Ebərəje 7 - Dɔnɔn kə̂ Siki: Tar kə̂ aw arə təbbə

Mɛlkisedɛk to tɔkə mbay ddəm nje-polo Lubba ddəm

¹ Ləw, Mɛlkisedɛk to tɔkə mbay kə̂ tɔkə bbe tə̂ kə̂ Salɛm ddəm nje-polo Lubba kə̂ nje-kisi ddutu dara tə̂ ddəm. Marə ndɔ, kar kə̂ Abaraham tətə tɔkə mbayje kə ddɔ ngaâ aw təl a, Mɛlkisedɛk le tila kəmɛ̂ ngaâ bbar tar kə̂ maji dɔɛ̂ tə̂.

² Ne â Abaraham jin dɔ nɛ̂nje kâra kâra tɔyn kə̂ in nɛ̂n ta ddɔ tə̂ arɛ̂ to dim. Gəl ri kə̂ to Mɛlkisedɛk le nan: «Tɔkə mbay kə̂ ndiki nɛ̂n-dda kə̂ gatə gatə.» Ngaâ n̂-to tɔkə mbay kə̂ Salɛm tɔ. Yeenn pa nan «tɔkə mbay kə̂ ndiki mə-wul-lɔm.»

³ Dəw gərə bɔɛ̂je ang ddəm kɔɛ̂nje ang ddəm gəle ang ddəm. Dəw gərə ndɔ kuje ang ddəm ndɔ yo laa ang ddəm. N̂-to tokə Ngonn lə Lubba, mba n̂-nayn to nje-polo Lubba kə ndɔ tɔyn.

⁴ Ooje! Mɛlkisedɛk to dəw kə̂ ngəng nya. Mba yeenn bba kajeje Abaraham jin dɔ nɛ̂nje kə̂ in nɛ̂n ta ddɔ tə̂ arɛ̂ to dim.

⁵ Ndu lə Mɔyijə pa arə njê kə̂ gəl Lebi tə̂ kə̂ toje to njê-poloje Lubba karə taaje dim dɔ nɛ̂nje tə̂ tɔyn ji dəwje tə̂ kə̂ Ijarayɛl. Dəwje le toje to ngakɔnde njaa ddəm n̂-toje to ngann mə Abaraham njaa tɔ ddəm.

⁶ A Mɛlkisedɛk kə̂ to dəw kə̂ gəl Lebi tə̂ ang taa dim ji Abaraham tə̂ ngaâ bbar tar kə̂ maji dɔ Abaraham tə̂ kə̂ Lubba unn ndue ta karɛ̂ nɛ̂nje.

⁷ Dəw kə̂ bo â aw bbar tar kə̂ maji dɔ dəw tə̂ kə̂ ngaji. Yeenn to nɛ̂n kə̂ dəw asə ta mayn ang.

⁸ Njê kə̂ gəl Lebi tə̂ kə̂ aw taaje dim toje to dəwje kə̂ a koyje marə ndɔ. Mɛlkisedɛk kara taa dim tɔ, a ne, n̂-nayn kəm baa ndərəng bbokənɛn tokə daw pa.

⁹ Njê kə̂ gəl Lebi tə̂ kə̂ aw taaje dim ji dəwje tə̂ le, ja kasəje ta pa nan Abaraham kə̂ uka dim arə Mɛlkisedɛk le, nayn to Lebi njaa kara uka dim arə Mɛlkisedɛk le tɔ.

¹⁰ Mba kar kə̂ Mɛlkisedɛk aw inga Abaraham le, Lebi nayn mə kɛɛ̂je Abaraham tə̂ le bbay.

¹¹ Lubba unn ndu arə ngann Ijarayɛlje pa nan, njê kə̂ gəl Lebi tə̂ â a toje to njê-poloje Lubba. A bbo kula polo-Lubba ləde le asə ta dda karə dəw ddee maji tɔyn a, mba ddi bba a to maji ta kinga marə nje-polo Lubba dang bbay tokə Mɛlkisedɛk bbo marə dəw kə̂ gəl Lebi tə̂ tokə lə Arɔn ang wa?

¹² Mba bbo gusu kula polo-Lubba turu a, ndu a turu njaa tɔ.

¹³ Tarjeenn le toje ɔju dɔ Əbbəjeje kə̂ gəle to dang. Dəw kâra kə̂ gəle tə̂ dda kula polo-Lubba dɔ bann tə̂ ang.

