Epɛjinyɛje 4 - Dɔnɔn kə̂ Siki: Tar kə̂ aw arə təbbə

Mə-kâra lə njê-mə-kunnje

¹ Yeenn bba, əman kə̂ dilam kəy-kula tə̂ mba Əbbə-dəwje, m-dujuse nya karə pa-nja ləse to pa-nja lə dəwje kə̂ Lubba bbarde njaa.

² Maji karə ə-ddaje rɔse ngaji, ə-wulje pee, ə-tɔje wurse ə-nginanje. Ə-tɔje wurse arəje naan ddəw ndiki naan tə̂.

³ Maji karə ə-ddaje singa mba ngəm mə-kâra kə̂ Ndil-mə-nda arə ə-ddaje kə naan ddəw kisi kə naan kə mə-wul-lɔm tə̂.

⁴ Da-rɔ kâra baa ngaâ Ndil-mə-nda kâra baa, tokə Lubba bbarse karə undaje məse dɔ nɛ̂n tə̂ kâra kə̂ n̂-bbarse mbɛɛ̂ le.

⁵ Əbbə-dəwje kâra baa, mə-kunn kâra baa, batɛm kâra baa.

⁶ Lubba kâra baa to Bɔ dəwje tɔyn. Nɔn dɔ dəwje tɔyn, naw dda kula ddəw tə̂ lə dəwje tɔyn, nee mə dəwje tə̂ tɔyn.

⁷ A jeje tɔyn njaa Lubba dda kə je mə-maji asə kəm gusu kə̂ Kristə arəje kâra kâra.

⁸ Mba yeenn bba, Makəturu lə Lubba pa nan: «Kin laa kə̂ nin naw taar nu le, nuwa bbərəje naw kə de, narə nɛ̂n dəwje baa.»

⁹ A tar kə̂ nan: «Nin naw taar» le a ta pa nan ddi wa? Yeenn pa nan, dɔngɔr n̂-ddisi ndərəng gəl nangə tə̂ bəər.

¹⁰ Dəw kə̂ ddisi le ne tɔ â, nin naw nday daraje tɔyn le. Yeenn bba ta ddusu nɛ̂n loje tɔyn kə̂ Lubba dda.

¹¹ Ne â narə gusu dəwje. Ne â narə marɛ̂je ddeeje to njê-kaw-kulaje, marɛ̂je to njê-kilaje mbər tar lə Lubba, marɛ̂je to njê-kilaje mbər Tar kə̂ Maji, marɛ̂je to njê-kulaje, a marɛ̂je to njê-nɛ̂n-tɔjuje.

¹² N̂-dda baann bba karə dəwje lə Lubba asəje tɔyn ta dda kula karə Egilisi kə̂ to da-rɔ Kristə sangə.

¹³ N̂-dda baann ndərəng karə jeje tɔyn mə-kunn ləje to kâra baa ngaâ karə n-gərəje Ngonn lə Lubba. Ngaâ karə n-ddeeje to dəwje kə̂ sangəje kə majɛ̂ asə naan kə Kristə.

¹⁴ Baann bba ja toje tokə lə ngannje ang ngaâ ləl nɛ̂n-tɔjuje tɔyn njaa a yəkəje ang ddəm a kuwaje kaw nɛ̂n kə yo kə nəənn tokə lə to kə̂ ləl aw yəkə dɔ maann tə̂ ang ddəm. Dəwje a ddaje gusu kərə nɛ̂n je karə n-ndəəm ddəw ang.

¹⁵ Bbo jaw pa tar kə̂ tɔkɔrɔ ddəw ndiki tə̂ a, ja sangə mə nɛ̂nje tə̂ tɔyn ndərəng ta ddee tokə lə Kristə kə̂ to dɔ Egilisi.

¹⁶ Tambal dɔɛ̂ â, dəbbə rɔ dang dang tɔyn mbɔn naan to da-rɔ kə̂ kâra baa ngaâ kətərə mba mənrə-rɔje le tɔje naan kə majɛ̂. A bbo dəbbə rɔ kə̂ dang dang le kâra kâra dda kula kə majɛ̂ a, da-rɔ le tɔyn njaa a tee kə mbi ngaâ a sangə ddəw ndiki tə̂.

