Epɛjinyɛje 5 - Dɔnɔn kə̂ Siki: Tar kə̂ aw arə təbbə

Maji ta nja lo-karɛ tə̂

¹ Ə-toje to ngannje kə̂ Lubba ndikise nya. Yeenn a, maji karə ə-ndajɛ̂je.

² Ə-ndikije njê-marəse tokə Kristə ndikije ngaâ unn təbbə laa arə Lubba to nɛ̂n-karə-baa ddəm to nɛ̂n-polo kə̂ tokə dukann kə̂ ətə maji ddəm.

³ Ə-toje to dəwje lə Lubba. Mba yeenn bba, maji karə dəw bbar ri nɛ̂nje tokə kaya, nɛ̂n-yərəw, kunda kəm-nda horose tə̂ ang.

⁴ Maji karə tar mbəje wase tar kə̂ asə pa ang kə tar rɔ-kul tee tase tə̂ ang. To nɛ̂nje kə̂ karə ə-ddaje ang. A wooyo â ta arəje Lubba.

⁵ Mba maji karə ə-gərəje kə majɛ̂: Dəw kə̂ aw dda kaya, dəw kə̂ aw dda nɛ̂n-yərəw, dəw kə̂ aw unda kəm-nda, mba kunda kəm-nda to polo kɔr. Bbe-kɔn lə Kristə de kə Lubba a to lə dəwje kə̂ baann ang.

⁶ Aaje kə majɛ̂ arəje dəw ərəse kə tarje kə̂ baa baa ang. Nɛ̂nje kə̂ baann â aw dda arə wungu aw ɔn Lubba dɔ dəwje tə̂ kə̂ aw ddaje dɔ-kətərə saa.

⁷ Maji karə ə-ddaje mə-kâra kə de marə nɛ̂n tə̂ ang.

⁸ Ləw, aw njaje lo ndul tə̂, a bbasinɛn aw njaje lo-karɛ tə̂ ddəw mə-kâra tə̂ kə̂ ə-ddaje kə Əbbə-dəwje. Yeenn a, maji karə ə-njaje tokə dəwje kə̂ aw njaje lo-karɛ tə̂.

⁹ Lo-karɛ aw ddee kə nɛ̂nje kə̂ maji dang dang kə̂ to nɛ̂nje kə̂ gatə gatə kə nɛ̂nje kə̂ tɔkɔrɔ.

¹⁰ Maji karə ə-sangəje ddəw ta gərə nɛ̂n kə̂ nəəl kəm Əbbə-dəwje tə̂.

¹¹ Nɛ̂nje kə̂ dəwje kə̂ aw njaje lo ndul tə̂ aw ddaje to nɛ̂nje kə̂ aw ddaje maji kə dəw ang. Maji karə ulaje rɔse kə tə̂ ang. A maji karə ə-teeje kə tarɛ̂ kə ddaka.

¹² Nɛ̂nje kə̂ dəwje le aw ddaje lo-kiyɛ̂ tə̂ le to rɔ-kul, asə karə dəw pa tarɛ̂ ang.

¹³ A nɛ̂n tɔyn kə̂ n̂-tee nɛ̂n kə ddaka, to nɛ̂n kə̂ ddee lo-karɛ tə̂.

¹⁴ Mba nɛ̂n tɔyn kə̂ tee kə ddaka to lo-karɛ. Mba yeenn bba Makəturu lə Lubba pa nan: «Əi kə̂ aw tibbi nəənn, ə-ndol In taar horo dəwje tə̂ kə̂ oyje, a Kristə a kuru ndoko laa dɔi tə̂.»

¹⁵ Maji karə aaje pa-njaje ləse ooje kə majɛ̂ bba. Ə-njaje tokə lə mbəje ang. Maji karə ə-njaje to njê-kəm-karɛje.

¹⁶ Maji karə unnje kar ləse mba dda nɛ̂n nɛ̂n kə̂ maji. Mba ndɔje kə̂ jisije tə̂ nəənn to ndɔje kə̂ maji ang.

¹⁷ Yeenn a, maji karə isije to mbəje ang. A maji karə ə-sangəje ta gərə nɛ̂n kə̂ mə Əbbəjeje ndiki karə ə-ddaje.

¹⁸ Ayje koto arə ddase ang. Mba koto aw kə dəw arə tuju. A arəje Ndil â ddususe.

¹⁹ Maji karə ɔsuje pa wal Lubba, pa piti Lubba kə paje kə̂ Ndil tɔjuse. Ɔsuje pa ə-ndɔije nɛ̂n ri Əbbə-dəwje kə məse tɔyn.

²⁰ Maji karə arəje wooyo Lubba kə̂ Bɔ kə kar tɔyn mba nɛ̂nje tɔyn kə ri Əbbəjeje Jeju-Kristə.

Kisi lə dingawje kə dɛnɛ̂nje ləde

²¹ Maji karə ə-bbəəlje naan ɔju dɔ bbəəl kə̂ aw bbəəlje Kristə.

²² Dɛnɛ̂nje, maji karə ooje ta ngawsese tokə aw ooje ta Əbbə-dəwje.

²³ Mba dingaw â to dɔ dɛnɛ̂n tokə Kristə to dɔ Egilisi. Kristə le â aji Egilisi kə̂ to da-rɔɛ̂ le.

²⁴ Maji karə dɛnɛ̂nje bbəəlje ngawdede mə nɛ̂nje tə̂ tɔyn tokə Egilisi bbəəl Kristə.

²⁵ Dingawje, maji karə ə-ndikije dɛnɛ̂nje ləse tokə Kristə ndiki Egilisi, ndərəng arə təbbə laa mbɛɛ̂.

²⁶ N̂-dda baann karə Egilisi ddee to nɛ̂n kə̂ dunda dang mba Lubba. Mba n̂-toko Egilisi le kə maann ddəm kə Tar ddəm.

²⁷ N̂-ndiki karə Egilisi le tee ar nɔɛ̂n tə̂ kura, nɛ̂n-yərəw ɔru ang ddəm kəmɛ̂ ayn mbara ang ddəm marə nɛ̂n tuju tə̂ ang ddəm. N̂-ndiki karə Egilisi laa le to nɛ̂n kə̂ maji tɔyn ngaâ marə tar to dɔɛ tə̂ ang.

²⁸ Yeenn a, maji karə dingaw ndiki dɛnɛ̂n laa tokə da-rɔɛ̂ njaa. Dəw kə̂ ndiki dɛnɛ̂n laa a, to ne njaa â n̂-ndiki rɔɛ̂.

²⁹ Ndɔ kâra dəw mbətə da-rɔɛ̂ ang. Dəw aw ngəm da-rɔɛ̂ kə nɛ̂n-kusa tokə Kristə aw dda kə Egilisi laa.

³⁰ Mba jeje n-toje to dəbbə rɔ Kristə le.

³¹ Makəturu lə Lubba pa nan: «Mba yeenn bba, dingaw a kinya bɔɛ̂je kə kɔɛ̂nje ta nayn kə dɛnɛ̂n laa ngaâ dede joo kəm dâ ddeeje to da-rɔ kə̂ kâra baa ngaa.»

³² Nɛ̂n kə̂ iya rɔɛ̂ mə tar tə̂ nəənn bo nya. A əman, m-pa marəse, tar nəənn to tar lə Kristə kə Egilisi.

³³ A tar le to mbase tɔ: Maji karə dəw kâra kâra ndiki dɛnɛ̂n laa tokə da-rɔɛ̂ njaa. Ngaâ maji karə dɛnɛ̂nje kâra kâra bbəəlje ngawdede.