ji Əbbə-dəwje tə̂ asə kəm maji laa kə̂ n̂-dda.

⁹ See dəwje kə̂ eeje kə bbərəje, ə-ddaje tokə baann tɔ kə bbərəje le. Ə-sirijede ang. Mba ə-gərəje to, sese kə bbərəje le tɔyn, Əbbəsese ee darâ ngaâ ɔru kəm dəw ang.

Nɛ̂n-ddɔje lə njê-mə-kunnje

¹⁰ Ta kutu nɛ̂n dɔɛ̂ a, maji karə ingaje singa ddəw mə-kâra tə̂ kə̂ ə-ddaje kə Əbbə-dəwje, ddəw singa-mɔngu tə̂ laa kə̂ bo nya.

¹¹ Otoje nɛ̂n-ddɔje tɔyn kə̂ Lubba arəse ulaje rɔse tə̂ bba â kasəje ta kuwa karə ngəng nɔn kula-ddaje tə̂ lə Əsu kə̂ aw dda kə gusu.

¹² To dəw â jaw ddaje ddɔ saa ang. Jaw ddaje ddɔ kə ndilje kə̂ aw ɔnje mbay, njê-singaje kə̂ duninya tə̂ nəənn kə̂ to lo ndul tə̂ kə ndilje kə̂ maji ang kə̂ mə dara tə̂.

¹³ Mba yeenn bba, maji karə otoje nɛ̂n-ddɔje lə Lubba tɔyn. Baann bba, bbo ndɔ kə̂ maji ang tee a, â kasəje ta maan gɔlse nangə̂ nɔn nje-baan tə̂ le karə ngəng ngaâ bbo ə-ddaje ddɔ le ndərəng ə-teeje nɛ̂n a, â naynje dɔ gɔlse tə̂.

¹⁴ Arje dɔ gɔlse tə̂, arəje tar kə̂ tɔkɔrɔ to bbərəse tə̂ tokə əndaar-kuwa-bbər. Arəje kula-dda kə̂ gatə gatə to karse tə̂ tokə kubbu andə-narɛ lə njê-ddɔje

¹⁵ ngaâ arəje bbo tɔju Tar kə̂ Maji kə̂ aw arə mə-wul-lɔm to rɔse tə̂ tokə nɛ̂n-gɔl kə̂ dəw ula.

¹⁶ Uta tɔyn, mə nɛ̂nje tə̂ tɔyn, uwaje mə-kunn ləse tokə dər. Baann bba a tɔlje nɛ̂n puru-kɔndɔrɔje lə Nje-mə-majang le kə ddang.

¹⁷ Unnje kaji kə̂ Lubba ajije le tokə əjɔkudɔ andə-narɛ lə njê-ddɔje. Ngaâ unnje tar lə Lubba tokə tɔkə kiya kə̂ Ndil-mə-nda arəse.

¹⁸ Mə karje tə̂ tɔyn arəje Ndil tɔjuse ddəw kə̂ â dujuje nɛ̂n Lubba. Maji karə ə-tibbije ang ngaâ ə-dujuje Lubba nya mba njê-mə-kunnje.

¹⁹ Ə-dujuje Lubba nya mbam tɔ, karə bbo mâ ta pa tar a, n̂-tɔjum tar kə̂ mâ pa, ta kila nɛ̂n mbər nɛ̂n kə̂ iya rɔɛ̂ mə Tar kə̂ Maji tə̂ le kə bbəəl ang.

²⁰ Kar tə̂ kə̂ mee nɛ̂n kəy-kula tə̂ nəənn kâra, m-to dəw kə̂ aw dda kula kə ri Kristə ta kila mbər Tar kə̂ Maji. Yeenn a, ə-dujuje Lubba karə mila mbər tar le kə bbəəl ang ddəm kə dɔgɔlɛ̂ ddəm.

Dɔbɔyn lapiya lə Pɔl

²¹ M-ndiki karə ə-gərəje tar dɔ kisi tə̂ ləm kə dɔ nɛ̂nje tə̂ kə̂ maw dda. Tisikə kə̂ to ngokɔnʼm kə̂ m-ndike ngaâ to dəw kə̂ aw dda kula lə Əbbə-dəwje kə dɔgɔlɛ̂ a pa tar dɔ nɛ̂nje tə̂ tɔyn karəse.

²² M-gərə kə majɛ̂ njaa bba mulɛ̂ marəse karə n̂-pa tar dɔ kisi tə̂ ləje narəse ddəm karə n̂-pa tarje kə̂ a karəse singa ddəm narəse.

²³ Maji karə Lubba kə̂ Bɔ kə Əbbəjeje Jeju-Kristə ddaje arə njê-mə-kunnje isije kə mə-wul-lɔm, karə n̂-ndikije naan ngaâ darəde mə-kunn.

²⁴ Maji karə Lubba dda mə-maji kə dəwje tɔyn kə̂ ndikije Əbbəjeje Jeju-Kristə kə ndiki kə̂ a goto ndɔ kâra ang.