Ebərəje 8 - Dɔnɔn kə̂ Siki: Tar kə̂ aw arə təbbə

Jeju to tɔkə nje-polo Lubba kə̂ tɔkɔrɔ

¹ Tar kə̂ ngəng uta kəseje kə̂ ja ta pa â nəənn: Tɔkə nje-polo Lubba ləje to darâ. Nisi dɔ ji-kɔl ngende-mbay tə̂ lə Lubba kə̂ to nje-singa-mɔngu kə̂ uta tɔyn.

² Naw dda kula laa le lo tə̂ kə̂ n̂-sangə nya bbay mə kəy-tande kinga-naan tə̂ kə̂ tɔkɔrɔ, kə̂ Əbbə-dəwje â dda, bbo dəw â dda ang.

³ Tɔkə njê-poloje Lubba tɔyn dundade karə dunnje nɛ̂n-karə-baa ddəm nɛ̂n-polo ddəm darəje Lubba. Mba yeenn bba, to tar lə Jeju ta kinga marə nɛ̂n mba karə Lubba tɔ.

⁴ Bbo Kristə nayn dɔ nangə tə̂ nəənn njaa kara, nâ to nje-polo Lubba ang. Mba marə njê-poloje Lubba toje mban. Daw dunnje nɛ̂n-karə-baaje darəje Lubba tokə ndu lə Mɔyijə pa le.

⁵ A kula lə njê-poloje Lubba le to ndil nɛ̂nje baa kə̂ undaje rɔ nɛ̂nje kə̂ tɔkɔrɔ kə̂ mə dara tə̂. Ddəw kâra baa tokə Lubba pa arə Mɔyijə kar tə̂ kə̂ nâ ta dda nɛ̂n kəy-tande kinga-naan le, n̂-pa nan: «Oo, maji karə ə-dda nɛ̂nje le tɔyn tokə ye kə̂ m-tɔji dɔ ddingiri tə̂ le.»

⁶ A bbasinɛn kula kə̂ uta ənga kəsə njê-poloje Lubba â darə Jeju, mba n̂-to nje-gɔl-tar dɔnɔn kə̂ maji uta ye kə̂ kete. Mə dɔnɔn tə̂ kə̂ siki le, Lubba unn ndue ta karə dəwje laa nɛ̂nje kə̂ maji nya uta yeje kə̂ mə dɔnɔn tə̂ kə̂ ləw le.

Lubba unn ndue mba marə dɔnɔn kə̂ siki

⁷ Bbo dɔnɔn kə̂ dɔngɔr asə tɔyn njaa a, dâ təl kɔsu marɛ̂ to joo laa ang ngaa.

⁸ A Lubba oo a, dəwje laa naynje aw ddaje nɛ̂nje kə̂ toje kə dɔgɔlɛ̂ ang bbay ngaâ pa nan: «Əbbə-dəwje pa nan: Dɔ ndɔje tə̂ kə̂ aw ddeeje, mâ kɔsu dɔnɔn kə̂ siki kə dəwje kə̂ Ijarayɛl ddəm dəwje kə̂ Juda ddəm.

⁹ Dɔnɔn le a to dang kə ye kə̂ mɔsu kə kadedeje ndɔ tə̂ kə̂ muwa jide m-tee kə de nangə tə̂ kə̂ Ejipitə kə ddang le. Əman Əbbə-dəwje m-pa tar baann: Kadedeje le ngəmje dɔnɔn ləm ang. Yeenn bba, əman njaa kara m-tusude minyade.

¹⁰ Əman Əbbə-dəwje m-təl pa nan: Dɔnɔn kə̂ mâ kɔsu kə ngann Ijarayɛlje go ndɔje tə̂ənn â nəənn: Mâ karə nduje ləm to kəjə tə̂ ləde, mâ kuja nduje le tokə makəturu dɔ bbəngərəde tə̂, mâ to Lubba ləde ngaâ dâ toje to dəwje ləm.

¹¹ Dəw kâra a tɔju nɛ̂n nje-bbe marɛ̂ ang ngaa ddəm ngokɔɛ̂n ang ngaa ddəm, ta pa nan: ‹Maji karə ə-gərə Əbbə-dəwje!› Dəw a pa baann ang ngaa. Mba dəwje tɔyn a gərəmje, unn kute dɔ njê kə̂ ngaji tə̂ ndərəng dɔ njê kə̂ tɔkə tə̂.

¹² Mâ kɔru tar dɔde tə̂ ddəm mâ kole məm dɔ majangje tə̂ ləde ang ngaa ddəm.»

¹³ Bbo Lubba pa tar dɔnɔn kə̂ siki a, yeenn pa nan n̂-dda narə ye kə̂ dɔngɔr le ddee to konn nɛ̂n ngaa. A nɛ̂n kə̂ to konn nɛ̂n ngaâ bbuka nya to nɛ̂n kə̂ a nday mbɔr ang.