¹⁴ Dəwje tɔyn gərəje to Əbbəjeje to dəw kə̂ gəl Juda tə̂. A kar kə̂ Mɔyijə aw pa nɛ̂n tar dɔ njê-poloje Lubba tə̂ le, nila ri njê kə̂ gəl Juda tə̂ ang.

Jeju to nje-polo Lubba tokə Mɛlkisedɛk

¹⁵ Nɛ̂n kə̂ dda arə nɛ̂njeenn tɔyn arɛje yərərə kəmje tə̂ â nəənn: Marə nje-polo Lubba kə̂ dang ddee ngaâ to tokə Mɛlkisedɛk le.

¹⁶ N̂-ddee to nje-polo Lubba ddəw ndu tə̂ lə dəwje ang, a ddəw singa-mɔngu tə̂ kə̂ to mə təbbə tə̂ laa kə̂ a tuju ndɔ kâra ang.

¹⁷ Mba Makəturu lə Lubba pa nan: «Ə-to nje-polo Lubba kə̂ to kə ndɔ kə ndɔ tokə Mɛlkisedɛk.»

¹⁸ Yeenn a, Ndu kə̂ ləw le ubba singa ang ddəm dda kula ang ddəm arə dɔru kə ddang.

¹⁹ Mba nɛ̂n kâra kə̂ Ndu lə Mɔyijə dda arə ddee maji tɔyn goto. A jingaje marə nɛ̂n kə̂ maji nya uta, ta kunda məje dɔɛ̂ tə̂. Ddəw nɛ̂n tə̂ənn â jaw ddeeje nɛ̂n ngɔsi kə Lubba.

²⁰ Dɔɛ tə̂ bbay, nɛ̂ɛnn le to ddəw yo-kunda tə̂ lə Lubba. Kəsə dəwje ddeeje to njê-poloje Lubba ddəw yo-kunda tə̂ ang.

²¹ A ənga Jeju, Lubba unda yo nan: «Əbbə-dəwje pa tar le to yo-kunda mban, nâ təl turu ndue ang ngaa. N̂-pa nan: ‹Ə-to nje-polo Lubba kə̂ to kə ndɔ kə ndɔ.› »

²² Mba yeenn bba, n-gərə kə majɛ̂ to Jeju le a dda karə jandə dɔnɔn tə̂ kə̂ maji uta ye kə̂ kete.

²³ Tɔ bbay, kəsə njê-poloje Lubba banyaje nya mba yo aw tɔlde, dingaje ddəw ta nayn dda kula ləde ang.

²⁴ A Jeju nayn kəm baa kə ndɔ kə ndɔ, marə dəw a kunn ture kula-polo Lubba tə̂ ang.

²⁵ Mba yeenn bba, dəwje kə̂ aw ddeeje ngɔsi kə Lubba ddəw tə̂ laa le, nasə ta kajide nyɔm kə ləw. Mba n̂-nayn kəm baa kə ndɔ tɔyn arə nasə ta duju Lubba mba tar ləde.

²⁶ Yeenn a, Jeju â to tɔkə nje-polo Lubba kə̂ maji karə jingaje. N̂-maji tɔyn, nɛ̂n-yərəw kâra ɔrɛ̂ ang, n̂-dda majang ang. Lubba undɛ̂ dang kə njê-nɛ̂n-ddaje kə̂ maji ang ngaâ aw undɛ̂ ddutu dara tə̂ nu.

²⁷ Kəsə tɔkə njê-poloje Lubba aw arəje nɛ̂n-polo Lubba kə ndɔ kâra kâra tɔyn, dɔngɔrɛ̂ darəje mba majang ləde dede njaa ngaa bba goe tə̂ a darəje mba majang lə kəsə dəwje. A Jeju to tokə baann ang. Narə nɛ̂n-polo gɔl kâra baa, to da-rɔɛ̂ njaa kə̂ nunn narə to nɛ̂n-polo.

²⁸ Tɔkə njê-poloje Lubba kə̂ Ndu lə Mɔyijə undade dang le toje to dəwje baa. Dubbaje singa mə marə nɛ̂nje tə̂ ang. A tar kə̂ Lubba pa to yo-kunda go Ndu tə̂ lə Mɔyijə le nunda Ngonnɛ̂ to nje-polo Lubba kə̂ asə tɔyn kə ndɔ kə ndɔ.