Epɛjinyɛje 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl kə̂ Lubba ndiki tə̂ karə m-ddee to nje-kaw-kula lə Jeju-Kristə, mula kə makəturu nəənn marə dəwje lə Lubba kə̂ ooje məde tə̂ kə Jeju-Kristə kə̂ isije Epɛjə.

² Maji karə Bɔjeje Lubba kə Əbbəjeje Jeju-Kristə n̂-ddaje kə se mə-maji ddəm darə məse wul lɔm ddəm.

Lubba arəje nɛ̂nje kə̂ maji ddəw tə̂ lə Kristə

³ Jɔsuje gaji Lubba kə̂ to Bɔ Əbbəjeje Jeju-Kristə. Mba narəje gusuje lə Ndil kə̂ in darâ ddee ddəw mə-kâra tə̂ kə̂ n-ddaje kə Kristə.

⁴ N̂-mbərəje ddəw tə̂ lə Kristə kete bba n̂-dda duninya, karə n-ddee to dəwje kə̂ maji tɔyn ddəm dəwje kə̂ tar to dɔde tə̂ ang ddəm kəmɛ̂ tə̂. Ddəw ndiki tə̂ laa,

⁵ Lubba gɔl tokə kete karə n-təl to ngannɛ̂ ddəw tə̂ lə Jeju-Kristə kə mə-maji laa njaa.

⁶ Yeenn a, maji karə jɔsuje gaji Lubba mba mə-maji kə̂ n̂-dda kə je kə nangə̂ baa, ddəw tə̂ lə Ngonnɛ̂ kə̂ n̂-ndike nya.

⁷ Ddəw məsə tə̂ lə Kristə, Lubba tee kə je mə nɛ̂n-dda tə̂ kə̂ maji ang kə ddang ngaâ nɔru tar majang ləje dɔje tə̂, ddəw mə-maji tə̂ laa kə̂ bo nya.

⁸ Tɔkɔrɔ njaa, n̂-dda kə je mə-maji bo nya ngaâ narəje nɛ̂n-gərə tɔyn kə kəm-karɛ tɔyn.

⁹ Narə n-gərə nɛ̂n kə̂ nayn lo-kiyɛ̂ tə̂ kə̂ n̂-gɔl ta dda kə mə-maji laa njaa baa le ddəw tə̂ lə Kristə.

¹⁰ Nɛ̂n kə̂ n̂-ndiki ta dda le bbo karɛ̂ asə a, ta mbɔn nɛ̂nje tɔyn kə̂ toje mə dara tə̂ kə nɛ̂nje kə̂ toje dɔ nangə tə̂ kungu kɔ gɔl mbay tə̂ kə̂ kâra baa, kə̂ to Kristə.

¹¹ Ddəw mə-kâra tə̂ kə̂ n-ddaje kə Kristə le jinga nɛ̂n kə̂ to ɔju dɔje. Mba Lubba mbərəje kete, ne njaa n̂-gɔl tokə baann. Naw dda nɛ̂nje tɔyn kə turu ndue tokə məɛ̂ ndiki.

¹² Yeenn a, maji karə jeje kə̂ n-toje to dɔngɔr dəwje kə̂ unda məde dɔ Kristə tə̂ jɔsuje gajɛ̂.

¹³ Ddəw tə̂ lə Kristə le tɔ a, sese kara ooje nɛ̂n tar kə̂ tɔkɔrɔ, Tar kə̂ Maji kə̂ ajise, ooje məse tə̂ kə Kristə ngaâ Lubba uja əndaji rɔse tə̂. Əndaji le to Ndil-mə-nda kə̂ nunn ndue ta karə le.

¹⁴ Ndil-mə-nda kə̂ jingaje le tɔju to ja kingaje nɛ̂nje kə̂ maji kə̂ Lubba a ta karəje le. Ja kinga nɛ̂njeenn le dɔ ndɔ tə̂ kə̂ Lubba a tee kə je mə nɛ̂n-ddaje tə̂ kə̂ maji ang kə ddang njaa nyɔm. Yeenn a, maji karə jɔsuje gaji Lubba.

Pɔl duju Lubba mba njê-mə-kunnje

¹⁵ Mba yeenn bba, əman njaa kara, unn kute ndɔ tə̂ kə̂ moo nan ooje məse tə̂ kə Əbbə-dəwje Jeju ddəm aw ndikije njê-mə-kunnje tɔyn ddəm le

¹⁶ kar kə̂ maw nduju Lubba a, maw marɛ̂ wooyo mbase ngaâ maw milase mə duju tə̂ kə̂ maw duje le kə ndɔ tɔyn.

¹⁷ M-duju karə Lubba lə Əbbəjeje Jeju-Kristə, Bɔ kə̂ piti to laa, arəse Ndil kə̂ aw arə kəm-karɛ, karə tɔju Bɔ le arəse kə ddaka ngaâ arə ə-gəreje kə majɛ̂.

¹⁸ M-duju karə Lubba ɔru kəmse arə ə-gərəje nɛ̂n kə̂ aw undaje məse dɔɛ tə̂, kə̂ n̂-bbarse mbɛɛ̂ le karə ə-gərəje nɛ̂n-kingaje kə̂ to nɛ̂n piti kə̂ narə dəwje laa ingaje, sese ddəm njê-mə-kunnje ddəm.

¹⁹ M-duju Lubba tɔ karə ə-gərəje singa-mɔngu kə̂ bo uta dɔɛ̂, kə̂ Lubba ngəm mba tar le jee njê-mə-kunnje. Singa-mɔngu laa kə̂ bo le njaa â

²⁰ n̂-tɔju kə ddaka dɔ Kristə tə̂, kar tə̂ kə̂ noy, a n̂-ndole ngaâ narə nisi dɔ ji-kɔlɛ̂ tə̂ darâ,

²¹ dɔ ndilje tə̂ tɔyn kə̂ aw ɔnje mbay, dɔ singa-mɔnguje tə̂ tɔyn kə dɔ rije tə̂ tɔyn kə̂ dəwje aw bbar nangə̂ nəənn, ndɔ tə̂ kə̂ bbokənɛn ddəm kə̂ bara ddəm.

²² Tɔkɔrɔ, Lubba ungu nɛ̂nje tɔyn kɔ gɔl Kristə tə̂, nundɛ̂ dɔ nɛ̂nje tə̂ tɔyn ngaâ n̂-ddɛɛ̂ to tɔkə mbay dɔ Egilisi tə̂.

²³ Egilisi le to da-rɔ Kristə ngaâ Kristə ddusu Egilisi tɔyn ngaâ Lubba ddusu Kristə tɔyn.