Ebərəje 9 - Dɔnɔn kə̂ Siki: Tar kə̂ aw arə təbbə

Ddəw polo-Lubba

¹ Dɔnɔn kə̂ dɔngɔr tɔju ddəwje kə̂ dəwje a poloje nɛ̂n Lubba ddəm tɔju marə kəy lə Lubba kə̂ dɔ nangə tə̂ ddəm.

² Mba yeenn bba, n̂-dda kəy-tande kinga-naan. Daw bbar dɔngɔr lo kə̂ məɛ tə̂ to «lo kə̂ n̂-sangə dang mba Lubba». Lambe kə̂ ndɔn pure ee siri kə tabələ kə̂ mapaje kə̂ dunn darə Lubba to dɔɛ tə̂ toje lo tə̂ənn le.

³ Giri kubbu tə̂ kə̂ to joo laa kə̂ n̂-gangə nɛ̂n mə kəy le, to lo kə̂ daw bbar nan «Lo kə̂ n̂-sangə dang nya bbay mba Lubba.»

⁴ Lo tə̂ənn le, bann kə̂ n̂-dda kə andə ta ro yamboje dɔɛ̂ tə̂ to tə̂. Sanduku dɔnɔn kə̂ n̂-dda gire tɔyn njaa kə andə-narɛ to tə̂ənn tɔ. Marə jo kə̂ n̂-dda kə andə-narɛ ngaâ nɛ̂n-kusa kə̂ ria nan mann ddusu məɛ̂ to mə sanduku tə̂ le. Kakə lə Arɔn kə̂ putu kə bəkərəje kə̂ duja makəturu dɔnɔn tə̂ toje mə sanduku tə̂ le tɔ.

⁵ Dunda nɛ̂nje kə̂ n̂-dda darə unn da-rɔ anjəje kə̂ daw bbarde to serubɛn pitije dɔ sanduku tə̂ le. Yeenn ta tɔju to Lubba ee lo tə̂ənn le. Bakəde ɔnn dɔ lo kə̂ daw dunn məsə darə tə̂ mba majang lə dəwje. A to kar tɔju nɛ̂njeenn tɔyn kə goe goe â nəənn ang bbay.

⁶ Dunda nɛ̂nje le tɔyn tokə baann. A kə ndɔ tɔyn, njê-poloje Lubba aw andəje dəbbə lo tə̂ kə̂ dɔngɔr kə̂ mə kəy-tande tə̂ le bba aw poloje Lubba.

⁷ A mə kəy tə̂ kə̂ to joo laa le, tɔkə nje-polo Lubba kə karɛ̂ baa â aw andə tə̂ gɔl kâra baa njaa mə bbal tə̂ kâra. Naw nandə mə kəy tə̂ le kə məsə ta karə Lubba to nɛ̂n-polo mba majang laa ne njaa ddəm mba majang lə dəwje ddəm.

⁸ Ndil-mə-nda tɔju tokə baann to, bbo dɔngɔr kəy-tande le nayn bbay a, ddəw kandə lo tə̂ kə̂ n̂-sangə dang nya bbay mba Lubba nayn ɔru ang bbay tɔ.

⁹ Nɛ̂njeenn aw tɔjuje marə nɛ̂n dɔ ndɔje kə̂ bbokənɛn, ta tɔju to nɛ̂n-karə-baaje kə nɛ̂n-poloje kə̂ dəwje aw arəje Lubba asəje ta dda karə kəjə lə dəw kə̂ aw polo Lubba le ddee maji tɔyn ang.

¹⁰ Nɛ̂njeenn toje to nɛ̂nje kə̂ dəwje â aw ddaje rɔde tə̂ ddaka baa ɔju dɔ nɛ̂n-kusaje kə toko nɛ̂n-yərəwje. Nɛ̂njeenn le toje to nduje kə̂ naynje kə singade ndərəng kar tə̂ kə̂ Lubba turu nɛ̂n nɛ̂nje tɔyn arə ddeeje tokə siki.

Kristə unn təbbə laa arə to nɛ̂n-polo

¹¹ A Kristə ddee mban. N̂-to tɔkə nje-polo Lubba kə̂ aw arəje nɛ̂nje kə̂ maji kə̂ toje tə̂ənn mban. Nandə mə kəy-tande tə̂ kə̂ ngəng uta ye kə̂ kete ddəm asə tɔyn ddəm. To dəw â dda kəy-tande le ang, yeenn pa nan to nɛ̂n kə̂ nangə̂ nəənn ang.

¹² Kristə andə lo tə̂ kə̂ n̂-sangə dang nya bbay le gɔl kâra baa njaa a bbayɛ̂. Məsə bal-binyaje kə məsə ngann mangəje â naw nɛ̂n to nɛ̂n-polo ang. Məse njaa naw nɛ̂n bba nɔru nɛ̂n je kə ddang mə majang tə̂ ləje nyɔm nyɔm.

¹³ Ləw, daw dunn məsə bal-binyaje kə məsə bal-mangəje kə mandə-mangəje kə̂ n̂-ro darə ddeeje to bu ngaâ n̂-tusu dɔ dəwje tə̂ kə̂ ulaje rɔde nɛ̂n-yərəw tə̂ darə n̂-ddeeje maji.

