Epɛjinyɛje 3 - Dɔnɔn kə̂ Siki: Tar kə̂ aw arə təbbə

Kula lə Pɔl horo dəwje tə̂ kə̂ toje to Jiipije ang

¹ Mba yeenn bba, əman Pɔl, dilam kəy-kula tə̂ mba tar lə Jeju-Kristə kə̂ maw mila mbəre marəse, see dəwje kə̂ ə-toje to Jiipije ang.

² Məjə to ooje tar kula kə̂ Lubba inya jim tə̂ ddəw mə-maji tə̂ laa mbase le njaa.

³ Lubba tɔjum nɛ̂nje kə̂ n̂-gɔl ta dda kə̂ naynje lo-kiyɛ̂ tə̂. M-pa tar dɔ nɛ̂nje tə̂ənn ngaji marəse kete makəturu tə̂ nəənn mban.

⁴ Aw turaje makəturu nəənn a, â kasəje ta gərə to nɛ̂nje lə Kristə kə̂ naynje lo-kiyɛ̂ tə̂ le m-gərə nya.

⁵ Ləw, Lubba tɔju nɛ̂nje kə̂ naynje lo-kiyɛ̂ tə̂ le arə dəwje ang. A bbasinɛn, ddəw tə̂ lə Ndil-mə-nda, n̂-tee nɛ̂n kə ddaka narə njê-kaw-kulaje laa kə njê-kilaje mbər tar laa kə̂ nundade dang.

⁶ Nɛ̂n kə̂ to lo-kiyɛ̂ tə̂ le tokə be: Ddəw Tar tə̂ kə̂ Maji, Lubba gɔl dəwje kə̂ toje to Jiipije ang karə ingaje nɛ̂nje kə̂ n̂-gɔl mba Jiipije naan tə̂ kə de. N̂-ddeeje to da-rɔ kə̂ kâra baa ngaâ nɛ̂n kə̂ Lubba unn ndue ta karə ddəw tə̂ lə Jeju-Kristə to mbade tɔ.

⁷ M-ddee to nje-kula Tar kə̂ Maji ddəw mə-maji tə̂ lə Lubba kə̂ dda səm baa kə singa-mɔngu laa.

⁸ Əman, m-to tɛn baa nya horo dəwje tə̂ lə Lubba tɔyn. A n̂-dda səm mə-maji karə mila mbər tar lə Kristə, kə̂ to nɛ̂n-kinga kə̂ uta nɛ̂n-kingaje tɔyn marə dəwje kə̂ toje to Jiipije ang.

⁹ Narəm ddəw tɔ karə m-tɔju gusu kə̂ n̂-dda nɛ̂n nɛ̂nje kə̂ n̂-gɔl kə̂ toje lo-kiyɛ̂ tə̂ le marə uja kəm dəwje tə̂ kə majɛ̂. Ne Lubba kə̂ n̂-dda nɛ̂nje tɔyn le n̂-ngəm nɛ̂nje kə̂ n̂-gɔl le lo-kiyɛ̂ tə̂ ləw baa.

¹⁰ Yeenn bba bbasinɛn, ddəw tə̂ lə Egilisi, singa-mɔnguje kə singa kɔn-mbayje kə̂ mə dara tə̂ gərəje nɛ̂n kəm-karɛ lə Lubba dang dang,

¹¹ ddəw kâra baa kə nɛ̂n kə̂ n̂-gɔl ta dda kunn-kutu nɛ̂n tə̂ nu ngaâ n̂-dda ddəw tə̂ lə Əbbəjeje Jeju-Kristə le.

¹² Ddəw məje tə̂ kə̂ junnje jarəje Jeju-Kristə ngaâ n-ddaje mə-kâra saa le jingaje ddəw ta ddee ngɔsi kə Lubba kə bbəəl ang.

¹³ Mba yeenn bba, m-dujuse karə rɔse oy njururu mba ndoo kə̂ maw moo mbase le ang. Yeenn to nɛ̂n kə̂ a karəse piti.

Ndiki kə̂ Kristə ndiki dəwje

¹⁴ Mba yeenn bba, mungu məkəjə-gɔləm nangə̂ nɔn Bɔy Lubba tə̂.

¹⁵ Ne â gəl nɛ̂nje tɔyn kə̂ mə dara tə̂ kə dɔ nangə tə̂ inje rɔɛ̂ tə̂.

¹⁶ M-duje nya karə ddəw piti tə̂ laa kə̂ uta dɔɛ̂, narəse singa nya məse tə̂ ddəw tə̂ lə Ndil-mə-nda.

¹⁷ M-duje karə narə Kristə dda bbe məse tə̂ ddəw mə-kunn tə̂ le, karə ndiki naan ləse dda arə ubbaje singa tokə lə kakə kə̂ ngirɛ̂ ungu nangə̂ arə kətərə ddəm tokə kəy kə̂ gɔlɛ̂ uwa nangə kə majɛ̂ ddəm.

¹⁸ Baann bba sese kə kəsə njê-mə-kunnje tɔyn â kasəje ta gərə ndiki lə Kristə kə̂ uta dɔɛ̂, kə̂ kɔnyɛ̂ goto le.

¹⁹ Ngaâ â gərəje ndiki lə Kristə kə̂ uta nɛ̂n-gərəje tɔyn. Baann bba karə nɛ̂nje lə Lubba ddususe tɔyn.

²⁰ Lubba aw dda kə je ddəw singa-mɔngu tə̂ laa kə̂ aw dda kula rɔje tə̂. Nasə dda karə jingaje nɛ̂nje uta yeje kə̂ n-dujeje wase yeje kə̂ jaw jəjəje.

²¹ Maji karə Egilisi pite, ddəw tə̂ lə Jeju-Kristə kə kar tɔyn kə ndɔ kə ndɔ. Amɛnn.