Pa-nja kə̂ ləw kə pa-nja kə̂ siki

¹⁷ Mba yeenn bba, nɛ̂n kə̂ m-dujuse nya kə ri Əbbə-dəwje â nəənn: Dəwje kə̂ gərəje Lubba ang le arəje pa-nja ləse to tokə ləde ang. Kəjəje ləde aw aw kə de nɛ̂nje tə̂ kə̂ baa.

¹⁸ Kəjəje ləde toje to kəjəje kə̂ tuju. Təbbə kə̂ Lubba aw arə dəwje to mbade ang. N̂-gərəje nɛ̂n kâra ang, mba məde kətərə.

¹⁹ Kəjə ləde maji ang. Dunnje rɔde dila kula-ddaje tə̂ kə̂ maji ang. Daw ddaje kaya dawje nɛ̂n kə kete kete.

²⁰ A sese, nɛ̂nje kə̂ n̂-tɔjuse dɔ Kristə tə̂ toje tokə baann ang.

²¹ Bbo n̂-pa tar laa darəse ngaâ n̂-tɔjuse tar laa kə̂ to tar kə̂ tɔkɔrɔ kə̂ ddee ddəw tə̂ lə Jeju a,

²² maji karə inyaje pa-nja ləse kə̂ ləw. Inyaje da-rɔ kə ləw kə̂ bbo kə̂ to tə̂ aw dda arə aw tuju.

²³ Maji karə ə-ddaje arə məse ddəm kəjə ləse ddəm ddeeje to yeje kə̂ siki.

²⁴ Maji karə ə-ddeeje to dəwje kə̂ siki kə̂ Lubba ddade tokə ye kə̂ məɛ̂ ndiki ngaâ tar kə̂ tɔkɔrɔ ddade arə n̂-ddeeje to dəwje kə̂ gatə gatə ddəm dəwje kə̂ nɛ̂n-yərəw ɔrude ang ddəm.

²⁵ Yeenn a, maji karə inyaje ngəm, ta dəw kâra kâra pa tar kə̂ tɔkɔrɔ arə nje-marɛ̂, mba jeje tɔyn njaa n-toje da-rɔ kə̂ kâra baa.

²⁶ Bbo wungu ɔnse a, ə-ddaje majang ang, arəje lo ndul dɔ wungu tə̂ le ang.

²⁷ Inyaje ddəw arəje Əsu aal isi dɔse tə̂ ang.

²⁸ Maji karə nje-bboko inya bboko laa, a unn rɔɛ̂ dda kula kə jia mba kinga nɛ̂n kə ddəwe. Baann bba nâ kinga nɛ̂n mba kuman nɛ̂n njê kə̂ nɛ̂n dude.

²⁹ Maji karə tar kə̂ maji ang kâra tee tase tə̂ ang. Tar kə̂ maji kə̂ a kuman dəw, kə̂ aw arə singa dəw ngaâ a dda maji kə dəwje kə̂ aw ooje tar kə̂ aw paje, tarje kə̂ baann â ta ə-paje.

³⁰ Maji karə ulaje wungu mə Ndil-mə-nda tə̂ kə̂ Lubba arəse le ang. Ndil-mə-nda to tokə əndaji kə̂ Lubba unda rɔse tə̂ ta tɔju to marə ndɔ a, nâ kɔruse mə majang tə̂ tɔyn njaa kə ddang.

³¹ Maji karə inyaje rɔ-katə, kila dəw mə tə̂, dda wungu, nɛ̂n-ndangə, nɛ̂n-taji, mə-majangje dang dang.

³² Maji karə ə-ddaje maji kə naan. Ooje ndoo lə naan. Ɔruje tar dɔ naan tə̂, tokə Lubba ɔru tar dɔse tə̂ ddəw tə̂ lə Kristə le.