Epɛjinyɛje 2 - Dɔnɔn kə̂ Siki: Tar kə̂ aw arə təbbə

Lubba arə təbbə ddəw tə̂ lə Kristə

¹ Ləw, kəm Lubba tə̂, ə-toje tokə lə dəwje kə̂ oy mba nɛ̂n-ddaje ləse kə̂ to kə dɔgɔlɛ̂ ang ddəm nɛ̂n-ddaje kə̂ maji ang ddəm.

² Aw unnje go kula-dda lə dəwje kə̂ duninya tə̂ nəənn. Aw ooje ta mbay le ndilje kə̂ maji ang kə̂ eeje mə ləl tə̂. Ne mbay le â n̂-to ndil kə̂ maji ang kə̂ aw dda kula rɔ dəwje tə̂ kə̂ aw mbətəje ta Lubba.

³ Ləw, jeje tɔyn njaa jee horo dəwje tə̂ənn le mba jaw nja ddəw bbo kə̂ da-rɔ tə̂: Jaw dda nɛ̂nje ddəw bbo kə̂ da-rɔje tə̂ kə ddəw kəjəje tə̂ ləje kə̂ maji ang. Jeje kara, n-to ddəw kâra baa kə kəsə dəwje kə̂ asə karə wungu lə Lubba to dɔde tə̂.

⁴ A Lubba oo kəm-to-ndoo ləje nya, mba n̂-ndikije nya.

⁵ Jeje kə̂ n-to tokə dəwje kə̂ oy mba nɛ̂n-ddaje kə̂ to kə dɔgɔlɛ̂ ang le, narəje təbbə kə̂ siki naan tə̂ kâra baa kə Kristə. Ddəw mə-maji tə̂ lə Lubba â aji nɛ̂n se.

⁶ Ddəw mə-kâra tə̂ kə̂ n-ddaje kə Jeju-Kristə, Lubba ndolje naan tə̂ saa ngaâ arə jisije darâ naan tə̂ kâra baa kə Kristə le.

⁷ Yeenn a, ddəw mə-maji tə̂ kə̂ n̂-dda kə je ddəw tə̂ lə Jeju-Kristə le, Lubba ndiki ta tɔju maji laa kə̂ uta dɔɛ̂ kə ndɔ kə ndɔ.

⁸ Mə-maji lə Lubba â aji nɛ̂n se ddəw koo kə̂ ooje məse tə̂ saa, bbo ə-ddaje marə nɛ̂n kâra mbɛɛ̂ ang. To nɛ̂n kə̂ Lubba arəse baa.

⁹ Lubba ajise mba kula-ddase ang. Baann bba karə marə dəw unda nɛ̂n gue baa ang.

¹⁰ Mba n-to dəw-kundaje lə Lubba. N̂-ddaje ddəw tə̂ lə Jeju-Kristə karə n-dda kulaje kə̂ maji kə̂ n̂-gɔl kete karə n-ddaje.

Dəwje tɔyn ddeeje to dəwje kə̂ kâra baa ddəw tə̂ lə Kristə

¹¹ Sese kə̂ dujuse to Jiipije ang le, Jiipije kə̂ dəwje â ujade ganja ndikije karə dəwje bbarde to njê-ganjaje. A daw bbarse to «njê-kuja ganja ang».

¹² Oleje məse to, dɔ ndɔɛ̂ tə̂ənn, ə-gərəje Kristə ang, â kasəje ta ddee to ngann njê-bbeje kə Ijarayɛlje ang. Nɛ̂nje kə̂ Lubba unn ndue ta karə dəwje kə̂ Ijarayɛl ddəw dɔnɔn tə̂ kə̂ nɔsu kə de kara oose ang. Nɛ̂n kə̂ undaje məse dɔɛ tə̂ kâra goto. Eeje kə Lubba dɔ nangə tə̂ nəənn ang.

¹³ A bbasinɛn, ddəw tə̂ lə Jeju-Kristə, sese kə̂ eeje ddəw əw ə-təl ə-ddeeje ngɔsi baa, ddəw məsə Kristə tə̂ le.

¹⁴ Mba ne Kristə le njaa n̂-dda narə jisi kə mə-wul-lɔm. N̂-dda narə Jiipije kə dəwje kə̂ toje to Jiipije ang ddeeje to dəwje kə̂ kâra baa. Ddəw koy tə̂ laa, mbətə-naan kə̂ to tokə ndoko kə̂ kayn horode le n̂-guru kə ddang.

¹⁵ Nɔru Ndu lə Mɔyijə kə tarje kə̂ məɛ tə̂ kə ddang. N̂-dda baann ta mbɔn Jiipije kə dəwje kə̂ toje to Jiipije ang karə n̂-ddeeje to gəl-dəwje kə̂ siki kə̂ kâra baa ddəw mə-kâra tə̂ kə̂ n̂-ddaje kə Kristə ngaâ karə mə-wul-lɔm to horode tə̂.

¹⁶ Ddəw koy tə̂ laa dɔ kakə-dəsə tə̂, Kristə mbɔnde arə n̂-ddeeje to dəwje kə̂ kâra baa ngaâ nungude naan tə̂ kə Lubba. Ddəw koy tə̂ laa le n̂-dda narə mbətə-naan unda ngangɛ̂.

¹⁷ Kristə ddee ta kila mbər Tar kə̂ Maji kə̂ ɔju dɔ kisi kə mə-wul-lɔm karəse, sese kə̂ eeje ddəw əw kə Lubba ddəm karə dəwje kə̂ eeje saa ngɔsi ddəm.

¹⁸ Mba ddəw tə̂ lə Kristə le â jeje tɔyn ja kasəje ta ddee nɔn Bɔjeje Lubba tə̂, ddəw tə̂ lə Ndil-mə-nda kə̂ kâra baa le.

¹⁹ Yeenn a, sese kə̂ ə-toje to Jiipije ang le ə-toje to njê-mbaje ang ngaa ddəm ə-toje to dəwje kə̂ aw ndayje to nday ang ngaa ddəm. A sese kə njê-mə-kunnje ə-toje to ngann njê-bbeje kə̂ kâra baa, eeje mə nuju tə̂ lə Lubba.

²⁰ Ə-toje tokə lə dəbbə ərje kə̂ dɔsu nɛ̂n kəy, kə̂ gɔl kəy le to njê-kaw-kulaje kə njê-kilaje mbər tar lə Lubba ngaâ Jeju-Kristə njaa to singa gɔl kəy kə̂ dungu nangə̂ le.

²¹ Ne â n̂-dda bba kəy kə̂ daw dɔsu mɔngu ngaâ ndəw arə ddee to kəy-polo Lubba kə̂ dunda dang mba Əbbə-dəwje.

²² Ddəw mə-kâra tə̂ kə̂ ə-ddaje kə Kristə le â, sese kə kəseje ə-ddeeje tokə kəy lə Lubba kə̂ Ndil-mə-nda isi məɛ tə̂.