¹⁴ Bbo baann a, məsə Kristə ngəng uta məsə dajeenn le. Ddəw tə̂ lə Ndil kə̂ to kə ndɔ kə ndɔ, Kristə unn rɔɛ̂ njaa arə Lubba to nɛ̂n-polo kə̂ maji tɔyn. Yeenn a, məse a toko kəjə nɛ̂n-ddaje kə̂ aw awje kə je karə jingaje yo le, karə n-ddaje kula lə Lubba kə̂ nje-kisi kəm baa le.

Məsə to nɛ̂n kə̂ tɔju kɔsu dɔnɔn kə Lubba

¹⁵ Mba yeenn bba, Kristə to nje-gɔl-tar marə dɔnɔn kə̂ siki, bba karə dəwje kə̂ Lubba bbarde ingaje nɛ̂n-kingaje kə̂ a to kə ndɔ kə ndɔ, kə̂ nunn ndue ta karə dəwje laa. Dasəje ta kinga nɛ̂nje le, mba Kristə oy ta kɔru dəwje mə majangje tə̂ kə̂ n̂-ddaje kar tə̂ kə̂ n̂-naynje nɛ̂n kɔ dɔnɔn tə̂ kə̂ dɔngɔr le.

¹⁶ Bbo dəw gɔl makəturu mba kayn nɛ̂n nɛ̂n-ndubbaje laa a, maji karə dəw kə̂ dda makəturu le oy bba dâ kuwa nɛ̂n-ndubba laa.

¹⁷ Mba, dəw kə̂ gɔl makəturu oy bba makəturu le a kubba singa. Â bbo dəw kə̂ dda makəturu le nayn kəm baa bbay a, makəturu le ubba singa ang.

¹⁸ Mba yeenn bba dɔnɔn kə̂ dɔngɔr le kara unn kute dɔ məsə da tə̂ kə̂ n̂-kayn tɔ.

¹⁹ Mɔyijə tura tarje kə̂ mə ndu tə̂ le kâra kâra kəm dəwje tə̂ tɔyn. Goe tə̂ a, nunn məsə ngann mangəje kə bal-binyaje, nunn maann kə ngonn kakə kə̂ ria nan ijopə kə ta-kubbu lɛnn kə̂ kasɛ ngaâ nula mə məsə tə̂ le n̂-tusu dɔ makəturu-Ndu tə̂ le ddəm dɔ dəwje tə̂ le tɔyn ddəm.

²⁰ N̂-pa nan: «Məsə nəənn to məsə dɔnɔn kə̂ Lubba ɔsu kə se ngaâ unn ndu karə ə-ngəmje.»

²¹ Goe tə̂ a, n̂-tusu məsə dɔ kəy-tande kinga-naan tə̂ kə dɔ nɛ̂nje tə̂ tɔyn kə̂ daw dda nɛ̂n kula lə Lubba tokə baann tɔ.

²² Ddəw Ndu tə̂ lə Mɔyijə, məsə â aw toko nɛ̂nje nya arə ddee maji. Bbo məsə ungu nangə̂ ang a, tar majang ɔru dɔ dəw tə̂ ang.

Məsə Kristə aw ɔru majang lə dəwje

²³ Daw toko nɛ̂nje kə̂ toje to ndil nɛ̂nje baa kə̂ darâ darə ddee maji tokə baann. A nɛ̂nje kə̂ toje to nɛ̂nje kə̂ tɔkɔrɔ kə̂ mə dara tə̂, to ta karə nɛ̂n-poloje kə̂ maji uta â n̂-toko nɛ̂n.

²⁴ Kəy lə Lubba kə̂ dəwje â ddaje kə jide â Kristə andə tə̂ ang. Yeenn to ndil nɛ̂n kə̂ tɔkɔrɔ le baa. Nandə mə dara tə̂ njaa, bbasinɛn naw nar nɔn Lubba tə̂ mba tar ləje.

²⁵ Bbal kâra kâra tɔyn, tɔkə nje-polo Lubba aw andə mə kəy tə̂ lə Lubba kə məsə da. A Kristə andə mə dara tə̂ ta kunn rɔɛ̂ karə Lubba gɔl banya nya ang.

²⁶ Mba bbo tokə baann a, nâ koo ndoo koy nɛ̂n gɔl banya nya, kunn-kute tə̂ kə̂ Lubba dda nɛ̂n duninya. A bbasinɛn nəənn, ddutu ndɔje tə̂ nəənn, Kristə ddee gɔl kâra baa to dɔbɔyn. Nunn rɔɛ̂ njaa narə to nɛ̂n-polo ta kɔru nɛ̂n majang kə ddang.

²⁷ To ta karə dəw oy gɔl kâra baa. Goe tə̂ a, sariya a ddee.

²⁸ Ddəw kâra baa, Kristə unn rɔɛ̂ arə to nɛ̂n-polo gɔl kâra baa ta kɔru nɛ̂n tar majang lə dəwje kə̂ banya. Nâ təl ddee kə̂ gɔl joo laa ta kaji dəwje kə̂ aw nginɛ̂nje, bbo ta kɔru tar majang ang ngaa.